Իսպանական <<Ռեալ Մադրիդ>> ֆուտբոլային ակումբը հանրությանն է ներկայացրել Արաբական Միացյալ Էմիրություններում 1 մլրդ ԱՄՆ դոլար արժողությամբ հանգստավայր կառուցելու նախագիծը, տեղեկացնում է The National Post պարբերականը: Հանգստավայրը կկառուցվի արհեստական կղզիների վրա, և այնտեղ կտեղակայվի <<Ռեալ Մադրիդ Հանգստի կղզի>> (Real Madrid Resort Island) թեմատիկ այգին:

Ըստ նախնական տվյալների՝ հանգստավայրի ընդհանուր մակերեսը կկազմի 450 հազար քառակուսի մետր, որտեղ կլինեն 5 – աստղանի հյուրանոց, շքեղ առանձնատներ, մարզադաշտ՝ նախատեսված 10 հազար հանդիսատեսի համար, նավահանգիստ և տեխնոլոգիական թանգարան՝ նվիրված ֆուտբոլային ակումբի պատմությանը: Նախագծի իրականացումը կօգնի ֆուտբոլային ակումբին Ասիայում և Մերձավոր Արևելքում էականորեն մեծացնել իրենց երկրպագուների քանակը: Նշենք, որ հանգստավայրի շինարարության ժամանակ ակումբին կաջակցի նաև Դուբայի կառավարությունը, իսկ արդեն պատրաստի զվարճանքների կենտրոնը հանրության առաջ կբացվի 2015 թ-ի հունվարին: Ի դեպ, բավականին հարմար է ընտրված նաև հանգստավայրի դիրքը: Նախագծի գլխավոր ներդրող խմբի՝ <<ԱռԷյՔեյ Մարջան Այլենդ Ֆուտբոլ Ինվեսթմենթ>> հիմնադրամի (RAK Marjan Island Football Investment) ղեկավարների խոսքերով, արհեստական կղզին կկառուցվի Դուբայի օդանավակայանին բավականին մոտ և այցելուներից ընդամենը 45 րոպե կպահանջվի այնտեղ հասնելու համար:

Վերջին ժամանակներս առավել արտահայտվում է ծովափնյա <<ցամաքի>> պակասը և բազմաթիվ արհեստական կղզիների նմանատիպ նախագծեր են առաջարկվում և իրականացվում: Այսպես, վերջերս Ադրբեջանը հայտարարեց իր մտադրության մասին կառուցել աշխարհի ամենաբարձր երկնաքերը՝ «Ադրբեջան աշտարակը» Կասպից ծովում իրականացվելիք «Խազար Այլենդս» արհեստական կղզիների վրա: Քաթարում արդեն սկսվել է արհեստական կղզիների վրա կառուցվող «Ամֆիբիա 1000» հյուրանոցային համալիրի շինարարությունը, իսկ ահա Դուբայում ընթանում է նույնպես արհեստական կղզիների վրա իրականացվող «Դը Վորլդ» աշխարհի քարտեզի տեսքով նախագծի շինարարությունը: