Օրերս ճապոնական «Շիմիզու Քորփորեյշն» (Shimizu Corporation) ընկերությունը հանրությանն է ներկայացրել ցնցող մի նախագիծ, որի նախապատրաստական աշխատանքները տևել են շուրջ 2 տարի: Ըստ տարածված տեղեկատվության՝ ընկերությունը ցանկանում է կյանքը տեղափոխել ստորջրյա հարթություն՝ կառուցելով յուրօրինակ ստորջրյա մի քաղաք: Ինչպես պնդում են նախագծի հեղինակները՝ քաղաքի կառուցման համար կպահանջվի մոտ 26 մլրդ ԱՄՆ դոլար, իսկ տեխնոլոգիաները, որոնք թույլ կտան իրականացնել այն, միայն հասանելի կլինեն 2030 թվականին:

Ըստ նախնական տվյալների՝ «Օվկիանոսի պարուրակ» (Ocean Spiral) անվանումը ստացած ստորջրյա քաղաքում կկարողանա ապրել մոտ 5000 բնակիչ: Ստորջրյա քաղաքն իրենից ներկայացնում է ջրի մեջ ընկղմված հսկա գունդ: Այն բաղկացած կլինի 3 հատվածներից: Առաջին հատվածը, որն իրենից ներկայացնելու է 500 մետր տրամագծով գունդ, կիսով չափ կտեղակայվի ջրի մակերեսին: Ապա այդ շրջանը ստորին հատվածին կմիանա 15 կիլոմետր երկարությամբ պարուրաձև արահետով: Ստորին հատվածում կգտնվի ստորջրյա հիմնական բաղադրիչը: Այն ոչ միայն հիմք կհանդիսանա հսկայական կառույցի համար, այլ այստեղ կտեղակայվի գիտահետազոտական հսկա մի կենտրոն: Այս կենտրոնում նախատեսվում է էներգիա արտադրել, ինչը հնարավոր կլինի ծովի հատակի սառը և մակերեսային տաք ջրերի ջերմաստիճանների տարբերության շնորհիվ: Բացի այդ, նախատեսվում է մեթանոգենների օգնությամբ ածխաթթու գազից մեթան ստանալ, ինչպես նաև թորած ջուր արտադրել:

«Շիմիզու Քորփորեյշն» ընկերության մամլո քարտուղար Մասատակա Նոգուչին (Masataka Noguchi) The Wall Street Journal պարբերականին տրված հարցազրույցում խոստովանել է, որ սա ընդամենը նախագիծ է, որի օգնությամբ ընկերությունը ձգտում է մշակել այնպիսի տեխնոլոգիաներ, որոնք հնարավորություն կտան կյանք ապահովել ստորջրյա տարածության մեջ:

«Շիմիզու Քորփորեյշն» ընկերությունն այս նախագիծը մշակել է Տոկիոյի ինստիտուտի, Ճապոնիայի ջրային երկրաբանական գիտությունների գործակալության (Japan Agency for Marine-Earth Science) և երկրի Ձկնաբուծական տնտեսության հետազոտությունների (Fisheries Research Agency) հետ համատեղ: Ըստ նախատեսվածի՝ «Օվկիանոսի պարուրակ» նախագիծը հիմնականում կիրականացնի գիտական, ինչպես նաև արտադրական գործառույթներ: