Google ընկերությունը Լոնդոնի հանրահայտ «Քինգս Քրոսս» (King’s Cross) կայարանի հարևանությամբ նոր գլխավոր գրասենյակ կկառուցի, որի բյուջեն գնահատվում է մոտ 1.6 մլրդ ԱՄՆ դոլար, տեղեկացնում է The Financial Times պարբերականը:

Լոնդոնի հյուսիսում գտնվող «Քինգս Քրոսս» կայարանում գնված տարածքի մակերեսը կազմում է 10 հազար քառակուսի մետր, որտեղ ինտերնետային հսկան պատրաստվում է կառուցել 11 հարկանի շենք, որը կդառնա ընկերության Մեծ Բրիտանիայի նոր գլխավոր գրասենյակը: Ըստ Reuters լրատվական գործակալության տվյալների՝ ընկերությունն ավելի քան 1 մլրդ ԱՄՆ դոլար կծախսի տարածքի գնման և կառույցի շինարարության համար, իսկ նախագծի ընդհանուր բյուջեն, որը պետք է ավարտվի 2016 թ-ին, կկազմի 1.6 մլրդ ԱՄՆ դոլար:

Google-ը պատրաստվում է նոր գրասենյակում կենտրոնացնել Լոնդոնում գտնվող իր ներկայիս 2 գրասենյակների աշխատանքը, որոնք այժմ գտնվում են Վիկտորիա (Victoria) և Հոլբորն (Holborn) շրջաններում: Իսկ ընկերության Մանչեսթրյան գրասենյակի աշխատանքը կմնա անփոփոխ:

Ինչպես նշում է FT պարբերականը, Google ընկերության կողմից նմանատիպ գործարքը ֆինանսական ճգնաժամից ի վեր համարվում է ռեկորդային Մեծ Բրիտանիայում: Ավելի վաղ խոշորագույն գրասենյակային տարածքներ Մեծ Բրիտանիայում զբաղեցրել են այնպիսի տեխնոլոգիական ընկերություններ, ինչպիսին են Skype-ը, Oracle-ը, Amazon-ը և Facebook-ը:

Google ընկերության Կենտրոնական և Հյուսիսային Եվրոպայի մասնաճյուղերի փոխնախագահ Մեթ Բրիթթինի (Matt Brittin) խոսքերով, սա խոշորագույն ներդրում է ընկերության համար, և նրանք հետագայում նախատեսում են ավելի զարգանալ և տարածվել Մեծ Բրիտանիայում:

Որպես կանոն՝ Google ընկերությունը ԱՄՆ-ի տարածքից դուրս միայն վարձակալում էր գրասենյակային տարածքներ, բայց վերջին 2 տարում նա գնել է անշարժ գույք Փարիզում և Դուբլինում: Բացի այդ անցած տարի ընկերությունը Լոնդոնում բացեց իր 7 հարկանի կենտրոնը սկսնակ մասնագետների և նորարարությունների մշակման համար: