Լոնդոնում պատրատվում են կառուցել թափանցիկ լողավազան, որը կտեղակայվի գետնից 35 մետր բարձրության վրա, տեղեկացնում է The Inhabitat կայքը: Ըստ նախնական տվյալների՝ բաց լողավազանն ամբողջությամբ կկախվի օդում և իրար կմիացնի 2 նորակառույց բարձրահարկերի «Նայն Էլմս» (Nine Elms) թաղամասում: Լողավազանի երկարությունը կկազմի 25 մետր, լայնությունը 5 մետր, իսկ խորությունը 3 մետր: Լողավազանի պատերն ու հատակը կկառուցվի 20 սանտիմետր հաստությամբ ապակուց: Իր տեսակի մեջ առաջին լողավազանը կդառնա Լոնդոնում կառուցվելիք 2000 բնակարան պարունակող «Դեսպանական այգիներ» (Embassy Gardens) բնակելի համալիրի մի մասը: Էլիտար բնակելի համալիրը կկառուցվի Լոնդոնի հարավում գտնվող «Բաթթերսի» թաղամասում, իսկ անմիջապես լողավազանից և համալիրի տանիքից յուրօրինակ տեսարան կբացվի դեպի «Վեսթմինսթերյան պալատ»: Ըստ նախնական տվյալների՝ նախագծի կառուցապատող ընկերությունն է «Բելլիմոր» (Ballymore) անգլիական ընկերությունը, լողավազանի կոնստրուկցիան նախագծել են «Արուփ» (Arup ), «Իքերսլի Օ՛Քալլագան» (Eckerseley O’Callaghan) և «Ռեյնոլդս» (Reynolds) ընկերությունները համատեղ: Բացի լողավազանից այս 2 բնակելի երկնաքերերը իրար կմիանան լողավազանին զուգահեռ քայլուղով: Նշենք, որ այս յուրօրինակ լողավազանի այցելուները կարող են դառնալ միայն «Դեսպանական այգիներ» համալիրի բնակիչները, իսկ այդ համալիրում անշարժ գույք հնարավոր կլինի ձեռք բերել նվազագույնը 944 հազար ԱՄՆ դոլարով: Լողավազանի և բնակելի համալիրի շինարարության ավարտը նախատեսված է 2017 թվականին:

Չինաստանն ամբողջ աշխարհում հայտնի է որպես ճարտարապետական, և ոչ միայն, նմուշների կրկնօրինակմամբ՝ սկսած Էյֆելյան աշտարակից և ավարտած Վենետիկով: Այս երկիրը զարմանալիորեն պատրաստ է կրկնօրինակել աշխարհում ցանկացած բան: Սակայն ոչ բոլոր նախաձեռնություններն են հաջողությամբ ընթանում: 2008 թ-ին Չինաստանում սկսվեց նոր յուրօրինակ նախագծի շինարարությունը, որը պետք է կրկնօրինակեր նյույորքյան ամենահայտնի թաղամասերից մեկը՝ Մանհեթենը: Այս նոր ֆինանսական թաղամասը սկսեցին կառուցել Պեկինից 120 կիլոմետր հեռավորության վրա գտնվող Յուջիապու (Yujiapu) թերակղզու վրա: Նախագծի ընդհանուր բյուջեն կազմում է ահռելի գումար՝ մոտ 50 մլրդ ԱՄՆ դոլար: Ըստ նախանական տվյալների այստեղ պետք է կառուցվեն 47 գրասենյակային և հյուրանոցային շինություններ՝ ներառյալ «Ռոքֆելլեր Կենտրոնն» ու «Երկվորյակ աշտարակները»: Սակայն 2009 թվականի համաշխարային տնտեսական ճգնաժամը ստիպեց 2010 թ-ից հետզետե դադարեցնել շինարարական աշխատանքները և նախագիծը անավարտ թողնել: Ինչպես տեղեկացնում է NBC News լրատվական գործակալությունը, Մանհեթենի կրկնօրինակի շինարարությունը, որը ստացել է «Յուջիապու» անվանումը, պետք է ավարտվեր 2019 թ-ին: Նախագծի շահագործման հանձնելուց հետո այն իր պոտենցիալ հաճախորդներին կառաջարկի ավելի քան 15 մլն քառակուսի մետր գրասենյակային տարածք՝ դրանով իսկ խթանելով հարևան բնակելի շրջանների զարգացումը: Սակայն մինչ բաղձալի ավարտն ու ֆինանսական եռուզեռի սկսվելը, այսօր այս նախագիծը ներգրավվել է «Քաղաք-ուրվականների» ցանկում: Նշենք, որ սա միակ խնդիրը չէ, որ ծառացած է Մանհեթթենի կրկնօրինակի առջև: Վերջին 7 տարիների ընթացքում «Քաղաք-ուրվականը» բազմաթիվ անգամ ենթարկվել է հեղեղումների: Բանն այն է, շինությունները կառուցված են ծովի մակերևույթից չնչին բարձրության վրա: Փաստորեն, նախագծի հեղինակները հաշվի չեն առել մի «փոքրիկ նրբություն» և խնդրի լուծման համար բավականին լուրջ լրացուցիչ ներդրումներ կլինեն հարկավոր:

Վերջին ժամանակներս այցելուներին հնարավոր չէ զարմացնել հյուրանոցների 5 աստղանի շքեղությամբ կամ էլ լողավազանի, սպա-կենտրոնի, մարզասրահի և այլ լյուքս ծառայությունների առկայությամբ: Այցելուների մոտ ավելի շատ հետաքրքրություն են առաջացնում յուրօրինակ հյուրանոցները, դրանց անսովոր ձևավորումը կամ էլ ոչ ավանդական դիրքը՝ ժայռի ծայրին, ծառի վրա կամ էլ ջրի տակ: Օրերս Աֆրիկայում բացվել է մայրցամաքի առաջին ստորջրյա հյուրանոցը: Այն տեղակայված է Տանզանիայի Զանզիբար արշիպելագի Պեմբա կղզում: Հյուրանոցը գտնվում է ինչպես ջրի մակերեսին, այնպես էլ ջրի տակ: Յուրօրինակ փոքրիկ հյուրանոցը կազմված է 3 հարկից՝ ճաշասենյակը և աստղերի դիտահարթակը գտնվում են ջրի մակերեսին, իսկ ննջասենյակը տեղակայված է ստորին հարկում՝ ջրի տակ: Այս յուրօրինակ հյուրանոցային համարից այցելուների համար բացվում է ստորջրյա կյանքի 360 աստիճանի տեսարան: Ստորջրյա հյուրանոցային համարները, կամ ինչպես դրանց այլ կերպ անվանում են հիդրոպոլիսները, նորություն չեն մեր կյանքում: Աշխարհի առաջին ստորջրյա հյուրանոցը գտնվում է ԱՄՆ-ի Ֆլորիդա նահանգում: «Ժյուլի Անդրծովյա Հյուրանոցը» (Ժյուլ Վեռնի, Jules’ Undersea Lodge) անվանումը կրող փոքրիկ հյուրանոցը այցելուների առաջ բացվել է 1986 թ-ին: Այս ստորջրյա կառույցը գործում է 1970–ական թվականներից և մինչ հյուրանոց դառնալը ծառայել է որպես առաջատար հետազոտական լաբորատորիա: Աշխարհի այս առաջին ստորջրյա հյուրանոցը գտնվում է 9 մետր խորության վրա և այնտեղ մտնելու համար այցելուները պետք է սուզվեն ջրի հատակը: Հյուրանոցը բաղկացած է 2 համարից, ընդհանուր հյուրասենյակից, ցնցուղից, խոհանոցից, օդորակիչից և այլն: Եվրոպայի միակ ստորջրյա հյուրանոցը գտնվում է Շվեդիայում, մայրաքաղաք Ստոկհոլմի շրջակայքում Մոլարեն լճում: Հյուրանոցը բաղկացած է ընդամենը 1 փոքրիկ համարից նվազագույն հարմարություններով (խոհանոց և սանհանգույց): Աշխարհի հայտնի զբոսաշրջային կենտրոնում՝ Մալդիվյան կղզիներում ևս կա 2 ստորջրյա կառույցներ, սակայն դրանք հյուրանոցային համարներ չեն: Օրինակ՝ «Մալդիվների Քոնրադ Ռանգալի Այլենդ» (Conrad Maldives Rangali Island) հյուրանոցում կարելի է ճաշել ստորջրյա ռեստորանում, որը գտնվում է 5 մետր խորության վրա: Նմանատիպ մի բար-ռեստորան էլ ունի «Նիյամա Ռեզորթը» (Niyama Resort): Մարդկային երևակայությունը չի կարող տեղում մնալ և այսօր, տարբեր ԶԼՄ-ներով, կառուցապատող ընկերությունները ներկայացնում են զանազան ստորջրյա ամբիցիոզ նախագծեր: Որպես ապագայի նախագծեր առանձնացնենք «Ամֆիբիա 1000» (Amphibious 1000) կիսասույզ հյուրանոցը Քաթարում: Նախագծի մասին առաջին անգամ հայտարարվել է 2011 թ-ին սակայն շինարարական աշխատանքները դեռևս չեն սկսվել: Նախագծի ընդհանուր բյուջեն գնահատվում է 500 մլն ԱՄՆ դոլար: Այս յուրօրինակ նախագիծը կունենա 4 հյուրանոց ստորջրյա համարներով և 80 լողացող անհատական լյուքս համարներ, որոնք կանվանվեն մեդուզաներ: Նմանատիպ 2 անհայտ ճակատագրով նախագծեր էլ հայտարարել էր Դուբայը՝ «Վոթեր Դիսքաս» (Water Discus) և «Հիդրոպոլիս» (Hydropolis) ստորգետնյա հյուրանոցները: Կառուցվելու դեպքում «Վոթեր Դիսքաս» հյուրանոցը կունենա 2 մակարդակ՝ ստորջրյա և վերջրյա: Ստորջրյա հատվածում կլինեն 21 հյուրանոցային համարներ: «Հիդրոպոլիսի» նախագծի մասին Դուբայը հայտարարել է դեռևս 2006 թ-ին, սակայն 480 մլն ընդհանուր բյուջեյով նախագիծը բազմաթիվ հետաձգումներից հետո այդպես էլ մնաց անկառույց: Եթե աշխարհում կառուցվում են յուրօրինակ նախագծեր, ապա դրանցից մեկի հայրենիքն անպայման պետք է Չինաստանը լինի: Այնպես որ Չինաստանում ևս կառուցվում է նմանատիպ հյուրանոց: Այս յուրօրինակ գետնաքեր հյուրանոցի շինարարությունը սկսվել է 2012 թ-ին Շանհայում՝«Տյանմուշան» (Tianmushan) բարձունքի ստորոտում: Շինարարության ավարտը նախատեսված է 2015 թ-ին, որից հետո հյուրանոցի այցելուները կարող են յուրօրինակ ընթրիք վայելել ստորջրյա ռեստորանում: Հայտարարված, բայց դեռևս չկառուցված նախագծերից են նաև «Պոսեյդոն ստորջրյա հանգստավայրը» (Posejdon Undersea Resort) Ֆիջիում, որի շինարարությունը շարունակվում է արդեն 13 տարի, սակայն հյուրանոցը դեռևս պատրաստ չէ, յոթ-հարկանի ստորջրյա հյուրանոցը Ստամբուլում, որի շինարարության մեկնարկի մասին դեռևս ոչինչ հայտնի չէ և կորեական Վոնսան քաղաքում նախատեսվող հյուրանոցը: Արդարացիության համար պետք է նշել, որ մարդկային երևակայությունն այստեղ էլ կանգ չի առնում: Ամբողջ աշխարհում հայտարարված և կիսատ մնացած այս հյուրանոցների դառը փորձն անտեսելով` օրերս ճապոնական «Շիմիզու Քորփորեյշն» (Shimizu Corporation) ընկերությունը հանրությանն է ներկայացրել մի ամբողջ ստորջրյա քաղաքի նախագիծ: Ըստ նախնական տվյալների այն հնարավոր կլինի իրականացնել արդեն 2030 թ-ին:

Սահարա անապատում գտնվող Ջոսերի բուրգը (Pyramid of Djoser), որը համարվում է հնագույնը Եգիպտոսում, ավերվում է այն նույն ընկերության կողմից, որը իշխանությունների կողմից ընտրվել է վերականգնողական աշխատանքների համար: 4600 տարեկան պատմական հուշարձանը մասնակի քանդվել է 1992 թ-ի երկրաշարժի ժամանակ, այնուհետև երկրի կառավարությունը որոշել է այն վերականգնել, սակայն տիրող բարդ տնտեսական և քաղաքական իրավիճակի պատճառով բուրգն ավելի շատ վնասվում է քան վերականգնվում: Եգիպտացի ակտիվիստները պնդում են, որ «Շուրբեգի» (Shurbagy) ընկերությունը, որն ընտրվել է որպես վերականգնողական աշխատանքների գլխավոր կապալառու, ոչ մի փորձ չունի պատմական հուշարձանների վերականգնման ոլորտում: Ակտիվիստների առաջնորդ Ամիր Գամալը պնդում է, որ տեխնիկական տեսանկյունից վերոնշյալ ընկերությունը և երկրի հնագույն պատմական հարցերով զբաղվող Խորհուրդը հանցագործություն են գործել: Բուրգի սահմաններից դուրս նոր պատեր են կառուցվել` որպես ժամանակակից կառույց: Ի դեպ, պատմական հուշարձանների վերականգնման միջազգային չափորոշիչները թույլ են տալիս անհրաժեշտության դեպքում պատմական հուշարձանի տարածքում միայն 5 տոկոսով ավելացնել ժամանակակից կառույցներ: Բացի այդ, ակտիվիստների կարծիքով նորակառույց պատերը կարող են ավելի ճնշել բուրգը և արագացնել վերջինիս փլուզումը: Աստիճանաձև կառուցված բուրգը սկզբում ունեցել է 62 մետր բարձրություն: Բուրգի ներսում եղել են մի շարք միջանցքներ և գրանիտով և մարմարով կառուցված դամբարան: 1992 թ-ի երկրաշարժից հետո հսկայական քարեր են թափվել բուրգի կենտրոնական մասում, այդպիսով ստեղծելով բաց տարածությունը բուրգի վերևի հատվածում: Երկրաշարժից հետո հնէաբան Պիտեր Ջեյմսի ընկերությունը բուրգի ներսում տեղադրել էր գնդաձև կառուցվածք, որը լցված էր ջրով, որպեսզի պահպանի բուրգը ներսից: Վերոնշյալ ընկերությունը հույս ուներ, որ քարերը կամրացվեն պողպատե ձողերով` պաշտպանելով բուրգը փլուզումից: Բայց նախագծի ֆինանսավորումը ավարտվել էր քաղաքական ոչ կայուն իրավիճակի պատճառով: 2012 թ-ի հոկտեմբերին երկրի Հնագույն պատմական հարցերով զբաղվող նախարարությունը հայտարարել է, որ բուրգի տարածքում վերականգնողական բոլոր աշխատանքները ավարտվում են, քանի որ կառավարությունը այլևս չի կարող վճարել կապալառուներին: Այս հայտարարությունից հետո որոշվում է բոլոր վերականգնողական աշխատանքները վստահել «Շուրբեգի» ընկերությանը, որը սակայն արդեն համարվում է պատասխանատու բուրգի մի հատվածի ավերման համար: Ինչպես պնդում են ակտիվիստները, այս ընկերությունը ընդհանրապես փորձ չունի հնագույն և պատմական հուշարձանների վերականգնման ոլորտում: Մինչ այժմ նրա իրականացրած բոլոր նախագծերը միայն ժամանակակից շինարարությանն են վերաբերում: Ավելին` ընկերությունը վերջին 9 տարիների ընթացքում ստանձնած 6 նախագծերից ոչ մեկն ավարտին չի հասցրել:

«Կոեն Օլդիս» (Koen Olthuis) և «Դաչ Դոքլենդս» (Dutch Docklands) ճարտարապետական ընկերությունները հայտարարել են նոր նախագծի մասին` կառուցել յուրօրինակ լողացող 5-աստղանի հյուրանոց Նորվեգիայի ափամերձ շրջանում: Հյուրանոցի յուրօրինակությունը նրա արտաքին տեսքն է լինելու: Ըստ ներկայացված նախագծի` այս լողացող հյուրանոցը ունենալու է 6-ծայրերից բաղկացած սառցե բյուրեղի տեսք, այսինքն` նմանվեու է ձյան փաթիլի: «Բյուրեղ» (The Krystall) անվանումը ստացած հյուրանոցը պետք է լողա Նորվեգիայի հյուսիսում գտնվող Տրոմսյո քաղաքի ափամերձ գոտում, որը տեղակայված է «Բևեռային շրջան»-ում: 120 մետր տրամագծով հյուրանոցում տեղակայվելու են 86 հյուրանոցային համարներ, խորհրդակցությունների սրահներ, սպա և առողջարանային համալիրներ: Ըստ նախնական տվյալների` նոր լողացող կոնստրուկցիան ամբողջությամբ կլինի ինքնաֆինանսավորվող և ինքնակառավարվող: Վերոնշյալից բացի, հյուրանոցը իր թափանցիկ և ապակե տանիքի շնորհիվ կդառնա այն գրավիչ վայրը, որտեղից հնարավոր կլինի հետևել «Հյուսիսափայլը»: Ծրագրի հեղինակների խոսքերով, շքեղ հյուրանոցը հիմնականում ուղղված է Ճապոնիայի, Ռուսաստանի և Եվրոպայի հարուստ զբոսաշրջիկներին: Ի դեպ, հյուրանոցի շինարարությունը կիրականացվի ցամաքում և հետո միայն պատրաստի կառույցը կտեղափոխվի ջրի վրա: Հյուրանոցի հյուրերը կարող են լողալ սառը միջանցքներով և քնել ձմեռային թեմատիկա ունեցող սենյակներում: Ըստ նախնական տվյալների` «Բյուրեղ»-ը զբոսաշրջիկների առաջ իր դռները կբացի 2016 թ-ին: