Եթե ձեզնից որևէ մեկը ցանկանում է առավոտյան արթնանալ՝ շրջապատված ստորջրյա աշխարհով և բազմաթիվ ձկներով, ապա Դուբայի «Աշխարհ» (The World) արհեստական կղզիներում առաջարկվող ընթացիկ նախագիծը լավագույն տարբերակ է ձեզ համար:

Փետրվարի 5-ին «Քլեյնդիենսթ Գրուփ» (Kleindienst Group) ընկերությունը պաշտոնապես հանրությանը և պոտենցիալ գնորդներին է ներկայացրել ստորջրյա առանձնատների յուրօրինակ նախագիծ, որոնք գտնվում են Դուբայի ափամերձ գոտուց 4 կիլոմետր հեռավորության վրա տեղակայված «Աշխարհ» արհեստական կղզիներում: Ընկերության կողմից ներկայացված պաշտոնական առաջարկից անմիջապես հետո 5 յուրօրինակ առանձնատներ գտել են իրենց սեփականատերերին: Ինչպես տեղեկացնում են տեղական պարբերականները, գնորդներից 2-ը Եվրոպայից են, իսկ մյուս 3-ը Հնդկաստանից և Պարսից ծովածոցին հարող երկրներից:

Այսօր ընկերությունը յուրօրինակ առանձնատները կառուցում է «Եվրոպայի Սիրտ» (Heart of Europe) նախագծի մաս կազմող Մոնակո կղզում: Յուրաքնաչյուր առանձնատան գինը կազմում է մոտ 1,36 մլն ԱՄՆ դոլար: Եռահարկ առանձնատների վերգետնյա 2 հարկը գտնվում է ջրի վրա, իսկ ներքևի հարկը 4 մետր խորությամբ ընկղմված է ստորջրյա յուրօրինակ աշխարհում: Առանձնատների մակերեսը կազմում է 156 քառակուսի մետր և նախատեսվում է, որ վերջիններս իրենց սեփականատերերին կարող են հյուրընկալել արդեն 2017 թ-ին:

Ըստ նախնական տվյալների՝ «Եվրոպայի Սիրտ» արհեստական կղզիները կառուցապատող ընկերությունը նախատեսում է կառուցել 42 ստորջրյա առանձնատուն, որոնցից 20-ն արդեն ներկայացվել են հանրությանը, իսկ մյուս 22-ն ընկերությունը տեղափոխել է նախագծի հաջորդ փուլ:

«Աշխարհ» արհեստական կղզիները, որոնց լայնությունը կազմում է 9 կիլոմետր, երկարությունը 7 կիլոմետր, իսկ ընդհանուր մակերեսը 931 հեկտար, գտնվում են Դուբայի ափամերձ շրջանից 4 կիլոմետր հեռավորության վրա: Առանձին կղզիների մակերեսը տատանվում է 14-ից 42 հազար քառակուսի մետր մակերեսի սահմաններում: Վերոնշյալ նախագծի մաս է կազմում «Եվրոպայի Սիրտ» նախագիծը, որը բաղկացած է 6 կղզիներից՝ Գերմանիա, Ավստրիա, Շվեյցարիա, Մոնակո, Շվեդիա և Սանկտ Պետերբուրգ: