Օրերս Դուբայում սկսվել է 2020 թվականի «Դուբայ Էքսպո-2020» համաշխարհային ցուցահանդեսի տաղավարի շինարարությունը: Նախագծի հիմնարկեքի հանդիսավոր արարողության ժամանակ շեյխ Ահմեդ իբն Սայիդ Ալ Մակտումը տեղադրել է տաղավարի հիմքի առաջին քարը և ստորագրել Դուբայի մասնակցության պաշտոնական փաստաթուղթը:

Ինչպես տեղեկացնում է The Arabian Business պարբերականը, տաղավարի շինարարությունը կիրականացնի «Արաբթեք քոնսթրաքշն» ընկերությունը, որը հանդիսանում է «Արաբթեք հոլդինգի» դուստր կազմակերպությունը: Նշենք, որ այս ընկերությունը կառուցման իրավունքը հաղթել է մրցույթի ժամանակ, որին մասնակցել են տարբեր ազգային և միջազգային ընկերություններ:

Յուրօրինակ տաղավարը նախագծվել և կառուցվելու է բազեի տեսքով` որպես ազատության, շփման և տոլերանտության խորհրդանիշ: Ըստ նախնական տվյալների՝ շինարարության ավարտից հետո 4 հարկանի շինության ընդհանուր մակերեսը կազմելու է 15 հազար քառակուսի մետր: Վերին հարկը 1717 քառակուսի մետր մակերեսով նախատեսված է լինելու հյուրերի ընդունման համար:

Ինչպես տեղեկացնում է պարբերականը, նախագծի շինարարության ավարտը նախատեսված է 2019 թվականին, իսկ հանրության առաջ բացումը՝ 2020 թվականի հոկտեմբերին: Նշենք, որ տաղավարի նախագծը պատկանում է Սանտյագո Կալատրավայի ճարտարապետական ընկերությանը:

Նախագիծն ընտրվել է 7 ամիս տևած մրցույթի արդյունքում, որին մասնակցության հայտ էին ներկայացրել 9 միջազգային ընկերություններ ներկայացնելով տաղավարի նախագծի 11 կոնցեպտ: