Մուսուլմանների ուխտագնացության գլխավոր կենտրոն Սաուդյան Արաբիայի Մեքքա քաղաքում նախատեսվում է կառուցել աշխարհի խոշորագույն և ամենատարողունակ հյուրանոցը: Համաձայն նախագծի՝ հյուրանոցում ընդհանուր առմամբ կլինի 10 000 հյուրանոցային համար: «Աբրաջ Կուդա» (Abraj Kudai) անվանումը ստացած հյուրանոցը նախատեսվում է կառուցել 2 տարում և այցելուների դատին հանձնել արդեն 2017 թվականին: 3,5 մլրդ ԱՄՆ դոլար արժողությամբ նախագիծը կտեղակայվի մուսուլմանների սուրբ «Մասջիթ ալ Հարամ» (Masjid al-Haram) մզկիթից 2 կիլոմետր հեռավորության վրա: Նախատեսվում է, որ հյուրանոցը հիմնականում հյուրընկալելու է ամբողջ աշխարհից սուրբ ուխտատեղի ժամանած միլիոնավոր ուխտավորներին: Ինչպես տեղեկացնում է DesignMENA ինտերնետային պարբերականը, 1.4 մլն քառակուսի մետր ընդհանուր մակերեսով յուրօրինակ հյուրանոցային համալիրը բաղկացած է լինելու 44 հարկանի 12 աշտարակներից, որտեղ տեղակայվելու են 10 000 հյուրանոցային համարներ, 70 ռեստորաններ, ինչպես նաև հսկայական խորհրդակցությունների դահլիճ: Շինությունների տանիքին լինելու են ուղղաթիռային հրապարակներ, իսկ ներքևի հարկերում առևտրային հսկա համալիրներ և հազարավոր ավտոմեքենաների համար նախատեսված կայանատեղի: Հյուրանոցային համալիրի 2 աշտարակներն այցելուներին առաջարկելու են 5-աստղանի և լյուքս դասի սենյակներ, իսկ մյուս 10 շենքերում տեղակայվելու են 4-աստղանի համարներ: Հյուրանոցի նախագծման աշխատանքներով զբաղվող «Դար Ալ-Հանդասահ» (Dar Al-Handasah) ճարտարապետական ընկերությունը նշում է, որ հյուրանոցի ներքին հարդարման աշխատանքներն էլ իրականացվելու են յուրօրինակ շքեղ ոճով: Այսօր աշխարհի խոշորագույն հյուրանոցները գտնվում են Լաս-Վեգասում: Աշխարհի խոշորագույն հյուրանոցների ցանկը գլխավորում է «Վենետիկյան» և «Պալացցո» (The Venetian and The Palazzo) համատեղ հյուրանոցը 7117 համարներով, նրան հետևում է «ԷմՋիԷմ Գրանդ» (The MGM Grand) հյուրանոցը 6852 սենյակներով:

Աշխարհի ամենաբարձր աշտարակի տիտղոսին հավակնող «Արքայական Աշտարակի» (Kingdom Tower) շինարարական գործընթացը կարևորագույն կետի է հասել. Օրերս շինհրապարակում նոր համաշխարհային ռեկորդ կգրանցվի, այստեղ կտեղադրվեն աշխարհի ամենաբարձր շինարարական կռունկները: Ինչպես նշում են նախագծի հեղինակները, քանի որ աշտարակը յուրօրինակ է իր ձևով և բարձրությամբ, հետևաբար յուրօրինակ պետք լինեն նաև աշտարակի շինարարության ժամանակ օգտագործված մեթոդները, շինանյութը, սարքավորումները: Այդ նպատակով շինհրապարակում տեղադրվելու են գերմանական «Լիբհեր Էնդ Վոլքկրան» (Liebherr & WolffKran) ընկերության նորագույն վերամբարձ կռունկները: Հսկայական դեղին սարքավորումները, որոնք հայտնի են որպես մագլցող կռունկներ, պետք է մասնակցեն աշտարակի շինարարությանը և ներսից, և դրսից` անհրաժեշտության դեպքում օգտագործելով նաև 65 վերելակների համար նախատեսված տարածքները: Շինհրապարակում տեղադրված 6 կռունկներից ամենամեծը (Liebherr 357 HC-L) կարող է րոպեում 44 մետր վայրկյան արագությամբ բարձրացնել մինչև 18 տոննա բեռ: Նշենք, որ այս կռունկները հենվում են չափազանց փոքր մակերեսի վրա, որը կազմում է 2.4 * 2.45 մետր: Սակայն այս կռունկների առավելությունը ոչ միայն նրանց գրաված չնչին մակերեսն է, այլև այն բոլոր նորագույն տեխնոլոգիաները որոնք տեղադրված են կռունկների վրա: Այդ տեխնոլոգիաները հնարավորություն են տալիս դիմակայել եղանակային կոշտ պայմաններին, մասնավորապես, այն ուժգին քամիներին, որոնք հնարավոր են երկնաքերի ամենաբարձր հատվածներում: Նշենք, որ այս կռունկները ղեկավարելու համար կհրավիրվեն են փորձառու և հավաստագրված մասնագետներ: Ըստ նախնական տվյալների` «Արքայական Աշտարակը» բաղկացած է լինելու 170 հարկից, որից 7 հարկում տեղակայվելու են գրասենյակային տարածքներ, իսկ մյուս 7 հարկում լինելու է «Ֆոր Սիզոնս» (Four Seasons) հինգաստղանի հյուրանոցը: Սակայն մեծ մասամբ աշտարակը լինելու է բնակելի: Վերջինիս 61 հարկերում տեղակայվելու են 318 բնակարան: Բացի վերոնշյալից աշտարակում պետք է լինեն մարզասրահներ, սպա-կենտրոններ, սրճարաններ, ռեստորաններ, ինչպես նաև 644 մետր բարձրության վրա տեղակայված 2՝ աշխարհի ամենաբարձր դիտահարթակները:

Սաուդյան Արաբիայի մայրաքաղաք Էր-Ռիադից ոչ հեռու տեղի է ունեցել «Աբդալա Արքայի անվան Միջազգային Այգիների» (the King Abdullah International Gardens (KAIG)) հիմնարկեքի արարողությունը: Ըստ նախնական տվյալների` շինարարության ավարտից հետո այստեղ կտեղակայվի աշխարհի խոշորագույն փակ բուսաբանական այգին: «Աբդալլա Արքայի անվան Միջազգային Այգիների» հիմնական շինարարական աշխատանքերը սկսվել են նախագծի առաջին փուլի ավարտից անմիջապես հետո, որի ընթացքում կատարվել են հողի հավասարեցման և տարածքի ցանկապատման աշխատանքները: Բուսաբանական այգու ընդհանուր մակերեսը կկազմի 2.5 մլն քառակուսի մետր: Աշխարհի խոշորագույն էկոլոգիական նախագծերից մեկը կբաժանվի 2 հատվածի` բաց և փակ: Բուսաբանական այգու փակ հատվածը կունենա կիսալուսնի ձև, որտեղ կտեղակայվի 100 հազար քառակուսի մետր մակերեսով հսկայական բուսաբանական այգի: Փակ բուսաբանական այգին կդառնա խոշորագույնն աշխարհում իր տեսակի մեջ և իր մակերեսով 5 անգամ կգերազանցի նույնօրինակ «Էդեմ նախագիծը» Մեծ Բրիտանիայի Քորնուոլ դքսությունում: Ինչպես նշում են նախագծի հեղինակները, այստեղ կլինեն 6 բաժիններ, որտեղ հիմնականում կներկայացվեն Արաբական թերակղզուն բնորոշ բուսականությունը: «Աբդուլլա Արքայի անվան Միջազգային Այգիների» բացօթյա հատվածում կլինի բացառապես բնական միջավայր` բույսերի բացօթյա թանգարան, սերմերի բանկ, ժայռե այգի: Բացի վերոնշյալներից, այստեղ կտեղակայվեն նաև գիտահետազոտական ինստիտուտներ, ծառայողական շինություններ, խանութ-սրահներ, ռեստորաններ և թատրոն: Նախագիծը լայնօրեն հագեցված է «կանաչ» տեխնոլոգիաներով, մասնավորապես` օգտագործվելու է այլընտրանքային էներգիա` արևի և քամու, ջրօգտագործման ծայրահեղ խնայող համակարգ, կեղտաջրերի մաքրում և կրկնօգտագործում:

«Ջեդդա տնտեսական ընկերության» (Jeddah Economic Company) նորանշանակ գործադիր տնօրեն Մոնիբ Համմոուդը (Mounib Hammoud) հայտարարել է, որ «Արքայական Աշտարակի» (Kingdom Tower) հիմնային աշխատանքներն արդեն ավարտված են: Ինչպես նշում է Arab News լրատվական գործակալությունը, սա նշանակում է, որ շուտով կսկսվեն շինարարական աշխատանքներն արդեն հողի մակերևույթի վրա և դրանից բարձր: Նշենք, որ անցած տարվա հոկտեմբերին շինարարական Bauer ընկերությունը հայտարարել էր, որ Սաուդյան Արաբիայի մայրաքաղաք Ջեդդայում կառուցվելիք աշխարհի ամենաբարձր աշտարակի հիմքային աշխատանքները սկսելու վերաբերյալ պայմանագիրն արդեն ստորագրված է: Իսկ «Արքայական Աշտարակի» մասին առաջին անգամ հայտարարվել է 2011 թ-ի օգոստոսի 2-ին, երբ Սաուդյան Արաբիայի արքայազն, միլիարդատեր Ալվալիդ իբն Թալալը (Alwaleed bin Talal) և երկրի խոշորագույն կառուցապատող Բեն Լադեն Գրուփ (Bin Laden Group – հիմնված է աշխարհի, արդեն հանգուցյալ, համար 1-ին ահաբեկչի հոր կողմից) ընկերությունը համաձայնագիր ստորագրեցին՝ Կարմիր ծովի ափին գտնվող Ջեդդա քաղաքում կառուցել 1.2 մլրդ ԱՄՆ դոլար արժողությամբ աշխարհի ամենաբարձր երկնաքերը: Այս տարվա հուլիսի 20-ին Չինաստանի Չանշա (Changsha) նահանգում սկսվեց աշխարհի ամենաբարձր երկնաքերի շինարարությունը: «Բրոուդ Սըսթեյնեբլ Բիլդինգ» (Broad Sustainable Building) ընկերությունը նախատեսել էր 7 ամսում կառուցել 838 մետր բարձրությամբ երկնաքեր՝ օգտագործելով «հավաքովի» կառուցվածքներ: Սակայն մի քանի օր անց շինարարական աշխատանքները դադարեցվեցին փաստաթղթային խնդիրների պատճառով:

Սաուդյան Արաբիան նախատեսում է սուրբ Մեքքա քաղաքի հարևանությամբ նոր քաղաք կառուցել ավելի քան 600 հազար մարդու համար: «Մեքքայի Դարպասներ» (Makkah Gate) անվանումը ստացած նոր քաղաքի նախագիծը մշակվել է պետական-մասնավոր համագործակցության արդյունքում: Ըստ նախնական տվյալների՝ 83 մլն քառակուսի մետր ընդհանուր մակերեսով քաղաքը կկառուցվի Մեքքա-Ջիդդա մայրուղու վրա: Այնտեղ կլինեն պետական և ուսումնական հաստատություններ, առևտրային կենտրոններ, բնակելի համալիրներ և ազգային զբոսայգի: Վերջին ժամանակներս բնակչության արագ աճի պատճառով Սաուդյան Արաբիան հայտարարել է մի քանի նոր քաղաքների կառուցման ծրագրերի մասին: Այս տարվա հունիսին երկրի ղեկավարները հայտարարեցին, որ Մեդինա քաղաքի հարևանությամբ նախատեսում են Խաջի և Ումրայի ժամանակ սրբավայր այցելող ավելի քան 200 հազար մուսուլմանների համար կառուցել նոր քաղաք: «Ուխտավորների քաղաք» (pilgrim city) անվանումը ստացած նախագծի ընդհունր մակերեսը կկազմի 1.6 մլն քառակուսի մետր և կներառի հյուրանոցներ, բնակելի համալիրներ, երկաթգծային և ավտոբուսային կայարաններ, պետական հաստատություններ և 400 հիվանդի համար նախատեսված հիվանդանոց: Մեկ այլ քաղաք էլ նախատեսվում է կառուցել Ռաբիգ քաղաքի հարևանությամբ, որը գտնվում է Ջիդդայից 150 կիլոմետր հյուսիս: «Մեգա քաղաք» (mega city) անվանումը ստացած քաղաքի ընդհանուր բյուջեն գնահատվում է 2.9 մլրդ ԱՄՆ դոլար: 20 մլն քառակուսի մետր մակերեսով քաղաքում կլինեն առաջատար հիվանդանոցներ, նավթաքիմիական գործարաններ, դպրոցներ, մզկիթներ և բնակելի համալիրներ: