Ավստրալիայի ամենահայտնի տեսարժան վայրերից մեկը՝ «Հարբոր Բրիջը» (Harbour Bridge- Նավահանգստային կամուրջ) նշում է իր 80-ամյա տարեդարձը, հաղորդում է BBC-ն:

1149 մետր երկարությամբ կամուրջը, որի շինարարությունը տևել է մոտ 10 տարի, բացվել է 1932 թ-ի մարտի 19-ին: Հանրահայտ կամուրջի շինարարությունը սկսվել է 1923 թ-ին: Շինարարության ամբողջ ընթացքում օգտագործվել է ավելի քան 52.8 հազար տոննա պողպատ և աշխատել մոտ 1.4 հազար շինարար: The Huffingtonpost-ի տվյալներով, այս կամուրջը համարվում է «Գինեսի ռեկորդակիր»՝ որպես աշխարհի ամենալայն (49 մետր) երկարաթռիչք կամուրջ:

Ըստ տարբեր լրատվամիջոցների տվյալների՝ 9.9 մլն ԱՄՆ դոլար (1932թ) արժողությամբ կամուրջի շինարարության ընթացքում 16 մարդ է զոհվել: Հանրահայտ կամուրջը, բացումից հետո, իրար է միացրել նավահանգստի հյուսիսային և հարավային ափերը: Սկզբնական շրջանում օրական կամուրջով երթևեկել է 11 հազար ավտոմեքենա, իսկ այսօր այդ թիվը հասնում է 160 հազարի: Նշենք, որ տեղացիները կամուրջի արտաքին տեսքի համար այն անվանում են նաև «կախիչ»:

Բավականին երկար տարիներ պրն. ՋեյՋեյՍի Բրեդֆիլդը (JJC Bredfield) և Ռալֆ Ֆրիմանը (Ralph Freeman) պայքարել են կամուրջի նախագծի հեղինակի տիտղոսի համար: Արդյունքում «Հարբոր Կամուրջի հայր» է ճանաչվել պրն. Բրեդֆիլդը, ում մտքում ծագել է կամուրջի շինարարության գաղափարը: Իսկ ահա Ռալֆ Ֆրիմանը, ով նախագծել է կամուրջը և շինարարության իրականացման մանրամասները, մի փոքր ավելի ուշ «ազնվականի» կոչում է ստացել շինարարության մեջ ունեցած իր հսկայական ներդրման համար: