Գյումրիի տեխնոլոգիական գոտում կառուցվելիք շենքը կունենա 6500 քառակուսի մետր տարածք, որից 5300 քառակուսի մետրն անմիջականորեն կծառայեցվի տեխնոլոգիական նպատակների, հաղորդում է news.am կայքը՝ հղում կատարելով ապրիլի 26-ին կառավարության նիստից հետո ՀՀ էկոնոմիկայի նախարարի խորհրդական Վահե Դանիելյանի կատարած հայտարարությանը: Մինչ այդ ՀՀ կառավարությունը հաստատել էր Վերակառուցման և զարգացման միջազգային բանկի «Էլ-հասարակության և մրցունակության համար նորարարության ծրագրի» շրջանակներում անցկացված մրցույթի արդյունքները: «Բաղրամյանշին» և «Ախուրյանի կոոպշին» ընկերությունները, որպես մրցույթի հաղթողներ, կիրականացնեն տեխնոպարկի շինարարությունը: Տեխնոպարկի շինարարության նպատակով հատկացվում է 1.67 մլրդ դրամ: Տեխնոպարկը կառուցվելու է Մ. Նալբանդյանի անվան Գյումրիի պետական մանկավարժական ինստիտուտի նախկին շենքի տեղում: Ըստ Վ. Դանիելյանի` 18 ամիս հետո շինարարությունը ավարտված կլինի: Այն կգործի ինկուբացիոն սկզբունքով` մոտ 20 ընկերություններ կհաստատվեն նոր տեխնոլոգիական կենտրոնում: Տեխնոպարկը կունենա լաբորատորիաներ, կրթական կենտրոն, բիզնես ենթակառուցվածքներ: Տեխնոպարկին կից իր առանձին շենքը կկառուցի նաև ցանցային և հեռահաղորդակցության սարքավորումների մշակման և արտադրության առաջատար «Դէ-Լինք» (D-Link International Pte Ltd) հայտնի տեխնոլոգիական ընկերությունը:
Հայաստանի պետական բյուջեից Շիրակի մարզին հատկացված 1.32 մլրդ դրամի շրջանակներում շինարարական մրցույթներն իրականացվել են, և արդեն սկսվել են շինարարական աշխատանքները: Այդ գումարի շրջանակներում մարզում իրականացվում են ճանապարհաշինության, դպրոցների, մարզադահլիճների, տանիքների վերանորոգման աշխատանքներ ինչպես Գյումրիում, այնպես էլ մարզի այլ բնակավայրերում, հաղորդում է news.am կայքը: Ըստ ծրագրի՝ Գյումրիում հիմնանորոգվում են Սեվյան եւ Լիսինյան փողոցները, որոնք վերջին ժամանակներում չեն հիմնանորոգվել: Ծրագրով նախատեսվում է նաև բազմաբնակարան շենքերի հարթ տանիքների հիմնանորոգման աշխատանքներ Անի և Բուլվարային թաղամասերում: Գյումրիի գեղարվեստի երրորդ արհեստագործական ուսումնարանում նույն ծրագրի շրջանակներում կիրականացվի տանիքի ու սանհանգույցի վերանորոգման աշխատանքներ: Պետական այս ծրագրով աշխատանքներ տարվում են նաև մարզի մի շարք դպրոցներում ու կրթական հաստատություններում: Գյումրիից ընդգրկվել են երկու դպրոց: Աշխատանքներն արդեն սկսված են Գյումրիի թիվ 15 դպրոցում, որի վերանորոգման համար նախատեսված է 50 միլիոն դրամ: Աշխատանքներն ավարտելու են մինչև սեպտեմբերի 1-ը:
