Ինչպես տեղեկացնում է Reuters լրատվական գործակալությունը, Facebook սոցիալական ցանցը նախատեսում է ԱՄՆ-ի սահմաններից դուրս կառուցել իր առաջին տվյալների կենտրոնը: Համալիրը կկառուցվի Հյուսիսային Շվեդիայի Լուլեա քաղաքում: Ընկերությունը, կառուցելով իր տեսակի մեջ խոշորագույն կենտրոնը Եվրոպայում, նախատեսում է օգտագործել քաղաքի կլիմայական պայմանները՝ 10 հազարավոր սերվերներ հովացնելու նպատակով: Շվեդական «ԷնՍիՍի» շինարարական խումբը (NCC construction group) հայտարարել է, որ այս նախագիծը կկառուցվի 2 ամերիկյան ընկերությունների՝ «ԴիՓիԱռ Քոնսթրաքշն» և «Ֆորթիս Քոնսթրաքշն» (DPR Construction and Fortis Construction) համատեղ գործունեության արդյունքում: Այս տվյալների կենտրոնը կլինի աշխարհի ամենահյուսիսայինը և կսպասարկի ավելի քան 800 մլն սոցիալական ցանցի օգտագործողների: Ըստ նախնական տվյալների՝ համալիրը բաղկացած կլինի 3 շինություններից, որոնցից յուրաքանչյուրը կունենա 28 հազար քառակուսի մետր մակերես և 121մլն ԱՄՆ դոլար բյուջե: Շինարարությունը նախատեսվում է սկսել անմիջապես և իրականացնել 3 փուլերով: Առաջին կառույցի շինարարությունը կավարտվի 1 տարվա ընթացքում, իսկ ամբողջ համալիրինը նախատեսվում է ավարտել 2014 թ-ին:

Երկու հազար տարեկան շատ շինություններ, որոնք կառուցված են բետոնով հին հռոմեկան նավահանգիստներում այսօր կանգուն են, մինչդեռ բազմաթիվ ժամանակակից շինություններ մի քանի տասնամյակի ընթացքում չդիմանալով թուլանում և ավերվում են: Վերջապես գիտնականներին հաջողվել է պարզել այդ յուրօրինակ բետոնի բաղադրությունը և նրանք կարծում են, որ այս բացահայտումը հնարավորություն կտա ժամանակակից շինությունները կառուցել էկոլոգիապես մաքուր շինանյութից, և վերջինները ավելի ամուր ու վստահելի կլինեն: Հետազոտությունների արդյունքները ներկայացված են American Mineralogist ամսագրում տպագրված գիտական հոդվածում: Հռոմեացիները բետոն պատրաստելու համար իրար էին խառնում կրաքարը, ծովի ջուրը, հրաբխային մոխիրը և քարը: Այսօր գիտնականներին հաջողվել է պարզել, որ բետոնի ամրության գաղտնիքը ծովի ջրի և հրաբխային մոխիրի քիմիական բաղադրության մեջ է: Հետազոտությունների ընթացքում պարզ է դարձել, որ հրաբխային մոխիրը պարունակում է հազվադեպ հանքային հավելում՝ ալյումինի տոբերմորիտ, որը շփվելով ծովի ջրի հետ բյուրեղանում է և ամրացնում շինանյութը: Այս հանքանյութը բաղկացած է ջրից, կալցիումից, ալյումինից, սիլիցիումից ու թթվածնից, և սովորաբար առաջանում է հիդրոջերմային աղբյուրներում: Գիտնականները նշում են, որ ծովի ջրի երկարատև ազդեցությունը նպաստում է, որ բյուրեղացած մոխիրն անընդհատ հասունանա, ամրանա և կանխարգելի առաջացող ճաքերը: Հետազոտությունների մասնակից Սոլթ Լեյք Սիթիի Յուտայի Համալսարանի (University Of Utah) երկրաբան Մարի Ջեքսոնի (Marie Jackson) խոսքերով, հին հռոմեկան բետոնի բաղադրատոմսը վաղուց կորած է և ոչ ոք մինչ օրս չի կարողացել այն վերականգնել: Ժամանակակից գիտնականների խնդիրն է, բետոնի պատրաստման համար գտնել իրենց քիմիական բաղադրությամբ ծովի ջրին և հրաբխային մոխիրին համապատասխան հումք: Նման հայտնագործությունը հնարավորություն կտա ստանալ ոչ միայն այնպիսի ամուր շինանյութ, որի շնորհիվ շինությունները կանգուն կմնան հազարամյակներ՝ հատկապես ծովի ջրի ազդեցության տակ, այլ նաև ստեղծել էկոլոգիապես ավելի մաքուր շինանյութ: Բանն այն է, որ ներկայիս բետոնի պատրաստման ընթացքում մեծ քանակությամբ վնասակար նյութեր և գազեր են արտանետվում մթնոլորտ:

Լոս-Անջելոսում սկսվել է մասնավոր առանձնատան շինարարությունը, որի ավարտից հետո այն հավակնում է դառնալ ամենաթանկն ամբողջ աշխարհում և ամենամեծն ԱՄՆ-ում: Ինչպես գրում է Bloomberg լրատվական գործակալությունը, շինարարության ավարտից հետո կառուցապատողը նախատեսում է այն վաճառել 500 մլն. ԱՄՆ դոլարով: Ամերիկացի կառուցապատող Նիլ Նիյամին (Nile Niami) հայտարարել է ԱՄՆ-ի խոշորագույն մասնավոր առանձնատան շինարության մեկնարկի մասին, որը գտնվում է Լոս-Անջելոսի Բել Էյր (Bel Air) շրջանում: Մասնավոր սեփականության գլխավոր առանձնատան մակերեսը կազմելու է 6,9 հազար քառակուսի մետր, իսկ մյուս շինությունների հետ միասին, ներառյալ հյուրերի համար նախատեսված 3 առանձնատները, կազմելու է 9,3 հազար քառակուսի մետր: Հայտնի է նաև, որ տանտիրոջ ննջասենյակի մակերեսը, որն առանձին մուտք է ունենալու դեպի սպա-սրահ և հանդերձարան, կազմելու է 465 քառակուսի մետր: Առանձնատունն ունենալու է նաև 30 ավտոմեքենայի համար նախատեսված փակ կայանատեղի: Մասնավոր սեփականության հողի ընդհանուր մակերեսը կազմում է 1,6 հեկտար: Այն գտնվում է յուրօրինակ մի վայրում՝ բլրի վրա, որտեղից էլ գեղեցիկ տեսարան է բացվում դեպի Խաղաղ օվկիանոսը, Բեվերլի-Հիլսը, Լոս-Անջելոսը և Սան-Ֆերնանդոյի հովիտը: Նախագիծը ենթադրում է հսկայածավալ նախապատրաստական աշխատանքներ: Բանն այն է, որ տարածքը շինարարության համար մաքրելու նպատակով անհրաժեշտ է տեղափոխել մոտ 30 հազար խորանարդ մետր հող: Շինարարության ավարտից և առանձնատան վաճառքից հետո, այս բնակելի համալիրը հավակնում է դառնալ 21-րդ դարի մեկ ընտանիքի բնակության համար նախատեսված խոշորագույն անշարժ գույքը ԱՄՆ-ում: Bloomberg լրատվական կայքի տվյալներով, որպես այս նոր նախագծի մրցակից հանդես է գալիս Ֆլորիդայում կառուցվող 8,3 հազար քառակուսի մետր մակերեսով առանձնատունը: Վերջինս պատկանում է «Վեսթգեյթ Ռեզորթս» (Westgate Resorts) ընկերության սեփականատեր Դեյվիդ Սիգելին (David Siegel): «Քրիստիս միջազգային անշարժ գույքի» (Christie’s International Real Estate) գործակալության տվյալներով, անցած տարվա ընթացքում վաճառվել է 5 անշարժ գույք 100 մլն. ԱՄՆ դոլար արժողության սահմաններում, և ևս 20 անշարժ գույք, որոնց գինը կազմել է 90 մլն ԱՄՆ դոլար: Ի դեպ, վերջին շրջանում վաճառված ամենաթանկ անշարժ գույքը գտնվել է Լոնդոնում: Գործակալության տվյալներով՝ գործարքն իրականացվել է 2011 թ-ին, և ընդհանուր բյուջեն կազմել է 221 մլն. ԱՄՆ դոլար: Այսօր միջազգային անշարժ գույքի շուկայում կան մի շարք բազմամիլիոնանոց առաջարկներ, որոնցից կարելի առանձնացնել որոշները՝ • ԱՄՆ-ի «Վագգոներ» ռանչոն : 750 մլն ԱՄՆ դոլարով վաճառվող ռանչոյի ընդհանուր մակերեսը կազմում է 2060 քառակուսի կիլոմետր, և այն տարածվում է Հյուսիսային Տեխասի 6 շրջանների վրա: Ռանչոյի տարածքում տեղակայված են հարյուրավոր տներ, 20 կովբոյական ճամբարներ, 120 քառակուսի կիլոմետր վարելահողեր, հարյուրավոր ձիեր, հազարավոր գլուխ խոշոր եղջերավոր անասուններ և այլն: • Ֆրանսիայում գտնվող «Վիլլա Լեոպոլդան» (Villa leopolda): Այս յուրօրինակ առանձնատունը կառուցվել է 20-րդ դարում Բելգիայի արքա Լեոպոլդ 2-րդի կողմից: Այն առաջին անգամ վաճառքի է հանվել 2009 թվականին 750 մլն ԱՄՆ դոլարով: 1 տարի անց անշարժ գույքի գինը կազմել է 506 մլն ԱՄՆ դոլար, իսկ արդեն 2014 թվականին առանձնատան գինը նվազել է մինչև 425 մլն ԱՄՆ դոլար: • Մոնակոյում կառուցվող 49 հարկանի «Տուր Օդեոն» (Tour Odeon) երկնաքերի փենթհաուսը: Փենթհաուսի մակերեսը կազմում է 3.3 հազար քառակուսի մետր: Անշարժ գույքի նախնական արժեքը սահմանվում է մոտ 400 մլն ԱՄՆ դոլար: Անշարժ գույքի այսպիսի բարձր գինը պայմանավորված է Մոնակոյում նորակառույցների արգելքով: Բանն այն է, որ 1960-ական թվականներից ի վեր այս երկնաքերը երկրի միակ նորակառույցն է: