Նյու Յորքում ավարտվել է «Համաշխարհային առևտրի կենտրոն 1»-ի շինարարությունը: Մայիսի 10-ին շինարարները տեղադրել են 124 մետր բարձրությամբ պողպատե շիվը, ինչի արդյունքում երկնաքերի ընդհանուր բարձրությունը հասել է 541 մետրի կամ 1776 ոտնաչափի: Ի դեպ այս բարձրությունը խորհրդանշում է ԱՄՆ-ի անկախության տարիքը: 541 մետր բարձրությամբ նոր աշտարակն արդեն ճանաչվել է ամենաբարձրն ԱՄՆ-ում և արևմտյան կիսագնդում, ինչպես նաև բարձրությամբ երրորդն ամբողջ աշխարհում՝ չնայած այն փաստին, որ դեռ քննարկումներ են ընթանում շիվի շարժականության վերաբերյալ, որը պետք է հանդիսանա շենքի հիմնական կառուցվածք, ինչը խիստ կարևոր է աշտարակի բարձրության չափման համար: Բացի վերոնշյալ տիտղոսները, նախագծի ընդհանուր բյուջեն, որը կազմել է 3.9 մլրդ ԱՄՆ դոլար, թույլ է տալիս աշտարակն անվանել նաև ամենաթանկ գրասենյակային կառույցն աշխարհում: Նախկինում հայտնի որպես «Ազատության աշտարակ»՝ «Համաշխարհային առևտրի կենտրոն 1»-ը կառուցվել է Ստորին Մանհեթթենում՝ 2001 թ-ի սեպտեմբերի 11-ին ահաբեկչության արդյունքում ավերված «Համաշխարհային առևտրային կենտրոն»-ի տարածքի կողքին: Ի սկզբանե աշտարակը ճանաչում էր գտել իր խոսակցական անվանմամբ՝ «Ազատության աշտարակ», սակայն 2009 թ-ի մարտի 30-ին Նյու Յորքի և Նյու Ջերսի քաղաքաների նավահանգստային ադմինիստրացիան պահանջեց աշտարակը կոչել իր իրավաբանական անվանմամբ՝ «Համաշխարհային առևտրի կենտրոն 1»: 2001 թ-ի սեպտեմբերի 11-ին տեղի ունեցած ահաբեկչական գործողություններից հետո բազմաթիվ քննարկումներ էին ընթանում ավերված տարածքի վերակառուցման ուղղությամբ: Անմիջապես առաջարկներ արվեցին արդեն 2003 թ-ին վերակառուցման մրցույթ հայտարարվեց, որի արդյունքում հաղթեց Դանիել Լիբեսքինդի (Daniel Libeskind) նախագիծը: Սակայն, այս սկզբնական նախագիծը բազմաթիվ փոփոխությունների ենթարկվեց և պաշտոնապես հանրությանը ներկայացվեց 2005 թ-ի հունիսի 28-ին: 2006 թ-ի ապրիլի 26-ին Նյու Յորքի և Նյու Ջերսի քաղաքաների նավահանգստային ադմինիստրացիան հաստատեց ձևափոխված նախագիծը, որից հետո միայն նույն թվականին հնարավոր եղավ սկսել աշտարակի շինարարությունը: Հարկ է նշել սակայն, որ հիմնարկեքի պաշտոնական արարողությունը տեղի էր ունեցել դեռևս 2004 թ-ի հուլիսի 4-ին: «Համաշխարհային առևտրի կենտրոն 1»-ի շենքի արտաքին շինարարական աշխատանքներն ավարտվել են 2013 թ-ի մայիսի 2-ին, իսկ բացման հանդիսավոր արարողությունը նախատեսված է այս տարվա վերջին կամ մյուս տարվա սկզբին՝ կախված ներքին հարդարման աշխատանքների ավարտից: Բացումից հետո նորակառույց աշտարակը կտրամադրի 241 հազար քառակուսի մետր մակերեսով կոմերցիոն տարածք, դիտահարթակներ, հեռուստահեռարձակման կենտրոններ և ռեստորաններ:
Այս տարվա սկզբին Դուբայը կրկին նոր ռեկորդ սահմանեց՝ բացելով աշխարհի խոշորագույն ծաղիկների այգին, որն անվանվեց «Դուբայի հրաշքների այգի» (Dubai Miracle Park): Այսօր նույն նախագծի հեղինակները պատրաստվում են սկսել ծրագրի երկրորդ փուլը, որը ենթադրում է աշխարհի խոշորագույն ուղղահայաց այգու և թիթեռների այգու շինարարություն: Ըստ նախնական տվյալների՝ նախագծի կառուցապատող «Դուբայ Փրոփերթիս Գրուփ» (Dubai Properties Group) ընկերության գործընկեր «Աքար Լենդսքեյփինգ և Ագրիքալչեր Քոմփանի» (Akar Landscaping & Agriculture Company) ընկերությունը կսկսի նոր ենթանախագծերի շինարարությունը, որոնք հանրությանը հասանելի կլինեն արդեն ընթացիկ տարվա հոկտեմբերին: Մոտ ապագայում նախագիծը, որի ընդհանուր մակերեսը կկազմի է 67 հազար քառակուսի մետր, կդառնա աշխարհի խոշորագույն ուղղահայաց այգու տունը: Բացի այդ այստեղ կկառուցվի նաև «Ուտելու բույսերի այգին» (Edible Plants Garden), որտեղ այցելուներն ազատ կկարողանան ճաշակել ծառերի մրգերն ու թփերի բանջարեղենները: Այգու մեկ այլ գեղատեսիլ վայերերից կլինի «Թիթեռնիկների այգին», որտեղ կապերի 40 տեսակի շուրջ 10 հազար թիթեռնիկ: Բացի վերոնշյալն այգում կկառուցվեն նաև մանկական զվարճանքի կենտրոններ, ծաղկային բլուրներ և սարեր: Այսօր աշխարհի խոշորագույն ուղղահայաց այգին գտնվում է Իտալիայի Միլան քաղաքում: Անցած տարի 1250 քառակուսի մետր մակերեսով և 44 հազար բույսերով ուղղահայաց այգին նոր ռեկորդ սահմանեց՝ դառնալով ամենամեծն աշխարհում:
«Մեդյան Գրուփ» (Medyan Group) կառուցապատող կազմակերպությունը նախատեսում է առաջիկա 6 շաբաթների ընթացքում Դուբայում սկսել 111-հարկանի աշտարակի շինարարությունը, տեղեկացնում է Emirates 24|7 պարբերականը: Ըստ տարածված տվյալների՝ շենքն իր բարձրությամբ կլինի երկրորդը քաղաքում և կտեղակայվի շեյխ Զայեդի անվան փողոցի վրա «Ռեդիսսոն Ռոյալ» (Radisson Royal) հյուրանոցի հարևանությամբ: Ըստ նախնական տվյալների` շենքում կլինեն բնակելի, կոմերցիոն և ժամանցային տարածքներ: Բացի այդ նոր աշտարակը կունենա տարածաշրջանում խոշորագույն սպա-կենտրոնն ու մարզասրահը՝ սեփական վազքուղով և թենիսի խաղահրապարակով: Աշտարակի մեկ այլ առավելությունն էլ կլինի վերջին հարկում տեղակայված գիշերային ակումբը: Նշենք, որ այսօր Դուբայում կառուցված են 200 մետրից բարձր 20 աշտարակը, որոնցից 18-ը գտնվում են շեյխ Զայեդի անվան փողոցի վրա, այդ թվում աշխարհի ամենաբարձր՝ 828 մետրանոց «Բուրջ Խալիֆան» և 414 մետր բարձրությամբ աշխարհի ամենաբարձր բնակելի «Փրինցեսս Թաուեր» աշտարակը:
Լոնդոնում 388 մլն ԱՄՆ դոլար ռեկորդային գնով առանձնատուն է հանվել վաճառքի, ինչը 700 անգամ ավելի է, քան մայրաքաղաքային անշարժ գույքի միջին գինը (565,000 ԱՄՆ դոլար), իսկ մակերեսը (մոտ 4600 քառակուսի մետր) 30 անգամ ավել, քան միջին լոնդոնյան ընտանիքի բնակարանի մակերեսը: Վաճառքից հետո Լոնդոնի կենտրոնում գտնվող այսպես կոչված ամենամեծ մասնավոր տան սեփականատերը կդառնան Անգլիայի թագուհու հարևանը և կկարողանա զմայլվել «Սբ. Ջեյմսի Այգու» (St James’s Park) բնապատկերներով: Նշենք, որ առանձնատան նմանօրինակ բարձր գինը պայմանավորված է լոնդոնյան անշարժ գույքի շուկայում նախորդ տարի գրանցված գործարքների ռեկորդային թվով: «Սավիլլս» (Savills) ընկերության տվյալներով անցած տարի Լոնդոնում վաճառվել է 2 մլն ԱՄՆ դոլար արժողությամբ 5115 տուն, ինչը 8 տոկոսով ավել է քան 2011 և 12 տոկոսով ավել քան 2007 թվականների ցուցանիշը: Այսօր Լոնդոնի ամենաթանկ առանձնատունը, որը գտնվում է Չարլթոն Հաուս Տերրաս 18 (Charlton House Terrace 18) հասցեում, պատկանում է Մերձավոր Արևելքի պետությունների թագավորական ընտանիքներից մեկի անդամին (որոշ աղբյուրներ նշում են Սաուդյան Արաբիայի թագավորական ընտանիքը), ով վաճառքի է հանել այս տունը, աշխատելով առանձնակի ուշադրության չարժանանալ: Նշենք, որ 4 հարկանի առանձնատունը, որն ունի նաև 2 ստորգետնյա հարկ, գտնվում է լավ վիճակում, սակայն չունի այն հարմարությունները, որոնց սովոր են մեծահարուստները՝ լողավազան, տնային կինոթատրոն և սպա-կենտրոն: Սակայն այս ամենի կառուցման համար բավականին ազատ տարածք կա: Առանձնատունը կառուցվել է 1827-32 թվականներին ճարտարապետ Ջոն Նեշի (John Nash) նախագծով և եղել է այդ տարիների Լոնդոնի ամենակարևոր քաղաքական կենտրոններից մեկը: Առաջին Համաշխարհային պատերազմի տարիներին առանձնատունը ծառայել է որպես «Բրիտանական Կարմիր Խաչի» և անհետ կորածների ու վիրավորների տեղեկատվական կենտրոն, որտեղից շատ ընտանիքներ տեղեկություններ են ստացել իրենց հարազատների մասին:
Քաղաք-պետություն Մոնակոն, որը հայտնի է որպես մեծահարուստների բնակավայր, մոտ ապագայում կարող է պարծենալ աշխարհի ամենաթանկ փենթհաուսով: Փենթհաուսը, որի արժեքը, ըստ նախնական տվյալների, սահմանվում է 387 մլն ԱՄՆ դոլար, պոտենցիալ գնորդների համար հասանելի կլինի արդեն հաջորդ տարի: Այսօր աշխարհի ամենաթանկ բնակարանը համարվում է լոնդոնյան «Ուան Հայդ Փարք» (One Hyde Park) համալիրում գտնվող 222 մլն ԱՄՆ դոլար արժողությամբ փենթհաուսը: Աշխարհի ամենաթանկ բնակարանը կառուցվում է 170 մետր բարձրությամբ «Օդեոն Թաուեր» (Odeon Tower) երկնաքերում, որն իրենից ներկայացնում է իրար միաձուլված 2 աշտարակ: Շինարարության ավարտից հետո նորակառույց շքեղ բնակելի աշտարակը գնորդներին կառաջարկի 73 էլիտար դասի բնակարաններ, 2 «երկնային դուպլեքսներ» (Sky duplex) յուրաքանչյուրը 1200 քառակուսի մետր ընդհանուր մակերեսով և մեկ 5-հարկանի «երկնային փենթհաուս» (Sky-penthouse) 3300 քառակուսի մետր ընդհանուր մակերեսով: Երկնաքերի ապամոնտաժման և հողային աշխատանքները սկսվել են դեռևս 2009 թվականի դեկտեմբերին: Շինարարության ավարտից հետո, ինչը նախատեսված է 2014 թվականի հուլիսին, «Օդեոն Թաուեր»-ը կդառնա միջերկրածովյան տարածաշրջանի բարձրությամբ երկրորդ աշտարակը՝ զիջելով միայն Իսպանիայում գտնվող 186 մետր բարձրությամբ «Գրան Հոթել Բալի» (Gran Hotel Bali) երկնաքերին: Շքեղագույն երկնաքերի նախագծման աշխատանքներով զբաղվում են այնպիսի հնչեղ անուններ ունեցող ճարտարապետներ, որոնցից է Ալեքսանդր Ջիրալդին (Alexander Giraldi), ով գլխավորում է ճարտարապետական թիմը: Երկնաքերի ինտերիերային նախագծմամբ զբաղվում է Ալբերտո Պինտոյի (Alberto Pinto) ճարտարապետական ստուդիան, իսկ երկնաքերի ընդհանուր պատկերն էլ лամբողջացնի Ժան Մուսի (Jean Mus) լանդշաֆտային նախագծերը: Աշխարհի ամենաթանկ փենթհաուսի գլխավոր առանձնահատկությունը վերջինիս հսկայական մակերեսն է՝ 5 հարկ և 3300 քառակուսի մետր, որին հաջորդում է երկնաքերի ամենավերին հարկում տեղակայված բացօթյա պատշգամբն իր ջրային սահքուղով դեպի հսկայական լողավազան: Բնակարանի ներքին ինտերիերում գերիշխում են մարմարն ու թերթաքարը: Բացի այդ փենթհաուսից շքեղ տեսարան է բացվում դեպի Միջերկրական ծովն ու Մոնակոյի զմրուխտե բլուրները: Նշենք, որ «Օդեոն Թաուեր»-ի բոլոր բնակարաններն էլ շքեղ են. իսկ հատակից-առաստաղ պատուհաններն ապահովում են ոչ միայն լույսի առատություն, այլև ցնցող տեսարաններ դեպի Մոնակոյի հրաշալի բնությունն ու Միջերկրական ծովը: Բացի այդ համալիրում ստեղծված են հանգստի բոլոր անհրաժեշտ պայմանները, մասնավորապես տեղակայված են առողջարարական կենտրոն, թուրքական և ռուսական բաղնիք, սաունա, մարզասրահ, լողավազաններ և սպա-կենտրոններ: Ի հավելումն այս ամենի՝ բնակիչները կարող են օգտվել նաև ամենօրյա մաքրության, քիմմաքրման, ավտոկայանման, ավտոլվացման և բազմաթիվ այլ ծառայություններից: Ի դեպ բոլոր այս ծառայությունները հասանելի են յուրաքանչյուր բնակարանում տեղադրված «խելացի բնակարան» համակարգի միջոցով:
