Լոնդոնում նախատեսվում է վերականգնել թագուհի Վիկտորիայի (գահ. 1837-1901) ժամանակաշրջանին պատկանող հիասքանչ «Բյուրեղապակյա դղյակը» (Crystal Palace): Նախագիծը համատեղ կիրականացնեն ճարտարապետական «Արուփ» (Arup) և չինական կառուցապատող ZhongRong Group ընկերությունները: Ըստ նախնական տվյալների` «Արուփ» ընկերությունը պատրաստել է վերականգնման այնպիսի նախագիծ, որը շատ մոտ է Ջոզեֆ Պակսթոնի նախագծած բնօրինակին: «Բյուրեղապակյա դղյակը» 1851 թ-ին «Հայդ Փարքում» կառուցվել է «Առաջին Համաշխարհային Ցուցահանդեսի» շրջանակներում` որպես ցուցասրահ: Ջոզեֆ Պանկթոնի գլխավորությամբ կառուցված ցուցասրահը ցուցահանդեսից հետո տեղափոխվել է մեկ այլ վայր` Հարավային Լոնդոնի Սայդենհեմ-Հիլլ արվարձան: Այնուհետև 1936 թ-ի հրդեհից հետո շինությունը այրվել է և մինչ օրս երբևէ չի վերականգնվել: Միայն վերջերս չինացի միլիարդատեր ZhongRong Group ընկերության հիմնադիր Նի Չժաոսինը հայտարարել է, որ պատրաստ է 800 մլն ԱՄՆ դոլար ներդնել պատմական շինությունը վերակառուցելու համար: Ինչպես արդեն նշել ենք, վերակառուցման նախագիծը շատ մոտ է բնօրինակին, որը ներառում էր հսկայական ստվերոտ զբոսայգի: «Արուփ» ընկերության նախագիծը ենթադրում է ոչ միայն շինության վերակառուցում, այլև այն շրջապատող 73 հեկտար ընդհանուր մակերեսով այգու վերականգնում: Զբոսայգում կլինեն ծառերով հագեցած զբոսուղիներ, իտալական ոճով կառուցված գեղեցիկ տեռասներ, սրճարան և այցելուների կենտրոն:

Ինչպես տեղեկացնում է Bloomberg լրատվական գործակալությունը, լոնդոնյան իշխանությունները հաստատել են Google ընկերության նոր գլխավոր գրասենյակի շինարարության նախագիծը: Ընկերության նոր գրասենյակը կառուցվելու է լոնդոնյան հանրահայտ «Քինգս Քրոսս» (King’s Cross) կայարանի հարևանությամբ: Համաձայն հաստատված նախագծի՝ Google ընկերության նոր գլխավոր գրասենյակի ընդհանուր մակերեսը կկազմի 1 հեկտար: Այստեղ կկառուցվի 85.5 հազար քառակուսի մետր ընդհանուր մակերեսով 7 և 11 հարկանի 2 մասնաշենք, Բացի գրասենյակներից նորագույն համալիրում կկառուցվի մարզասրահ, լողավազան, վազքուղիներ և 7 թենիսի դաշտի մեծության կայանատեղի հեծանիվների համար: Ըստ նախնական տվյալների՝ ընկերության լոնդոնյան գրասենյակում կաշխատեն 5 հազար մասնագետներ: 1.6 մլրդ ԱՄՆ դոլար արժողությամբ իր նորագույն կամպուսի շինարարության նախագծի մասին Google ընկերությունը հայտարարել էր դեռևս այս տարվա հունվարին: Իսկ ընթացիկ տարվա հուլիսին ընկերությունը ներկայացրել էր գրասենյակի պատկերները, որը նախագծել է «Օլլֆորդ Հոլլ Մոնագան Մորրիս» (Allford Hall Monaghan Morris) ճարտարապետական ընկերությունը: Ըստ նախնական տվյալների՝ գրասենյակի շինարարությունը կսկսվի այս տարվա վերջին և կավարտվի 2015 թ-ին:

Լոնդոնյան «Սիթիում» կառուցվող «Ֆենչերչ սթրիթ 20» (20 Fenchurch Street) երկնաքերը դարձել է հարևանությամբ կայանած «Յագուար» մակնիշի ավտոմեքենայի որոշ հատվածների հալվելու պատճառ: Գործարար Մարտին Լինդսի (Martin Lindsay) խոսքերով, նա իր մեքենան կայանել է Իսթչիփ (East cheap) փողոցի վրա ընդամենը 2 ժամ, իսկ վերադառնալուց հետո տեսել է, որ մեքենան շրջապատված է բազմաթիվ հետաքրքրասեր լուսանկարիչներով: Բանն այն է, որ հալվել են բավականին ներկայանալի մակնիշի ավտոմեքենայի արտաքին և ներքին որոշ պլաստմասե հատվածներ, «Յագուար» պատկերանիշը, ինչպես նաև վնասված է կողային հայելին: Վերադարձից հետո ավտոմեքենայի սեփականատերը դիմային հայելու վրա գտել է հետևյալ երկտողը «Ձեր ավտոմեքենան ձևափոխվել է, կարող եք մեզ հետ կապնվել»: Հետագայում «Լենդ Սեքյուրիթիս» (Land Securities) և «Քանարի Վորֆ» (Canary Wharf) կառուցապատող ընկերությունները ներողություն են խնդրել Լինդսիից և համաձայնել վճարել «Յագուար» ավտոմեքենայի վերանորոգման ծախսը, որը կազմել է 1470 ԱՄՆ դոլար: Նշենք, որ ավելի վաղ նույն Իսթչիփ փողոցում վնասվել էր օդորակիչներ տեղադրող Էդի Քեննոնի «Վոքսհոլ Վեվարո» (Vauxhall Vevaro) ավտոմեքենան: Ներկայումս երկնաքերի կառուցապատողները ուսումնասիրում են ավտոմեքենաների վնասվելու պատճառները: Հավանական է, որ մեքենաների նմանօրինակ հալվելը կապված է երկնաքերի ոչ սովորական ձևի հետ՝ գոգավոր ապակիներից կազմված դիմային հատվածն անդրադարձնում է արևի ճառագայթները երկնաքերի կողքով անցնող փողոցի վրա: Հետաքննության ընթացքում երկնաքերի շրջակայքի որոշ հատվածներում կայանելն արգելվել է: Կառուցապատողները հույս ունեն, որ ապակիների հզոր անդրադարձը կարող են մեղմել հատուկ պաշտպանիչ թաղանթի միջոցով: 160 մետր բարձրությամբ, 37 հարկանի «Ֆենչերչ սթրիթ 20» երկնաքերը, որը հանրությանը հայտնի է նաև «Վոքի Թոքի» (Walkie-Talkie) անվանմամբ, կառուցվում է հայտնի ուրուգվայցի ճարտարապետ Ռաֆայել Վինոլիի նախագծով: Ըստ նախնական տվյալների՝ 200 մլն ֆունտ ստերլինգ բյուջեյով նախագիծը շահագործման կհանձնվի արդեն 2014 թ-ին:

Այս տարվա սկզբին Google ընկերությունը հայտարարել էր, որ Լոնդոնի հանրահայտ «Քինգս Քրոսս» (King’s Cross) կայարանի հարևանությամբ նոր գլխավոր գրասենյակ կկառուցի , որի բյուջեն գնահատվում էր մոտ 1.6 մլրդ ԱՄՆ դոլար: Օրերս տարբեր լրատվամիջոցներ ներկայացրել են ընկերության լոնդոնյան գլխավոր գրասենյակի նախագծի պատկերը: Նորագույն գրասենյակային համալիրը նախագծել է «Օլլֆորդ Հոլլ Մոնագան Մորրիս» (Allford Hall Monaghan Morris) ճարտարապետական ընկերությունը: Ըստ ընկերության ներկայացրած տվյալների՝ գրասենյակային համալիրի ընդհանուր մակերեսը կկազմի 270 հազար քառակուսի մետր և այն կունենա 11 հարկ: Google-ը պատրաստվում է «Քինգս Քրոսս» կայարանի հարևանությամբ կառուցվելիք նոր գրասենյակում կենտրոնացնել Լոնդոնում գտնվող իր ներկայիս 2 գրասենյակների աշխատանքը, որոնք այժմ գտնվում են Վիկտորիա (Victoria) և Քովենթ-Գարդեն (Covent Garden) շրջաններում: Ինչպես նորագույն նախագծերի մեծ մասը, այս շենքը ևս կլինի էկոլոգիապես մաքուր՝ ճարտարապետները մտադիր են ստանալ BREEAM կանաչ շենքերի սերտիֆիկացման (Բրիտանիա) ամենաբարձր գնահատականը, ինչպես նաև արժանանան Ամերիկյան LEED Պլատինե հավաստագրման: Նոր համալիրը կկառուցվի օգտագործելով պողպատե կոնստրուկցիաներ, ապակի և խաչաձև-սոսնձված փայտանյութ: Վերջին տասնամյակում գրեթե անհնար է որևէ մեկին զարմացնել Լոնդոնում կառուցվելիք նախագծերով, սակայն այնպիսի տեխնոլոգիական հսկաներ, ինչպիսիքն են՝ Apple-ը, Google-ը և Facebook-ը, կարողացել են հասնել այնպիսի աստիճանի, որ ցանկացածի հետաքրքիր է՝ ինչ են նրանք կառուցում և ինչպիսի պայմաններում պիտի աշխատեն աշխարհի ամենաստեղծագործ և ՏՏ խելոք մարդիկ: Ընկերության նորագույն նախագիծը, որոնք շատերը նաև անվանում են «գետնաքեր», կլինի բազմահարկ, որը մի ծայրում կունենա 7 հարկ, որն էլ աստիճանաբար կհասնի 11 հարկի շենքի մյուս ծայրում: Շենքը հիմնականում կկառուցվի փայտից, ինչը հնարավորություն կտա շինարարության ընթացքում 40 տոկոսով կրճատել մթնոլորտ արտանետվող ածխաթթու գազի քանակը: Հարկ է նշել, որ առաջին անգամ նման լայնամասշտաբ համալիրի կառուցման ժամանակ ներքին կոնստրուկցիաները կկառուցվեն պողպատից և խաչաձև-սոսնձված փայտանյութից: Նորագույն համալիրում կլինեն 67 հազար քառակուսի մետր մակերեսով գրասենյակներ, 4600 քառակուսի մետր մակերեսով առևտրային տարածքներ և 1860 քառակուսի մետր մակերեսով կայանատեղի հեծանիվների համար:

Լոնդոն 2012 «Օլիմպիական ավանը» կվերածվի բնակելի թաղամասի, և բնակարաններից շատերը կներգրավվեն «մատչելի բնակարան» ծրագրով, հայտարարել են լոնդոնյան պաշտոնյաները: Ըստ նախնական տվյալների՝ «Օլիմպիական ավանը» կձևափոխվի և կվերանվանվի «Արևելյան ավան» (East Village) անվանումը կրող շրջանի: Նոր ավանը արդեն այս տարվա օգոստոսին վարձակալներին կառաջարկի 2818 բնակարան, որոնցից 1379 «մատչելի» ծրագրով: Մասնագետների կարծիքով, սա կատարյալ որոշում է Լոնդոնի պաշտոնյաների կողմից, քանի որ այն հնարավորություն է տալիս մեղմել 2007 թ-ի գլոբալ տնտեսական ճգնաժամի հետևանքով քաղաքում առաջացած բնակելի տարածքների պակասուրդը: Այն բանից հետո, երբ «Օլիմպիական այգին» ձեռք բերվեց Կատարի «Կատար Դայեր» (Qatar Diar) բարեկեցության հիմնադրամի և «Դիլանսեյ» (Delancey) կառուցապատող ընկերության կողմից, վերամբարձ կռունկները և շինարարական խմբերը անդադար սկսեցին աշխատել այս նախագծի իրականացման վրա: Այսօր արդեն «Օլիմպիական այգուց» տեղափոխվում են ժամանակավոր շինությունները, որոնք կառուցվել էին Օլիմպիադայի համար և 2818 բնակարանները արդիականացվում են; Ըատ նախնական տվյալների՝ բնակարանների առաջին խմբաքանակը պատրաստ կլինի արդեն այս տարվա օգոստոսին: Մատչելի բնակարանները կտրամադրի «Տրիատլոն» (Triathlon) լոնդոնյան բնակարանային ասոցիացիան, իսկ մյուս բնակարանները կտնօրինի «Կատար Դայեր» ընկերությունը: Նմանատիպ քայլը շատ կարևոր էր Լոնդոնի բնակարանային շուկայի զարգացման համար, քանի որ «Շելթեր» (Shelter) ընկերության ուսումնասիրությունների համաձայն՝ Լոնդոնի բնակարանների վարձակալների 55 տոկոսի համոզմամբ, իրենք երբեք չեն կարողանա գումար հավաքել բնակարան գնելու համար: Իսկ «Արևելյան գյուղ» նոր թաղամասը կարող է փոխել նման մտածելակերպը՝ առաջարկելով բնակարաններ խելամիտ վարձակալական գներով և գրավելով մարդկանց: Բացի այդ, ով՞ չի ցանկանա ապրել այնպիսի թաղամասում, որը գտնվում է անմիջապես «Օլիմպիական այգում», ունի նորակառույց ուսումնական կենտրոն, հիվանդանոց, ռեստորաններ և այլն: Ավելի վաղ հայտարարվել էր, որ ամառային Օլիմպիական խաղերի փակումից հետո «Օլիմպիական այգին» նույնպես կվերափոխվի: 2013 թ-ին Արևելյան Լոնդոնում 500 հազար քառակուսի մետր մակերեսով այգի կբացվի, որը կկրի «Թագուհի Եղիսաբեթի անվան Օլիմպիական Այգի» անվանումը: ԱրսելորՄիտտալ Օրբիթ դիտահարթակ-աշտարակը նախկինի պես վեր կխոյանա այգում, իսկ Օլիպիական մարզադաշտն էլ կվերակառուցվի, կփոքրացվի և կունենա 25 հազար նստատեղ: