Երևանում 2011-14 թթ-ին մետրոպոլիտենի «Հանրապետության հրապարակ» կայարանի հարակից տարածքում կկառուցվի միջազգային դասի հյուրանոցային համալիր: Հայաստանի կառավարությունը հինգշաբթի` օգոստոսի 18-ին, որոշեց Երևանի քաղաքապետին իրավունք տալ առանց մրցույթի, կառուցապատման իրավունքով, 99 տարի ժամկետով 5850 քառակուսի մետր մակերեսով հողամաս հատկացնել հյուրանոցի կառուցման համար: Ըստ քաղաքապետարանի ներկայացրած տեղեկանքի` հյուրանոցային համալիրն իր մեջ ներառելու է ընդունելությունների և խորհրդակցությունների սրահ, սպորտդահլիճ, խաղասրահ, գեղեցկության սրահ, ռեստորան և սրճարան։ Ինչպես հավաստիացնում են պատասխանատու մարմինները, հյուրանոցը կառուցվելու է գոյություն ունեցող պատմական կառույցների, շենքերի եւ շինությունների քաղաքաշինական, ծավալա-հատակագծային և ճարտարապետա-գունային լուծումներին համահունջ, որը կապահովի պատմական կենտրոնի ամբողջականությունը։ Հյուրանոցի կառուցապատողն է «Տաշիր գրուպ» ընկերությունը, որի հետ Երևանի քաղաքապետարանն արդեն համաձայնագիր է կնքել: Կառուցապատման իրականացման համար ստեղծվել է «Սամկար պլազա» սահմանափակ պատասխանատվությամբ ընկերությունը, որին «Տաշիր գրուպ»-ը երաշխավորել է իրականացնել այս աշխատանքները։ Նշենք, որ մայրաքաղաքի կենտրոնում նմանատիպ հյուրանոց կառուցելու վերաբերյալ խոսակցությունները վաղուց են գնում, սակայն պաշտոնական քննարկումները սկսեցին այս տարվա հուլիսի 21-ին Երևանի քաղաքաշինական խորհրդում ունեցած հերթական նիստի ժամանակ, երբ ներկայացվեց «Հանրապետության հրապարակի» մետրոյին հարակից տարածքում 7-8 հարկանի հյուրանոցի կառուցման ներդրումային ծրագրի էսքիզային առաջարկությունը: Քվեարկությանը մասնակցեց 30 անդամներից 27-ը, որից 24 կողմ և 3 ձեռնպահ ձայներով նախագիծն ընդունվեց: Նշենք, որ նախագծին դեմ են արտահայտվում բազմաթիվ ճարտարապետներ, մասնավորապես ընդգծելով, որ նման նախագծերի արդյունքում Երևանը կորցնում է իր պատմաճարտարապետական ժառանգությունը: Սակայն չշտապենք եզրակացություններ անել և տեսնենք դրականը այս ամենի մեջ և հավատանք տրված հավաստիացումներին: Նշենք, որ նմանատիպ քայլերով կատարվում են Հանրապետության համար կարևոր ներդրումներ, ստեղծվում են նոր աշխատատեղեր և կառուցվում են նոր՝ սեյսմակայուն շենքեր: Նշենք նաև, որ Երևանի պատմական կենտրոնի գրեթե բոլոր հին կառույցները պետք է վաղ թե ուշ վերակառուցվեն՝ վատ սեյսմակայունության պատճառով: Իհարկե, անկասկած շատ ավելի ճիշտ կլիներ կենտրոնի հետագա կառուցապատումը իրականացնել հին և վտանգավոր կառույցների տեղերում, չավելացնելով կենտրոնի կառուցապատման խտությունը և հետզետե ստեղծելով ավելի սեյսմիկ-անվտանգ մայրաքաղաք:
Ինչպես տեղեկացնում է ռուսական lenta.ru կայքը, Տաշիր ընկերությունը Յարոսլավլում բացել է 120 մլն ԱՄՆ դոլար արժողությամբ ՌԻՈ առևտրա-ժամանցային համալիրը: 70 հազար քառակուսի մետր ընդհանուր մակերեսով համալիրը գտնվում է Տուտաևյան մայրուղու վրա, քաղաքի 2 խոշորագույն շրջանների՝ Բրագինոյի և Կիրովսկիի սահմանագծին: Համալիրում տեղակայված են առևտրային ցուցասրահ, մթերային հիպերմարկետ, հիպերմարկետ-DIY, կենցաղային և էլեկտրոնային սարքավորումների հանրախանութ, Սպորտմաստեր ապրանքանիշի մասնագիտացված խանութ-սրահ, Սինեմա-սթար ցանցի 4 դահլիճից բաղկացած կինոդահլիճ, մարզական և ժամանցի սրահներ. բոուլինգ և բիլիարդ, ռեստորաններ և ավտոկայանատեղի նախատեսված 800 ավտոմեքենայի համար: Յարոսլավլի ՌԻՈ համալիրը Տաշիր ընկերության 16-րդ գործող առևտրա-ժամանցային կենտրոնն է: Մոտ ապագայում նախատեսվում է Վոլոգդայում և Սանկտ Պետերբուրգում ևս բացել ՌԻՈ ապրանքանիշի առևտրային համալիրներ: Ռուսաստանի խոշորագույն անշարժ գույքի հոլդինգներից մեկը՝ Տաշիր գրուփը, հիմնադրել է Սամվել Կարապետյանը 1999 թ-ին: Ընկերությունը Մոսկվայում և Ռուսաստանի այլ շրջաններում կառուցում է առևտրա-ժամանցային կենտրոններ, գրասենյակային, բնակելի և պահեստային համալիրներ, հյուրանոցներ: 2011 թ-ի դրությամբ ընկերությունը կառուցել է մոտ 60 առևտրային նշանակության կենտրոն ավելի քան 1.2 մլն քառակուսի մետր ընդհանուր մակերեսով: Նշենք նաև, որ ռուսական ՌԲԿ (РБК) ամսագիրը, իր հունիսյան համարում հրապարակել էր Ռուսաստանի խոշորագույն կառուցապատողների ցուցակը: Այդ վարկանիշում Տաշիր ընկերությունը զբաղեցրել էր 2-րդ հորիզոնականը 1.73 մլրդ ԱՄՆ դոլար շրջանառությամբ: Ինչպես մանրամասնել էին ամսագրի հեղինակները, վարկանիշային աղյուսակը կազմվել է հիմնվելով ընկերությունների տրամադրած տվյալների, վերլուծաբանների գնահատականների, ինչպես նաև սեփական հետազոտությունների վրա:
