2012 թ-ին ճարտարապետության միջազգային օրն անց կկացվի «Ճարտարապետները քաղաքների վերափոխողներն են» նշանաբանով, տեղեկացնում է «Ճարտարապետների միջազգային միության» (International Union of Architects, UIA) կայքը:

Ճարտարապետության միջազգային օրը (World Day of Architecture)՝ ճարտարապետների մասնագիտական տոնը, նշվում է 1985 թ-ից «Ճարտարապետների միջազգային միության» նախաձեռնությամբ ամեն տարվա հոկտեմբերի առաջին երկուշաբթի օրը: Այս տարի այն կնշվի հոկտեմբերի 1-ին:

Ինչպես տեղեկացվում է կայքի հայտարարության մեջ, նման նշանաբանը ընտրվել է միության կողմից, որպեսզի այն իր ներդրումն ունենա վերջերս Միավորված ազգերի կազմակերպության կողմից սկսված «Լավ քաղաքներ, լավ կացություն» շարժման մեջ:

Բանն այն է, որ ուսումնասիրությունների համաձայն՝ 2050 թ-ին քաղաքաբնակները կկազմեն երկրագնդի բնակչության 70 տոկոսը: Այդ իսկ պատճառով քաղաքներում պետք է արմատական փոփոխություններ կատարվեն, որպեսզի վերջիններս իրենց բնակիչների համար կարողանան ապահովել անձնական զարգացման և բարեկեցության համար անհրաժեշտ պայմաններ: Վերոնշյալ նպատակի իրականացման համար պետք է կենտրոնանալ կլիմայի փոփոխության կանխման, վնասակար նյութերի մթնոլորտ արտանետման ծավալների նվազեցման, ռեսուրսների և էներգիայի ռացիոնալ օգտագործման վրա: Բացի այդ քաղաքը պետք է զարգացնել այնպես, որ վերջինս կարողանա դիմակայել աղետների (անչափ կարևոր է Երևանի համար) և ճգնաժամերի, գործունեության և զարգացման լայն հնարավորություններ ընձեռի իր բնակիչներին, ինչպես նաև ապահովի անվտանգություն և սանիտարահիգիենիկ պայմաններ:

«Ճարտարապետները էական դեր են խաղալու այս նպատակների իրականացման հարցերում», - նշվում է տարածված հայտարարության մեջ: