Մեկ տանիքի տակ առևտրի ու ժամացի հարյուրավոր տաղավարներ ընդգրկող հսկայական կենտրոնները՝ մոլլերը, դարձել են մեծ քաղաքների կարևոր բաղկացուցիչներից մեկը: Երևանը ևս այս առումով չի զիջում մեծ քաղաքներին: Մոլլերի «բումը» մեր քաղաքում մեկնարկեց 2012 թ. (Դալմա Գարդեն Մոլլի բացումով) և շարունակվում է առ այսօր:

Մեգա Մոլլ Արմենիա

«Մեգա Մոլլ Արմենիա» առևտրաժամանցային կենտրոնը երևանյան մյուս մոլլերից տարբերվելու է իր մեծությամբ: Ներկայում այն ՀՀ ամենամեծ մակերես ունեցող շենքն է 105 000 քմ՝ արտաքին ավտոկայանատեղիներով ու հարակից տարածքներով, բուն շինությունը զբաղեցնում է 25 000 քմ տարածք:

Մեգա մոլլը կառուցվել է բավական խիտ բնակեցված համայնքում: Մոլլին հարակից երեք համայնքների բնակչության թիվը կազմում է մոտ 350 հազար, իսկ մոլլից 15-20 րոպե հետիոտնի անցման շառավղով ապրում է մոտ 70.000 մարդ:

Կենտրոնը գտնվում է Գայի, Սամվել Սաֆարյան և Բաղյան փողոցների հատման վայրում, և ունենալու է դեպի երեք փողոցներ բացվող մուտքեր: Պայմանավորված տեղանքի ռելիեֆային թեքությունով՝ շենքն ունի բարդ կառուցվածք. շենքի մի հատված կառուցապատվել է 4 հարկով, շարունակությունը՝ 5 հարկով:

Չնայած շինության մեծությանն ու բարդ կառուցվածքին՝ ներսում այն կունենա բավականին պարզ կողմնորոշվելու սխեմա՝ հարկերի միջև հաղորդակցության միջոցների բազմազանության շնորհիվ:

Մեգա Մոլլը կունենա մի քանի մուտք տարբեր մակարդակներից և տարբեր փողոցներից: Օրինակ՝ գյուղատնտեսական շուկայի հիմնական մուտքը կլինի Սաֆարյան փողոցից և փարքինգից, իսկ առևտրի կենտրոնի հիմնական այցելուների մուտքը կազմակերպվելու է Գայի պողոտայից: Այս մուտքի առաջ լինելու է թվայնացված ջրվեժ:

Շենքի էքստերիերը և ինտերիերը լուծված են հայկական ժամանակակից ձևերով,կիրառվել են հիմնականում տեղական երեսպատման քարեր և նյութեր: Այժմ մոլլի շինարարությունը գտնվում է ներքին հարդարման փուլում:

Ավտոմատացված Ստորգետնյա Ավտոկայանատեղիներ

Մեծությունից բացի «Մեգա Մոլլ Արմենիան» առանձնանալու է ավտոկայանատեղիների քանակով: Մոլլի շրջակայքով տեղակայված վերգետնյա ավտոկայանատեղիներից զատ լինելու է նաև ներքին երկհարկանի ավտոկայանատեղի՝ 15 000 քմ տարածքով: Այն լինելու է ամբողջովին ավտոմատացված: Վարորդը մինչև շարք մտնելը վահանակի վրա տեսնելու է, թե քանի ազատ տեղ կա և որտեղ: Շարք մտնելուց հետո նրան ուղղորդելու է լուսային նավիգացիան. յուրաքանչյուր կայանված մեքենայի վերևում կարմիր լույս է վառվելու, ազատ տեղերում՝ կանաչ:

Ժամանցային Բազմաբնույթ Տարածքներ և Խարիսխային Կետեր

«Մեգա Մոլլ Արմենիայում» գործելու է երկհարկանի զվարճանքի և խաղերի զոնա (5800մ²), որտեղ կգործի ՀՀ-ում առաջին փակ ավտոքարթինգը: Զվարճանքի և խաղերի զոնայում տեղադրվելու են նաև ջրվեժ-ճոճանակներ:

Կլինի նաև ֆուդկորտ, առանց որի չի կարելի պատկերացնել որևէ մոլլ: Ի դեպ ֆուդկորտում նախատեսվում է ընդգրկել մոտ 12 ռեստորան ու սրճարան: Լինելու է 4 կինոդահլիճ: Գործելու է նաև մեծ ֆիթնես ակումբ, որը զբաղեցնելու է 2000 մ² տարածք:

«Մեգա Մոլլ Արմենիան» կունենա մի քանի խարիսխներ. էլեկտրատեխնիկայի սրահ (10000 մ²), հիպերմարկետ «Երևան Սիթի» (5600մ²) և գյուղատնտեսական մեծածախ շուկա (2000մ²):