Գրքի սիրահարներ Ձեր երազանքը կատարվել է, աշխարհի ամենամեծ գրախանութը բացվել է Իրանի մայրաքաղաք Թեհրանում: «Գրքերի Այգին» կանաչ տանիքով հսկայական շինություն է, որի մակերեսը կազմում է 14.300 քառակուսի մետր: Գրախանութի գրապահարանների երկարությունն ավելի քան 19.300 մետր է: Այն 65.000 քառակուսի մետր մակերեսով մշակութային համալիրի մաս է կազմում, որտեղ տեղակայված են նաև կինոթատրոններ, գիտական սրահներ, դասասենյակներ, ռեստորան և աղոթքի սենյակ:

«Գրքերի Այգու» բացումը մշակութային կարևորագույն իրադարձություն է երկրի համար, իսկ հիմնական առաքելությունը իրանցի երեխաների մեջ սեր արթնացնելն է դեպի գիրքը, բացման արարողության ժամանակ հայտարարել է Ազգային ժողովի խոսնակ Ալի Լարիջանին:

Ինչպես տեղեկացնում է Mehr News լրատվական կայքը, «Գրքերի Այգին» առաջին անգամ տաղավարի տեսքով ներկայացել է քաղաքային ամենամյա միջազգային գրքի ցուցահանդեսի ժամանակ 2004 թվականին: Այնուհետև սկսվել է շինարարությունը, որն ավարտվել է անցած տարվա սեպտեմբերին, որից հետո սկսվել է գրքերի տեղափոխման և դասավորման գործընթացը: Real Iran պարբերականի փոխանցմամբ այս գրախանութում ներկայացված են միայն մանկական մոտ 400,000 անուն գիրք: Ի դեպ, գրախանութի մանկական գրքերի սրահը պատրաստված է ցածր գրապահարաններով հատուկ փոքրիկների համար:

«Գրքերի Այգին» օրերս գրանցվել է «Գինեսի ռեկորդների գրքում»՝ որպես աշխարհի խոշորագույն գրախանութ: