Ինչպես տեղեկացնում է constructiondigital կայքը, հղում կատարելով պաշտոնական աղբյուրներին, 6.08 մլրդ ԱՄՆ դոլար արժողությամբ Աբու Դաբի միջազգային օդանավակայանի (Abu Dhabi International Airport (ADIA)) նոր տերմինալի շինարարությունը կսկսվի 2012 թ-ին: Չնայած համաշխարհային տնտեսական ճգնաժամին՝ Միացյալ Արաբական Էմիրություններում շարունակում են իրականացնել բազմաթիվ շինարարական նախագծեր: Այսպես՝ 2012 թ-ին նախատեսվում է սկսել Աբու Դաբի միջազգային օդանավակայանի՝ 650 հազար քառակուսի մետր ընդհանուր մակերեսով նոր տերմինալի շինարարությունը: Ըստ նախնական տվյալների՝ նոր տերմինալը շահագործման կհանձնվի 2017 թ-ին և կսպասարկի ավելի քան 30 մլն ուղևոր: Օդանավակայանի ղեկավարությունը շինարարությունն իրականացնելու համար ստացել է 6 դիմում- հայտ աշխարհի տարբեր երկրներից, այդ թվում՝ Գերմանիայից, Հարավային Աֆրիկայից և ԱՄՆ-ից: Շինարարության իրականացման վերջնական պայմանագիրը կստորագրվի 2012 թ-նի առաջին եռամսյակում: Ըստ նախանական տվյալների՝ նոր տեմինալի հսկա շենքը կունենա աշխարհի ամենաերկար ծածկող կամարները, որոնց բարձրությունը կհասնի 52 մետրի: Նոր տերմինալում կլինի նաև շքեղ հյուրանոց, սպա-կենտրոն, ռեստորաններ, բարեր և 20-25 հազար քառակուսի մետր մակերեսով առևտրային կենտրոններ: Այս կառույցները կգտնվեն 8.4 հազար քառակուսի մետր մակերեսով, միջերկրական և անապատային բնաշխարհով, փակ այգու շրջակայքում: Ինչպես տեղեկացնում է օդանավակայանի պաշտոնական կայքը, նախապատրաստական աշխատանքները սկսվել են դեռևս 2009 թ-ի փետրվարի, իսկ շինարարության իրականացման նպատակով մրցույթ է հայտարարվել այս տարվա հունվարին: Աբու Դաբի միջազգային օդանավակայանն իր առաջին չվերթն իրականացրել է 1982 թ-ին: Այն գտնվում է մայրաքաղաքի կենտրոնից 30 կիլոմետր հեռավորության վրա, որտեղ գտնվում է Էթիադ Էյրվեյս (Etihad Airways) ընկերության գլխավոր գրասենյակը:
Ինչպես տեղեկացնում է The National ինտերնետային կայքը, համաձայն նախատեսված գրաֆիկի՝ Աբու-Դաբիի Քորնիչ (Corniche) թաղամասում, կամ դրա շրջակայքում առաջիկա ամիսների ընթացքում շահագործման կհանձնվեն մի քանի երկնաքերեր, որոնք պարունակում են մոտ 1400 լյուքս կարգի բնակարաններ: Նախագծերը համալրված են սպասարկման ժամանակակից միջոցներով, այդ թվում՝ լողավազաններ տանիքներում, ֆիթնես-ակումբներ և այլն: Ռեքս անշարժ գույքի (Rex Real Estate) գործակալության տնօրեն Ալմեր Ագմիրենի (Almer Agmyren) խոսքերով, որոշ մարդիկ Դուբայից վերադառնում են Աբու-Դաբի ապրելու, քանի որ մայրաքաղաքում ևս աստիճանաբար կառուցվում են բարձր մակարդակի շինություններ: Առաջիկա ամիսներին շինարարությունը կավարտվի և շահագործման կհանձնվեն՝ Էթիհադ Աշտարակը (Etihad Towers), որը գտնվում է Էմիրեյթս Փէլիս (Emirates Palace) հյուրանոցի մոտ, 47-հարկանի Սեբա Աշտարակը (Seba Tower), որն առավել հայտնի է Ալ Էյն Աշտարակ (Al Ain Tower) անունով, ինչպես նաև Նեյշն Աշտարակը (Nation Towers): Քլաթթոնս (Cluttons) խորհրդատվական ընկերության մասնագետ Սթիվ Մորգանի խոսքերով, Քորնիչ թաղամասում կառուցվող ցանկացած նախագիծ թանկագին զարդ է դառնում այդ հիանալի պսակի մեջ: Էթիհադ Աշտարակի առաջին 885 բնակարանները վարձակալության համար հասանելի կդառնան այս տարվա հոկտեմբերից: 67 քառակուսի մետր մակերեսով, մեկ ննջարանով բնակարանների տարեկան վարձը կսկսի մոտ 27 հազար ԱՄՆ դոլարից, իսկ 160 քառակուսի մետր ընդհանուր մակերեսով երկու ննջարաններով բնակարաններինը՝ 61.3 հազար ԱՄՆ դոլարից: 732 քառակուսի ընդհանուր մակերեսով փենթհաուսների վարձակալությունը տարեկան կկազմի 265 հազար ԱՄՆ դոլար: Համարժեք գներով հոկտեմբերի վերջին կսկսեն վարձակալության հանձնվել նաև Ալ Էյն Աշտարակի բնակարանները, իսկ ահա Նեյշն Աշտարակն արդեն շահագործման կհանձնվի մյուս տարվա գարնանը:
Ինչպես տեղեկացնում է Արաբիան Բիզնես (Arabian business) պարբերականը, համաձայն Նայթ Ֆրենկ (Knight Frank) ռիելթորական ընկերության կատարած ուսումնասիրությունների, Մերձավոր Արևելքը դուրս է մնացել աշխարհի ամենաթանկ գրասենյակային տարածքների վարձակալման ցուցանիշով առաջատար տասնյակից: Աբու-Դաբին և Դուբայը 2010թ-ին նույն ուսումնասիրության արդյունքում գրասենյակային տարածքների վարձակալության գների մակարդակով գրավել էին համապատասխանաբար 6-րդ և 7-րդ հորիզոնականները: Ինչպես նշում են վերլուծաբանները, նախորդ մի քանի տարիներին շինարարության բարձր տեմպերի հետևանքով վարձով գրասենյակային տարածքների շուկայում առաջարկի ավելցուկ է գրանցվել: Հենց այս գործոնն է, որ ստիպում է սեփականատերերին իջեցնել վարձավճարները: 2010թ-ի ընթացում Դուբայում և Աբու-Դաբիում վարձավճարները նվազել են 10-20 տոկոսով, և, հավանաբար, գների անկումը դեռ շարունակական բնույթ է կրելու: 2008 թ-ի համեմատ Աբու-Դաբիում անշարժ գույքի գները նվազել են 45, իսկ Դուբայում մոտ 50 տոկոսով: Բացի այդ Նայթ Ֆրենկ (Knight Frank) ընկերության կանխատեսումներով, Դուբայում հաջորդ 18-24 ամիսներին շահագործման կհանձնվի ևս 200 հազար քառակուսի մետր գրասենյակային տարածք: Գրասենյակային տարածքների վարձավճարների մակարդակով առաջատարն է Լոնդոնը: Նրան հաջորդում են Տոկիոն, Հոնգ Կոնգը և Մոսկվան:
