Հանրահայտ «Սագրադա Ֆամիլիա» (Sagrada Familia թարգմ. - Սուրբ Ընտանիքի Եկեղեցի) տաճարի շինարարության ավարտի մոտավոր տարեթիվն արդեն հայտնի է: Ինչպես պնդում է բրիտանական The Independent պարբերականը՝ հղում կատարելով նախագծի ներկայիս ճարտարապետ Ջորդի Ֆաուլին (Jordi Fauli), սուրբ տաճարն ամբողջությամբ պատրաստ կլինի 2030-2032 թթ-ին: Իսկ ահա արդեն 2026 թվականին աշխարհի ամենահայտնի երկար կառուցվող շենքը հավակնում է դառնալ ամենաբարձր եկեղեցին աշխարհում և ամենաբարձր շենքը Բարսելոնայում: Այս յուրօրինակ շենքը կառուցվում է արդեն 1 դարից ավել՝ այն սկսել են կառուցել 1882 թվականին և չեն ավարտել մինչ օրս: Սուրբ տաճարի ներկայիս ճարտարապետը նախատեսում է եկեղեցու մաս կազմող 6 աշտարակների շինարարությունն ավարտել Անտոնիո Գաուդիի մահվան 100 ամյա տարելիցին ընդառաջ, մինչև 2026 թվականի հունիսի 10-ը, իսկ ահա տաճարն ամբողջությամբ պատրաստ կլինի արդեն 2030-2032 թթ-ին: Նշենք, որ դեռևս այս տարվա մարտին Ջորդի Ֆաուլին հայտարարել էր, որ սուրբ տաճարի շինարարության ընթացքում 3D տպիչների ներդրումը հնարավորություն կտա ավելի արագացնել վերջինիս շինարարությունը և հնարավորինս հավատարիմ մնալ Գաուդիի նախնական գծագրերին «Սագրադա Ֆամիլիա» տաճարի կենտրոնական շենքի շուրջը կկառուցվեն 6 աշտարակներ, որոնցից մեկը խորհրդանշելու է Հիսուս Քրիստոսին, մեկը կույս Մարիամին, իսկ մյուս 4-ն էլ առաքյալներին: Ամենաբարձր աշտարակը կլինի Հիսուս Քրիստոսին նվիրվածը, որի բարձրությունը կկազմի 172,5 մետր: Այս աշտարակը հնարավորություն կտա սուրբ տաճարին դառնալ աշխարհի ամենաբարձր եկեղեցին: Այսօր այդ ռեկորդը պատկանում է գերմանական Ուլմ քաղաքում գտնվող «Մյունսթեր» գոթական տաճարին, որի բարձրությունը կազմում է մոտ 161,5 մետր: Վերջինս կառուցվել է 498 տարի՝ 1392-1890 թթ-ին: Ֆաուլիի խոսքերով այսօր «Սագրադա Ֆամիլիա» տաճարն ավարտված է 70 տոկոսով; Նշենք, որ տաճարի շինարարությունը ֆինանսավորվում է զբոսաշրջիկների կողմից վճարված այցեվճարների միջոցով: Տարեկան այս յուրօրինակ եկեղեցի է այցելում ավելի քան 3,2 մլն մարդ, որոնց կողմից վճարված գումարները զգալի մաս են կազմում են տարեկան 28 մլն ԱՄՆ դոլլար բյուջեով շինարարության համար: Նշենք նաև, որ 2005 թվականից «Սագրադա Ֆամիլիան» ներառված է ՅՈՒՆԵՍԿՕ-ի մշակութային ժառանգության ցանկում:

Հանրահայտ «Սագրադա Ֆամիլիա» (Sagrada Familia թարգմ. - Սուրբ Ընտանիքի Եկեղեցի) տաճարի շինարարությունը ձգվում է ավելի քան 130 տարի, և միայն 21-րդ դարի նորագույն տեխնոլոգիաների, մասնավորապես՝ 3D-տպիչների, շնորհիվ հնարավորություն է ստեղծվել 19-րդ դարի կառույցի շինարարությունն ավարտել 2026 թ-ին: Կարելի է հավաստել, որ «Սագրադա Ֆամիլիան» աշխարհում ամենաերկար շինարարական գործընթաց ունեցող կառույցներից մեկն է: Շինարարական աշխատանքները սկսվել են դեռևս 1882 թ-ին, իսկ 1926 թ-ին կառույցի գլխավոր ճարտարապետի մահվան ժամանակ կառուցվել էր տաճարի ընդամենը մեկ քառորդ մասը; Ինչպես տեղեկացնում է BBC լրատվական գործակալությունը, չնայած հանրահայտ տաճարի արտաքին ձևավորումն անավարտ է, և դեռ շատ անելիք կա Գաուդիի նախագիծը կյանքի կոչելու համար, այնուամենայնիվ, այս գլուխգործոցն բաց է հանրության առաջ: «Սագրադա Ֆամիլիա» տաճարի նախագիծը երկարատև շինարարական գործընթացի և գերազանց նախագծի շնորհիվ իր գոյության ընթացքում բազմաթիվ նախագծողների և ճարտարապետների ուշադրության կենտրոնում է եղել: Այսօր շատերն են ուրախ, որ նորագույն տեխնոլոգիաները հնարավորություն են տալիս ժամանակակից ճարտարապետական թիմին ավարտել տաճարի շինարարությունը բնօրինակին հնարավորինս մոտ: Նախագծի ներկայիս ղեկավարները շինարարական գործընթացում 3D-տեխնոլոգիաները սկսել են օգտագործել 2001 թ-ից, սակայն վերջին տարիներին այս տեխնոլոգիաների արագ զարգացումն էլ ավելի արագ թափ հաղորդեցին շինարարական աշխատանքերին: Նախագծի գլխավոր ճարտարապետ Ջորդի Քոլը (Jordi Coll) պնդում է, որ Գաուդին անձամբ կողմ կլիներ 3D տեխնոլոգիաների օգտագործմանը ճարտարապետության մեջ: Եթե նա այսօր կենդանի լիներ, նա միանշանակ առավելագույնս կօգտագործեր 3D տեխնոլոգիաներն իր տաճարի շինարարության ժամանակ, քանի որ դեռևս 19-րդ դարում նրա շինությունը նախագծված էր եռաչափ տարածության մեջ: «Սագրադա Ֆամիլիա» տաճարի շինարարական և ճարտարապետական թիմն ունի իր սեփական տեխնիկական ստուդիան, որտեղ տեղադրված Է 2 հատ 3D-տպիչ: Տպիչները հիմնականում օգտագործվում են տաճարի բնօրինակ հատվածների վերակառուցման համար: Բնօրինակ գիպսե մոդելներՆ ավերվել են Իսպանիայում քաղաքացիական պատերազմի ժամանակ: Ճարտարապետական թիմն ամեն ինչ անում է, որ նորագույն տեխնոլոգիաների օգնությամբ կարողանա վերստեղծել Գաուդիի բնօրինակը: Տաճարի այցելուներն այսօր հիանում են կատարված աշխատանքով և վստահ են, որ թիմը շինարարությունը կհասցնի իր տրամաբանական և գերազանց ավարտին:

Անցած տարեվերջին Արաբական Միացյալ Էմիրությունների մայրաքաղաք Աբու-Դաբիում ավելի քան 1000 հայերի առաջ իր դռներն է բացել առաջին հայկական եկեղեցին: Եկեղեցին կառուցված է հայկական ավանդույթներին և ճարտապետական ոճին համահունչ: Եկեղեցական համալիրը բաղկացած է 3 կառույցներից, որոնց ընդհանուր մակերեսը կազմում է 2475 քառակուսի մետր: Այս 3 կառույցները դասավորված են կամարաձև՝ կենտրոնում գտնվում է արքեպիսկոպոսությունը, աջ մասում եկեղեցու հիմնական շենքն է, իսկ ձախ մասում գտնվում է մասնակիորեն ապակուց կառուցված և ամբողջությամբ հայկական այբուբենով զարդարված 3-րդ մասնաճյուղը: Այս շենքի դիմաց տեղադրված է նաև Մեսրոպ Մաշտոցի արձանը: Նախագծի իրականացման առաջին քայլը կատարվել է 2005 թ-ին, երբ Շեյխ Մուհամեդ բին Զայեդը հատուկ հրաման արձակեց և հայկական եկեղեցու կառուցման համար հողատարածք նվիրաբերեց: Այնուհետև նախագծի հեղինակները սկսեցին Արաբական Միացյալ Էմիրությունների և Քուվեյթի հայկական համայնքներում նվիրատվություններ հավաքել: Եկեղեցական համալիրի շինարարությունը պաշտոնապես մեկնարկեց 2012 թ-ին:

Կիևում 2014թ. կատարվել է հայկական մայր տաճարի կառուցման զգալի ծավալի աշխատանք: AnalitikaUA.net-ին Ուկրաինայի հայերի միությունից հայտնել են, որ մեծ ծավալով աշխատանք է կատարվել իշխանությունների կողմից եկեղեցու համար հատկացված հողատարածքում: Կիևում հայկական մայր տաճարի շինարարության մասին որոշումն ընդունվել էր 2012 թ., սակայն շինարարական աշխատանքները հաջողվել է սկսել միայն մի շարք կարևոր հարցեր լուծելուց հետո: Ավելի վաղ հաղորդվել էր, որ եկեղեցաշինությունը Ուկրաինայի հայերի միության գործունեության հիմնական ուղղվածություններից մեկն է: Ըստ ՈՒՀՄ-ի ղեկավար Վիլեն Շատվորյանի՝ եկեղեցիների շինարարությունը թույլ կտա իրականացնել հայկական սփյուռքի գլխավոր նպատակներից մեկը՝ համակողմանի ներկայացնել հայկական մշակույթն Ուկրաինայի ժողովրդին:

Նոյեմբերի 16-ին Վրինդավան (Vrindavan) հնդկական քաղաքում տեղի կունենա «Շրի Կրիշնա» (Sri Krishna) տաճարի հիմնարկեքի հանդիսավոր արարողությունը: Ըստ նախնական տվյալների՝ տաճարի բարձրությունը կկազմի 213 մետր, իսկ շինարարության ավարտից հետո այն կդառնա ամենաբարձրն աշխարհում: Տաճարի հիմնային աշխատանքերը վաղուց են սկսվել: Ինչպես պնդում են նախագծի հեղինակները, շինարարության ընթացքում կօգտագործվեն նորագույն տեխնոլոգիաներ և ճարտարագիտական մոտեցումներ, որպեսզի այս յուրօրինակ տաճարին ապահովեն ամենաքիչը 500 տարվա կյանք: Նախագծի ընդհանուր բյուջեն գնահատվում է 49 մլն ԱՄՆ դոլար, իսկ շինարարության ժամկետը՝ 5 տարի: Նախագծի իրականացմամբ զբաղվում է «Կրիշնայի գիտակցության միջազգային համայնքը» (ISKCON) Բանգալորից և աշխարհի խոշորագույն հասարակական «Ակշայա Պատրա» (Akshaya Patra) կազմակերպությունը: Ի դեպ, վերջինս ապահովում է միլիոնից ավել դպրոցականների ամենօրյա կերակրման ծրագիրը երկրում: Այս յուրօրինակ տաճարն իր մեջ կհամադրի ինչպես հնդկական, այնպես էլ ժամանակակից ճարտարապետության տարրեր: Տաճարի շուրջը կվերականգնվեն Վինդավան քաղաքում գտնվող 12 անտառները, իսկ Յամունա սուրբ գետի ջուրը պոմպերի օգնությամբ կբերվի դեպի փոքրիկ գետակներ, որպեսզի այցելուները կարողանան նավակներով զբոսնել: