Այսօր Մյունխեն քաղաքը կարող է պարծենալ որպես աշխարհի ամենականաչ գրասենյակային շենքի հայրենիք: Եվրոպական «Դայրեքշն» (Direction) գիտահետազոտական նախագիծը և Ֆրաունհոֆերի ինստիտուտի (Fraunhofer Institute for Building Physics) գիտնականները համախմբվել են, որպեսզի նախագծեն այս «գեր-կանաչ» շինությունը՝ հուսալով այն դարձնել ապագա կանաչ շինարարության էտալոն ամբողջ աշխարհում: Կառույցը շատ արագ արժանացել է LEED Պլատինե հավաստագրման տիտղոսի:

«Նոր Գրասենյակ» (NuOffice) անվանումը ստացած այս շենքում տեղադրված են բազմաթիվ այլընտրանքային էներգիայի աղբյուրներ: Նախ՝ շինության տանիքը պատված է բուսականությամբ, բացի այդ հենց նույն տանիքում տեղադրված են հզոր ֆոտոէլեկտրական արևային վահանակներ: Շինության ջեռուցման և սառեցման նպատակով ստորգետնյա հարկում տեղադրված է ջեռուցման բարդ համակարգ, որը ամռան ամիսներին շինության սառեցման համար օգտագործելու է ստորգետնյա ջուր: Շենքի ներքին բակում բուսականությունն այնպես է տնկված, որ արևի բնական լույսն ամբողջությամբ ներթափանցի ներս: Ի հավելումն վերոնշյալին, գերազանց ջերմամեկուսացված արտաքին պատերը և եռակի ապակեպատված պատուհանները կայուն են պահում ներքին տարածքների ջերմաստիճանը:

Նշենք, որ ոչ վաղ անցյալում շահագործման հանձնված գրասենյակային շենքը նախագծող խումբը մանրամասնորեն հետևում է ծախսված էլեկտրաէներգիայի ծավալներին: Խումբը հուսով է, որ մինչև տարեվերջ էլեկտրաէներգիայի ծախսը 1 քառակուսի մետրի համար կարող է հասցնել 30 կիլովատ ժամի, մինչդեռ ավանդական գրասենյակային շենքերում քառակուսի մետրի համար ծախսվող էլեկտրաէներգիայի ծավալը կազմում է 100-150 կիլովատ ժամ: