90 կմ երկարությամբ Մ6 Վանաձոր-Ալավերդի-Բագրատաշեն միջպետական ճանապարհի վերանորոգումը նախատեսված է իրականացնել երկու փուլով: Շինարարական տեխնիկան այս ճանապարհի տարբեր հատվածներում աշխատում է արդեն մեկ տարի: Առաջին փուլում վերանորոգվում է Վանաձոր-Ալավերդի ճանապարհի 38,5 կմ երկարությամբ հատվածը, որն ընդգրկում է նաև միջպետական ճանապարհի երեք թունելներն ու կամուրջները:

Ձորագետ համայնքի ղեկավար Լյովա Գրիգորյանը պատմում է, որ վերջին անգամ թունելները վերանորոգվել են 1962 թվականին. «Դրանից հետո այս թունելներ շինարար չի մտել: Մեքենաները ջարդվում էին, իսկ հիմա մարդիկ հեշտ կգնան մարզկենտրոն, ավտոբուսները կաշխատեն: Թունելները մայթեր են ունենալու, լուսավորվելու են: Բացի դրանից, մեր համայնքը մայրուղուն կպած է, միգուցե խորտկարաններ, կրպակներ բացեն, մարդիկ աշխատեն»:

«Կապավոր ՍՊԸ» -ն հիմնանորոգումն իրականացնող երեք կապալառու կազմակերպություններից մեկն է և այժմ վերանորոգման աշխատանքներն իրականացնում է Թումանյան քաղաքից Ձորագետ հատվածում՝շուրջ 9 կմ ճանապարհին: «Կապավոր ՍՊԸ»-ի տեղամասի պատասխանատու Բաղդասար Զարգարյանն ասում է, որ տեղանքը բարդ է: Արդեն իրականացվել են պայթեցման ու ժայռերից քարաթափման աշխատանքները, ճանապարհի երթևեկելի հատվածի հետ կապված խնդիրներ չկան: «Սկզբում կառուցել ենք հենապատերը, համարյա ավարտել ենք: Երկու թունելները վերանորոգվել են, մեկը կարելի է ասել՝ վերակառուցել: Մեքենաների համար լուրջ դժվարություն էր այս թունելներով անցնելը: Նախկինում լայնությունը եղել է 3,5-ից 4 մետր, տեղեր կային անանցանելի էին, հիմա արդեն երթևեկելի մասը 5 մ ապահովում է, այսինքն այժմ արդեն լայնությունն էլ, բարձրությունն էլ ապահովված է և երկու մեքենա իրար կողքով անցնում են»,- ասում է Բաղդասար Զարգարյանը:

Այժմ իրականացվում են Ձորագետի երկու թունելների մուտքերը մոտ 25 մետրով երկարացնելու աշխատանքները, ինչի անհրաժեշտությունն առաջացել է այս տեղանքում առկա քարաթափումների վտանգից:

Թումանյան քաղաքի հատվածում իրականացվել է ջրատարի տեղափոխում, կտեղափոխվի նաև գազատարը: Շինարարների խոսքով ՝ճանապարհների լայնացման աշխատանքները հատկապես Թումանյանից Ձորագետ հատվածում նկատելի կլինի: Նախկին ճանապարհը նեղ էր, իսկ վարորդների տեսադաշտը փակում էին ժայռերը: Ներկայիս ճանապարհը լայն է և անվտանգ:

«Ճանապարհի 6 կմ-ը խճապատված է, պատրաստ է, 4 կմ-ն արդեն ասֆալտապատված է, մնում է վերևի շերտն անենք, բայց, երևի, ոչ այս տարի: Աշխատում ենք որակն ապահովենք, դրա համար էլ այս անձրևոտ եղանակներին ասֆալտապատումն արդարացված չէ», - պատմում է շինարարության այս տեղամասի պատասխանատու Բաղդասար Զարգարյանը:

Իսկ Վանաձոր քաղաքի տարածքում 6,6 կմ ճանապարհն արդեն վերանորոգվել է և շահագործվում է: Վերանորոգվել են նաև երեք կամուրջներից երկուսը:

Լոռու մարզպետարանի աշխատակազմի քաղաքաշինության վարչության տրանսպորտի և ճանապարհաշինության բաժնի պետ Վարդան Գևորգյանի խոսքով՝ Վանաձոր-Ալավերդի-Բագրատաշեն միջպետական ճանապարհի վերանորոգումը մեր երկրում իրականացվող ճանապարհաշինության ոլորտի կարևոր ծրագրերից մեկն է և կենսական նշանակություն ունի ամբողջ հանրապետության համար. «Հանրապետություն ներկրվող բեռների մեծ ծավալի տեղափոխումն իրականացվում է Բագրատաշեն-Ալավերդի-Երևան ճանապարհով, և այն կարևոր նշանակություն ունի և Լոռու մարզի, և հանրապետության համար: Զբոսաշրջության զարգացման առումով էլ հսկայական դեր ունի: Եթե թեթև մարդատար մեքենաները մի կերպ էին գնում այդ թունելներով, պատկերացրեք ծանրաքարշ բեռնատարները կամ բազմատեղանոց ավտոբուսներն ինչ դժվարություններ էին ունենում: Իսկ հիմա թունելները նորոգվել են հիմնովին, ճանապարհի շրջադարձերն ավելի թեթև են»:

Զբոսաշրջիկներ տեղափոխող ավտոբուսի վարորդ Հրաչյա Ասլանյանը մեզ հետ զրույցում պատմեց, որ զբոսաշրջիկների հիմնական դժգոհությունների առիթը հենց ճանապարհներն էին. «Մի անգամ դեպք եղավ, որ ճանապարհների պատճառով ավտոբուսի մեջ դրամահավաք կազմակերպեցին, որ մեզ վճարեն և խնդրեցին, որ իրենց հետ տանենք Վրաստան: Թեև մեր երկրում զարգացած է սպասարկման ոլորտը, հյուրանոցները, մարդիկ հյուրընկալ են, բայց ճանապարհները ստվեր էին գցում այդ ամենի վրա»:

Միջպետական ճանապարհի՝ Ալավերդուց մինչև Բագրատաշեն հատվածը կհիմնանորոգվի ծրագրի երկրորդ փուլում, աշխատանքները սկսվելու են 2018 թվականի գարնանը:

Մ6 միջպետական ճանապարհի վերակառուցման ծրագիրն իրականացվում է Եվրոպական ներդրումային ու Ասիական բանկերի ֆինանսավորմամբ ու պետբյուջեի համաֆինանսավորմամբ: Առաջին փուլով նախատեսված հիմնանորոգման աշխատանքների արժեքը կազմում է 15 մլրդ դրամ: 33 համայնքների տարածքով անցնող ավտոմայրուղին ամբողջությամբ շահագործման կհանձնվի 2020 թվականի հունվարին: