Հանրահայտ «Սագրադա Ֆամիլիա» (Sagrada Familia թարգմ. - Սուրբ Ընտանիքի Եկեղեցի) տաճարի շինարարության ավարտի մոտավոր տարեթիվն արդեն հայտնի է: Ինչպես պնդում է բրիտանական The Independent պարբերականը՝ հղում կատարելով նախագծի ներկայիս ճարտարապետ Ջորդի Ֆաուլին (Jordi Fauli), սուրբ տաճարն ամբողջությամբ պատրաստ կլինի 2030-2032 թթ-ին: Իսկ ահա արդեն 2026 թվականին աշխարհի ամենահայտնի երկար կառուցվող շենքը հավակնում է դառնալ ամենաբարձր եկեղեցին աշխարհում և ամենաբարձր շենքը Բարսելոնայում: Այս յուրօրինակ շենքը կառուցվում է արդեն 1 դարից ավել՝ այն սկսել են կառուցել 1882 թվականին և չեն ավարտել մինչ օրս: Սուրբ տաճարի ներկայիս ճարտարապետը նախատեսում է եկեղեցու մաս կազմող 6 աշտարակների շինարարությունն ավարտել Անտոնիո Գաուդիի մահվան 100 ամյա տարելիցին ընդառաջ, մինչև 2026 թվականի հունիսի 10-ը, իսկ ահա տաճարն ամբողջությամբ պատրաստ կլինի արդեն 2030-2032 թթ-ին: Նշենք, որ դեռևս այս տարվա մարտին Ջորդի Ֆաուլին հայտարարել էր, որ սուրբ տաճարի շինարարության ընթացքում 3D տպիչների ներդրումը հնարավորություն կտա ավելի արագացնել վերջինիս շինարարությունը և հնարավորինս հավատարիմ մնալ Գաուդիի նախնական գծագրերին «Սագրադա Ֆամիլիա» տաճարի կենտրոնական շենքի շուրջը կկառուցվեն 6 աշտարակներ, որոնցից մեկը խորհրդանշելու է Հիսուս Քրիստոսին, մեկը կույս Մարիամին, իսկ մյուս 4-ն էլ առաքյալներին: Ամենաբարձր աշտարակը կլինի Հիսուս Քրիստոսին նվիրվածը, որի բարձրությունը կկազմի 172,5 մետր: Այս աշտարակը հնարավորություն կտա սուրբ տաճարին դառնալ աշխարհի ամենաբարձր եկեղեցին: Այսօր այդ ռեկորդը պատկանում է գերմանական Ուլմ քաղաքում գտնվող «Մյունսթեր» գոթական տաճարին, որի բարձրությունը կազմում է մոտ 161,5 մետր: Վերջինս կառուցվել է 498 տարի՝ 1392-1890 թթ-ին: Ֆաուլիի խոսքերով այսօր «Սագրադա Ֆամիլիա» տաճարն ավարտված է 70 տոկոսով; Նշենք, որ տաճարի շինարարությունը ֆինանսավորվում է զբոսաշրջիկների կողմից վճարված այցեվճարների միջոցով: Տարեկան այս յուրօրինակ եկեղեցի է այցելում ավելի քան 3,2 մլն մարդ, որոնց կողմից վճարված գումարները զգալի մաս են կազմում են տարեկան 28 մլն ԱՄՆ դոլլար բյուջեով շինարարության համար: Նշենք նաև, որ 2005 թվականից «Սագրադա Ֆամիլիան» ներառված է ՅՈՒՆԵՍԿՕ-ի մշակութային ժառանգության ցանկում:

Հանրահայտ «Սագրադա Ֆամիլիա» (Sagrada Familia թարգմ. - Սուրբ Ընտանիքի Եկեղեցի) տաճարի շինարարությունը ձգվում է ավելի քան 130 տարի, և միայն 21-րդ դարի նորագույն տեխնոլոգիաների, մասնավորապես՝ 3D-տպիչների, շնորհիվ հնարավորություն է ստեղծվել 19-րդ դարի կառույցի շինարարությունն ավարտել 2026 թ-ին: Կարելի է հավաստել, որ «Սագրադա Ֆամիլիան» աշխարհում ամենաերկար շինարարական գործընթաց ունեցող կառույցներից մեկն է: Շինարարական աշխատանքները սկսվել են դեռևս 1882 թ-ին, իսկ 1926 թ-ին կառույցի գլխավոր ճարտարապետի մահվան ժամանակ կառուցվել էր տաճարի ընդամենը մեկ քառորդ մասը; Ինչպես տեղեկացնում է BBC լրատվական գործակալությունը, չնայած հանրահայտ տաճարի արտաքին ձևավորումն անավարտ է, և դեռ շատ անելիք կա Գաուդիի նախագիծը կյանքի կոչելու համար, այնուամենայնիվ, այս գլուխգործոցն բաց է հանրության առաջ: «Սագրադա Ֆամիլիա» տաճարի նախագիծը երկարատև շինարարական գործընթացի և գերազանց նախագծի շնորհիվ իր գոյության ընթացքում բազմաթիվ նախագծողների և ճարտարապետների ուշադրության կենտրոնում է եղել: Այսօր շատերն են ուրախ, որ նորագույն տեխնոլոգիաները հնարավորություն են տալիս ժամանակակից ճարտարապետական թիմին ավարտել տաճարի շինարարությունը բնօրինակին հնարավորինս մոտ: Նախագծի ներկայիս ղեկավարները շինարարական գործընթացում 3D-տեխնոլոգիաները սկսել են օգտագործել 2001 թ-ից, սակայն վերջին տարիներին այս տեխնոլոգիաների արագ զարգացումն էլ ավելի արագ թափ հաղորդեցին շինարարական աշխատանքերին: Նախագծի գլխավոր ճարտարապետ Ջորդի Քոլը (Jordi Coll) պնդում է, որ Գաուդին անձամբ կողմ կլիներ 3D տեխնոլոգիաների օգտագործմանը ճարտարապետության մեջ: Եթե նա այսօր կենդանի լիներ, նա միանշանակ առավելագույնս կօգտագործեր 3D տեխնոլոգիաներն իր տաճարի շինարարության ժամանակ, քանի որ դեռևս 19-րդ դարում նրա շինությունը նախագծված էր եռաչափ տարածության մեջ: «Սագրադա Ֆամիլիա» տաճարի շինարարական և ճարտարապետական թիմն ունի իր սեփական տեխնիկական ստուդիան, որտեղ տեղադրված Է 2 հատ 3D-տպիչ: Տպիչները հիմնականում օգտագործվում են տաճարի բնօրինակ հատվածների վերակառուցման համար: Բնօրինակ գիպսե մոդելներՆ ավերվել են Իսպանիայում քաղաքացիական պատերազմի ժամանակ: Ճարտարապետական թիմն ամեն ինչ անում է, որ նորագույն տեխնոլոգիաների օգնությամբ կարողանա վերստեղծել Գաուդիի բնօրինակը: Տաճարի այցելուներն այսօր հիանում են կատարված աշխատանքով և վստահ են, որ թիմը շինարարությունը կհասցնի իր տրամաբանական և գերազանց ավարտին:

Նոյեմբերի 24-ին Վատիկանի սուրբ Պետրոս հրապարակում գտնվող Բերնինիի սյունաշարքի ցուցասրահում բացվել է աշխարհահռչակ ճարտարապետ Անտոնիո Գաուդիին և նրա սքանչելի Սուրբ ընտանիքի Տաճարին նվիրված ցուցահանդես, հաղորդում է The Vatican Today պարբերականը: Ցուցահանդեսն այցելուների առաջ բաց կլինի մինչև 2012 թ-ի հունվարի 15-ը: Ցուցահանդեսը զբաղեցնում է մոտ 800 քառակուսի մետր տարածք: Այցելուները ներկայացված աշխատությունների միջոցով հնարավորություն ունեն ծանոթանալ «Սուրբ ընտանիքի» բազիլիկի պատմությանը, իմանալ դրա կառուցման բոլոր փուլերի մասին և պատկերացնել վերջնական տեսքը շինարարության ավարտից հետո: Ցուցահանդեսում ներկայացված են Գաուդիի աշխատանքների լուսանկարները, մակետները, տեսաձայնային նյութեըը: Նշենք, որ ներկայացվող բոլոր նյութերը բերված են Բարսելոնայից՝ Սուրբ ընտանիքի տաճարի ցուցասրահից: Վատիկանում ներկայացված ցուցահանդեսին, բացի սուրբ տաճարից, ներկայացված են նաև Գաուդիի այլ աշխատանքներ: Սուրբ ընտանիքի տաճարի շինարարությունը սկսվել է դեռևս 1882 թ-ին, իսկ շինարարության ավարտը դեռևս հայտնի չէ: Գաուդին շինարարության վրա աշխատել է իր կյանքի 43 տարիների ընթացքում, սակայն այդ ժամանակահատվածում տաճարի միայն մի փոքր մասն է կառուցվել: Գաուդիի մահից հետո, բազում ճարտարապետներ են շարունակվել նրա աշխատանքը, և բոլորն էլ հայտարարել են, որ կպահպանեն Գաուդիի ոճը: Այսօր տաճարի մակերեսն արդեն 3 անգամ գերազանցում է նախագծի նախնական չափերը: Նախատեսված 18 աշտարակներից ավարտված են միայն 8-ը: Փորձագետները կանխատեսում են, որ տաճարի շինարարությունը կավարտվի մոտ 20 տարուց:

Բարսելոնյան «Սագրադա Ֆամիլիա» տաճարի (Sagrada Familia), կամ էլ «Սուրբ Ընտանիքի քավության մայր տաճարի» շինարարությունը կարող է ավարտվել 2026 թ-ին, կառուցումը սկսելուց 140 տարի անց, տաճարի ճարտարապետ Անտոնիո Գաուդիի (Antoni Gaudí) մահվան 100 ամյա տարելիցին, տեղեկացնում է The Guardian կայքը, վկայակոչելով տաճարի կառուցման խորհրդի ղեկավար Խուան Ռիգոլի (Joan Rigol) խոսքերը: Տաճարի շինարարությունը սկսվել է 1882 թ-ին և շարունակվում է մինչ այսօր, քանի որ այն իրականացվում է բարեգործությունների շնորհիվ: Շատերն են կարծիք հայտնել, որ շինարարությունը ձգձգվում է, սակայն մի անգամ, նկատի ունենալով աստծուն, Գաուդին հայտարարել է. «իմ հաճախորդը չի շտապում»: Նախկինում տաճարը ստացել է նաև «Աղքատների տաճար» (the cathedral of the poor) անվանումը, քանի որ Գաուդին ինքը դիմում էր բազմաթիվ մարմինների՝ խնդրելով ֆինանսավորել տաճարի շինարարությունը: Այսօր, The Guardian-ի տվյալներով, տաճարի շինարարությամբ զբաղվող խորհուրդը տարեկան ստանում է միջինը 500 հազար եվրո: Անցած տարի Հռոմի Պապ Բենեդիկտոս XVI –ի այցի ժամանակ տաճարի տանիքն արդեն պատրաստ էր, և նա կարողացավ օծել տաճարը: Սակայն ապրիլին չարագործի կողմից հրդեհված տաճարը մեծ վնասներ է կրում, իսկ հրդեհի հետևանքները մինչ օրս ամբողջությամբ վերացված չեն: Տաճարի ներկայիս ճարտարապետ Ջորդի Բոնետի (Jordi Bonet) խոսքերով, հրդեհի հասցրած վնասը սպասվածից շատ ավելին էր: «Մեր նպատակն է ավարտել 6 կենտրոնական աշտարակների շինարարությունը, որոնցից 5-ն արդեն կառուցման փուլում են», - հայտարարել է Ռիգոլը, ավելացնելով՝ եթե հնարավոր չլինի տաճարն ավարտել Գաուդիի մահվան 100 ամյա տարելիցին, ապա 2 տարի անց այն պատրաստ կլինի: 6-րդ աշտարակը կունենա 170 մետր բարձրություն և այնտեղ կտեղադրվի վերելակ, որպեսզի զբոսաշրջինկերը կարողանան տանիք բարձրանալ: «Սագրադա Ֆամիլիան»՝ Հռոմի Կաթոլիկ եկեղեցուն պատկանող մայր տաճարը, գտնվում է Կատալոնիայի մայրաքաղաք Բարսելոնայում: Տաճարի նախագծի հեղինակն է աշխարհի ամենատաղանդավոր ճարտարապետներից մեկը՝ Անտոնիո Գաուդին (1852–1926թթ): Չնայած նրան, որ տաճարի շինարարությունը դեռ ավարտված չէ, Բարսելոնայի Սուրբ Ընտանիքի եկեղեցին Անտոնիո Գաուդիի 6 այլ ստեղծագործությունների հետ միասին գրանցված է UNESCO-ի համաշխարհային մշակույթային ժառանգության ցանկում: (https://www.building.am/arm/page.php?id=100) Ճարտարապետ Գաուդին տաճարի շինարարությանն է նվիրել իր կյանքի վերջին տարիները, և նրա մահվան ժամանակ նախագծի մեկ չորրոդն Էր միայն ավարտված: 1926 թ-ին նա մահացել է՝ վրաերթի ենթարկվելով № 30 տրամվայի կողմից, տաճար գնալու ճանապարհին: Բժիշկները միայն մի քանի ժամ անց են կարողացել պարզել աշխարհահռչակ ճարտարապետի ինքնությունը, իսկ տրամվայի վարորդին թվացել է, որ նա ինչ-որ հարբած թափառականի է վրաերթի ենթարկել: