Սեպտեմբերի 9-ին Միացյալ Արաբական էմիրությունների վարչապետ և Դուբայի կառավարիչ Մուհամեդ իբն Ռաշիդ ալ Մակթումը հանդիսավոր կերպով պաշտոնապես կբացի Դուբայի մետրոյի՝ 23 կիլոմետր երկարությամբ և 16 կայարանից բաղկացած «Կանաչ գիծը», հաղորդում է Gulf News-ը: Նորաբաց գիծն իր մեջ ներառում է նաև 2 «Կարմիր գծին» միացնող կայարաններ: Առաջինը «Յունիոն» (Union) կայարանն է, որը, 25 հազար քառակուսի մետր ընդհանուր մակերեսով, համարվում է մետրոյի աշխարհի խոշորագույն կայարանը, և «Խալիդ իբն ալ Վալիդ» կայարանը, որն էլ համարվում է մետրոյի երկրագնդի ամենաշլացուցիչ կայարանից մեկը: Հոդվածի համաձայն՝ նորաբաց գծում օրվա մարդաշատ ժամերին ուղևորներին կսպասարկի 14, իսկ ավելի ազատ ժամերին 10 գնացք: Ի դեպ, գնացքներն ուղևորներին կմոտենան 6-8 րոպե ընդմիջմամբ: Նշենք, որ մետրոյի երկու գծերում միասին օրվա մարդաշատ ժամերին կաշխատեն 50, իսկ ավելի հանգիստ ժամերին 28 գնացք: Ինչպես տեղեկացնում է մեկ այլ ինտերնետային աղբյուր՝ 2daydubai.com-ը, Դուբայի մետրոյում շինարարական աշխատանքները պաշտոնապես սկսել են 2006 թ-ի մարտի 21-ին: 2009 թ-ի սեպտեմբերի 9-ին պաշտոնապես շահագործման է հանձնվել «Կարմիր գիծը» և ահա ուղիղ 2 տարի անց հանրության համար կբացվի նաև երկրորդ՝ «Կանաչ գիծը»: Նախապես որոշված էր շինարարությունն իրականացնել 2 փուլով՝ առաջին փուլի (4.2 մլրդ ԱՄՆ դոլար) ընթացքում պետք է կառուցվեր 35 կիլոմետր երկարությամբ գիծ, իսկ երկրորդ փուլի (12 մլրդ ԱՄՆ դոլար) ընթացքում ընդլայնվեր երկու գծերի երթուղին:
Դուբայի խոշոր առևտրա-ժամանցային կենտրոնների կառուցապատող Մաջիդ Ալ Ֆութեյմ Գրուփը (Majid Al Futtaim Group), անտեսելով Սիրիայում տիրող պայթյունավտանգ իրավիճակը, երկրում սկսել է Քամս Շամաթ (Khams Shamat)՝ նոր բազմաֆունկցիոնալ համալիրի շինարությունը: Օգոստոսի 7-ին ընկերությունը հայտարարել է, որ Սիրիայի մայրաքաղաք Դամասկոսից 17 կիլոմետր արևմուտք գտնվող տարածքում սկսել է կառուցել 1 մլրդ ԱՄՆ դոլար արժողությամբ համալիրը: Նախագծի առաջին փուլի շինարարական աշխատանքները սկսել են հուլիս 27-ին: 1.5 մլն քառակուսի մետր ընդհանուր մակերեսով առևտրա-ժամացային կենտրոնում կլինեն հյուրանոցներ, խանութ-սրահներ, բնակարաններ և գրասենյակներ: Սիրիայում և Լիբանանում ընկերության ներկայացուցիչ Վադահ Էլ Սոլհը հայտարարել է, որ բոլոր նախապատրաստական աշխատանքներն ավարտված են, պատրաստ են ինչպես շինարարությունը ղեկավարող խմբերը, այնպես էլ աշխատողները: Հարկ է նշել, որ այս տարվա մարտից Սիրիայում անկարգությունների հետևանքով զոհվել են 2200 ցուցարար և 500 անվտանգության համակարգի աշխատակից:
Մերձավոր Արևելքի խոշորագույն կառուցապատողներից մեկը, Դամաք Փրոփերթիս (Damac Properties) ընկերությունը Դուբայ Մարինա (Dubai Marina) թաղամասում սկսել է իր Դամաք Հեյթս (Damac Heights) նախագծի շինարարությունը, տեղեկացնում է Tradearabia լրատվական գործակալությունը: Նախագծի գլխավոր կապալառուի դերը ստանձնել է Արաբթեք (Arabtec) ընկերությունը: 85 հարկանի և 420 մետր բարձրությամբ նախագծի իրականացման նախնական բյուջեն կազմում է 138.4 մլն ԱՄՆ դոլար: Դամաք Հեյթսը շահագործման հանձնվելուց հետո իր հավանական սեփականատերերին կառաջարկի 2, 3 և 4 սենյականոց, ինչպես նաև երկհարկանի բնակարաններ, և փենթհաուսներ: Բնակելի համալիրը կհամապատասխանի ապրելու ամենաբարձր չափանիշներին և բնակիչները կկարողանան օգտվել համալիրի 5 աստղանի ենթակառուցվածքներից: Մասնավորապես՝ նախատեսվում է աշտարակում կառուցել կարգավորվող ջերմաստիճանով լողավազան, մարզասրահ, մանկական խաղասրահ, շոգեբաղնիք, սպա-կենտրոն և այլն: Ինչպես նշված է Դամաք Փրոփերթիս ընկերության փոխնախագահ Նիալ Մակ Լուգլինի (Niall Mc Loughlin) ելույթում, Դամաք Հեյթսը կդառնա հերթական շողացող ծովափնյա մարգարիտը: Աշտարակը կառուցվում է Դուբայ Մարինա թաղամասի Ալ Սուֆու մայրուղու (Al Sufouh Road) վրա: 2 կիլոմետր երկարությամբ ծովափնյա այս ոչ լայն հատվածը դարձել է բազմաթիվ բացառիկ նախագծերի վայր, «որոնց շարքում Դամաք Հեյթսը պիտի ամենավառը փայլի», նշել է Մակ Լուգլինը: Նա նաև ավելացրել է, որ այսօր շատ դժվար է զարմացնել՝ Դուբայում նոր շենք կառուցելով: «Բավարար չէ կառուցել լավ շինություն սովորական թաղամասում: Այսօր կառուցապատողները պետք է տեղափոխվեն մեկ այլ հարթություն և ստեղծեն ֆենոմենալ նախագծեր՝ հեղինակավոր թաղամասերում և բոլոր ժամանակակից հարմարություններով: Դամաք Հեյթսը կլինի հենց այդպիսին», ավելացրել է փոխնախագահը: Դամաք Հեյթս բնակելի համալիրը կառուցապատող Դամաք Փրոփերթիս և կապալառու Արաբթեք ընկերությունների երկրորդ համատեղ նախագիծն է: Նրանք անցած տարի հաջողությամբ ավարտեցին 84 հարկանի Օուշըն Հեյթս (Ocean Heights) կառույցի շինարարությունը: Դամաք Փրոփերթիս ընկերությունը ստեղծվել է 2002 թ-ին և մինչ օրս Դուբայում կառուցել է 28 շենք ընդհանուր 986,6 հազար քառակուսի մետր տարածքով: Մինչև այս տարվա վերջ ընկերությունը նախատեսում է շահագործման հանձնել ևս 8 շենք 233,5 հազար քառակուսի մետր ընդհանուր մակերեսով: Ինչպես արդեն նշել էինք, Դուբայում վերջին 2 տարվա ընթացքում հետաձգվել կամ չեղյալ են հայտարարվել ավելի քան 217 անշարժ գույքի նախագիծ, իսկ 2010 թ-ին մոտ 22%-ով նվազել են անշարժ գույքի նկատմամբ կատարված գործարքները: Սակայն ինչպես տեսնում ենք, այս հանգամանքները և անշարժ գույքի գների շարունակական անկումը բոլորովին էլ չեն անհանգստացնում որոշ կառուցապատողների, որոնք բավականին լավատեսորեն են տրամադրված և ղեկավարվում են իրենց առաջարկի բացառիկությամբ:
Ինչպես տեղեկացնում է Արաբիան Բիզնես (Arabian Business) ինտերնետային պարբերականը, Դուբայում վերջին 2 տարվա ընթացքում հետաձգվել կամ չեղյալ է հայտարարվել ավելի քան 217 անշարժ գույքի նախագիծ: Համաձայն Դուբայի իշխանությունների ներկայացրած տվյալների՝ մոտ 450 անավարտ անշարժ գույքի նախագծերից միայն 237-ն է նախատեսվում ավարտել ժամանակին: Ինչպես ներկայացված է կայքում, 2010 թ-ին Դուբայում նվազել են անշարժ գույքի նկատմամբ կատարված գործարքները՝ կազմելով 32.6 մլրդ ԱՄՆ դոլար նախորդ տարվա 41.7 մլրդ ԱՄՆ դոլարի փոխարեն: Համաձայն գերմանական Դոյչե բանկի (Deutsche Bank) տրամադրած տեղեկատվության՝ վերջին 3 տարում Մերձավոր արևելքի ամենաանկայուն անշարժ գույքի շուկայում՝ Դուբայում, անշարժ գույքի գները գնալով նվազում են, իսկ հարևան երկրներում տիրող քաղաքական դրությունը ավելի է ծանրացնում ստեղծված իրավիճակը: Այսպիսով՝ մայիսին նախորդ ամսվա համեմատ տների գները նվազել են 1.2, իսկ վարձավճարները՝ 1 տոկոսով: Բնակարանների գները նվազել են 1.3, իսկ առանձնատներինը՝ 1 տոկոսով: Ըստ ոլորտի մասնագետների՝ չնայած բազմաթիվ ջանքերին բարձրացնելու Դուբայի անշարժ գույքի նկատմամբ երբեմնի հետաքրքրությունը՝ արդյունքը գոհացուցիչ չէ: Անգամ եթե ենթադրենք, որ վատագույնն անցյալում է, միևնույն է նորաստեղծ առաջարկը, գնորդների անտարբերությունն ու իրականացվող գործարքների պակացը առաջիկայում իրավիճակի փոփոխություն դեպի լավը չեն խոստանում:
Ռիելթի Քեփիթալ (Realty Capital) ընկերությունն ավարտեց է Դուբայում կառուցվող Այ-Րայզ (i-Rise Tower) գրասենյակային աշտարակի շինարարությունը: 150 հազար քառակուսի մետր ընդհանուր մակերեսով տարածաշրջանի ամենամեծ գրասենյակային աշտարակներից մեկը գտնվում է Դուբայի Թեքոմ (Tecom Site-C) թաղամասի հանգույցային հատվածում: Ռիելթի Քեփիթալ ընկերությունը հայտարարել է, որ բազմաթիվ վարձակալներ արդեն սկսել են 36 հարկանի աշտարակում իրենց էլիտար գրասենյակների ներքին հարդարման աշխատանքները: Սակայն պետք է նշել, որ մինչ օրս աշտարակի միայն կեսն է վարձակալության հանձնված: Աշտարակի շինարարական աշխատանքների ընթացքում Ռիելթի Քեփիթալ ընկերությունը համագործակցել է համաշխարհային համբավով մի շարք նախագծային, շինարարական և ռիելթորական ընկերությունների հետ, այդ թվում՝ տարածաշրջանի առաջատար ճարտարապետա-շինարարական Խաթիբ և Ալամի (Khatib & Alami Consolidated Engineering Company) և համաարաբական ամենամեծ նախագծային և շինարարական խորհրդատվական Պրոջաքս Ինթերնեշնլ (Projacs International) ընկերությունների հետ: Շինարարական աշխատանքները ժամանակին ավարտելու նպատակով կառուցապատողը վստահել է շինարարության գլխավոր կապալառուի դերը Ալ Նաբուդահ (Al Naboodah) ընկերությանը: 36 հարկանի աշտարակն առաջարկում է բարձրակարգ գրասենյակային տարածքներ՝ յուրաքանչյուր հարկում 3 հազար քառակուսի մետր մակերեսով: Գրասենյակային տարածքներն աշտարակում բնութագրվում են ինչպես՝ ժամանակակից և ճկուն՝ 50 – 330 քառակուսի մետր տարածքների ընտրությամբ: Անհատական գրասենյակները 2 մոդուլով են՝ գործադիր և կորպորատիվ: Գործադիր գրասենյակներն ունեն առանձնացված զուգարանասենյակներ, բուֆետ և պահեստներ: Այ-Ռայզ բիզնես աշտարակի բոլոր գրասենյակային տարածքներում գերիշխում է արևի լույսը՝ հնարավորություն ընձեռելով էլեկտրաէներգիայի խնայողության համար և միաժամանակ բարձրացնելով կառույցի բնապահպանական ցուցանիշները: Աշտարակն ունի հարմարավետ դիրք՝ անմիջապես Շեյխ Զայեդ (Sheikh Zayed) փողոցից մուտքով և մետրոյի կայարանի հարևանությամբ, իսկ գրասենյակների լուսամուտներից բացվում են հիանալի տեսարաններ դեպի Արաբական ծովածոցը և Նոր Դուբայի հորիզոնը:
