«Ստեֆանո Բոերի» (Stefano Boeri) ճարտարապետական ընկերությունն ամբողջ աշխարհում շարունակում է իր «Ուղղահայաց այգու» հաղթարշավը: Ինչպես տեղեկացնում է The Inhabitat կայքը, այս անգամ ճարտարապետական ստուդիան կանգ է առել Փարիզում, որտեղ նախատեսում է կառուցել Ֆրանսիայի առաջին ուղղահայաց աշտարակը: Ըստ նախնական տվյալների՝ «Ֆողե Բլանշ» (Forêt Blanche) անվանումը ստացած նախագիծը, ինչը ֆրանսերենից թարգմանաբար նշանակում է «Սպիտակ անտառ», կկառուցվի Փարիզի արևելյան հատվածում գտնվող Վիլյի-սյուր-Մարն (Villiers sur Marne) թաղամասում: 54 մետր բարձրությամբ աշտարակը կկառուցվի հիմնականում փայտանյութից, իսկ ճակատային հատվածներում կտնկվեն մոտ 2000 ծառ, թուփ և բույս, ինչն իր մակերեսով հավասար կլինի մոտ 1 հեկտար անտառի: Ինչպես տեղեկացնում է ճարտարապետական բյուրոյի կայքը, շինության վերին հարկերում կտեղակայվեն բնակարաններ, իսկ ստորին հարկերում՝ գրասենյակային և առևտրային տարածքներ: Աշտարակի չորսբոլորը կտեղակայվեն պատշգամբներ դեպի կենտրոնական Փարիզ տեսարաններով:
Երբ տարիներ առաջ իտալացի ճարտարապետ Ստեֆանո Բոերին (Stefano Boeri) հայտարարեց, որ ծրագրում է նախագծել աշխարհի առաջին «Ուղղահայաց Անտառը» (Bosco Verticale), ոչ ոք չէր հավատում, որ այն ավելին է քան ճարտարապետի երևակայությունը: Սակայն փաստն այն է, որ աշխարհի առաջին ուղղահայաց անտառի շինարարությունն արդեն մոտենում է ավարտին: Երկու աշտարակներն արդեն պատրաստ են, իսկ անցած տարվա ապրիլից հատուկ խմբերը սկսել են ծառերի և այլ բուսականության տեղադրումը: Նախատեսվում է, որ ծրագրի հանդիսավոր բացման արարողությունը կկայանա այս տարվա վերջին: Միլանն աշխարհի ամենաաղտոտված մթնոլորտ ունեցող քաղաքներից է, իսկ «Ուղղահայաց Անտառ» նախագիծն ուղղված է փոքր-ինչ մեղմելու քաղաքի էկո համակարգին հասցված վնասը: Նախագիծը բաղկացած է 2 աշտարակներից, որոնց դիմային հատվածներում պետք է տնկվեն բազմաթիվ ծառեր և թփեր: «Ուղղահայաց Անտառը» համակարգ է, որը կոչված է էներգիայի օպտիմալացմանը, վերականգնմանը և արտադրմանը, իսկ բուսականության բազմազանությունն էլ ապահովելու է խոնավություն, կլանելու է ածխաթթու գազ ու վնասակար նյութեր և արտադրելու է թթվածին: Ըստ նախնական տվյալների՝ յուրաքանչյուր բնակարան ունենալու է ծառերով ու բուսականությամբ հագեցած պատշգամբ, որոնք պետք է արձագանքեն եղանակային փոփոխություններին: Ամռանը ծառերի խիտ սաղարթները պահպանելու են բնակարաններն արևից, ինչպես նաև մաքրելու են աղտոտված մթնոլորտը, իսկ ձմռանը մերկ ծառերը հնարավորություն են տալու, որպեսզի ցերեկային բնական լույսը ներթափանցի բնակարաններ: Պատշգամբներում տնկված բուսականությունը ոռոգվելու է շենքի օգտագործած վերամշակված ջրով: 80 և 110 մետր բարձրությամբ աշտարակները ներառելու են մեծ և միջին մեծության 480 ծառ, 250 փոքր ծառ, 5 հազար թուփ և 11 հազար հատակային բույսեր: Աշտարակներում օգտագործվող ծառերի տեսակները մանրակրկտորեն են ընտրվել, բուսաբանների մի խումբ ավելի քան 2 տարի աշխատել է, որպեսզի քաղաքի կլիմային հարմար ծառեր ընտրի: Նախագծում օգտագործվող բույսերը նախօրոք աճեցվել են կլիմայական պայմաններին հեշտությամբ ընտելանալու համար: Միլանի շրջակա միջավայրը բիոբազմազանության հնարավորություն չի տալիս, իսկ նոր տնկիները կարող են որոշ չափով փոխել քաղաքի էկո համակարգը և հնարավորություն տալ տարբեր թռչունների և սողունների ապրելու այնտեղ: Իսկ ամենաուշագրավն այն է, որ «Ուղղահայաց Անտառ» նախագծի իրականացումն ընդամենը 5 տոկոսով է ավելի թանկ, քան ավանդական երկնաքերերի շինարարությունը:
