Ինչպես տեղեկացնում է The National ինտերնետային կայքը, համաձայն նախատեսված գրաֆիկի՝ Աբու-Դաբիի Քորնիչ (Corniche) թաղամասում, կամ դրա շրջակայքում առաջիկա ամիսների ընթացքում շահագործման կհանձնվեն մի քանի երկնաքերեր, որոնք պարունակում են մոտ 1400 լյուքս կարգի բնակարաններ: Նախագծերը համալրված են սպասարկման ժամանակակից միջոցներով, այդ թվում՝ լողավազաններ տանիքներում, ֆիթնես-ակումբներ և այլն: Ռեքս անշարժ գույքի (Rex Real Estate) գործակալության տնօրեն Ալմեր Ագմիրենի (Almer Agmyren) խոսքերով, որոշ մարդիկ Դուբայից վերադառնում են Աբու-Դաբի ապրելու, քանի որ մայրաքաղաքում ևս աստիճանաբար կառուցվում են բարձր մակարդակի շինություններ: Առաջիկա ամիսներին շինարարությունը կավարտվի և շահագործման կհանձնվեն՝ Էթիհադ Աշտարակը (Etihad Towers), որը գտնվում է Էմիրեյթս Փէլիս (Emirates Palace) հյուրանոցի մոտ, 47-հարկանի Սեբա Աշտարակը (Seba Tower), որն առավել հայտնի է Ալ Էյն Աշտարակ (Al Ain Tower) անունով, ինչպես նաև Նեյշն Աշտարակը (Nation Towers): Քլաթթոնս (Cluttons) խորհրդատվական ընկերության մասնագետ Սթիվ Մորգանի խոսքերով, Քորնիչ թաղամասում կառուցվող ցանկացած նախագիծ թանկագին զարդ է դառնում այդ հիանալի պսակի մեջ: Էթիհադ Աշտարակի առաջին 885 բնակարանները վարձակալության համար հասանելի կդառնան այս տարվա հոկտեմբերից: 67 քառակուսի մետր մակերեսով, մեկ ննջարանով բնակարանների տարեկան վարձը կսկսի մոտ 27 հազար ԱՄՆ դոլարից, իսկ 160 քառակուսի մետր ընդհանուր մակերեսով երկու ննջարաններով բնակարաններինը՝ 61.3 հազար ԱՄՆ դոլարից: 732 քառակուսի ընդհանուր մակերեսով փենթհաուսների վարձակալությունը տարեկան կկազմի 265 հազար ԱՄՆ դոլար: Համարժեք գներով հոկտեմբերի վերջին կսկսեն վարձակալության հանձնվել նաև Ալ Էյն Աշտարակի բնակարանները, իսկ ահա Նեյշն Աշտարակն արդեն շահագործման կհանձնվի մյուս տարվա գարնանը:
Սիթիգրուփ (Citigroup) ընկերության տվյալներով, Միացյալ Արաբական Էմիրություններում օգոստոս ամսին հետաձգված շինարարական նախագծերի ընդհանուր ծավալը հասել է 170 մլրդ ԱՄՆ դոլարի, տեղեկացնում է Arabianbusiness ինտերնետային կայքը: Ինչպես նշվում է հաշվետվության մեջ, Պարսից ծոցի երկրներում անշարժ գույքի շուկան դեռ շատ հեռու է վերականգնվելուց: Հաշվետվության տվյալներով, Մերձավոր արևելքի և հյուսիսային Աֆրիկայի տարածաշրջանում հետաձգված նախագծերի 56 տոկոսը պատկանում է Միացյալ Էմիրություններին, որտեղ նախորդ ամսվա համեմատ այդ ցուցանիշն ավելացել է 13 տոկոսով: Ի դեպ, հաշվետվության հեղինակներին չի զարմացրել այն փաստը, որ հետաձգված են հիմնականում անշարժ գույքի նախագծերը: Միացյալ Արաբական Էմիրություններում անշարժ գույքի բումից՝ 2008 թ-ից հետո, շուկայում գները նվազել են մոտ 60 տոկոսով, ինչն էլ ստիպում է բազմաթիվ կառուցապատողների հրաժարվել նախկին մտահաղացումներից: Ինչպես ներկայացնում է հաշվետվությունը, տարածաշրջանի որոշ երկրներում անշարժ գույքի շուկայում պոտենցիալ աճ է գրանցվել: Այսպես՝ Սաուդյան Արաբիայում նոր շինարարության ծավալներն ավելացել են 81 մլրդ ԱՄՆ դոլարով, իսկ Քուվեյթում և Քաթարում շինարարության առաջին փուլում գտնվող նախագծերի ընդհանուր բյուջեն ավելացել է համապատասխանաբար 20 և 2 մլրդ ԱՄՆ դոլարով:
Սեպտեմբերի 9-ին Միացյալ Արաբական էմիրությունների վարչապետ և Դուբայի կառավարիչ Մուհամեդ իբն Ռաշիդ ալ Մակթումը հանդիսավոր կերպով պաշտոնապես կբացի Դուբայի մետրոյի՝ 23 կիլոմետր երկարությամբ և 16 կայարանից բաղկացած «Կանաչ գիծը», հաղորդում է Gulf News-ը: Նորաբաց գիծն իր մեջ ներառում է նաև 2 «Կարմիր գծին» միացնող կայարաններ: Առաջինը «Յունիոն» (Union) կայարանն է, որը, 25 հազար քառակուսի մետր ընդհանուր մակերեսով, համարվում է մետրոյի աշխարհի խոշորագույն կայարանը, և «Խալիդ իբն ալ Վալիդ» կայարանը, որն էլ համարվում է մետրոյի երկրագնդի ամենաշլացուցիչ կայարանից մեկը: Հոդվածի համաձայն՝ նորաբաց գծում օրվա մարդաշատ ժամերին ուղևորներին կսպասարկի 14, իսկ ավելի ազատ ժամերին 10 գնացք: Ի դեպ, գնացքներն ուղևորներին կմոտենան 6-8 րոպե ընդմիջմամբ: Նշենք, որ մետրոյի երկու գծերում միասին օրվա մարդաշատ ժամերին կաշխատեն 50, իսկ ավելի հանգիստ ժամերին 28 գնացք: Ինչպես տեղեկացնում է մեկ այլ ինտերնետային աղբյուր՝ 2daydubai.com-ը, Դուբայի մետրոյում շինարարական աշխատանքները պաշտոնապես սկսել են 2006 թ-ի մարտի 21-ին: 2009 թ-ի սեպտեմբերի 9-ին պաշտոնապես շահագործման է հանձնվել «Կարմիր գիծը» և ահա ուղիղ 2 տարի անց հանրության համար կբացվի նաև երկրորդ՝ «Կանաչ գիծը»: Նախապես որոշված էր շինարարությունն իրականացնել 2 փուլով՝ առաջին փուլի (4.2 մլրդ ԱՄՆ դոլար) ընթացքում պետք է կառուցվեր 35 կիլոմետր երկարությամբ գիծ, իսկ երկրորդ փուլի (12 մլրդ ԱՄՆ դոլար) ընթացքում ընդլայնվեր երկու գծերի երթուղին:
Դուբայի խոշոր առևտրա-ժամանցային կենտրոնների կառուցապատող Մաջիդ Ալ Ֆութեյմ Գրուփը (Majid Al Futtaim Group), անտեսելով Սիրիայում տիրող պայթյունավտանգ իրավիճակը, երկրում սկսել է Քամս Շամաթ (Khams Shamat)՝ նոր բազմաֆունկցիոնալ համալիրի շինարությունը: Օգոստոսի 7-ին ընկերությունը հայտարարել է, որ Սիրիայի մայրաքաղաք Դամասկոսից 17 կիլոմետր արևմուտք գտնվող տարածքում սկսել է կառուցել 1 մլրդ ԱՄՆ դոլար արժողությամբ համալիրը: Նախագծի առաջին փուլի շինարարական աշխատանքները սկսել են հուլիս 27-ին: 1.5 մլն քառակուսի մետր ընդհանուր մակերեսով առևտրա-ժամացային կենտրոնում կլինեն հյուրանոցներ, խանութ-սրահներ, բնակարաններ և գրասենյակներ: Սիրիայում և Լիբանանում ընկերության ներկայացուցիչ Վադահ Էլ Սոլհը հայտարարել է, որ բոլոր նախապատրաստական աշխատանքներն ավարտված են, պատրաստ են ինչպես շինարարությունը ղեկավարող խմբերը, այնպես էլ աշխատողները: Հարկ է նշել, որ այս տարվա մարտից Սիրիայում անկարգությունների հետևանքով զոհվել են 2200 ցուցարար և 500 անվտանգության համակարգի աշխատակից:
Մերձավոր Արևելքի խոշորագույն կառուցապատողներից մեկը, Դամաք Փրոփերթիս (Damac Properties) ընկերությունը Դուբայ Մարինա (Dubai Marina) թաղամասում սկսել է իր Դամաք Հեյթս (Damac Heights) նախագծի շինարարությունը, տեղեկացնում է Tradearabia լրատվական գործակալությունը: Նախագծի գլխավոր կապալառուի դերը ստանձնել է Արաբթեք (Arabtec) ընկերությունը: 85 հարկանի և 420 մետր բարձրությամբ նախագծի իրականացման նախնական բյուջեն կազմում է 138.4 մլն ԱՄՆ դոլար: Դամաք Հեյթսը շահագործման հանձնվելուց հետո իր հավանական սեփականատերերին կառաջարկի 2, 3 և 4 սենյականոց, ինչպես նաև երկհարկանի բնակարաններ, և փենթհաուսներ: Բնակելի համալիրը կհամապատասխանի ապրելու ամենաբարձր չափանիշներին և բնակիչները կկարողանան օգտվել համալիրի 5 աստղանի ենթակառուցվածքներից: Մասնավորապես՝ նախատեսվում է աշտարակում կառուցել կարգավորվող ջերմաստիճանով լողավազան, մարզասրահ, մանկական խաղասրահ, շոգեբաղնիք, սպա-կենտրոն և այլն: Ինչպես նշված է Դամաք Փրոփերթիս ընկերության փոխնախագահ Նիալ Մակ Լուգլինի (Niall Mc Loughlin) ելույթում, Դամաք Հեյթսը կդառնա հերթական շողացող ծովափնյա մարգարիտը: Աշտարակը կառուցվում է Դուբայ Մարինա թաղամասի Ալ Սուֆու մայրուղու (Al Sufouh Road) վրա: 2 կիլոմետր երկարությամբ ծովափնյա այս ոչ լայն հատվածը դարձել է բազմաթիվ բացառիկ նախագծերի վայր, «որոնց շարքում Դամաք Հեյթսը պիտի ամենավառը փայլի», նշել է Մակ Լուգլինը: Նա նաև ավելացրել է, որ այսօր շատ դժվար է զարմացնել՝ Դուբայում նոր շենք կառուցելով: «Բավարար չէ կառուցել լավ շինություն սովորական թաղամասում: Այսօր կառուցապատողները պետք է տեղափոխվեն մեկ այլ հարթություն և ստեղծեն ֆենոմենալ նախագծեր՝ հեղինակավոր թաղամասերում և բոլոր ժամանակակից հարմարություններով: Դամաք Հեյթսը կլինի հենց այդպիսին», ավելացրել է փոխնախագահը: Դամաք Հեյթս բնակելի համալիրը կառուցապատող Դամաք Փրոփերթիս և կապալառու Արաբթեք ընկերությունների երկրորդ համատեղ նախագիծն է: Նրանք անցած տարի հաջողությամբ ավարտեցին 84 հարկանի Օուշըն Հեյթս (Ocean Heights) կառույցի շինարարությունը: Դամաք Փրոփերթիս ընկերությունը ստեղծվել է 2002 թ-ին և մինչ օրս Դուբայում կառուցել է 28 շենք ընդհանուր 986,6 հազար քառակուսի մետր տարածքով: Մինչև այս տարվա վերջ ընկերությունը նախատեսում է շահագործման հանձնել ևս 8 շենք 233,5 հազար քառակուսի մետր ընդհանուր մակերեսով: Ինչպես արդեն նշել էինք, Դուբայում վերջին 2 տարվա ընթացքում հետաձգվել կամ չեղյալ են հայտարարվել ավելի քան 217 անշարժ գույքի նախագիծ, իսկ 2010 թ-ին մոտ 22%-ով նվազել են անշարժ գույքի նկատմամբ կատարված գործարքները: Սակայն ինչպես տեսնում ենք, այս հանգամանքները և անշարժ գույքի գների շարունակական անկումը բոլորովին էլ չեն անհանգստացնում որոշ կառուցապատողների, որոնք բավականին լավատեսորեն են տրամադրված և ղեկավարվում են իրենց առաջարկի բացառիկությամբ:
