Ֆրանսիայում նախատեսվում է Նապոլեոն Բոնապարտի պատվին, նրա մահից մոտ 200 տարի անց, թեմատիկ այգի կառուցել, տեղեկացնում է The Telegraph պարբերականը: Աշխարհահռչակ «Դիսնեյլենդին» մրցակից այս այգին կկրի «Նապոլեոնլենդ» անվանումը: 280 մլն ԱՄՆ դոլար բյուջեյով նախագծի իրականացման գաղափարը պատկանում է Ֆրանսիայի նախկին նախարար և պատմության սիրահար Իվ Ժեգոյին (Yves Jégo):

Ըստ նախնական տվյալների՝ զվարճանքների այգին կկառուցվի Փարիզից ոչ հեռու՝ Մոնտերո (Montereau) փոքր քաղաքում, որտեղ 1814 թ-ին Նապոլեոնի բանակը հաղթանակ կրեց ռուս-ավստրիական զորքերի հետ մարտում: Ժեգոն հուսով է, որ այգու շինարարությունը կսկսվի 2014 թ-ին, և այն պատրաստ կլինի արդեն 2017-ին:

Այգում կլինի հյուրանոց, թանգարան, խանութներ, ռեստորաններ և խորհրդակցությունների կենտրոն: Այգում «կվերականգնվի» 1815 թ-ի Վաթերլոյի ճակատամարտը, որտեղ Վելինգթոնի դուքսը վերջ դրեց Նապոլեոնի կառավարմանը: Եվ իհարկե, աչքից չի վրիպի Աուստերլիցի ճակատամարտը, որտեղ Նապոլեոնը ջախջախեց ռուս-ավստրիական զորքերին:

Այցելուները կարող են նաև դիտել ջրային շոու, որը կներկայացնի 1805թ-ի Թրաֆալգարի ճակատամարտը, երբ ծովակալ Հորացիո Նելսոնը ջախջախեց ֆրանս-իսպանական նավատորմը:

Աշխարհահռչակ ֆրանսիացի առաջնորդը մինչ օրս չունի ազգային և պատմական թանգարան Ֆրանսիայում և Ժեգոն վստահ է, որ այս նախագիծը ոչ միայն վառ կպահի նրա անունը, այլև կնպաստի տեղեկան տնտեսությանը: Ըստ նրա՝ առաջին տարում այգին կհյուրընկալի ավելի քան 1.5 մլն այցելուի: