Հանրահայտ «Սագրադա Ֆամիլիա» (Sagrada Familia թարգմ. - Սուրբ Ընտանիքի Եկեղեցի) տաճարի շինարարության ավարտի մոտավոր տարեթիվն արդեն հայտնի է: Ինչպես պնդում է բրիտանական The Independent պարբերականը՝ հղում կատարելով նախագծի ներկայիս ճարտարապետ Ջորդի Ֆաուլին (Jordi Fauli), սուրբ տաճարն ամբողջությամբ պատրաստ կլինի 2030-2032 թթ-ին: Իսկ ահա արդեն 2026 թվականին աշխարհի ամենահայտնի երկար կառուցվող շենքը հավակնում է դառնալ ամենաբարձր եկեղեցին աշխարհում և ամենաբարձր շենքը Բարսելոնայում: Այս յուրօրինակ շենքը կառուցվում է արդեն 1 դարից ավել՝ այն սկսել են կառուցել 1882 թվականին և չեն ավարտել մինչ օրս: Սուրբ տաճարի ներկայիս ճարտարապետը նախատեսում է եկեղեցու մաս կազմող 6 աշտարակների շինարարությունն ավարտել Անտոնիո Գաուդիի մահվան 100 ամյա տարելիցին ընդառաջ, մինչև 2026 թվականի հունիսի 10-ը, իսկ ահա տաճարն ամբողջությամբ պատրաստ կլինի արդեն 2030-2032 թթ-ին: Նշենք, որ դեռևս այս տարվա մարտին Ջորդի Ֆաուլին հայտարարել էր, որ սուրբ տաճարի շինարարության ընթացքում 3D տպիչների ներդրումը հնարավորություն կտա ավելի արագացնել վերջինիս շինարարությունը և հնարավորինս հավատարիմ մնալ Գաուդիի նախնական գծագրերին «Սագրադա Ֆամիլիա» տաճարի կենտրոնական շենքի շուրջը կկառուցվեն 6 աշտարակներ, որոնցից մեկը խորհրդանշելու է Հիսուս Քրիստոսին, մեկը կույս Մարիամին, իսկ մյուս 4-ն էլ առաքյալներին: Ամենաբարձր աշտարակը կլինի Հիսուս Քրիստոսին նվիրվածը, որի բարձրությունը կկազմի 172,5 մետր: Այս աշտարակը հնարավորություն կտա սուրբ տաճարին դառնալ աշխարհի ամենաբարձր եկեղեցին: Այսօր այդ ռեկորդը պատկանում է գերմանական Ուլմ քաղաքում գտնվող «Մյունսթեր» գոթական տաճարին, որի բարձրությունը կազմում է մոտ 161,5 մետր: Վերջինս կառուցվել է 498 տարի՝ 1392-1890 թթ-ին: Ֆաուլիի խոսքերով այսօր «Սագրադա Ֆամիլիա» տաճարն ավարտված է 70 տոկոսով; Նշենք, որ տաճարի շինարարությունը ֆինանսավորվում է զբոսաշրջիկների կողմից վճարված այցեվճարների միջոցով: Տարեկան այս յուրօրինակ եկեղեցի է այցելում ավելի քան 3,2 մլն մարդ, որոնց կողմից վճարված գումարները զգալի մաս են կազմում են տարեկան 28 մլն ԱՄՆ դոլլար բյուջեով շինարարության համար: Նշենք նաև, որ 2005 թվականից «Սագրադա Ֆամիլիան» ներառված է ՅՈՒՆԵՍԿՕ-ի մշակութային ժառանգության ցանկում:

Հանրահայտ «Սագրադա Ֆամիլիա» (Sagrada Familia թարգմ. - Սուրբ Ընտանիքի Եկեղեցի) տաճարի շինարարությունը ձգվում է ավելի քան 130 տարի, և միայն 21-րդ դարի նորագույն տեխնոլոգիաների, մասնավորապես՝ 3D-տպիչների, շնորհիվ հնարավորություն է ստեղծվել 19-րդ դարի կառույցի շինարարությունն ավարտել 2026 թ-ին: Կարելի է հավաստել, որ «Սագրադա Ֆամիլիան» աշխարհում ամենաերկար շինարարական գործընթաց ունեցող կառույցներից մեկն է: Շինարարական աշխատանքները սկսվել են դեռևս 1882 թ-ին, իսկ 1926 թ-ին կառույցի գլխավոր ճարտարապետի մահվան ժամանակ կառուցվել էր տաճարի ընդամենը մեկ քառորդ մասը; Ինչպես տեղեկացնում է BBC լրատվական գործակալությունը, չնայած հանրահայտ տաճարի արտաքին ձևավորումն անավարտ է, և դեռ շատ անելիք կա Գաուդիի նախագիծը կյանքի կոչելու համար, այնուամենայնիվ, այս գլուխգործոցն բաց է հանրության առաջ: «Սագրադա Ֆամիլիա» տաճարի նախագիծը երկարատև շինարարական գործընթացի և գերազանց նախագծի շնորհիվ իր գոյության ընթացքում բազմաթիվ նախագծողների և ճարտարապետների ուշադրության կենտրոնում է եղել: Այսօր շատերն են ուրախ, որ նորագույն տեխնոլոգիաները հնարավորություն են տալիս ժամանակակից ճարտարապետական թիմին ավարտել տաճարի շինարարությունը բնօրինակին հնարավորինս մոտ: Նախագծի ներկայիս ղեկավարները շինարարական գործընթացում 3D-տեխնոլոգիաները սկսել են օգտագործել 2001 թ-ից, սակայն վերջին տարիներին այս տեխնոլոգիաների արագ զարգացումն էլ ավելի արագ թափ հաղորդեցին շինարարական աշխատանքերին: Նախագծի գլխավոր ճարտարապետ Ջորդի Քոլը (Jordi Coll) պնդում է, որ Գաուդին անձամբ կողմ կլիներ 3D տեխնոլոգիաների օգտագործմանը ճարտարապետության մեջ: Եթե նա այսօր կենդանի լիներ, նա միանշանակ առավելագույնս կօգտագործեր 3D տեխնոլոգիաներն իր տաճարի շինարարության ժամանակ, քանի որ դեռևս 19-րդ դարում նրա շինությունը նախագծված էր եռաչափ տարածության մեջ: «Սագրադա Ֆամիլիա» տաճարի շինարարական և ճարտարապետական թիմն ունի իր սեփական տեխնիկական ստուդիան, որտեղ տեղադրված Է 2 հատ 3D-տպիչ: Տպիչները հիմնականում օգտագործվում են տաճարի բնօրինակ հատվածների վերակառուցման համար: Բնօրինակ գիպսե մոդելներՆ ավերվել են Իսպանիայում քաղաքացիական պատերազմի ժամանակ: Ճարտարապետական թիմն ամեն ինչ անում է, որ նորագույն տեխնոլոգիաների օգնությամբ կարողանա վերստեղծել Գաուդիի բնօրինակը: Տաճարի այցելուներն այսօր հիանում են կատարված աշխատանքով և վստահ են, որ թիմը շինարարությունը կհասցնի իր տրամաբանական և գերազանց ավարտին:

Մայորկայում վաճառքի են հանել «Քասթիլլո Մայորկա» (Castillo Mallorca) առանձնատունը, որտեղ սիրել է հանգստանալ արքայադուստր Դիանան: Առանձնատունը գնահատվում է 52 մլն ԱՄՆ դոլար: The Local պարբերականի փոխանցմամբ, ներկայում այն կղզու ամենաթանկ անշարժ գույքն է: Չնայած բարձր գնին, «Իգլ և Վոլքերս» (Engel und Voelkers) անշարժ գույքի գործակալության վաճառքի գործակալները չեն կասկածում ապագա գործարքի հաջողությանը: «Քասթիլլո Մայորկա» առանձնատան ընդհանուր մակերեսը 1400 քառակուսի մետր է: Այն տեղակայված է Պալմա դե Մայորկայից 20 րոպե հեռավորության վրա գտնվող մասնավոր թերակղզում: Երկհարկանի առանձնատանը տեղակայված են «լեդի Դիանայի սենյակը», բիլիարդի սրահը, մարզասրահը և շոգեբաղնիքը: Առանձնատան բակում, որի մակերեսը կազմում է 6000 քառակուսի մետր, կան նաև հյուրերի համար նախատեսված տնակներ, շքեղ այգիներ, լողավազան, զբոսանավի նավամատույց եւ նույնիսկ սեփական քարանձավ: Առանձնատան գնորդը կդառնա ոչ միայն պատմական մեծ արժեքի, այլև իսկապես շքեղ առանձնատան սեփականատերը: Արդեն հետաքրքրություն են ցուցաբերել գնորդներ Իսպանիայից, Չինաստանից եւ Շվեյցարիայից:

Աշխարհի խոշորագույն խաղային «Լաս Վեգաս Սենդս» (Las Vegas Sands) կորպորացիայի սեփականատեր, ամերիկացի միլիարդատեր Շելդոն Ադելսոնը հրաժարվել է Իսպանիայում խաղատնային հսկա նախագծի շինարարությունից, որտեղ ավելի վաղ նախատեսել էր ներդնել մոտ 30 մլրդ ԱՄՆ դոլար: Ադելսոնը մանրամասնել է, որ ընկերությունն այսօր ավելի շատ հետաքրքրված է Ճապոնիայով և Հարավային Կորեայով: Նա նպատակ ունի ընդլայնել զբոսաշրջային կենտրոնները և զարգացնել խաղատնային հանգստավայրերը հենց այս ասիական երկրներում: «Եվրովեգաս» նախագծի շինարարության մասին հայտնի դարձավ 2007 թ-ին: Ի սկզբանե Ադելսոնը նախատեսել էր այն կառուցել Բարսելոնայում: Ավելի ուշ մոլեխաղերի եվրոպական մայրաքաղաքի տիտղոսի համար սկսեց պայքարել Մադրիդը, և արդյունքում երկրի մայրաքաղաքի հարևանությամբ էլ որոշվեց կառուցել «Եվրովեգաս»-ը: Եվրոպայի խոշորագույն խաղային հանգստավայրը որոշվեց կառուցել իսպանական մայրաքաղաքի արվարձաններում գտնվող «Ալկորկոն» (Alcorcon) քաղաքում: 2013 թ-ի հուլիսին պաշտոնապես հայտարարվեց նախագծի սկիզբը: Ենթադրվում էր, որ հանգստավայրը կներառի 4 հսկա խաղատուն, 12 հյուրանոց ընդհանուր 36 հազար սենյակներով, 9 թատրոն, գոլֆի 3 դաշտ, ակումբներ, ռեստորաններ և առևտրային կենտրոններ: Նախագիծը հաստատվեց նաև Իսպանիայի կառավարության կողմից, քանի որ հանգստավայրը 260 հազար աշխատավայր պետք է ապահովեր: Բանն այն է, որ Իսպանիան առաջվա պես կրում է ճգնաժամի ծանր հետևանքները, իսկ գործազրկության մակարդակն էլ երկրում կազմում է մոտ 27 տոկոս: Հարկ է նշել, որ ամենասկզբից «եվրոպական Լաս-Վեգասը» բազմաթիվ խնդիրների է հանդիպել: Սկզբում նախագծին դեմ էր արտահայտվում հռոմեկան կաթոլիկ եկեղեցին և սոցիալական անհավասարության շարժման մասնակիցները: Այնուհետև 2011 թ-ին Իսպանիայում նոր օրենք ընդունվեց, որն արգելում է ծխելը հասարակական վայրերում: Ադելսոնը փորձում էր ազատել իր նախագիծն այս օրենքի ազդեցությունից, բայց նրան դեմ կանգնեցին ծխելու դեմ պայքարի շարժման ակտիվիստները:

Իսպանական Բենիդորմ (Benidorm) քաղաքում կառուցվող երկնաքերն ավելի հարմարավետ կլիներ, եթե այնտեղ վերելակ լիներ: Սակայն, կարծես թե շինարարներն ինչ-որ բան են բաց թողել, քանի որ որոշ բնակարանների սեփականատերեր ստիպված են 47-րդ հարկ բարձրանալ ոտքով: «ԻնԹեմպո» (In Tempo) անվանումը ստացած երկնաքերը վեր է խոյանում քաղաքի վրա որպես հույսի, բարգավաճման և ֆինանսական ճգնաժամի հաղթահարման խորհրդանիշ: Ցավոք, երկնաքերի կեսը չունի վերելակ: Ի դեպ, սա երկնաքերի շինարարական գործընթացի միակ թերությունը չէ: Հարկ է նշել, որ ամբողջ շինարարական ուղին անցել է մի շարք խնդիրներով: Ի սկզբանե նախագծի ֆինանսավորումն իրականացրել է Caixa Galicia բանկը, սակայն հետագայում ծրագրի ֆինանսավորումն իր վրա է վերցրել Իսպանիայում «վատ բանկի» համբավ ձեռք բերած Sareb բանկը: Սկզբում 3000 եվրո կապիտալ ունեցող կառուցապատող ընկերությանը բանկը տրամադրել է 93 մլն եվրո վարկ, սակայն համաշխարհային ֆինանսական ճգնաժամի սկսելուց ի վեր ներդրողները դադարեցրել են նախագծում գումարներ ներդնել: Նշենք նաև, որ շինարարության սկզբում շինարարները ծառայողական վերելակի բացակայության պատճառով ստիպված էին մինչև 23-րդ հարկ ոտքով բարձրանալ: Այնուհետ, վերջապես կառուցված վերելակը վայր է ընկնում, որի հետևանքով վիրավորվում է 13 շինարար: Շտապ օգնությունը չի կարողանում մոտենալ տուժածներին շինհրապարակում կուտակված շինարարական աղբի պատճառով: Իսկ վերջին ժամանակներս շինարարներն ընդհանրապես հրաժարվում են աշխատել, քանի որ ամիսներով չեն վճարվում նրանց աշխատավարձերը: Ըստ նախնական տվյալների՝ երկնաքերը շահագործման պետք է հանձնվեր 2009 թ-ին, սակայն մինչ օրս պատրաստ է կառույցի միայն 94 տոկոսը՝ այն էլ 20-րդ հարկից վեր առանց վերելակի: Նախագծի ներկայիս կառուցապատողները խոստանում են շենքը շահագործման հանձնել այս տարվա դեկտեմբերին: Նշենք, որ նորակառույց շենքում վաճառված են բնակարանների միայն 35 տոկոսը: Սկզբում նախատեսվում էր, որ «ԻնԹեմպո» աշտարակն ունենալու է 20 հարկ, սակայն երևում է կառուցապատողը տարվել է շինարարությամբ և հասել է մինչև 47-րդ հարկ, որտեղ տեղակայված են 269 բնակարան: Հարկ է նշել, որ 20 հարկանի երկնաքերի նախագծում նախատեսված էր վերելակ՝ մինչև 20–րդ հարկ, վերջինիս համար կա հատկացված տարածք: Սակայն վերին հարկերի կառուցման ժամանակ ոչ ոք չի մտածել նման «մանրուքի» մասին և ոչ միայն չի տեղադրել վերելակ, այլև վերջինիս համար հատկացված տարածք էլ չկա: Զարմանալի չէ, որ նախագծի վրա աշխատող ճարտարապետները չարաբաստիկ տեղեկատվության բացահայտումից հետո հեռացել են աշխատանքից: Այժմ հայտնի չէ, ինչպես է պատրաստվում կառուցապատողը լուծել առաջացած խնդիրը, սակայն պարզ է, որ միայն աստիճաններով հնարավոր չէ բարձրանալ 47-րդ հարկ: Զավեշտալի է, սակայն կառույցը, որը պետք դառնար ամենաբարձր բնակելի երկնաքերը Եվրոմիությունում, դարձավ անգրագիտության, ագահության և անշարժ շուկայի ճգնաժամի խորհրդանիշ: