Ֆրանսիայի լազուրե ափին 5,25 մլն ԱՄՆ դոլարով վաճառվում է Էդիտ Պիաֆի այն տունը, որտեղ երգչուհին անց է կացրել կյանքի վերջին տարիները, տեղեկացնում է բրիտանական Daily Mail պարբերականը: Եռահարկ առանձնատունը գտնվում է Ֆրանսիայի հարավարևելյան Գրասս քաղաքում: Երգչուհին այդ տունը գնել է 1949 թվականին և ապրել այնտեղ մինչև իր կյանքի վերջը՝ 1963 թվականը: Ըստ պարբերականի ներկայացրած տվյալների՝ առանձնատանը տեղակայված են 4 ննջասենյակ, հյուրասենյակ բիլլիարդով և բուխարիով, ճաշասրահ ու խոհանոց: Տան հատակն հինականում սալիկապատված է, իսկ առաստաղը ձևավորված են փայտով: Պատերը և հյուրասենյակի ու ճաշասենյակի միջև գտնվող կամարը ձևավորված են քարով: Գլխավոր առանձնատնից բացի հսկայական տարածքի վրա տեղակայված են թենիսի կորտ, 2 լողավազան՝ բացօթյա և փակ, 3 տնակ նախատեսված հյուրերի համար և երկսենյականոց պահակակետ: Բացի վերոնշյալը տնամերձ հողամասում գտնվում է միջերկրածովյան ոճով ձևավորված այգի՝ փոքրիկ լճակով և ուղղաթիռի վայրէջքի համար նախատեսված հարթակով:

Ինչպես ներկայացնում է Նյույորքյան The Real Deal պարբերականը, Լևոն Հայրապետյանի դուստրը US$ 9.9 մլն-ով վաճառքի է հանել Նյու-Յորքում գտնվող պատմական առանձնատունը: Անյա Հայրապետյանը եռահարկ առանձնատունը ձեռք է բերել անցած տարի US$ 9,89 մլն-ով մի ընտանեկան զույգից: Արդյունքում ներկայիս գինը համապատասխանում է մեկ տարի առաջ գրանցված արժեքին: Անշարժ գույքի վաճառքով զբաղվող Compass գործակալության կայքում ներկայացված է, որը պատմական առանձնատունը կառուցվել է 1860-ական թվականներին և ամբողջությանբ վերակառուցվել վերջին 3 տարիների ընթացքում: Եռահարկ առանձնատան ընդհանուր մակերեսը կազմում է 471 քառակուսի մետր, իսկ տնամերձ հողամասինը՝ 193 քառակուսի մետր: Տունն ունի 4 ննջասենյակ, 3 լոգարան, խոհանոց-հյուրասենյակ՝ նախատեսված 10-12 հյուրի համար, 3 մեքենայի համար նախատեսված ավտոտնակ և պատշգամբ՝ տեղակայված առանձնատան տանիքին: Առանձնատունը գտնվում է քաղաքի հեղինակավոր թաղամասերից մեկում՝ Բրուքլին Հեյթսում, Իսթ-Ռիվեր նեղուցի ափին: Առանձնատան հարևանությամբ տեղակայված է ափամերձ գոտի, մետրոյի կայարան և Բրուքլինյան կամուրջը: Նշենք, որ վերջին տարիներին Բրուքլինում գրանցվել է անշարժ գույքի գնի կայուն աճ, և սկսել են կառուցվել ու շահագործման հանձնվել մի շարք նորակառույց շինություններ:

Այս ամիս չինական ZhuoDa ընկերությունը հանրությանն է ներկայացրել բավականին յուրօրինակ «հավաքովի» շինարարության մոդել, որն ամբողջ աշխարհի վրա անմոռանալի տպավորություն է թողել: Բանն այն է, որ չինական Սիան քաղաքում ընդամենը 3 ժամվա ընթացքում հավաքված ամբոխի առաջ հիմքից կառուցվել է երկհարկանի առանձնատուն, որը, ինչպես պնդում է կառուցապատող ընկերությունը, կարող է կանգուն մնալ 150 տարի: Նմանատիպ արագության գաղտնիքն այն է, որ առանձնատան 90 տոկոսը, անգամ ներքին հարդարումը, խողովակաշարը, սանտեխնիկան և կահույքը, նախապես հատուկ 3D տպիչի օգնությամբ կառուցվում է գործարանում: Արդյունքում գրեթե պատրաստ առանձնատունը բերվում է շինհրապարակ, որտեղ էլ հմուտ անձնակազմի օգնությամբ մանկական «լեգո» խաղի տարբերակով հավաքվում: Առանձնատան պատերը տպագրվում են հատուկ նյութից, որի բաղադրությունն ընկերությունը գաղտնի է պահում: Ինչպես պնդում է կառուցապատող ընկերությունը, շինարարության նման մեթոդն անհամեմատ մատչելի է և հնարավորություն է տալիս կառուցել 1 քառակուսի մետրը ընդամենը 400-480 ԱՄՆ դոլլարով: Քանի որ առանձնատան բոլոր հատվածները նախօրոք տպագրվում են գործարանում, ընկերությունը կարողանում է խուսափել շատ ծախսերից, առանց որոնց հնարավոր չէ ավանդական շինարարություն իրականացնել: Ստացվում է, որ նորարական մեթոդներով կառուցվող այս առանձնատները անհամեմատ մատչելի են: Նախագծի հեղինակների պնդմամբ, կոնստրուկցիաները կառուցվում են այնպիսի նյութերից, որոնք ստացվում են արդյունաբերական և գյուղատնտեսական թափոնների միախառնումից, այդ իսկ պատճառով չեն պարունակում բազմաթիվ վնասակար նյութեր, մասնավորապես՝ ֆորմալդեգիդ, ամոնիակ, ռադոն: Այս յուրօրինակ առանձնատունը կարող է դիմակայել մինչ 9 բալ երկրաշարժի, չվախենալ ջրից և հրդեհից: Բացի այդ առանձնատան պատերը կարող են ծածկված լինել տարբեր դեկորատիվ տեկստուրաներով, օրինակ՝ մարմար, փայտ, գրանիտ և այլն: Իսկ առողջ ապրելակերպի բավականին ակտիվ ջատագովները կարող են խնդրել կառուցապատողից նախապես պատրաստվող շինանյութի մեջ ավելացնել չինական դեղաբույսերի խառնուրդներ: ZhuoDa ընկերության գլխավոր ճարտարագետ Ան Յոնգլիանգը (An Yongliang) պնդում է, որ ավանդական եղականով նմանատիպ առանձնատուն կառուցելու համար անհրաժեշտ է մոտ 6 ամիս, այնինչ իրենց ընկերությունը դա անում է ընդամենը 10 օրում: Ի դեպ, այս տարվա հունվարին չինական WinSun ընկերությունը տպագրության համար հատուկ պատրաստված շինանյութից բավականին հաջող տպագրել է 5-հարկանի բնակելի շենք և 110 քառակուսի մետր մակերեսով առանձնատուն:

Իտալական «Լիոնարդ Էլիտար Գույք» (Lionard Luxury Estate) անշարժ գույքի գործակալությունը վաճառքի է հանել ամրոց, որի շինարարության ժամանակ իր մեծ ավանդն է ներդրել Վերածննդի դարաշրջանի գյուտարար և ճարտարապետ Լեոնարդո դա Վինչին: Վաճառվող անշարժ գույքը բաղկացած է ամրոցից, այգուց և Տիրենեյան ծովին նայող 4 հարկանի շինությունից: Կալվածքը գտնվում է իտալական Տոսկանա արվարձանի Լիվորնո շրջանում ժայռի գագաթին: Ինչպես տեղեկացնում է «Լիոնարդ» անշարժ գույքի գործակալության պաշտոնական կայքը, ամրոցի հիմնական մասը կառուցվել է 15-րդ դարում անանուն ճարտարապետի կողմից: Այնուհետև 1502 թվականին Լեոնարդո դա Վինչին ժամանել է ամրոց: Նա հրավիրվել էր որպես ռազմական ճարտարագետ, որպեսզի նա նախագծի և կառուցի առանձնատունը շրջապատող պարիսպները: Նախագծային աշխատանքների ընթացքում գյուտարարն ապրել է այն շենքում, որն այսօր վաճառվում է ամրոցի և այգու հետ միասին: Ներքին կառույցների ընդհանուր մակերեսը կազմում է 773 քառակուսի մետր: Ի դեպ, Կենտրոնական Իտալիայում նմանատիպ կառույցը համարվում է մեծահարուստ ընտանիքին բնորոշ անշարժ գույք: Առաջին հարկում գտնվում են հյուրասենյակը, ճաշասենյակը, 3 սանհանգույց, հանդերձասրահ, մառան և լոգարան: Երկրորդ հարկում տեղակայված են 5 ննջարան յուրաքանչյուրը սեփական լոգարանով: Վերնահարկը ավանդապես օգտագործվում է ծառայողական անձնակազմի կողմից: Այստեղ են գտնվում ծառայողների համար նախատեսված ճաշասենյակ, ննջարան և լոգարան: 2 ստորին հարկերում տեղակայված են բաց պատշգամբներ, որոնցից տեսարան է բացվում դեպի ծովը և պարսիպները: Տունն ամբողջությամբ կառուցված է քարից և աղյուսից, հատակը թրծած կավից է, իսկ քիվերը՝ պղնձից: Նշենք, որ առանձնատան հարևանությամբ գտնվում է նաև սեփական ավտոտնակ: 19-րդ դարասկզբին առանձնատանը բնակվել է Նապոլեոնի քույր Էլիզա Բոնապարտը: Նա կառույցն օգտագործել է որպես Պյեմոնտի իր կալվածքների կառավարման պաշտոնական նստավայր: Ըստ նախնական տվյալների՝ յուրօրինակ կալվածքի ստույգ արժեքը դեռևս հայտնի չէ, սակայն նախատեսվում է որ այն կվաճառվի 5.6 - 11.2 մլն ԱՄՆ դոլարի սահմաններում:

ԱՄՆ-ի և Կուբայի կառավարությունները հայտարարել են 860 մլն ԱՄՆ դոլար բյուջեով համատեղ իրագործվելիք նախագծի մասին, որը ենթադրում է ամերիկացի հանրահայտ գրող Էռնեստ Հեմինգուեյի առանձնատան վերականգնում: «Ֆինկա Վիջիա» (Finca Vigia) առանձնատունը, որտեղ ավելի քան 20 տարի՝ 1939-1961 թվականներին, ապրել և ստեղծագործել է գրողը, գտնվում է Հավանայի արվարձաններում: Հենց այս առանձնատանն էլ գրողը ստեղծել է իր գլուխգործոցներից մեկը՝ «Ծերունին և ծովը», որի համար 1954 թվականին արժանացել է «Նոբելյան» մրցանակի: Կուբա տեղափոխվելուց հետո Հեմինգուեյը հաստատվել է Հավանայի «Մունդոս» (Mundos) հյուրանոցում և հետո միայն տեղափոխվել գաղութատիրական ոճով կառուցված առանձնատուն: ԱՄՆ-ի և Կուբայի միջև կնքված պայմանագիրը ծրագրի իրականացման շրջանակներում հնարավորություն է տալիս ԱՄՆ-ին շինանյութ ներկրել «Ազատության կղզի»: Նշենք, որ Կուբայում 1959 թվականին տեղի ունեցած հեղափոխությունից և ԱՄՆ-ի հետ բոլոր դիվանագիտական հարաբերությունները սառեցնելուց հետո սա առաջին նմանօրինակ քայլն է: Հեմինգուեյի առանձնատան վերակառուցման նախագիծը ենթադրում է բուն առանձնատան ամրացման և վերակառուցման աշխատանքները, որը Կուբայի ծանր կլիմայական պայմանների ազդեցությամբ բավականին վնասվել է: Բացի այդ նախատեսվում է նաև նոր փոքրիկ ենթակառույց ստեղծել, որտեղ գիտաշխատողները կկարողանան վերականգնել հեղինակի հազարավոր աշխատանքները, այդ թվում՝ անավարտ նամակներ և սևագրություններ: Հեմինգուեյի առանձնատան վերակառուցման շուրջ Կուբայի իշխանությունների հետ բանակցությունները սկսել են դեռևս 2005 թվականին, սակայն 2 պետությունների միջև լարված հարաբերությունների պատճառով, նախագիծն այդպես էլ հնարավոր չի եղել իրականացնել: Նշենք, որ գրողի մահից հետո նրա այրին առանձնատունն իր ամբողջ գույքով, անգամ գրողի հագուստն ու մողեսների հավաքածուն, նվիրաբերել է Կուբայի կառավարությանը, որպեսզի այստեղ թանգարան բացվի: Հեմինգուեյը համարվում է ամերիկացի ամենահայտնի գրողներից մեկը: Նրա գրչին են պատկանում այնպիսի գլուխգործոցներ, ինչպիսիքն են՝ «Ում մահն է գուժում զանգը» «Ծերունին և ծովը», «Տոն, որը միշտ քեզ հետ է» և «Հրաժեշտ զենքին»: