Մայրաքաղաքում Ծավալուն Վերանորոգումներ են Ակնկալվում

Մայրաքաղաքում Ծավալուն Վերանորոգումներ են Ակնկալվում

Վերջերս Երևանի քաղաքապետարանի տեղեկատվության և հասարակության հետ կապերի վարչությունից տեղեկացանք մայրաքաղաքում այս տարվա նախատեսվող բարեկարգման և շինարարական աշխատանքներին։ Ըստ տրամադրված տեղեկության կհիմնանորոգվեն կրթամշակութային և առողջապահական մի շարք հաստատություններ, կբարեկարգվեն ճանապարհներ։ 2020թ-ին մայրաքաղաքում շինարարության և բարեկարգման աշխատանքները կընդգրկեն քաղաքային տնտեսության տարբեր ոլորտներ՝ մշակույթ, առողջապահություն, կրթություն, ճանապարհների բարեկարգում և այլն: «Ասիական զարգացման բանկի ծրագրով ունենք բավականին շատ ծավալներ՝ մոտ 30 մանկապարտեզի, մեր ծրագրերով էլ 9 մանկապարտեզի մրցույթների նախագծերը պատրաստ են, տեղադրել ենք արդեն, որ շինարարություն իրականացվի»,- նշել է Երևանի քաղաքապետարանի շինարարության և բարեկարգման վարչության պետ Գրիգոր Հարությունյանը: Տարվա ընթացքում կհիմնանորոգվի մշակութային երեք կարևոր օջախ: Միանգամայն նոր պայմաններում կաշխատեն Պատանի հանդիսատեսի թատրոնը, Մանկապատանեկան ստեղծագործական քաղաքային կենտրոնը, Հայաստանի ժողովրդական նկարիչ Էդուարդ Իսաբեկյանի ցուցասրահը:

Վերջինիս բարեկարգման աշխատանքները մեր կարծիքով առաջնային խնդիրներից է եթե հաշվի առնենք այն հանգամանքը, որ Էդուարդ Իսաբեկյանի ցուցասրահում շուրջ 30 կտավ կա, միևնույն ժամանակ սրահը զուրկ է օդի խոնավության, լուսավորության ու ջերմաստիճանի անհրաժեշտ պայմաններից։ <<Խնդիրը շատ հրատապ է, որովհետև կտավները վնասվել են: Ներկաշերտերը ուռել են, ճաքճքել, ափսոս են այս նկարները: Ցուցասրահը կսկսի աշխատել, վերածնունդ կունենա, կանենք շատ ցուցահանդեսներ»,- նշել է «Էդուարդ Իսաբեկյան» ցուցասրահի վարիչ Իրինա Իսաբեկյանը:

Երևանում նախորդ տարվա 5000 քմ-ի փոխարեն այս տարի կրկնակի շատ՝ 10.000 քմ հողային պաստառով ճանապարհ կբարեկարգվի: Ծավալի առումով զգալի աշխատանքներ կտարվեն նաև այգիների, նոր մայթեր կառուցելու ու բարեկարգելու, եզրաքարեր փոխելու, հենապատեր կառուցելու և ոռոգման նոր ցանց անցկացնելու համար: 2020-ին կբարեկարգվի նաև հետիոտնային ստորգետնյա 4 անցում:

«Նախորդ տարի ստորգետնյա 4 անցում բարեկարգեցինք: Այս տարի 300 մլն-ի բյուջե ենք հաստատել և նախագծերն արդեն պատվիրել ենք: Խոսքը Գրիգոր Լուսավորչի փողոցի, փակ շուկայի մոտի, Ազատության պողոտայի («Լամբադա» կամուրջ) և Թամանցիների փողոցի գետնանցումների մասին է»,- նշել է Գրիգոր Հարությունյանը: Հիշեցնենք, որ 2019-ին մենք անդրադարձել էիք այս թեմային «Մայրաքաղաքի գետնանցումները նոր շունչ են առնում» հոդվածում։ Դեռ դեկտեմբերին քաղաքապետարանը սկսել էր մայրաքաղաքի մի շարք գետնանցումների բարեկարգման աշխատանքներ․ «Ծրագրի իրագործման համար հատկացվել է 300,0 մլն. դրամ, սակայն շինարարական աշխատանքներն ընթանում են 3 գետնանցումներում, որոնց համար կնքվել են 44,0 մլն. դրամի կապալի պայմանագրեր»։ Նշենք, որ անցած տարվա հիմնանորոգման աշխատանքները ընթանում էին Հալաբյան-Լենինգրադյան, մետրոյի Մարշալ Բաղրամյան կայարան, Ազատության պողոտայի՝ «Հաղթանակ» զբոսայգու հարակից ստորգետնյա անցումներում։

Առողջապահության առաջնային օղակը ևս ուշադրության կենտրոնում է: Պոլիկլինիկաները բուժսարքավորումներով վերազինման ծրագրին զուգահեռ՝ բուժկենտրոններում հիմնանորոգման ու վերանորոգման աշխատանքներ կիրականացվեն: Այս տարի ծրագրում համայնքային 5 պոլիկլինիկա է ընդգրկված: Շուրջ 8000 քմ տարածք ունեցող թիվ 12 պոլիկլինիկան կվերանորոգվի փուլ առ փուլ: Այս տարի կլուծվի սանհանգույցների ու շենքի ողջ էներգամատակարարման խնդիրը, կփոխարինվեն կաբինետների դռները: