Չինաստանի կենտրոնական Շանսի նահանգի մայրաքաղաք Սիանում կառուցվել է 100 մետր բարձրությամբ օդը մաքրող աշտարակ, տեղեկացնում է The Inhabitat կայքը: Չինաստանի Գիտությունների Ակադեմիայի երկրային միջավայրի ինստիտուտի մասնագետների փորձարկումները ցույց են տվել, որ աշտարակի փորձարկումից հետո 10 քառակուսի կիլոմետր մակերեսով տարածքի օդը զգալիորեն մաքրվել է: Ի դեպ, նշենք, որ այս աշտարակը համարվում է իր տեսակի մեջ աշխարհում ամենաբարձրը: Աշտարակը կլանում է աղտոտված օդը հիմնային հատվածում տեղակայված ջերմոցների մասում, որտեղ օդը տաքանում է, իսկ հետագայում ֆիլտրվում աշտարակի մեջ մի քանի մակարդակներում և կրկին արտանետվում մթնոլորտ: Ի դեպ, արտանետված օդը պարունակում է 15 տոկոսով ավելի քիչ վնասակար նյութեր, քան մինչև մաքրվելը; Աշտարակի հիմնային մասում տեղադրված ջերմոցներն աշխատում են արևային էներգիայով տարվա ցանկացած եղանակի: Քանի որ առաջին նախագծի փորձարկումները դրական արդյունքներ են գրանցել, նախագծի հեղինակները նախատեսում են ևս 2 աշտարակ կառուցել 500 և 200 մետր բարձրությամբ, որոնք կկարողանան մաքրել մոտ 30 քառակուսի կիլոմետր տարածք, ինչը բավարար կլինի փոքր քաղաքների աղտոտված մթնոլորտի մաքրման նամար:

Չինաստանում մարդկային աչքի տեսքով հանրային գրադարան է կառուցվել: Ինչպես տեղեկացնում է The Dezeen պարբերականը, «Տյանցզին Բինհայ հանրային գրադարանի» կենտրոնական հատվածը նախագծված է հսկայական եռաչափ բիբի տեսքով, որն անցորդին է նայում շինության ապակյա դիմային հատվածից: Հինգհարկանի շինության մեջ հատակից մինչև տանիք տեղակայված են գրադարակներ, որոնք ձևավորում են ակնախոռոչը, իսկ կենտրոնում տեղակայված ապակյա հսկա գունդը ձևավորում է աչքի բիբը: Նշենք, որ գրադարակներն այնպես են նախագծված, որ այցելուները կարող են վերցնել գիրքը, նստել դարակների վրա, կարդալ և մյուս գրասերների հետ քննարկել կարդացածը: Նախագծային «ԷմՎիԱրԴիՎի» (MVRDV) ընկերությունն այս նախագծի մասին առաջին անգամ հայտարարել է 2016 թվականին, երբ շինարարությունը պաշտոնապես արդեն սկսված էր: Նշենք, որ այս հանրային գրադարանը կառուցվել է Բինհայ քաղաքում նոր մշակութային կենտրոնի կառուցման ծրագրի շրջանակներում: Կառուցապատման գլխավոր հատակագիծն իրականացրել է գերմանական «ՋիԷմՓի» ճարտարապետական ընկերությունը: 33.7 հազար քառակուսի մետր մակերեսով մշակութային կենտրոնի շինարարությունը ավարտվել է 3 տարվա ընթացքում, ինչը ռեկորդային է այս բարդության կառույցի իրականացման համար: Միգուցե այդ իսկ պատճառով շինարարության ընթացքում և ավարտից հետո որոշակի խնդիրներ են առաջացել: Մասնավորապես, կառուցապատող ընեկերության տեղական խումբը առանց գլխամասային գրասնեյակի հետ քննարկման չի կառուցել դեպի վերին գրադարակներ տանող սենյակները: Արդյունքում ընկերությունը ստիպված է եղել վերևի հատվածում տեղակայված գրադարակների վրա նկարելով այնպիսի տպավորություն ստեղծել, որ այնտեղ գրքեր են շարված: Հանրային գրադարանի ստորգետնյա հատվածում տեղակայված են գրքերի պահետսներ, առաջին հարկում երեխաների և ծերերի համար նախատեսված ընթերցասրահներ, երկրորդ և երրորդ հարկերում ընթերցասրահներ և հանգստի գոտիներ, իսկ ահա վերին հարկերում գտնվում են խորհրդակցությունների սենյակներ, գրասենյակներ, համակարգչային լսարաններ և 2 բացօթյա պատշգամբ՝ տեղակայված շինության տանիքին:

Սյսօր Երևանում տեղի ունեցավ Չինաստանի Ժողովրդական Հանրապետության Դեսպանության նոր տարածքի կառուցապատման հիմնարկեքի արարողությունը: Նոր տարածքը գտնվում է Ծովակալ Իսակովի 17/4 հասցեում՝ Իսակովի և Բագրատունյանց պողոտաների խաչմերուկի հարակից տարածքում՝ նախկին խաղողի այգիների տեղում: Հետաքրքիրն այն է, որ Չինաստանն իր նոր դեսպանության տարածքը ընտրել է ԱՄՆ-ի դեսպանության հարևանությամբ և այն կլինի երկրորդ խոշոր դեսպանությունը Հայաստանում՝ Միացյալ Նահանգների դեսպանությունից հետո: Դեսպանության տարածքը գրավում է մոտ 4 հեկտար մակերես և ներառում է իր մեջ ռազմանական ոստիկանություն տանող ճանապարհը՝ Իսակովի պողոտայի կողմից: Շինարարական աշխատանքներն իրականացնելու են Չինաստանից ժամանած շինարարները և ըստ նախնական տվյալների շինարարությունը կտևի մոտ 2 տարի: Այսօր Չինաստանի Ժողովրդական Հանրապետության Դեսպանության շենքը գտնվում է Բաղրամյան 12 հասցեում, որը դեռ 1992 թվականից տրամադրել է ՀՀ կառավարությունը ժամանակավոր օգտագործման հիմունքներով:

Չինական «Չայնա Ռեյլվեյ Քոնսթրաքշն Քորփորեյշնը» (China Railway Construction Corporation) և աֆրիկական «Ջեներալ Քոնսթրաքշն օֆ Կասաբլանկա» (The General Construction Company of Casablanca) ընկերությունը պայմանագիր են ստորագրել, որը նախատեսում է Մարոկկոյի մայրաքաղաք Ռաբաթում կառուցել Աֆրիկայի ամենաբարձր երկնաքերը, գրում է Xinhuanet օնլայն պարբերականը: Ըստ նախնական տվյալներ՝ չինական ընկերությունը պարտավորվել է ֆինանսավորել շինարարության 60 տոկոսը, որի բյուջեն կազմում է US$ 380 մլն, իսկ մնացած 40 տոկոսը պետք է ներդնի մարոկկական ընկերությունը: 55 հարկանի երկնաքերի բարձրությունը կկազմի 55 մետր: Այնտեղ կտեղակայվեն գրասենյակներ, հյուրանոցներ և լյուքս դասի բնակարաններ: Նշենք, որ այս շինությունը պետք է դառնա 2014 թվականին երկրի իշխանությունների կողմից ընդունված և 2014-2018 թվականների համար նախատեսված «Ռաբաթ՝ լույսի քաղաք, Մարոկկոյի մշակութային մայրաքաղաք» նախագծի հիմնական մասը: Վերոնշյալ նախագծի շրջանակներում այս երկնաքերից բացի Ռաբաթում նախատեսվում է կառուցել որոշ մշակութային կենտրոններ, այդ թվում՝ թատրոն, մշակույթի տուն, հնէաբանական թանգարան և Մարոկկոյի ազգային արխիվ: Ներկայումս Աֆրիկայի ամենաբարձր շինությունը գտնվում է Յոհաննեսբուրգում: «Քարլթոն Ցենթեր» (Carlton Center) երկնաքերի բարձրությունը կազմում է 225 մետր: Իսկ Մարոկկոյի ամենաբարձր երկնաքերը 115 մետր բարձրությամբ «Կասաբլանկա Թվին Սենթերն» (Casablanca Twin Center) է:

Այս ամիս չինական ZhuoDa ընկերությունը հանրությանն է ներկայացրել բավականին յուրօրինակ «հավաքովի» շինարարության մոդել, որն ամբողջ աշխարհի վրա անմոռանալի տպավորություն է թողել: Բանն այն է, որ չինական Սիան քաղաքում ընդամենը 3 ժամվա ընթացքում հավաքված ամբոխի առաջ հիմքից կառուցվել է երկհարկանի առանձնատուն, որը, ինչպես պնդում է կառուցապատող ընկերությունը, կարող է կանգուն մնալ 150 տարի: Նմանատիպ արագության գաղտնիքն այն է, որ առանձնատան 90 տոկոսը, անգամ ներքին հարդարումը, խողովակաշարը, սանտեխնիկան և կահույքը, նախապես հատուկ 3D տպիչի օգնությամբ կառուցվում է գործարանում: Արդյունքում գրեթե պատրաստ առանձնատունը բերվում է շինհրապարակ, որտեղ էլ հմուտ անձնակազմի օգնությամբ մանկական «լեգո» խաղի տարբերակով հավաքվում: Առանձնատան պատերը տպագրվում են հատուկ նյութից, որի բաղադրությունն ընկերությունը գաղտնի է պահում: Ինչպես պնդում է կառուցապատող ընկերությունը, շինարարության նման մեթոդն անհամեմատ մատչելի է և հնարավորություն է տալիս կառուցել 1 քառակուսի մետրը ընդամենը 400-480 ԱՄՆ դոլլարով: Քանի որ առանձնատան բոլոր հատվածները նախօրոք տպագրվում են գործարանում, ընկերությունը կարողանում է խուսափել շատ ծախսերից, առանց որոնց հնարավոր չէ ավանդական շինարարություն իրականացնել: Ստացվում է, որ նորարական մեթոդներով կառուցվող այս առանձնատները անհամեմատ մատչելի են: Նախագծի հեղինակների պնդմամբ, կոնստրուկցիաները կառուցվում են այնպիսի նյութերից, որոնք ստացվում են արդյունաբերական և գյուղատնտեսական թափոնների միախառնումից, այդ իսկ պատճառով չեն պարունակում բազմաթիվ վնասակար նյութեր, մասնավորապես՝ ֆորմալդեգիդ, ամոնիակ, ռադոն: Այս յուրօրինակ առանձնատունը կարող է դիմակայել մինչ 9 բալ երկրաշարժի, չվախենալ ջրից և հրդեհից: Բացի այդ առանձնատան պատերը կարող են ծածկված լինել տարբեր դեկորատիվ տեկստուրաներով, օրինակ՝ մարմար, փայտ, գրանիտ և այլն: Իսկ առողջ ապրելակերպի բավականին ակտիվ ջատագովները կարող են խնդրել կառուցապատողից նախապես պատրաստվող շինանյութի մեջ ավելացնել չինական դեղաբույսերի խառնուրդներ: ZhuoDa ընկերության գլխավոր ճարտարագետ Ան Յոնգլիանգը (An Yongliang) պնդում է, որ ավանդական եղականով նմանատիպ առանձնատուն կառուցելու համար անհրաժեշտ է մոտ 6 ամիս, այնինչ իրենց ընկերությունը դա անում է ընդամենը 10 օրում: Ի դեպ, այս տարվա հունվարին չինական WinSun ընկերությունը տպագրության համար հատուկ պատրաստված շինանյութից բավականին հաջող տպագրել է 5-հարկանի բնակելի շենք և 110 քառակուսի մետր մակերեսով առանձնատուն: