Ռուսաստանի ամենաթանկ առանձնատունը վաճառվում է 98,6 մլն ԱՄՆ դոլարով, տեղեկացնում է «Բնակարանների աշխարհ» (Мир Квартир) անշարժ գույքի պարբերականը: 1,7 հազար քառակուսի մետր ընդհանուր մակերեսով առանձնատունը տեղակայված է «Ֆլորանս» փակ քոթեջային գյուղում ՄԿԱԴ-ից 5 կիլոմետր հեռավորության վրա Ռուբլյովո-Ուսպենսկոյե մայրուղու ուղղությամբ: Համեմատության համար նշենք, որ վերլուծաբանների հաշվարկով Մոսկվայի տարածաշրջանում միջին մակարդակի տունն արժե մոտ 400 անգամ էժան (246 հազար ԱՄՆ դոլար), իսկ Ռուսաստանում՝ 1100 անգամ՝ 88.4 հազար ԱՄՆ դոլար: Այս շքեղ առանձնատունը բաղկացած է 5 կահավորված ննջասենյակներից սեփական լոգարաններով և հանդերձարաններով, 3-4 աշխատասենյակներից, սեփական լողավազանով սպա-սրահից, սաունայից, սոլյարիից, գեղեցկության սրահից, կինոթատրոնից, բիլիարդից և գրադարանից: Առանձնատան հողամասի մակերեսը կազմում է 11 հազար քառակուսի մետր: Տնամերձ հողամասում կառուցված է ընդունելությունների տուն սեփական բեմով, մասնագիցված խոհանոցով և խորհրդակցությունների սրահով, 6 ավտոմեքենայի համար նախատեսված ավտոտնակ, փոքրիկ ֆերմա, ինչպես նաև ձկնորսության համար հարմարեցված լճակներ: Նշենք, որ ընթացիկ տարվա մայիսին նույն պարբերականի վերլուծաբանները Ռուսաստանի ամենաթանկ առանձնատան գինը նշել էին 66.3 մլն ԱՄՆ դոլար, որը 45 տոկոսով էժան է եղել ներկայիս ռեկորդակրից:

ԱՄՆ-ում վաճառքի է հանվել երկրի նախկին նախագահ Ռիչարդ Նիքսոնի առանձնատունը, որը նախագահի սեփականությունն է եղել շուրջ 11 տարի՝ 1969-1980 թվականներին: «Լա Կազա Փասիֆիքա» (La Casa Pacifica) առանձնատունը գտնվում է Կալիֆորնիայի Սան-Կլեմենտե քաղաքի ափամերձ գոտում: Նախագահի հաճախակի այցելությունների պատճառով այս առանձնատունը ստացել է նաև իր երկրորդ անվանումը «Արևմտյան Սպիտակ Տուն» (Western White House): Այստեղ նա անց էր կացնում ընտանեկան հանգիստը, ռազմավարական բանակցությունները, ինչպես նաև հյուրընկալում ամերիկյան և արտասահմանյան քաղաքական գործիչներին: 1974 թ-ի Ուոթերգեյթյան սկանդալից և իր հրաժարականից հետո Նիքսոնը տեղափոխվեց այս առանձնատուն իր կյանքի հուշագրերը գրի առնելու համար: Անշարժ գույքի հողի ընդհանուր մակերեսը կազմում է 22,3 հազար քառակուսի մետր, որտեղ տեղակայված են հիմնական առանձնատունը, հյուրերի համար նախատեսված տնակները, ծառայողական տները՝ 1400 քառակուսի մետր ընդհանուր մակերեսով, ինչպես նաև 140 մետր երկարությամբ մասնավոր ծովափը: Առանձնատունը կառուցվել է 1920 թվականին իսպանական ոճով՝ սպիտակ դիմային հատվածով, կարմիր կղմինդրե տանիքով և կենտրոնական բակով: Առանձնատան հսկա կամարակապ պատուհանները նայում են անմիջապես օվկիանոսին, իսկ ճաշասենյակի առջև բացվում է իսկական անգլիական այգին; Ռիչարդ Նիքսոնի հրամանով կառուցված բացօթյա սանդուղքն էլ հնարավորություն է տալիս բարձրանալ բուխարիով աշխատասենյակ: Հանրահայտ նախագահի կալվածքի նախնական գինը սահմանվել է 75 մլն ԱՄՆ դոլար: Ինչպես գրում է The Wall Street Journal պարբերականը՝ հղում կատարելով «Սոթբի միջզագային անշարժ գույքի գործակալության» (Sotheby’s International Realty) գործակալ Ռոբ Գիեմին (Rob Giem), առանձնատան նման բարձր գինն արդարացված է ոչ միայն նախկին սեփականատիրոջ հեղինակությամբ, այլև Լոս-Անջելոսի արևմուտքում գտնվող այս յուրօրինակ առանձնատան ընդարձակությամբ: Ի դեպ, այս շրջանում 2500 քառակուսի մետր մակերեսով հողատարածքը գնահատվում է 5-10 մլն ԱՄՆ դոլար: «Արևմտյան Սպիտակ Տունը» վաճառվում է ներկայիս սեփականատեր, արդեն թոշակի անցած դեղագործական հզոր ցանցի սեփականատեր 83-ամյա Գեվին Հերբերտի (Gavin Herbert) կողմից: Նա առանձնատունը գնել է Ռիչարդ Նիքսոնից 1980 թվականին և արդեն 35 տարի վայելում է այս յուրօրինակ անշարժ գույքը: Այս տարիների ընթացքում պրն. Հերբերտը կալվածքը բաժանել է տարբեր մասերի և կառուցել 14 առանձնատուն: Բացի այդ նա լողավազանի շրջակայքում տաղավար է կառուցել և այն զարդարել առանձնատուն այցելած բարձրաստիճան հյուրերի նկարներով: Վերջերս նա նաև վերանորոգել է հիմնական առանձնատան հիմքը, ինչպես նաև գլխավոր ննջասենյակում լոգարան և պահարաններ ավելացրել:

1800 թվականին Ֆրանսիայի կայսեր Նապոլեոն Բոնապարտի նստավայր հանդիսացած 74 սենյականոց առանձնատունը վաճառքի է հանվել ընդամենը 5,78 մլն ԱՄՆ դոլարով, տեղեկացնում է բրիտանական Daily Mail պարբերականը: Առանձնատան վաճառքով զբաղվում է «Բյուչեմփ Իսթեյթս» (Beauchamp Estates) անշարժ գույքի գործակալությունը, որն ինչպես պնդում է պարբերականը, զուգահեռ միևնույն գնով վաճառում է ընդամենը 3 սենյականոց բնակարան լոնդոնյան Բելգրավիա շրջանում: Իտալական Պյեմոնթում գտնվող «Լա Վոգլինա» (La Voglina) առանձնատունը կառուցվել է 18-րդ դարում՝ բարոկկո ոճի հայտնի ներկայացուցիչ, ճարտարապետ Ֆիլիպպո Յուվարայի կողմից: Պատմական կալվածքը և վերջինիս հարող հողատարածքի ընդհանուր մակերեսը կազմում է 240 հազար քառակուսի մետր, որտեղ տեղակայված են 13 ննջասենյակ, 9 լոգարան, 2 ճաշասրահ, 2 խոհանոց, 10 ընդունարան, հյուրերի տնակ և փոքրիկ մասնավոր մատուռ՝ նախատեսված 30 այցելուի համար: Պատմական առանձնատունը շրջապատված է այգիներով, ինչպես նաև տարածքում գտնվում են խաղողի այգիներ, որոնց վերամշակման պարագայում հնարավոր կլինի տարեկան ստանալ մոտ 100 հազար շիշ գինի: 215 տարի առաջ 1800-ական թվականներին Ֆրանսիայի կայսրը Մարենգոյի ճակատամարտի ընթացքում այս առանձնատունն օգտագործել է որպես գլխավոր գրասենյակ:

Այսօր 3D տպիչներն ամենուր են, և դրանցով հնարավոր է տպել ամեն բան: Վերջերս չինական WinSun ընկերությունը տպագրության համար հատուկ պատրաստված շինանյութից բավականին հաջող տպագրել է 5-հարկանի բնակելի շենք և 110 քառակուսի մետր մակերեսով առանձնատուն: 3D տպագրություն կազմակերպելու համար «Վինսան» ընկերությունը նախ կառուցել է հսկայական 3D տպիչ, որի բարձրությունը կազմում է 6.6 մետր, լայնությունը 10 մետր, իսկ երկարությունը 40 մետր: Ցանկացած շինություն կառուցելու համար տպիչը նախ իրար է խառնում վերամշակված շինանյութն ու չոր ցեմենտը, հետո հորիզոնական շերտ առ շերտ լցնում է մածուցիկ դարձած շինանյութը, որն այնուհետև չորանում և ամրանում է: Հաջորդ փուլում տպագրված հատվածները ամրացվում են պողպատով և մեկուսացվում են: Չինաստանի նորագույն 3D-տպագրված առանձնատունը պատրաստված է վերամշակված նյութերից: Այս կառուցվել է շինարարական թափոններից և վերամշակված քարերի խառնուրդից առաջացած շինանյութից: Բացի այս առանձնատնից, ընկերությունը վերոնշյալ տպագրիչի օգնությամբ կառուցել է նաև 5-հարկանի բնակելի շենք: Շինության հատվածների տպագրության համար անհրաժեշտ է եղել ընդամենը 1 օր և ևս 5 օր, որպեսզի տպագրված հատվածները հավաքվեն և ամրացվեն շինհրապարակում: Ինչպես պնդում են WinSun ընկերության ղեկավարները, շինարարության այս մեթոդն ունի մի շարք առավելություններ՝ շինարարական նվազագույն թափոններ, ամենակարճ ժամկետներ, նվազագույն աշխատուժ և ծախսեր: Անցած տարվա մարտին, այս ընկերությունը նաև տպել է 10 մատչելի բնակարաններ, որոնցից յուրաքանչյուրն արժեցել է 5000 ԱՄՆ դոլար: Բացի արդեն գրանցած հաջողությունների ընկերությունն ապագայի հսկայական նախագծեր ունի: Այսօր այստեղ փորձում են մշակել այնպիսի նախագիծ, որը հնարավոր կդարձնի կամուրջների և երկնաքերերի «տպագրությունը»: Նշենք նաև, որ անցած տարի DUS Architects ճարտարապետական բյուրոն Նիդեռլանդներից ևս նմանատիպ փորձ է արել և կառուցել է 3D-տպագրված տուն՝ որպես շինանյութ օգտագործելով բիոպլաստիկը:

Թոմ Կրուզը որոշել է վաճառել Կոլորադոյի Թելուրայդ լեռներում գտնվող իր շքեղ առանձնատունը՝ այն ձեռք բերելուց 20 տարի անց: Վերջինիս վաճառքով զբաղվում է աշխարհահռչակ Սոթբի միջազգային գործակալությունը: 1.2 մլն քառակուսի մետր ընդհանուր մակերեսով կալվածքը վաճառվում է 59 մլն ԱՄՆ դոլարով: Շքեղ առանձնատունը գտնվում է Թելուրայդ դահուկային հանգստավայրից ոչ հեռու՝ խիտ անտառի մեջ: Հսկայական լեռներով և անտառով շրջապատված այս առանձնատունը երկար տարիներ եղել է դերասանի թաքստոցը: Այստեղ նա շատ ժամանակ է անց կացրել Լոս-Անջելոսի աղմուկից հետո: Սակայն Քեթի Հոլսմի հետ ամուսնալուծությունից հետո նա գրեթե այստեղ չի եղել և որոշել է այն վաճառել: Տան շինարարությունն ավարտվել է 2004 թ-ին, և դերասանն անձամբ մասնակցել է այդ գործընթացին: Շինարարության ողջ ընթացքում օգտագործվել է ամենաթանկ և նորագույն տեխնոլոգիաները: Տան հիմքը կառուցվել է բնական քարից, իսկ 2 շինությունները մայրու գերաններից: 930 քառակուսի մետր մակերեսով առանձնատանը գտնվում է 4 ննջասենյակ, 6 լոգասենյակ, մանկական սենյակ, հյուրասենյակ, գրադարան, մարզասրահ և այլն: Երկրորդ շինության մակերեսը, որը հյուրերի համար է նախատեսված, կազմում է 148 քառակուսի մետր: Առանձնատան ամբողջ տարածքը հիանալի կահավորված է: Ի դեպ, շատ պարբերականներ պնդում են, որ այս անշարժ գույքի վաճառքից հետո Թոմ Կրուզը կարող է ռեկորդակիր դառնալ, քանի որ նա կվաճառի մինչ այժմ հանրահայտ մարդկանց (աստղերի) կողմից վաճառված ամենաթանկ անշարժ գույքը: