Այս ամիս չինական ZhuoDa ընկերությունը հանրությանն է ներկայացրել բավականին յուրօրինակ «հավաքովի» շինարարության մոդել, որն ամբողջ աշխարհի վրա անմոռանալի տպավորություն է թողել: Բանն այն է, որ չինական Սիան քաղաքում ընդամենը 3 ժամվա ընթացքում հավաքված ամբոխի առաջ հիմքից կառուցվել է երկհարկանի առանձնատուն, որը, ինչպես պնդում է կառուցապատող ընկերությունը, կարող է կանգուն մնալ 150 տարի: Նմանատիպ արագության գաղտնիքն այն է, որ առանձնատան 90 տոկոսը, անգամ ներքին հարդարումը, խողովակաշարը, սանտեխնիկան և կահույքը, նախապես հատուկ 3D տպիչի օգնությամբ կառուցվում է գործարանում: Արդյունքում գրեթե պատրաստ առանձնատունը բերվում է շինհրապարակ, որտեղ էլ հմուտ անձնակազմի օգնությամբ մանկական «լեգո» խաղի տարբերակով հավաքվում: Առանձնատան պատերը տպագրվում են հատուկ նյութից, որի բաղադրությունն ընկերությունը գաղտնի է պահում: Ինչպես պնդում է կառուցապատող ընկերությունը, շինարարության նման մեթոդն անհամեմատ մատչելի է և հնարավորություն է տալիս կառուցել 1 քառակուսի մետրը ընդամենը 400-480 ԱՄՆ դոլլարով: Քանի որ առանձնատան բոլոր հատվածները նախօրոք տպագրվում են գործարանում, ընկերությունը կարողանում է խուսափել շատ ծախսերից, առանց որոնց հնարավոր չէ ավանդական շինարարություն իրականացնել: Ստացվում է, որ նորարական մեթոդներով կառուցվող այս առանձնատները անհամեմատ մատչելի են: Նախագծի հեղինակների պնդմամբ, կոնստրուկցիաները կառուցվում են այնպիսի նյութերից, որոնք ստացվում են արդյունաբերական և գյուղատնտեսական թափոնների միախառնումից, այդ իսկ պատճառով չեն պարունակում բազմաթիվ վնասակար նյութեր, մասնավորապես՝ ֆորմալդեգիդ, ամոնիակ, ռադոն: Այս յուրօրինակ առանձնատունը կարող է դիմակայել մինչ 9 բալ երկրաշարժի, չվախենալ ջրից և հրդեհից: Բացի այդ առանձնատան պատերը կարող են ծածկված լինել տարբեր դեկորատիվ տեկստուրաներով, օրինակ՝ մարմար, փայտ, գրանիտ և այլն: Իսկ առողջ ապրելակերպի բավականին ակտիվ ջատագովները կարող են խնդրել կառուցապատողից նախապես պատրաստվող շինանյութի մեջ ավելացնել չինական դեղաբույսերի խառնուրդներ: ZhuoDa ընկերության գլխավոր ճարտարագետ Ան Յոնգլիանգը (An Yongliang) պնդում է, որ ավանդական եղականով նմանատիպ առանձնատուն կառուցելու համար անհրաժեշտ է մոտ 6 ամիս, այնինչ իրենց ընկերությունը դա անում է ընդամենը 10 օրում: Ի դեպ, այս տարվա հունվարին չինական WinSun ընկերությունը տպագրության համար հատուկ պատրաստված շինանյութից բավականին հաջող տպագրել է 5-հարկանի բնակելի շենք և 110 քառակուսի մետր մակերեսով առանձնատուն:

Այսօր նորագույն տեխնոլոգիաները հասել են զարգացման բավական բարձր մակարդակի և ընդգրկվել կյանքի յուրաքանչյուր ոլորտում: Տեխնոլոգիական զարգացումից և նորարարություններից անմասն չի մնացել նաև շինարարությունը: Եթե աշխարհահռչակ ճարտարապետ Անտոնիո Գաուդիին որևէ մեկն ասեր, որ իր գլուխգործոց «Սագրադա Ֆամիլիայի» շինարարությունն ավարտվելու է 3D տպիչների օգնությամբ, նա երևի կծիծաղեր: Սակայն փաստն այն է, որ այս նորագույն գործիքները բավականին հաջողությամբ ներդրվել են ժամանակակից շինարարության մեջ: 3D տպիչների օգնությամբ նախագծողները ստեղծել են հատուկ «հովացնող աղյուսներ» բնակարանների ներքին և արտաքին հարդարման համար, չինացի կառուցապատողներն արդեն հասցրել են 3D տպագրված 5 հարկանի բնակելի շենք և 110 քառակուսի մետր մակերեսով առանձնատուն կառուցել , իսկ ամերիկացի ճարտարապետ Ադամ Կուշներն էլ ծրագրում է մի ամբողջ 3D տպագրված կալվածք կառուցել: Սակայն տեխնոլոգիական զարգացումը շարունակում է առաջ գնալ, և այսքանով, թերևս, ոչինչ ավարտված չէ: Օրերս նիդեռլանդական «Հեյջմանս» (Heijmans) նորարական շինարարական ընկերությունը հայտարարել է 3D տպագրված հետիոտն կամուրջ կառուցելու նախագծի մասին: Ի դեպ, նշենք, որ հենց Նիդեռլանդներում է կառուցվել աշխարհի առաջին 3D տպագրված տունը, որի շինարարության ընթացքում այս ընկերությունն իր ակտիվ մասնակցությունն է ունեցել: Նորագույն կամուրջի նախագծի շուրջ այսօր աշխատում են Նիդեռլանդական 3 խոշորագույն և հայտնի ընկերություններ՝ «Հեյջմանս» նորարական շինարարական ընկերությունը, Յորիս Լարմանի (Joris Laarman) դիզայներական ընկերությունը և «ԷմԷքս3Դե» (MX3D) 3D տպիչներ նախագծող ընկերությունը: Պողպատյա հետիոտն կամուրջը, որը պետք է անցնի Նիդերլանդների մայրաքաղաքի ջրանցքներից մեկի վրայով, կպատրաստվի MX3D Metal հատուկ ռոբոտացված ձեռքի օգնությամբ: Գործնականում այս տեսակի ռոբոտը ղեկավարում է եռակցման գործընթացն ու մետաղի շարունակական մատակարարումը համատեղող սարքավորումը: Այսպիսով կամուրջը կկառուցվի հալեցրած մետաղի փոքր կաթիլներով` շարունակական զոդման միջոցով: Նման եղանակով ստացվող կառույցն ավելի ամուր է, քան առանձին մետաղյա կոնստրուկցիաներով կառուցվածը: Նախագծի հեղինակները համոզված են, որ այս նոր կամուրջը կարող է որոշակի փոփոխություններ մտցնել շինարարության կազմակերպման ավանդական ձևի մեջ: Բոլորին էլ արդեն հայտնի է, որ շինարարության այս տարբերակն առավել մատչելի է, օգտագործում է քիչ շինանյութ և առաջացնում է նվազագույն քանակությամբ շինարարական թափոններ: Բացի այդ «Հեյջմանս» ընկերության նորարական կառավարիչ Յուր վան դեր Վենը (Jurre van der Ven) պնդում է, որ շինարարության այս տարբերակը հնարավորություն կտա միաձուլել ծրագրի նախագծման և շինարարության փուլերը: Եթե ավանդական շինարարության ժամանակ ճարտարապետը ինչ-որ նախագիծ էր ներկայացնում, այնուհետև շինարարը կառուցում էր այն ինչ ինքն է պատկերացնում, ապա շինարարության 3D տպագրության ժամանակ այս 2 գործընթացները միաձուլվում են և ստացված արդյունքն էլ ավելի կատարյալ է լինում: Հետիոտն կամուրջի նախագծման աշխատանքներն իրականացնող դիզայներ Յորիս Լարմանն էլ պնդում է, որ այս ծրագիրը հնի և նորի յուրօրինակ համադրություն է լինելու, քանի որ նորարական կամուրջը կառուցվելու է Ամստերդամի հնագույն ջրանցքներից մեկի վրա: Կամուրջի շինարարության սկիզբը նախատեսված է այս տարվա սեպտեմբերի 15-ին: Հեղինակները պատրաստակամ են գործընթացը դարձնել հանրային, որպեսզի բոլորը կարողանան տեսնել՝ ինչպես է կերտվում ապագայի շինարարությունը: Աղբյուրներ՝ www.inhabitat.com; www.heijmans.nl

Օդագնացության և տիեզերական տարածության հետազոտությունների ազգային վարչությունը (NASA) և 3D տպագրության հարցերով զբաղվող ԱՄՆ ազգային Ինստիտուտը մրցույթ են հայտարարել, որը ենթադրում է 3D տպագրված տների կառուցում այնպիսի մեթոդներով և նյութերից, որպեսզի վերջիններս հնարավոր լինի տեղադրել Մարսի և արեգակնային համակարգի այլ մոլորակների վրա: Ըստ նախնական տվյալների՝ երկու փուլերով անցկացվող մրցույթի ընդհանուր բյուջեն կազմում է 2,25 մլն ԱՄՆ դոլար: Նախագծի առաջին փուլն արդեն սկսվել է և կտևի մինչև սեպտեմբերի 27-ը: Առաջին փուլի ընթացքում մրցույթի մասնակիցները պետք է մշակեն և ներկայացնեն այնպիսի նախագծեր, որոնք հնարավոր է կառուցել 3D տպագրական սարքերի միջոցով օգտագործելով բացառապես տեղական շինանյութ: Բնակելի տարածքների շինարարության ժամանակ մասնակիցները կարող են օգտագործել նաև այն տեխնիկայի մասերը, որոնց շնորհիվ տպագրական սարքերը տեղափոխվելու են այլ մոլորակներ: Առաջին փուլի ընթացքում ընտրվելու են հաղթող 30 նախագծերը, նրանցից էլ՝ լավագույնը, ով կստանա սահմանված 50 հազար ԱՄՆ դոլար մրցանակը: Սեպտեմբերի 26-ից մեկնարկելու է նախագծի երկրորդ փուլը, որը կազմակերպվելու է 2 ենթափուլով: Առաջին ենթափուլը ենթադրում է 3D տեխնոլոգիաների ստեղծում, որոնք կօգտագործեն տեղական՝ մոլորակային շինանյութ: Երկրորդ ենթափուլի ընթացքում մրցույթի մասնակիցները տեղական շինանյութով պետք է կկառուցեն մրցույթի ընթացքում հաղթած բնակելի տարածքը: Յուրաքանչյուր ենթափուլի հաղթողը կստանա համապատասխանաբար 1,1 մլն ԱՄՆ դոլար:

Անցած տարի ճարտարապետ Ադամ Կուշները (Adam Kushner) հայտարարել էր իր նախագծի մասին՝ կառուցել 3D-տպագրված տուն Նյու Յորք նահանգի փոքրիկ Գարդիներ քաղաքում: Վերջերս էլ «Դի-Շեյփ» (D-Shape) ընկերության գլխավոր ճարտարապետ և գործադիր տնօրեն Ջեյմս Վոլֆը (James Wolff) և ճարտարապետ Կուշները Նյու Յորքում «3D տպագրության շաբաթ» միջոցառումների շրջանակներում հանրությանն են ներկայացրել արդեն ամբողջությամբ ավարտված 3D տպագրված անշարժ գույքի նախագիծը: Նախագծի հանրային ներկայացման ժամանակ բավականին մանրամասներ հայտնի դարձան; Բանն այն է, որ Կուշները նախատեսում է կառուցել ոչ միայն առանձնատուն, այլ մի ամբողջ անշարժ գույք: Ըստ նախնական տվյալների՝ այն բաղկացած կլինի բաց և փակ լողավազաններից, ծածկով ավտոկայանատեղիից և 4 ննջասենյակ պարունակող 223 քառակուսի մետր ընդհանուր մակերերսով առանձնատնից: Չնայած նախագիծը դեռ վերջնական պատրաստ չէ, և անելիքներ կան, յուրօրինակ անշարժ գույքի կառուցման վայրն արդեն հայտնի է: Դեռևս 3 տարի առաջ Կուշները և նրա կինը Նյու Յորքից 137 կիլոմետր հեռավորության վրա գնել են 20 հազար քառակուսի մետր մակերեսով հողատարածք, որտեղ էլ նախատեսում են կառուցել անշարժ գույքը: Ինչպես մանրամասնում է Կուշները, այս հողատարածքի ժայռային բնապատկերը ոգեշնչել է նրան նախագծման աշխատանքների ընթացքում: Նա նաև համոզված է, որ հողատարածքում գտնվող բոլոր նյութերը հնարավոր կլինի օգտագործել որպես շինանյութ: Ամբողջ անշարժ գույքը նախատեսվում է տպագրել ձևափոխված և ոչ լայնածավալ Էնրիկո Դինիի (Enrico Dini) «Դի-Շեյփ» (D-Shape) տպիչ սարքերի օգնությամբ: Այս տպիչ սարքերը տարբերվում են սովորական խտացված մոդելներից և հնարավորություն կտան Կուշներին տպագրել անհրաժեշտ շինանյութը տեղական նյութերից, ինչպես, օրինակ՝ ավազից: Շինարարական աշխատանքների նախնական փուլի համար ճարտարապետը սպասում է Իտալիայից առաքվող 3D տպիչ սարքին; Ըստ նախնական տվյալների՝ սարքը տեղում կլինի արդեն այս ամսվա վերջին: Հունիսին հնարավոր կլինի սկսել փորձարարական աշխատանքները, որոնց հաջողության դեպքում ճարտարապետական խումբը կսկսի բուն շինարարական աշխատանքները: Նախատեսվում է աշխատանքները սկսել փակ լողավազանների և ավտոկայանատեղիի կառուցումից: Հիմնական և բարդ հատվածը՝ 223 քառակուսի մետր մակերեսով առանձնատան կառուցումն է: Կուշները նախագծի կարևորությունը բացատրում է վերջինիս լայնածավալ հնարավորություններով: Նա համոզված է, իր նախագծի հաջողության պարագայում հնարավոր կլինի այս մեթոդն օգտագործել հասանելի բնակարանների, օթևանատների, կամուրջների և այլ կառույցների շինարարության ժամանակ: Նշենք, որ տարեսկզբին չինական WinSun ընկերությունը տպագրության համար հատուկ պատրաստված շինանյութից բավականին հաջող տպագրել է 5-հարկանի բնակելի շենք և 110 քառակուսի մետր մակերեսով առանձնատուն : Անցած տարի էլ «ԴիՅուԷս Արքիթեքթս» (DUS Architects) ճարտարապետական բյուրոն Նիդեռլանդներից «բիոպլաստիկ»-ի օգնությամբ փոքրիկ 3D տպագրված տուն է կառուցել:

Հանրահայտ «Սագրադա Ֆամիլիա» (Sagrada Familia թարգմ. - Սուրբ Ընտանիքի Եկեղեցի) տաճարի շինարարությունը ձգվում է ավելի քան 130 տարի, և միայն 21-րդ դարի նորագույն տեխնոլոգիաների, մասնավորապես՝ 3D-տպիչների, շնորհիվ հնարավորություն է ստեղծվել 19-րդ դարի կառույցի շինարարությունն ավարտել 2026 թ-ին: Կարելի է հավաստել, որ «Սագրադա Ֆամիլիան» աշխարհում ամենաերկար շինարարական գործընթաց ունեցող կառույցներից մեկն է: Շինարարական աշխատանքները սկսվել են դեռևս 1882 թ-ին, իսկ 1926 թ-ին կառույցի գլխավոր ճարտարապետի մահվան ժամանակ կառուցվել էր տաճարի ընդամենը մեկ քառորդ մասը; Ինչպես տեղեկացնում է BBC լրատվական գործակալությունը, չնայած հանրահայտ տաճարի արտաքին ձևավորումն անավարտ է, և դեռ շատ անելիք կա Գաուդիի նախագիծը կյանքի կոչելու համար, այնուամենայնիվ, այս գլուխգործոցն բաց է հանրության առաջ: «Սագրադա Ֆամիլիա» տաճարի նախագիծը երկարատև շինարարական գործընթացի և գերազանց նախագծի շնորհիվ իր գոյության ընթացքում բազմաթիվ նախագծողների և ճարտարապետների ուշադրության կենտրոնում է եղել: Այսօր շատերն են ուրախ, որ նորագույն տեխնոլոգիաները հնարավորություն են տալիս ժամանակակից ճարտարապետական թիմին ավարտել տաճարի շինարարությունը բնօրինակին հնարավորինս մոտ: Նախագծի ներկայիս ղեկավարները շինարարական գործընթացում 3D-տեխնոլոգիաները սկսել են օգտագործել 2001 թ-ից, սակայն վերջին տարիներին այս տեխնոլոգիաների արագ զարգացումն էլ ավելի արագ թափ հաղորդեցին շինարարական աշխատանքերին: Նախագծի գլխավոր ճարտարապետ Ջորդի Քոլը (Jordi Coll) պնդում է, որ Գաուդին անձամբ կողմ կլիներ 3D տեխնոլոգիաների օգտագործմանը ճարտարապետության մեջ: Եթե նա այսօր կենդանի լիներ, նա միանշանակ առավելագույնս կօգտագործեր 3D տեխնոլոգիաներն իր տաճարի շինարարության ժամանակ, քանի որ դեռևս 19-րդ դարում նրա շինությունը նախագծված էր եռաչափ տարածության մեջ: «Սագրադա Ֆամիլիա» տաճարի շինարարական և ճարտարապետական թիմն ունի իր սեփական տեխնիկական ստուդիան, որտեղ տեղադրված Է 2 հատ 3D-տպիչ: Տպիչները հիմնականում օգտագործվում են տաճարի բնօրինակ հատվածների վերակառուցման համար: Բնօրինակ գիպսե մոդելներՆ ավերվել են Իսպանիայում քաղաքացիական պատերազմի ժամանակ: Ճարտարապետական թիմն ամեն ինչ անում է, որ նորագույն տեխնոլոգիաների օգնությամբ կարողանա վերստեղծել Գաուդիի բնօրինակը: Տաճարի այցելուներն այսօր հիանում են կատարված աշխատանքով և վստահ են, որ թիմը շինարարությունը կհասցնի իր տրամաբանական և գերազանց ավարտին: