Անգլիական Հեմպրշիր (Hampshire) կոմսությունում վաճառքի է հանվել տասնամյակներ շարունակ որպես ոստիկանական ուսումնարան ծառայած պատմական համալիրը: «Բրամշիլ» անվանումը կրող դղյակի ընդհանուր արժեքը գնահատվում է 38.5 մլն ԱՄՆ դոլար: 1612 թ-ին կառուցված համալիրի տարածքում տեղակայված են փոքրիկ լճակ, 2 զանգակատուն, 329 ննջասենյակ, 58 տուն անձնակազմի համար, 2 բար, մարզադահլիճ և այլն: Համալիրի գլխավոր՝ պատմական 1-ին կարգի շինության մակերեսը կազմում է 4 հազար քառակուսի մետր և այն համարվում է երկրի խոշորագույն առանձնատներից մեկը: Նշենք, որ ոստիկանական ուսումնարանից բացի «Բրամշիլ» դղյակի տարածքում էին գտնվում նաև Բրիտանիայի ոստիկանության ազգային գրադարանը (Եվրոպայի խոշորագույն ոստիկանական գրադարանը) և Անհետ կորածների ազգային բյուրոն: Ըստ Daily Mail պարբերականի տրամադրած տեղեկատվության, դղյակը վաճառքի է հանվել պահպանման բարձր ծախսերի պատճառով: Բանն այն է, որ տարեկան 7.7 մլն ԱՄՆ դոլար գումար էր պահանջվում այդ նպատակների համար, ինչն էլ դժգոհություն է առաջացրել հարկատուների մոտ:
Այս տարվա սկզբին Google ընկերությունը հայտարարել էր, որ Լոնդոնի հանրահայտ «Քինգս Քրոսս» (King’s Cross) կայարանի հարևանությամբ նոր գլխավոր գրասենյակ կկառուցի , որի բյուջեն գնահատվում էր մոտ 1.6 մլրդ ԱՄՆ դոլար: Օրերս տարբեր լրատվամիջոցներ ներկայացրել են ընկերության լոնդոնյան գլխավոր գրասենյակի նախագծի պատկերը: Նորագույն գրասենյակային համալիրը նախագծել է «Օլլֆորդ Հոլլ Մոնագան Մորրիս» (Allford Hall Monaghan Morris) ճարտարապետական ընկերությունը: Ըստ ընկերության ներկայացրած տվյալների՝ գրասենյակային համալիրի ընդհանուր մակերեսը կկազմի 270 հազար քառակուսի մետր և այն կունենա 11 հարկ: Google-ը պատրաստվում է «Քինգս Քրոսս» կայարանի հարևանությամբ կառուցվելիք նոր գրասենյակում կենտրոնացնել Լոնդոնում գտնվող իր ներկայիս 2 գրասենյակների աշխատանքը, որոնք այժմ գտնվում են Վիկտորիա (Victoria) և Քովենթ-Գարդեն (Covent Garden) շրջաններում: Ինչպես նորագույն նախագծերի մեծ մասը, այս շենքը ևս կլինի էկոլոգիապես մաքուր՝ ճարտարապետները մտադիր են ստանալ BREEAM կանաչ շենքերի սերտիֆիկացման (Բրիտանիա) ամենաբարձր գնահատականը, ինչպես նաև արժանանան Ամերիկյան LEED Պլատինե հավաստագրման: Նոր համալիրը կկառուցվի օգտագործելով պողպատե կոնստրուկցիաներ, ապակի և խաչաձև-սոսնձված փայտանյութ: Վերջին տասնամյակում գրեթե անհնար է որևէ մեկին զարմացնել Լոնդոնում կառուցվելիք նախագծերով, սակայն այնպիսի տեխնոլոգիական հսկաներ, ինչպիսիքն են՝ Apple-ը, Google-ը և Facebook-ը, կարողացել են հասնել այնպիսի աստիճանի, որ ցանկացածի հետաքրքիր է՝ ինչ են նրանք կառուցում և ինչպիսի պայմաններում պիտի աշխատեն աշխարհի ամենաստեղծագործ և ՏՏ խելոք մարդիկ: Ընկերության նորագույն նախագիծը, որոնք շատերը նաև անվանում են «գետնաքեր», կլինի բազմահարկ, որը մի ծայրում կունենա 7 հարկ, որն էլ աստիճանաբար կհասնի 11 հարկի շենքի մյուս ծայրում: Շենքը հիմնականում կկառուցվի փայտից, ինչը հնարավորություն կտա շինարարության ընթացքում 40 տոկոսով կրճատել մթնոլորտ արտանետվող ածխաթթու գազի քանակը: Հարկ է նշել, որ առաջին անգամ նման լայնամասշտաբ համալիրի կառուցման ժամանակ ներքին կոնստրուկցիաները կկառուցվեն պողպատից և խաչաձև-սոսնձված փայտանյութից: Նորագույն համալիրում կլինեն 67 հազար քառակուսի մետր մակերեսով գրասենյակներ, 4600 քառակուսի մետր մակերեսով առևտրային տարածքներ և 1860 քառակուսի մետր մակերեսով կայանատեղի հեծանիվների համար:
«Ադջայե Ասոշիեյթս» (Adjaye Associates) ճարտարապետական ընկերությունը մշակել է դիտարան և ուսումնական կենտրոն հուշարձանի նախագիծ՝ ի պատիվ կաթնասունների, սողունների, թռչունների և վայրի բնության այլ վերացած տեսակների: Նոր քարե շինությունը վեր կխոյանա Անգլիայի Պորտլենդ կղզում, «Բովերս Քուորրի» քարհանքի (Bowers Quarry) տեղում: 30 մետր բարձրությամբ հուշարձանը կներառի ցուցասրահ, տեղեկատվական կենտրոն և դիտարան: Նոր նախագիծը մշակվել է «Բովերս Քուորրի» (Bowers Quarry) քարհանքի համար, որը 1700-ական թվականներից ի վեր հանդիսանում է պորտլենդյան քարի աղբյուր և որտեղ գտնվել են վերացած հնադարյան հարյուրավոր կենդանիների և բույսերի մնացորդներ: Ըստ նախնական տվյալների՝ գալարաձև կառույցը ամբողջությամբ նվիրված կլինի բուսական և կենդանական աշխարհի մահացած և այստեղ հայտնաբերված 860 տեսակներին, որոնց պատկերները կքանդակվեն կառույցի քարե ճակատային հատվածի վրա: Կառույցի ներսում կլինի «կենսաբազմազանության զանգակատուն», որն ամեն անգամ կահազանգի որևէ նոր տեսակի վերացման մասին: Կառույցի արտաքին հարդարումը կիրականացվի վերամշակված նյութերով և տեղական բնական քարով:
Լոնդոն 2012 «Օլիմպիական ավանը» կվերածվի բնակելի թաղամասի, և բնակարաններից շատերը կներգրավվեն «մատչելի բնակարան» ծրագրով, հայտարարել են լոնդոնյան պաշտոնյաները: Ըստ նախնական տվյալների՝ «Օլիմպիական ավանը» կձևափոխվի և կվերանվանվի «Արևելյան ավան» (East Village) անվանումը կրող շրջանի: Նոր ավանը արդեն այս տարվա օգոստոսին վարձակալներին կառաջարկի 2818 բնակարան, որոնցից 1379 «մատչելի» ծրագրով: Մասնագետների կարծիքով, սա կատարյալ որոշում է Լոնդոնի պաշտոնյաների կողմից, քանի որ այն հնարավորություն է տալիս մեղմել 2007 թ-ի գլոբալ տնտեսական ճգնաժամի հետևանքով քաղաքում առաջացած բնակելի տարածքների պակասուրդը: Այն բանից հետո, երբ «Օլիմպիական այգին» ձեռք բերվեց Կատարի «Կատար Դայեր» (Qatar Diar) բարեկեցության հիմնադրամի և «Դիլանսեյ» (Delancey) կառուցապատող ընկերության կողմից, վերամբարձ կռունկները և շինարարական խմբերը անդադար սկսեցին աշխատել այս նախագծի իրականացման վրա: Այսօր արդեն «Օլիմպիական այգուց» տեղափոխվում են ժամանակավոր շինությունները, որոնք կառուցվել էին Օլիմպիադայի համար և 2818 բնակարանները արդիականացվում են; Ըատ նախնական տվյալների՝ բնակարանների առաջին խմբաքանակը պատրաստ կլինի արդեն այս տարվա օգոստոսին: Մատչելի բնակարանները կտրամադրի «Տրիատլոն» (Triathlon) լոնդոնյան բնակարանային ասոցիացիան, իսկ մյուս բնակարանները կտնօրինի «Կատար Դայեր» ընկերությունը: Նմանատիպ քայլը շատ կարևոր էր Լոնդոնի բնակարանային շուկայի զարգացման համար, քանի որ «Շելթեր» (Shelter) ընկերության ուսումնասիրությունների համաձայն՝ Լոնդոնի բնակարանների վարձակալների 55 տոկոսի համոզմամբ, իրենք երբեք չեն կարողանա գումար հավաքել բնակարան գնելու համար: Իսկ «Արևելյան գյուղ» նոր թաղամասը կարող է փոխել նման մտածելակերպը՝ առաջարկելով բնակարաններ խելամիտ վարձակալական գներով և գրավելով մարդկանց: Բացի այդ, ով՞ չի ցանկանա ապրել այնպիսի թաղամասում, որը գտնվում է անմիջապես «Օլիմպիական այգում», ունի նորակառույց ուսումնական կենտրոն, հիվանդանոց, ռեստորաններ և այլն: Ավելի վաղ հայտարարվել էր, որ ամառային Օլիմպիական խաղերի փակումից հետո «Օլիմպիական այգին» նույնպես կվերափոխվի: 2013 թ-ին Արևելյան Լոնդոնում 500 հազար քառակուսի մետր մակերեսով այգի կբացվի, որը կկրի «Թագուհի Եղիսաբեթի անվան Օլիմպիական Այգի» անվանումը: ԱրսելորՄիտտալ Օրբիթ դիտահարթակ-աշտարակը նախկինի պես վեր կխոյանա այգում, իսկ Օլիպիական մարզադաշտն էլ կվերակառուցվի, կփոքրացվի և կունենա 25 հազար նստատեղ:
Լոնդոնում 388 մլն ԱՄՆ դոլար ռեկորդային գնով առանձնատուն է հանվել վաճառքի, ինչը 700 անգամ ավելի է, քան մայրաքաղաքային անշարժ գույքի միջին գինը (565,000 ԱՄՆ դոլար), իսկ մակերեսը (մոտ 4600 քառակուսի մետր) 30 անգամ ավել, քան միջին լոնդոնյան ընտանիքի բնակարանի մակերեսը: Վաճառքից հետո Լոնդոնի կենտրոնում գտնվող այսպես կոչված ամենամեծ մասնավոր տան սեփականատերը կդառնան Անգլիայի թագուհու հարևանը և կկարողանա զմայլվել «Սբ. Ջեյմսի Այգու» (St James’s Park) բնապատկերներով: Նշենք, որ առանձնատան նմանօրինակ բարձր գինը պայմանավորված է լոնդոնյան անշարժ գույքի շուկայում նախորդ տարի գրանցված գործարքների ռեկորդային թվով: «Սավիլլս» (Savills) ընկերության տվյալներով անցած տարի Լոնդոնում վաճառվել է 2 մլն ԱՄՆ դոլար արժողությամբ 5115 տուն, ինչը 8 տոկոսով ավել է քան 2011 և 12 տոկոսով ավել քան 2007 թվականների ցուցանիշը: Այսօր Լոնդոնի ամենաթանկ առանձնատունը, որը գտնվում է Չարլթոն Հաուս Տերրաս 18 (Charlton House Terrace 18) հասցեում, պատկանում է Մերձավոր Արևելքի պետությունների թագավորական ընտանիքներից մեկի անդամին (որոշ աղբյուրներ նշում են Սաուդյան Արաբիայի թագավորական ընտանիքը), ով վաճառքի է հանել այս տունը, աշխատելով առանձնակի ուշադրության չարժանանալ: Նշենք, որ 4 հարկանի առանձնատունը, որն ունի նաև 2 ստորգետնյա հարկ, գտնվում է լավ վիճակում, սակայն չունի այն հարմարությունները, որոնց սովոր են մեծահարուստները՝ լողավազան, տնային կինոթատրոն և սպա-կենտրոն: Սակայն այս ամենի կառուցման համար բավականին ազատ տարածք կա: Առանձնատունը կառուցվել է 1827-32 թվականներին ճարտարապետ Ջոն Նեշի (John Nash) նախագծով և եղել է այդ տարիների Լոնդոնի ամենակարևոր քաղաքական կենտրոններից մեկը: Առաջին Համաշխարհային պատերազմի տարիներին առանձնատունը ծառայել է որպես «Բրիտանական Կարմիր Խաչի» և անհետ կորածների ու վիրավորների տեղեկատվական կենտրոն, որտեղից շատ ընտանիքներ տեղեկություններ են ստացել իրենց հարազատների մասին:
