Հոլանդիան հայտնի է իր հարթավայրային բնությամբ, սակայն Վելդհովեն քաղաքում մոտ ապագայում կկարողանանք հանդիպել հսկայական կանաչ լեռան: Այս քաղաքում կկառուցվի «Հոլանդական սարեր» (Dutch Mountains) անվանումը կրող նախագիծը, որը հավակնում է դառնալ աշխարհի խոշորագույն փայտյա շինությունը: Ի դեպ, շինարարության ընթացքում նախատեսվում է համատեղել նորագույն տեխնոլոգիաները և բնական շինանյութերը: Յուրօրինակ համալիրում կտեղակայվեն գրասենյակային տարածքներ, խորհրդակցությունների սրահներ, հյուրանոց և զբոսաշրջիկների համար նախատեսված կարճաժամկետ ծառայությունների սրահներ: Համալիրի հիմնական շինությունը կկառուցեն բացառապես փայտանյութից, իսկ շինարարության ավարտից հետո այն հավակնում է դառնալ խոշորագույնն ամբողջ աշխարհում: Ըստ նախնական տվյալների՝ այս նախագիծը կլինի ինքնաբավ՝ էներգիայի, ջրի, թափոնների և այլ նյութերի փակ շրջաններով: Ճարտարապետները փայտանյութն ընտրել են որպես հիմնական շինանյութ՝ մթնոլորտ արտանետվող ածխաթթու գազի քիչ քանակի համար: Բացի այդ ճարտարապետները նախատեսում են համալիրի դիմային հատվածում տեղադրել խելացի համակարգ, որը կկարգավորի ջերմաստիճանը և կնվազեցի էներգիայի սպառումը: Նշենք, որ համալիրի շինարարության ընթացքում կօգտագործվի միայն էկոլոգիապես մաքուր շինանյութ: Բայց սա դեռ ամենը չէ: Համալիրը կոչված է մթնոլորտ արտանետել հսկայական քանակությամբ թթվածին: Ամբողջ համալիրը պատված կլինի բուսականությամբ, իսկ տանիքին հսկայական բաց այգի կկառուցվի:
Ճապոնական Կառուցապատող «Սումիտոմո Ֆորեսթրի» (Sumitomo Forestry) ընկերությունը հանրությանն է ներկայացրել աշխարհի ամենաբարձր փայտյա երկնաքերի նախագիծը, որը կկառուցվի Տոկիոյի սրտում: 350 մետր բարձրությամբ փայտյա երկնաքերը նախագծել է « Նիկեն Սեկեյ» (Nikken Sekkei) ճարտարապետական ընկերությունը: Ըստ նախնական տվյալների՝ փայտյա աշտարակի շինարարությունը կավարտվի 2041 թվականին՝ կառուցապատող ընկերության հիմնադրման 350-ամյակին: Ինչպես պնդում է կառուցապատող ընկերությունը, այս փայտյա և պողպատյա շինությունը հնարավորություն կտա ձևափոխել քաղաքն անտառի: Ինչպես տեղեկացնում է The Telegraph կայքը, այս երկնաքերի շինարարության համար կպահանջվի 5,6 մլրդ ԱՄՆ դոլար: Երկնաքերի կարկասը կկառուցվի պողպատից և փայտից պատրաստված հիբրիդային կառուցվածքներից: Կառուցապատող ընկերության տվյալներով՝ փայտի և պողպատի հարաբերակցությունը երկնաքերի շինարարության ժամանակ կլինի 9:1-ին: Փայտյա երկնաքերի ընդհանուր մակերեսը կկազմի 450 հազար քառակուսի մետր, որտեղ կտեղակայվեն բնակարաններ, գրասենյակային տարածքներ, առևտրային և զվարճանքի կենտրոններ: Շինարարության ավարտից հետո այս երկնաքերը կդառնա ոչ միայն ամենաբարձր փայտյա երկնաքերն ամբողջ աշխարհում, բայց նաև ամենաբարձր երկնաքերը Ճապոնիայում: Ինչպես մանրամասնում է կայքը, աշտարակի շինարարության համար կպահանջվի 185 հազար խորանարդ մետր փայտ, ինչը բավարար է 8000 շարքային տուն կառուցելու համար: Երկնաքերի ներքին հարդարման մեջ կօգտագործվի բացառապես փայտանյութ, որպեսզի մարդիկ ավելի մոտ գտնվեն բնությանը: Նախագծի հեղինակների տվյալներով, շինարարության համար ընտրվել է այնպիսի փայտանյութ, որը հրդեհակայուն լինի: Փորձարկումները ցույց են տվել, որ այն կարող է դիմակայել 3 ժամ տևող հրդեհին:
ԱՄՆ-ում նախատեսվում է կառուցել երկրի խոշորագույն փայտյա կառուցվածքներով գրասենյակային համալիրը: Ինչպես տեղեկացնում է The Dezeen պարբերականը, գրասենյակային համալիրը կկառուցվի Նյու Ջերսի նահանգի Նյուարկ քաղաքում: 47000 քառակուսի մետր մակերեսով համալիրը նախագծել է կանադական «Մայքլ Գրին Արքիթեքչը» (Micheal Green Architecture) ճարտարապետական ընկերությունը: Ըստ նախնական տվյալների՝ շինարարության ավարտից հետո գրասենյակային համալիրը 2 անգամ ավելի մեծ կլինի Մինեապոլիսում գտնվող նախորդ ռեկորդակրից՝ «Տ3 Նորթ Լուփ Էմ» (T3 North Loop M) շինությունից: Վերջին տարիներին ԱՄՆ-ում աճում է փայտյա շինարարության նկատմամբ հետաքրքրությունը, քանի որ այն ամուր է, էկոլոգիապես մաքուր, մատչելի և արագ է կառուցվում: Ըստ նախնական տվյալների՝ գրասենյակային համալիրը բաղկացած կլինի 3 աստիճանական շինություններից, որոնք փոխկապակցված կլինեն: Շինությունները համապատասխանաբար կունենան 6, 8 և 11 հարկ: Գրասենյակային համալիրի հիմքը կկառուցվի բետոնից, իսկ մնացած կոնստրուկցիաները փայտից: Ինչպես տեղեկացնում է պարբերականը, համալիրի ճակատային հատվածը կերեսապատվի մետաղական կամ աղյուսե վահանակներով: Ներքին հարդարման մեջ կգերակշռի փայտը, մեծ պատուհանների շնորհիվ շինություն կներթափանցի արևի բնական լույսը, իսկ տանիքին կտնկվի այգի աշխատակիցների համար: Նախագծի հեղինակների խոսքերով գրասենյակային համալիրը կկառուցվի «Ռիվերֆրոնթ Սքուեր» (Riverfront Square) անվանումը ստացած նախագծի շրջանակներում: Նախագծի ընդհանուր մակերեսը կկազմի 186 հազար քառակուսի մետր, որի մեջ կներառվեն գրասենյակային տարածքներ, 2000 բնակարաններ, հյուրանոց, հանրային տարածքներ և մշակութային կենտրոններ:
