Ինչպես տեղեկացնում է լոնդոնյան ամառային օլիմպիական խաղերի պաշտոնական London2012.com կայքը, Օլիմպիք Դիլիվըրի Օթորիտի (Olympic Delivery Authority) կազմակերպությունը հայտարարել է Օլիմպիական այգում (Olympic Park) 5-րդ կառույցի՝ Միջազգային հեռարձակման կենտրոնի շինարարության ավարտի մասին:

Նոր համալիրն իր մեջ ներառում է Մամուլի Գլխավոր կենտրոնը և կազմում է զանգվածային լրատվամիջոցների համալիրի մի մասը: Միջազգային հեռարձակման կենտրոնում կաշխատեն մոտ 20 հազար հեռարձակողներ, ֆոտոլրագրողներ, տպագիր մամուլի ներկայացուցիչներ և նրանց շնորհիվ մոտ 4 մլրդ մարդ աշխարհում կդիտի Լոնդոնի ամառային օլիմպիական խաղերը:

275 մետր երկարությամբ, 104 մետր լայնությամբ և 21 մետր բարձրությամբ համալիրն այնքան մեծ է, որ կարող է տեղավորվել 5 մեծ օդանավ: Համալիրում կա ճաշասրահ, բազմահարկ ավտոկայանատեղի, ինչպես նաև 700 հոգու համար նախատեսված խորհրդակցությունների սենյակ: Համալիրը նախագծված է Ալիես ընդ Մորիսն(Allies and Morrison) բյուրոյի կողմից այնպես, որ օլիմպիական խաղերի ավարտից հետո հնարավոր կլինի տարածքները վարձակալության հանձնել տեխնոլոգիական ոլորտի խոշոր ընկերություններին: