Դուբայը նոր ռեկորդ է սահմանել՝ հունիսի 10-ին Դուբայի հեղինակավոր «Դուբայ Մարինա» (Dubai Marina) թաղամասում շահագործման է հանձնվել աշխարհի ամենաբարձր ոլորված աշտարակը՝ «Ինֆինիթի Թաուեր»-ը (Infinity Tower - Անսահմանության Աշտարակ): Նոր 75 հարկանի յուրօրինակ շինությունը, որն իր առանցքի շուրջ պտտվում է 90 աստիճան, ունի 307 մետր բարձրություն: Նախագծի շինարարությունը տևել է 7 տարի, որի ընթացքում ծախսվել է 274 մլն ԱՄՆ դոլար գումար: «Անսահմանության Աշտարակը» նախագծել է «Սքիդմոր Օուվինգս և Մերրիլլ» (Skidmore Owings & Merrill) ճարտարապետական ընկերությունը, որը նախագծել է նաև «Բուրջ Խալիֆա» աշտարակը: Նոր ոլորուն աշտարակը իր նախորդ տիտղոսակրից բավականին առաջ է անցել: Շվեդիայի Մալմյո քաղաքում գտնվող «Թըրնինգ Թորսո» (Turning Torso) ոլորված աշտարակի բարձրությունը կազմում է 190 մետր: Նոր աշտարակում տեղակայված է 68 բնակարան՝ մեկ սենյականոցից-փենթհաուսներ, խորհրդակցությունների սրահներ, թենիսի կորտեր, լողավազաններ, մարզադահլիճներ, մանկապարտեզ և սպա-կենտրոններ: Բնակարանների գները տատանվում են 4000-5800 ԱՄՆ դոլար քառակուսի մետրի դիմաց: «Ինֆինիթի Թաուեր»-ում յուրաքանչյուր հաջորդ հարկ թեքվում է 1.2 աստիճանով, այնպես որ վերջին հարկում շենքը թեքվում է 90 աստիճանով: Արաբական Միացյալ Էմիրությունների ֆինանսական մայրաքաղաքը հայտնի է շինարարության ոլորտում իր ռեկորդներով: Այստեղ է գտնվում աշխարհի ամենաբարձր աշտարակը «Բուրջ Խալիֆան»՝ 828 մետր, աշխարհի ամենաբարձր բնակելի աշտարակը՝ «Փրինցես Թաուերը»՝ 414 մետր և աշխարհի ամենաբարձր հյուրանոցը՝ «JW Մարիոթ Մարքուեսը»՝355 մետր:

Մոտ ապագայում, արդեն 2014 թ-ին «Բուրջ Խալիֆան» կարող է զիջել իր դիրքերը որպես աշխարհի ամենաբարձր աշտարակ: Անցած տարվա օգոստոսին Չինաստանի Չանշա քաղաքում ներկայացված 220 հարկանի «Երկնային քաղաք» (Sky City) երկնաքերը կարող է գրավել նրա տեղը: Ինչպես տեղեկացնում է Treehugger պարբերականը ի դեմս Լլոյդ Ալթերի, նոր աշտարակի կառուցապատող «Բրոուդ Սըսթեյնեբլ Բիլդինգ» (Broad Sustainable Building) ընկերությունը նախագծի շինարարությունը կսկսի արդեն այս տարվա հունիսին: Շինարարության ավարտից հետո «Երկնային քաղաք» աշտարակը հավակնում է դառնալ ապագա կայուն զարգացման մոդելը: Ըստ նախնական տվյալների՝ 220-հարկանի և 838 մետր բարձրությամբ երկնաքերը կարող է տեղավորել մինչև 100 հազար մարդ, իսկ մշտական կբանկվեն 4450 ընտանիք, սակայն շենքը կզբաղեցնի ընդամենը 10 տոկոսն այն տարածքի, որն անհրաժեշտ է ավանդական քաղաքին այդքան մարդ բնակեցնելու համար: Նոր բնակելի ուղղահայաց քաղաքն իր բնակիչներին կառաջարկի բնակելի, գրասենյակային և առևտրային տարածքներ, դպրոցներ, հիվանդանոցներ, օրգանական ագարակներ և այլն: Ի տարբերություն ժամանակակից և ավանդական քաղաքների, այս յուրօրինակ ուղղահայաց քաղաքն իր բնակիչներին կապահովի բացօթյա և կանաչ հսկայական տարածությամբ, քանի որ երկնաքերը շրջապատված կլինի հսկայական այգիներով: Նոր քաղաքի բնակիչները կկարողանան շնչել մաքուր օդ, խնայել ինչպես ժամանակ, այնպես էլ գումար իրենց անհրաժեշտ ծառայություններից օգտվելու համար, քանի որ այս քաղաքում չեն լինի ավտոմեքենաներ, իսկ բնակիչներն ասենք դպրոց կամ հիվանդանոց կկարողանան հասնել էներգախնայող 92 վերելակների միջոցով: Իսկ եթե նրանք ցանկանան քայլել, կկարողանան օգտվել շենքի առաջինից 170-րդ հարկ ձգվող 9650 մետր երկարությամբ քայլուղուց: Բացի վեորնշյալ առավելություններից, կառուցապատող ընկերության պնդմամբ նոր երկնաքերը կկարողանա դիմակայել 9 մագնիտուտ հզորությամբ երկրաշարժի և 3 ժամ տևողությամբ հրդեհի: Հավաքովի նախագծով կառուցվելիք շենքը կպարունակի նաև այնպիսի էներգիախնայող տարրեր, ինչպիսիքն են՝ 20 սանտիմետր հաստությամբ մեկուսիչ պատերը, եռակի ապակեպատումը և այլն: Treehugger պարբերականի պնդմամբ այս ամբիցիող նախագծի շինարարությունը կսկսվի արդեն մյուս ամիս և կտևի 7 ամիս (210 օր): Այսօր շինարարության նմանօրինակ տեմպն ու դիզայնը միայն երևակայություն են թվում, սակայն եթե «Բրոուդ Սըսթեյնեբլ Բիլդինգ» ընկերությունը կարողանա իրականացնել իր առջև դրված խնդիրը, ապա նոր ուղի կբացի էներգախնայող և կայուն զարգացման ոլորտում: Հիշեցնենք, որ հենց այս ընկերությունն իրականացրեց ապշեցուցիչ տեմպերով, ընդամենը 15 օրում, 30 հարկանի բարձրահարկի շինարարությունը , իսկ վերը նշված Չանշա քաղաքում ՝ 6 օրում կառուցեց 15 հարկանի «Տապան Հյուրանոցը» (The Ark Hotel): Այնպես որ, հավաքովի կառուցվածքներից այս ահռելի նախագծի իրականացման հավանականությունը բավականին բարձր է, և Broad Sustainable Building-ը, ամենայն հավանականությամբ, նորից կփայլի իր աշխատանքների կազմակերպման անգերազանցելի հնարավորություններով:

Նյու Յորքում ավարտվել է «Համաշխարհային առևտրի կենտրոն 1»-ի շինարարությունը: Մայիսի 10-ին շինարարները տեղադրել են 124 մետր բարձրությամբ պողպատե շիվը, ինչի արդյունքում երկնաքերի ընդհանուր բարձրությունը հասել է 541 մետրի կամ 1776 ոտնաչափի: Ի դեպ այս բարձրությունը խորհրդանշում է ԱՄՆ-ի անկախության տարիքը: 541 մետր բարձրությամբ նոր աշտարակն արդեն ճանաչվել է ամենաբարձրն ԱՄՆ-ում և արևմտյան կիսագնդում, ինչպես նաև բարձրությամբ երրորդն ամբողջ աշխարհում՝ չնայած այն փաստին, որ դեռ քննարկումներ են ընթանում շիվի շարժականության վերաբերյալ, որը պետք է հանդիսանա շենքի հիմնական կառուցվածք, ինչը խիստ կարևոր է աշտարակի բարձրության չափման համար: Բացի վերոնշյալ տիտղոսները, նախագծի ընդհանուր բյուջեն, որը կազմել է 3.9 մլրդ ԱՄՆ դոլար, թույլ է տալիս աշտարակն անվանել նաև ամենաթանկ գրասենյակային կառույցն աշխարհում: Նախկինում հայտնի որպես «Ազատության աշտարակ»՝ «Համաշխարհային առևտրի կենտրոն 1»-ը կառուցվել է Ստորին Մանհեթթենում՝ 2001 թ-ի սեպտեմբերի 11-ին ահաբեկչության արդյունքում ավերված «Համաշխարհային առևտրային կենտրոն»-ի տարածքի կողքին: Ի սկզբանե աշտարակը ճանաչում էր գտել իր խոսակցական անվանմամբ՝ «Ազատության աշտարակ», սակայն 2009 թ-ի մարտի 30-ին Նյու Յորքի և Նյու Ջերսի քաղաքաների նավահանգստային ադմինիստրացիան պահանջեց աշտարակը կոչել իր իրավաբանական անվանմամբ՝ «Համաշխարհային առևտրի կենտրոն 1»: 2001 թ-ի սեպտեմբերի 11-ին տեղի ունեցած ահաբեկչական գործողություններից հետո բազմաթիվ քննարկումներ էին ընթանում ավերված տարածքի վերակառուցման ուղղությամբ: Անմիջապես առաջարկներ արվեցին արդեն 2003 թ-ին վերակառուցման մրցույթ հայտարարվեց, որի արդյունքում հաղթեց Դանիել Լիբեսքինդի (Daniel Libeskind) նախագիծը: Սակայն, այս սկզբնական նախագիծը բազմաթիվ փոփոխությունների ենթարկվեց և պաշտոնապես հանրությանը ներկայացվեց 2005 թ-ի հունիսի 28-ին: 2006 թ-ի ապրիլի 26-ին Նյու Յորքի և Նյու Ջերսի քաղաքաների նավահանգստային ադմինիստրացիան հաստատեց ձևափոխված նախագիծը, որից հետո միայն նույն թվականին հնարավոր եղավ սկսել աշտարակի շինարարությունը: Հարկ է նշել սակայն, որ հիմնարկեքի պաշտոնական արարողությունը տեղի էր ունեցել դեռևս 2004 թ-ի հուլիսի 4-ին: «Համաշխարհային առևտրի կենտրոն 1»-ի շենքի արտաքին շինարարական աշխատանքներն ավարտվել են 2013 թ-ի մայիսի 2-ին, իսկ բացման հանդիսավոր արարողությունը նախատեսված է այս տարվա վերջին կամ մյուս տարվա սկզբին՝ կախված ներքին հարդարման աշխատանքների ավարտից: Բացումից հետո նորակառույց աշտարակը կտրամադրի 241 հազար քառակուսի մետր մակերեսով կոմերցիոն տարածք, դիտահարթակներ, հեռուստահեռարձակման կենտրոններ և ռեստորաններ:

«Մեդյան Գրուփ» (Medyan Group) կառուցապատող կազմակերպությունը նախատեսում է առաջիկա 6 շաբաթների ընթացքում Դուբայում սկսել 111-հարկանի աշտարակի շինարարությունը, տեղեկացնում է Emirates 24|7 պարբերականը: Ըստ տարածված տվյալների՝ շենքն իր բարձրությամբ կլինի երկրորդը քաղաքում և կտեղակայվի շեյխ Զայեդի անվան փողոցի վրա «Ռեդիսսոն Ռոյալ» (Radisson Royal) հյուրանոցի հարևանությամբ: Ըստ նախնական տվյալների` շենքում կլինեն բնակելի, կոմերցիոն և ժամանցային տարածքներ: Բացի այդ նոր աշտարակը կունենա տարածաշրջանում խոշորագույն սպա-կենտրոնն ու մարզասրահը՝ սեփական վազքուղով և թենիսի խաղահրապարակով: Աշտարակի մեկ այլ առավելությունն էլ կլինի վերջին հարկում տեղակայված գիշերային ակումբը: Նշենք, որ այսօր Դուբայում կառուցված են 200 մետրից բարձր 20 աշտարակը, որոնցից 18-ը գտնվում են շեյխ Զայեդի անվան փողոցի վրա, այդ թվում աշխարհի ամենաբարձր՝ 828 մետրանոց «Բուրջ Խալիֆան» և 414 մետր բարձրությամբ աշխարհի ամենաբարձր բնակելի «Փրինցեսս Թաուեր» աշտարակը:

Քաղաք-պետություն Մոնակոն, որը հայտնի է որպես մեծահարուստների բնակավայր, մոտ ապագայում կարող է պարծենալ աշխարհի ամենաթանկ փենթհաուսով: Փենթհաուսը, որի արժեքը, ըստ նախնական տվյալների, սահմանվում է 387 մլն ԱՄՆ դոլար, պոտենցիալ գնորդների համար հասանելի կլինի արդեն հաջորդ տարի: Այսօր աշխարհի ամենաթանկ բնակարանը համարվում է լոնդոնյան «Ուան Հայդ Փարք» (One Hyde Park) համալիրում գտնվող 222 մլն ԱՄՆ դոլար արժողությամբ փենթհաուսը: Աշխարհի ամենաթանկ բնակարանը կառուցվում է 170 մետր բարձրությամբ «Օդեոն Թաուեր» (Odeon Tower) երկնաքերում, որն իրենից ներկայացնում է իրար միաձուլված 2 աշտարակ: Շինարարության ավարտից հետո նորակառույց շքեղ բնակելի աշտարակը գնորդներին կառաջարկի 73 էլիտար դասի բնակարաններ, 2 «երկնային դուպլեքսներ» (Sky duplex) յուրաքանչյուրը 1200 քառակուսի մետր ընդհանուր մակերեսով և մեկ 5-հարկանի «երկնային փենթհաուս» (Sky-penthouse) 3300 քառակուսի մետր ընդհանուր մակերեսով: Երկնաքերի ապամոնտաժման և հողային աշխատանքները սկսվել են դեռևս 2009 թվականի դեկտեմբերին: Շինարարության ավարտից հետո, ինչը նախատեսված է 2014 թվականի հուլիսին, «Օդեոն Թաուեր»-ը կդառնա միջերկրածովյան տարածաշրջանի բարձրությամբ երկրորդ աշտարակը՝ զիջելով միայն Իսպանիայում գտնվող 186 մետր բարձրությամբ «Գրան Հոթել Բալի» (Gran Hotel Bali) երկնաքերին: Շքեղագույն երկնաքերի նախագծման աշխատանքներով զբաղվում են այնպիսի հնչեղ անուններ ունեցող ճարտարապետներ, որոնցից է Ալեքսանդր Ջիրալդին (Alexander Giraldi), ով գլխավորում է ճարտարապետական թիմը: Երկնաքերի ինտերիերային նախագծմամբ զբաղվում է Ալբերտո Պինտոյի (Alberto Pinto) ճարտարապետական ստուդիան, իսկ երկնաքերի ընդհանուր պատկերն էլ лամբողջացնի Ժան Մուսի (Jean Mus) լանդշաֆտային նախագծերը: Աշխարհի ամենաթանկ փենթհաուսի գլխավոր առանձնահատկությունը վերջինիս հսկայական մակերեսն է՝ 5 հարկ և 3300 քառակուսի մետր, որին հաջորդում է երկնաքերի ամենավերին հարկում տեղակայված բացօթյա պատշգամբն իր ջրային սահքուղով դեպի հսկայական լողավազան: Բնակարանի ներքին ինտերիերում գերիշխում են մարմարն ու թերթաքարը: Բացի այդ փենթհաուսից շքեղ տեսարան է բացվում դեպի Միջերկրական ծովն ու Մոնակոյի զմրուխտե բլուրները: Նշենք, որ «Օդեոն Թաուեր»-ի բոլոր բնակարաններն էլ շքեղ են. իսկ հատակից-առաստաղ պատուհաններն ապահովում են ոչ միայն լույսի առատություն, այլև ցնցող տեսարաններ դեպի Մոնակոյի հրաշալի բնությունն ու Միջերկրական ծովը: Բացի այդ համալիրում ստեղծված են հանգստի բոլոր անհրաժեշտ պայմանները, մասնավորապես տեղակայված են առողջարարական կենտրոն, թուրքական և ռուսական բաղնիք, սաունա, մարզասրահ, լողավազաններ և սպա-կենտրոններ: Ի հավելումն այս ամենի՝ բնակիչները կարող են օգտվել նաև ամենօրյա մաքրության, քիմմաքրման, ավտոկայանման, ավտոլվացման և բազմաթիվ այլ ծառայություններից: Ի դեպ բոլոր այս ծառայությունները հասանելի են յուրաքանչյուր բնակարանում տեղադրված «խելացի բնակարան» համակարգի միջոցով: