Knight Frank ընկերությունը հրապարակել է ամենամյա հաշվետվություն, որն անց է կացվում աշխարհի 56 երկրներում` պարզելու «անշարժ գույքի գների գլոբալ ցուցանիշը»: Ըստ կատարված հետազոտության` այս տարվա ամենաարդյունավետ անշարժ գույքի շուկա է ճանաչվել Դուբայը, որտեղ գրացվել է 35 տոկոս աճ: Սակայն ինչպես նշում են ընկերության մասնագետները, Դուբայի անշարժ գույքի շուկան դեռևս 25 տոկոսով զիջում է 2008 թ-ին գրանցված ցուցանիշը, իսկ 2014 թ–ի առաջին կեսի աճի ցուցանիշը արդեն կրկնակի նվազել է: Այս տարվա հետազոտությունը ցույց է տվել, որ անշարժ գույքի գների աճ գրանցվել է հետազոտված 56 երկրներից 39-ում, 2012 թ-ի 27 երկրների փոխարեն: Եվրոպան նախկինի պես գերակայում է ցուցակի երկրորդ հատվածում: Նոր հետազոտության համաձայն` նախորդ տարվա համեմատ «անշարժ գույքի գների գլոբալ ցուցանիշը» աճել է 8.4 տոկոսով: Հետազոտությանը մասնակցած 11 անշարժ գույքի շուկա` Չինաստան, ԱՄՆ, Թուրքիա, Բրազիլիա, Ինդոնեզիա. Կոլումբիա և այլն, գրանցել են երկնիշ աճ: Ուսումնասիրված երկրներից գների անկման ամենաբարձր ցուցանիշ է գրանցվել է Ուկրաինայում (-25,9%), Խորվատիայում (-14,4%) և Հունաստանում (-9,3%):

Լոնդոնում վաճառքի է հանվել անշարժ գույքի գործակալների կարծիքով բրիտանական մայրաքաղաքի լավագույն առանձնատներից մեկը: Ինչպես նշում է Daily Mail պարբերականը, Հեմփսթեդ շրջանում գտնվող տան համար սեփականատերը պահանջում է 82 մլն ԱՄՆ դոլար: 4 հարկանի 1400 քառակուսի մետր ընդհանուր մակերեսով շինությունը կառուցվել է 1896 թ-ին Լիվերպուլի հայտնի նավատեր Ռասսել Ռիի համար: Այն ունի 8 ննջասենյակ, 7 լոգարան, 4 հյուրասենյակ, ընդունելությունների սրահ, շոգեբաղնիք, մարզասրահ, կինոդահլիճ և լողավազան: Հարակից այգում կա բաց լողավազան, աղախինների համար փոքրիկ տնակ և գեղեցիկ զբոսայգի: Ինչպես նշում է պարբերականը, առանձնատան արժեքը մոտ 300 անգամ գերազանցում է Մեծ Բրիտանիայում միջին արժողության տան գինը, որը կազմում է 270 հազար ԱՄՆ դոլար: Ի դեպ, հարկ է նշել, որ այս առանձնատան տարեկան ծախսը կազմում է 328 հազար ԱՄՆ դոլար: Այսօր Լոնդոնում վաճառվող ամենաթանկ առանձնատունը գտնվում է Չարլթոն Հաուս Տերաս փողոցի վրա և գնահատվում է 388 մլն ԱՄՆ դոլար: 164 մլն ԱՄՆ դոլար արժողությամբ երկրորդ տեղում է սաուդյան արքայազն Աբդուլ Ազիզ բին Ֆահդի առանձնատունը Քենսինգթոնում, իսկ երրորդ տեղում Հիթ Հոլ առանձնատունն է Հեմփսթեդ շրջանում, որի արժեքը 106 մլն ԱՄՆ դոլար է:

Պրագայում 18 մլն ԱՄՆ դոլարով վաճառվել է յուրօրինակ ճարտարապետություն ունեցող գրասենյակային համալիր «Պարող Տունը»: Հանրահայտ ճարտարապետներ Ֆրենկ Գերիի և Վլադո Միլունիչի նախագծած խորհրդանշական կառույցը գնել է աշխարհահռչակ անշարժ գույքի կոլեկցիոներ և ներդրող Վացլավ Սկալան: Նշենք, որ նրանից բացի յուրօրինակ շինության սեփականութան իրավունքի համար պայքարում էին ևս 10 ներդրողներ հիմնականում Չեխիայից: «Պարող Տան» նախկին սեփականատերը, որը կառույցը ձեռք էր բերել 2011 թ-ին, «ՍիԲիԱռԻ» (CBRE) գլոբալ ներդրումների ընկերությունն էր: «Պարող Տունը» բաղկացած է 2 գլանաձև աշտարակներից, մեկը` բնական, մյուսը` դեստրուկտիվ: Նշենք, որ այս յուրօրինակ շինությունն ունի ևս մի անվանում` «Ջինջեր և Ֆրեդ»` ի պատիվ աշխարհահռչակ պարային զույգ Ջինջեր Ռոջերսի և ֆրեդ Աստերի: Գլանաձև աշտարակներից մեկը խորհրդանշում է տղամարդու, իսկ մյուսը կանացի մարմին: Գրասենյակային համալիրը կառուցվել է 1994-1996 թթ-ին 19-րդ դարում կառուցված և Երկրորդ համաշխարհային պատերազմի ժամանակ ավերված տան տեղում: 8 հարկանի գրասենյակային համալիրի ընդհանուր մակերեսը կազմում է մոտ 4 հազար քառակուսի մետր: «Պարող Տան» 6 հարկերը բացառապես օգտագործվում են որպես գրասենյակային տարածքներ ընդհանուր 2965 քառակուսի մետր մակերեսով: Շինության վերին հարկում տեղակայված է 679 քառակուսի մետր մակերեսով ռեստորանը, իսկ առաջին և ստորգետնյա հարկերում գտնվում է 400 քառակուսի մետր մակերեսով խորհրդակցությունների սրահը:

Ֆլորիդայում գտնվող «Կազա Կազուարինա» (Casa Casuarina) առանձնատունը, որի մոտ 1997 թ-ին սպանվել է աշխարհահռչակ դիզայներ Ջաննի Վերսաչին, աճուրդում վաճառվել է 41.5 մլն ԱՄՆ դոլարով, տեղեկացնում է Reuters գործակալությունը: Աճուրդում առանձնատան նախնական գինը սահմանվել է 25.5 մլն ԱՄՆ դոլար, իսկ առուվաճառքում հաղթել է «ՎիԷմ Սաուֆ Բիչ» (VM South Beach) ընկերությունը, որը փոխկապակցված է հագուստի արտադրությամբ զբաղվող Jordache Enterprises ցանցին: Առանձնատան նոր սեփականատիրոջ խոսքերով Մայամիի արվարձանում գտնվող այս տունը նախատեսվում է վերածել հյուրանոցի, որը կստանա «Վերսաչի Վիլլա Հոթել» (Versace Hotel Villa) անվանումը: Ջաննի Վերսաչին այս առանձնատունը գնել է 1992 թ-ին և ծախսել 33 մլն ԱՄՆ դոլար այն վերակառուցելու համար: 1997 թ-ի հուլիսին հայտնի դիզայները անհայտ պատճառով սպանվել է իր իսկ տանը էնդրյու Կյունենենի կողմից: Այնուհետև 2000 թ-ից առանձնատան նոր սեփականատեր է դարձել հեռախաղորդակցության մագնատ Փիթեր Լոֆինը: Արդեն 2012 թ-ին գործարարն իր սնանկության պատճառով որոշել է առանձնատունը վաճառել: Միջերկրական ոճով կառուցված եռահարկ առանձնատունը կառուցվել է 1930 թ-ին: 2137 քառակուսի մետր ընդհանուր մակերեսով տունն ունի 10 ննջասենյակ, 11 լոգասենյակ, ինչպես նաև լողավազան, պատված 24 կարատանոց ոսկով: Առանձնատանը հիմնականում գերակշռում է իտալական մարմարն ու ոսկին: Առանձնատան յուրաքանչյուր անկյունում կարելի է հանդիպել Վերսաչիի պատկերանիշը, նկարներ հունական ոճով և այլն:

Ինչպես տեղեկացնում է Daily Mail պարբերականը, այն առանձնատունը, որտեղ Քեմբրիջի դուքսն ու դքսուհին անց են կացրել իրենց ամուսնական կյանքի առաջին 2 տարին, տրվում է վարձով: Առանձնատունը, որն ունի 4 ննջասենյակ՝ յուրաքանչյուրը երկտեղանի մահճակալով, սեփական լողափ և շքեղ բնապատկերներ, գտնվում է Ուելսի Անգլսի կղզում: Դուքս Ուիլյամն այն վարձակալում էր ամսեկան 1200 ԱՄՆ դոլարով, սակայն առանձնատան սեփականատերերը համոզված են, որ այժմ տան վարձակալության գինն անհամեմատ կաճի: Բանն այն է, որ Ուիլյամն ու Քեյթը խոստովանել են, որ իրենց չափազանց դուր է եկել առանձնատունը և ցանկություն են հայտնել երբեմն-երբեմն այցելել այնտեղ: Հետևաբար, նոր վարձակալները բացառիկ հնարավորություն կստանան հանդիպել նրանց հետ: Մինչ օրս տեղական ԶԼՄ-ները թագավորական ընտանիքի անվտանգությունից ելնելով ոչինչ չեն հաղորդել առանձնատան մասին, սակայն այսօր արդեն պարզ է, որ այն ունի 4 ննջասենյակ, հյուրասենյակ բուխարիով, խոհանոց, հանդերձարան և տնտեսական սենյակ: Վերջերս դուքս Ուիլյամը ափսոսանքով հայտարարել է, որ պատրաստվում է ավարտել զինվորական ծառայությունը և ընտանիքի հետ հեռանալ Ուելսից: Մոտ ապագայում թագավորական ընտանիքը նախատեսում է տեղափոխվել լոնդոնյան Քենսինգթոնյան դղյակ, որի մի թևը 1.6 մլն ԱՄՆ դոլար բյուջեյով վերակառուցվել է վերջերս: Նշենք, որ մինչը փոքրիկ արքայազնի ծնունդը ամուսնական զույգն ապրում էր այս առանձնատանը միայնակ: Փոքրիկ Ջորջի ծննդից հետո այստեղ է տեղափոխվել նաև Քեյթի մայրը՝ Քերոլ Միդլթոնը, որպեսզի օգնի խնամել փոքրիկին: