Կանադական Տորոնտո քաղաքում սկսվել է երկրի ամենաբարձր բնակելի աշտարակի շինարարությունը, տեղեկացնում է The Dezeen ինտերնետային պարբերականը: Ըստ նախնական տվյալների՝ երկնաքերի բարձրությունը հասնելու է 306 մետրի, ինչի արդյունքում աշտարակը դառնալու է երկրի ամենաբարձր բնակելի շինությունը և երկրորդ շինությունը իր բարձրությամբ ամբողջ Կանադայում: Երկրի ամենաբարձր շինությունն այսօր համարվում է 553 մետր բարձրությամբ հեռահաղորդակցական «ՍիԷն Թաուերը» (CN Tower) աշտարակը: «Դը Ուան» (The One) անվանումը ստացած երկնաքերը նախագծել են աշխարհահռչակ «Ֆոսթեր + Փարթներս» (Foster+Partners) և «Քոր Արքիթեքթս» (Core Architects) ճարտարապետական ընկերությունները: Ուղղանկյան ոճով նախագծված աշտարակին ճոխություն և յուրօրինակություն են հաղորդում բրոնզագույն երեսպատված հորիզոնական և ուղղահայաց կոնստրուկտիվ էլեմենտները: Ըստ նախնական տվյալների՝ 85 հարկանի երկնաքերի 8 ստորգետնյա հարկերում տեղակայվելու են բազմաթիվ վաճառասրահներ, ռեստորաններ, սրճարաններ, զվարճանքի կենտրոններ, սպա և ֆիթնես կենտրոն, գրադարան և այլն: Երկնաքերի վերին հարկերում կառուցվելու են շուրջ 560 բնակարաններ, ինչպես նաև մի քանի երկհարկանի փենթհաուսներ Օնտարիո լճի գեղեցիկ տեսարանով:

«Բիգ» (BIG, Bjarke Ingels Group) ճարտարապետական ընկերութունը պատրաստվում է Կոպենհագենում կառուցել 2 աշտարակից կազմված համալիր, որն իր դիմային հատվածի յուրօրինակ դիզայնի շնորհիվ կնմանվի կակտուսի, տեղեկացնում է Archidaily պարբերականը: «Կակտուս» համալիրում կլինի նոր ֆորմատով ներկայացող «Իկեա» խանութ-սրահը և մատչելի հյուրանոց: «Կակտուս» համալիրը կկառուցվի Կոպենհագենի կենտրոնում: Այն շրջապատված կլինի սեփական զբոսայգով: Ըստ նախնական տվյալների աշտարակների բարձրությունը կկազմի 60 և 80 մետր, իսկ բնակարանային ֆոնդը՝ 500 բնակարան: Աշտարակներում տեղակայված հյուրանոցն էլ կունենա 1250 հյուրանոցային համար: Ըստ ճարտարապետական ընկերության տարածած տվյալների՝ այս յուրօրինակ աշտարակները կշրջապատվեն նոր ենթակառուցվածքներով: Համալրում տեղակայված «Իկեա» խանութ սրահի մոտ չի նախատեսվում կառուցել ավտոկայանատեղի, իսկ խանութ սրահում կվաճառվեն փոքր չափսերով ապրանքներ, որոնք հաճախորդները կկարողանան տուն տանել հեծանիվով:

Հյուսիսային Կորեայի մայրաքաղաք Փհենյանում սկսել են վերակառուցել «Ռյուգյոն» (Ryugyong) հյուրանոցը, որը համարվում է աշխարհի ամենաբարձր անավարտ շինությունը, գրում է Daily Mail պարբերականը: Շինարարական աշխատանքները սկսվել են մեկ շաբաթ առաջ՝ հուլիսի 27-ին, կորեական պատերազմում կնքված հրադադարի օրվա կապակցությամբ: Քաղաքային իշխանությունները հեռացրել են բարձրահարկը շրջապատող շինարարական ցանկապատը և դեպի երկնաքեր տանող երկու քայլուղի բացել: «Ռյուգյոն» հյուրանոցի շինարարական աշխատանքները սկսվել են դեռևս 1987 թվականին՝ Կիմ Իր Սենի նախագահության տարիներին: Նախատեսված էր հյուրանոցը բացել 1989 թվականին, սակայն 1990-ականների տնտեսական ճգնաժամը բերեց շինարարության երկար տարիների կոնսերվացման: 105 հարկանի և 330 մետր բարձրությամբ հյուրանոցը համարվում է Հյուսիսային Կորեայի ամենաբարձր շինությունը: Հյուրանոցի ընդհանուր մակերեսը կազմում է 300 հազար քառակուսի մետր: Չնայած այն փաստին, որ արտաքինից հյուրանոցը ավարտված շինության տպավորություն է թողնում, անավարտ են ներքին հարդարման աշխատանքները: Բացի այդ ինչպես նշում է Daily Mail պարբերականը, անավարտ շինությունը լուրջ կառուցվածքային խնդիրներ ունի: Կիմ Չեն Ընի նախագահության սկզբից՝ 2011 թվականից, Հյուսիսային Կորեայում շինարարական աշխատանքներ են սկսվել մի շարք անավարտ շինություններում, ներառյալ 70 հարկանի երկնաքերը, միջազգային օդանավակայանը և ատոմի տեսք ունեցող գիտական կենտրոնը: Այդ ժամանակ եգիպտական «Օրասքոմ Տելեկոմ Մեդիա և Թեքնոլոջիս Հոլդինգի» (Orascom Telecom Media & Technology Holding) հետ համագործակցության արդյունքում իրականացվեցին նաև Հյուրանոցի ճակատի ապակեպատման աշխատանքները:

Իրաքի նավթային մայրաքաղաք համարվող Բասրա քաղաքում նախատեսվում է կառուցել աշխարհի ամենաբարձր երկնաքերը, տեղեկացնում է Designboom պարբերականը: «Հարս» (The Bride) անվանումը ստացած երկնաքերը նախագծել է «ԷյԷմԲիԷս Արքիթեքթս» (AMBS Architects) ճարտարապետական ընկերությունը: Ի տարբերություն անապատում տեղակայված հարևան բնակավայրերի, Բասրա քաղաքը կառուցված է Շատ-Էլ-Արաբ գետի ափին բերրի հողերի վրա: Հողատարածքների բարձր բերքատվության և քաղաքի յուրօրինակ ճարտարապետության շնորհիվ Բասրա քաղաքն անվանում են նաև Պարսից ծոցի «հարսնացու»: Ըստ նախնական տվյալների՝ «Հարսնացու երկնաքերը» բաղկացած է լինելու 4 աշտարակներից, որոնք տարբեր հարկերում իրար են միանալու բազմաթիվ կապող հատվածներով: Ինչպես պնդում են նախագծի հեղինակները, նմանատիպ մոտեցումը երկնաքերին բավականին ամրություն կհաղորդի: Բազմաֆունկցիոնալ համալիրի ամենաբարձր երկնաքերը կդառնա հարավային աշտարակը, որի բարձրությունն առանց ալեհավաքի կկազմի 964 մետր: Աշտարակի գագաթին կտեղադրվի նաև 188 մետր բարձրությամբ ալեհավաք, որի օգնությամբ երկնաքերի ընդհանուր բարձրությունը կկազմի 1152 մետր: Արդյունքում աշտարակը կդառնա ամենաբարձրն աշխարհում՝ իր հետևում թողնելով ներկայիս ռեկորդակիր «Բուրջ Խալիֆա» երկնաքերին (828 մետր): Նախատեսվում է, որ 241 հարկանի աշտարակում կտեղակայվի ավելի քան 1.55 մլն քառակուսի մետր մակերեսով անշարժ գույք: Հարավային հատվածում «Հարսնացու երկնաքերը» կծածկվի «հարսանեկան քողով»: Կորացած մետաղական կոնստրուկցիան յուրօրինակ ծածկ կդառնա երկնաքերի ստորոտին կառուցվող փոքրիկ շինությունների համար: «Հարսանեկան քողի» ուղղահայաց մակերեսը կկազմի 79 հազար քառակուսի մետր, իսկ հորիզոնականը՝ 590 հազար քառակուսի մետր: Ըստ նախնական տվյալների՝ «հարսանեկան քողի» տակ կտեղակայվեն ռեստորաններ, այգիներ, հանրային տարածքներ, զբոսուղիներ: Նշենք նաև, որ «հարսանեկան քողը» բաղկացած կլինի հիբրիդային արևային վահանակներից, որոնք ներգրավելով արևի ճառագայթները կվերածեն դրանք ջերմային և էլեկտրական էներգիայի: Ստացված էներգիան կծախսվի երկնաքերի կարիքները հոգալու նպատակով: Նախագծի հեղինակները այս յուրօրինակ համալիրը անվանում են նաև »ուղղահայաց քաղաք»: Բանն այն է, որ բացի հյուրանոցներից, գրասենյակային և բնակելի տարածքներից, երկնաքերում կտեղակայվեն նաև առևտրային և զվարճանքի կենտրոններ, բուսաբանական այգի, ինչպես նաև սեփական երկաթգիծ: Այսօր Բասրայում ապրում է գրեթե 2 մլն մարդ: Այստեղ են գտնվում խոշորագույն նավթաարդյունաբերական, քիմիական և տեքստիլ ընկերությունները: Համաձայն քաղաքի ղեկավարության որդեգրած քաղաքականության՝ Բասրան պետք է ընդլայնվի ոչ թե լայնությամբ, այսինքն՝ նոր տարածքներ ներգրավելով, այլ ուղղահայաց, այսինքն՝ բարձրահարկ շինարարության շնորհիվ: Տարեցտարի աճող բնակչությունը տեղավորելու համար արդեն 2025 թ-ին Բասրայում պետք է շահագործման հանձնվի 1,1 կիլոմետր բարձրությամբ «Հարսնացու երկնաքերը», որն էլ կդառնա քաղաքի գլխավոր այցեքարտը: /a>;

Ավստրալիական “Էլենբերգ Ֆրազեր” (Elenberg Fraser) ճարտարապետական ընկերությունը նախագծել է 226 մետր բարձրությամբ յուրօրինակ կորաձև երկնաքեր: Ինչպես պնդում են նախագծի հեղինակները, երկնաքերի ստեղծման ժամանակ նրանք ոգեշնչվել են հանրահայտ երգչուհի Բեյոնսեի «Ուրվական» (Ghost) երգի տեսահոլովակով: Երկնաքերի նախագծման ընթացքում վերջինիս ձևը նրանք ստացել են տեսահոլովակում երգչուհու շարժումների մոտիվներից: «Պրեմիեր Թաուեր» (Premier Tower) անվանումը ստացած երկնաքերը կկառուցվի Ավստրալիայի Մելբուրն քաղաքի Սպենսերի փողոցում: Այս յուրօրինակ նախագծի պատվիրատուն սինգապուրյան «Ֆրագրենս Գրուփ» (Fragrance Group) կառուցապատող ընկերությունն է: Ըստ նախնական տվյալների՝ 68 հարկանի երկնաքերում կտեղակայվեն 660 բնակարններ, հյուրանոց 160 համարներով և առևտրային կենտրոններ: Ինչպես պնդում են հեղինակները՝ երկնաքերի բոլոր բնակարաններից յուրօրինակ գեղեցիկ տեսարան կբացվի դեպի քաղաքային բնապատկերը երկնաքերի բարձրության և բարակության շնորհիվ: Ըստ հեղինակների տարածած հաղորդագրության՝ երկնաքերի արտաքին տեսքը այն զուտ յուրօրինակ դարձնելուն չէ միտված: Բանն այն է, որ կորաձև դիզայնը հնարավորություն է տալիս հավասարակշռել երկնաքերի կշիռը, պաշտպանել այն քամու ազդեցությունից և կանխարգելել տատանումները: Բացի այդ, բարձրահարկի նախագծման ընթացքում ճարտարապետները ջանացել են նվազագույնի հասցնել արտաքին միջավայրի վրա երկնաքերի ազդեցությունը: Նախագծի մանրամասները դեռևս չեն հայտարարվում, անհայտ են երկնաքերի ընդհանուր մակերեսը, ինչպես նաև շինարարության ժամկետները: