Ինչպես հայտնել էինք մեկ շաբաթ առաջ, ռուս միլիարդատեր Ռոման Աբրամովիչը դիմել էր լոնդոնյան Քենսիգթոն ու Չելսի շրջանների իշխանություններին՝ թույլատրել վերակառուցել 17–րդ դարի իրեն պատկանող պատմական կառույցը: Արդյունքում միլիարդատիրոջը հաջողվել է հաղթել 3 տարի տևած պայքարում և իշխանությունների կողմից ստանալ առանձնատան 15 մլն ԱՄՆ դոլար արժողությամբ վերակառուցման թույլտվություն: Նշենք, որ Լոնդոնի բնակիչները և մասնավորապես Աբրամովիչի հարևանները կարծում են, որ վերակառուցման արդյունքում կաղավաղվի տվյալ առանձնատան, ինչպես նաև շրջակա տների արտաքին տեսքը: Հարևան բնակիչները նաև դժգոհում են, որ վերակառուցման արդյունքում իրականացրած փոփոխությունները կարող են փակել Թեմզա գետի տեսարանը: Ինչպես գրում է Daily Mail պարբերականը, վերակառուցման նախագիծը ենթադրում է առանձնատան միացում հարակից 2 կառույցների հետ, տան որոշ հատվածի ձևափոխում գեղարվեստական պատկերասրահի, ինչպես նաև տան հիմքից որոշակի հողի հանում և երկհարկանի ստորգետնյա տարածքի կառուցում:
Լոնդոնյան Քենսինգթոն և Չելսի շրջանների իշխանությունները հաջորդ շաբաթ կքննարկեն ռուս միլիարդատեր Ռոման Աբրամովիչի նախագիծը՝ վերակառուցել Թեմզա գետին նայող առանձնատունը: Ինչպես տեղեկացնում է լոնդոնյան Evening Standard ինտերնետային պարբերականը, պատմական դղյակը պատկանել է նկարիչ Ջեյմս Ուիսթլերին: Ըստ նախնական տվյալների՝ նախագիծն արդեն ստացել է դրական արձագանքներ և ամենայն հավանականությամբ կընդունվի տեղական իշխանությունների հերթական նիստի ժամանակ: Աբրամովիչը ցանկանում է հին լորենիները վերափոխել կաղնիներով և վերակառուցել 17-րդ դարի պատմական առանձնատան այգին այնպես, որ այն նման լինի Ուիսթլերի պատկերած նկարներից մեկին: Հիմնական շենքում կվերակառուցվի Թեմզա գետին նայող սրահը, առանձնատան մասնաճյուղերից մեկը կառանձնացվի հիմնական շենքից և կդառնա բնակատեղի ծառայողական աշխատակազմի և հյուրերի համար: Բացի այդ նախատեսվում է ապամոնտաժել հին ավտոտնակները և դրանց փոխարեն կառուցել գեղարվեստական պատկերասրահ նկարների համար, որոնք միլիարդատերը հավաքել է ընկերուհի Դարյա Ժուկովայի հետ: Ենթադրվում է, որ դրական պատասխանի դեպքում, վերակառուցման աշխատանքները կավարտվեն 3 տարում: Ինչպես մանրամասնում է պարբերականը, վերակառուցման աշխատանքների արժեքը, որի մեջ մտնում է նաև Ուիսթլերի տունը, կկազմի մոտ 15 մլն ԱՄՆ դոլար:
