Ինչպես տեղեկացնում է news.yahoo.com կայքը, այս շաբաթ Պանամայում շահագործման է հանձնվել Թրամփ աշտարակը (Trump Tower): Լատինական Ամերիկայի ամենաբարձր երկնաքերը պոտենցիալ հաճախորդներին առաջարկում է ինչպես բնակարաններ, այնպես էլ հյուրանոցային համարներ: 284 մետր բարձրությամբ աշտարակը մեկ անգամ ևս ընդգծում է Պանամայի անշարժ գույքի բումը: Ինչպես ներկայացված է Թրամփ Օուշն Քլաբի (Trump Ocean Club) բացման հրավիրատոմսերում, վերջինս ժամանակակից, շքեղ ճանապարհորդության կենտրոն է: Հյուրանոցում ամենաէժան սենյակն արժե 300 ԱՄՆ դոլար գիշերվա համար, իսկ բնակարանների գները տատանվում են 250 հազարից մինչև 1 մլն ԱՄՆ դոլար: 430 մլն ԱՄՆ դոլար արժողությամբ նախագծի հեղինակն է կոլումբիական Արիաս Սեռնա Սարավիա (Arias Serna Saravia) ընկերությունը, իսկ կառուցապատողը Դոնալդ Թրամփի կազմակերպությունն է: Թրամփ աշտարակում կա 47 լյուքս, 37 վերելակ, սպա-կենտրոն, փոքրիկ նավահանգիստ զբոսանավերի համար, խաղասրահ և կղզի մասնավոր լողափով: Հյուրանոցն իր մեջ ներառում է 900 քառակուսի մետր տարածքով պատշգամբ՝ լողավազանով և 4200 քառակուսի մետր ընդհանուր մակերեսով խորհրդակցությունների դահլիճ: Հյուրերը հնարավորություն ունեն նաև օգտվել սեփական սպասավորի ծառայություններից: Զարգացող անշարժ գույքի շուկան Պանաման վերածել է «փոքրիկ Դուբայի»՝ հայելապատ երկնաքերերով և հոյակապ կառույցներով: Հարցն այն է թե որքան՞ ժամանակ կտևի այս շինարարական վերելքը և ինչ՞ ցավալի հետևանքների կարող է այն հանգել: Ի դեպ Լատինական Ամերիկայի ամենաբարձր 3 երկնաքերերը գտնվում են Պանամայում: Ցուցակը գլխավորում է այս շաբաթ շահագործման հանձնված Թրամփ աշտարակը, նրան հաջորդում է 67 հարկանի, 266 մետր բարձրությամբ Դը Փոինթ (The Point) աշտարակը և կրկին այս տարի բացված 246 մետր բարձրությամբ Օուշն Թու (Ocean Two) աշտարակը:
Մերձավոր Արևելքի խոշորագույն կառուցապատողներից մեկը, Դամաք Փրոփերթիս (Damac Properties) ընկերությունը Դուբայ Մարինա (Dubai Marina) թաղամասում սկսել է իր Դամաք Հեյթս (Damac Heights) նախագծի շինարարությունը, տեղեկացնում է Tradearabia լրատվական գործակալությունը: Նախագծի գլխավոր կապալառուի դերը ստանձնել է Արաբթեք (Arabtec) ընկերությունը: 85 հարկանի և 420 մետր բարձրությամբ նախագծի իրականացման նախնական բյուջեն կազմում է 138.4 մլն ԱՄՆ դոլար: Դամաք Հեյթսը շահագործման հանձնվելուց հետո իր հավանական սեփականատերերին կառաջարկի 2, 3 և 4 սենյականոց, ինչպես նաև երկհարկանի բնակարաններ, և փենթհաուսներ: Բնակելի համալիրը կհամապատասխանի ապրելու ամենաբարձր չափանիշներին և բնակիչները կկարողանան օգտվել համալիրի 5 աստղանի ենթակառուցվածքներից: Մասնավորապես՝ նախատեսվում է աշտարակում կառուցել կարգավորվող ջերմաստիճանով լողավազան, մարզասրահ, մանկական խաղասրահ, շոգեբաղնիք, սպա-կենտրոն և այլն: Ինչպես նշված է Դամաք Փրոփերթիս ընկերության փոխնախագահ Նիալ Մակ Լուգլինի (Niall Mc Loughlin) ելույթում, Դամաք Հեյթսը կդառնա հերթական շողացող ծովափնյա մարգարիտը: Աշտարակը կառուցվում է Դուբայ Մարինա թաղամասի Ալ Սուֆու մայրուղու (Al Sufouh Road) վրա: 2 կիլոմետր երկարությամբ ծովափնյա այս ոչ լայն հատվածը դարձել է բազմաթիվ բացառիկ նախագծերի վայր, «որոնց շարքում Դամաք Հեյթսը պիտի ամենավառը փայլի», նշել է Մակ Լուգլինը: Նա նաև ավելացրել է, որ այսօր շատ դժվար է զարմացնել՝ Դուբայում նոր շենք կառուցելով: «Բավարար չէ կառուցել լավ շինություն սովորական թաղամասում: Այսօր կառուցապատողները պետք է տեղափոխվեն մեկ այլ հարթություն և ստեղծեն ֆենոմենալ նախագծեր՝ հեղինակավոր թաղամասերում և բոլոր ժամանակակից հարմարություններով: Դամաք Հեյթսը կլինի հենց այդպիսին», ավելացրել է փոխնախագահը: Դամաք Հեյթս բնակելի համալիրը կառուցապատող Դամաք Փրոփերթիս և կապալառու Արաբթեք ընկերությունների երկրորդ համատեղ նախագիծն է: Նրանք անցած տարի հաջողությամբ ավարտեցին 84 հարկանի Օուշըն Հեյթս (Ocean Heights) կառույցի շինարարությունը: Դամաք Փրոփերթիս ընկերությունը ստեղծվել է 2002 թ-ին և մինչ օրս Դուբայում կառուցել է 28 շենք ընդհանուր 986,6 հազար քառակուսի մետր տարածքով: Մինչև այս տարվա վերջ ընկերությունը նախատեսում է շահագործման հանձնել ևս 8 շենք 233,5 հազար քառակուսի մետր ընդհանուր մակերեսով: Ինչպես արդեն նշել էինք, Դուբայում վերջին 2 տարվա ընթացքում հետաձգվել կամ չեղյալ են հայտարարվել ավելի քան 217 անշարժ գույքի նախագիծ, իսկ 2010 թ-ին մոտ 22%-ով նվազել են անշարժ գույքի նկատմամբ կատարված գործարքները: Սակայն ինչպես տեսնում ենք, այս հանգամանքները և անշարժ գույքի գների շարունակական անկումը բոլորովին էլ չեն անհանգստացնում որոշ կառուցապատողների, որոնք բավականին լավատեսորեն են տրամադրված և ղեկավարվում են իրենց առաջարկի բացառիկությամբ:
Ռիելթի Քեփիթալ (Realty Capital) ընկերությունն ավարտեց է Դուբայում կառուցվող Այ-Րայզ (i-Rise Tower) գրասենյակային աշտարակի շինարարությունը: 150 հազար քառակուսի մետր ընդհանուր մակերեսով տարածաշրջանի ամենամեծ գրասենյակային աշտարակներից մեկը գտնվում է Դուբայի Թեքոմ (Tecom Site-C) թաղամասի հանգույցային հատվածում: Ռիելթի Քեփիթալ ընկերությունը հայտարարել է, որ բազմաթիվ վարձակալներ արդեն սկսել են 36 հարկանի աշտարակում իրենց էլիտար գրասենյակների ներքին հարդարման աշխատանքները: Սակայն պետք է նշել, որ մինչ օրս աշտարակի միայն կեսն է վարձակալության հանձնված: Աշտարակի շինարարական աշխատանքների ընթացքում Ռիելթի Քեփիթալ ընկերությունը համագործակցել է համաշխարհային համբավով մի շարք նախագծային, շինարարական և ռիելթորական ընկերությունների հետ, այդ թվում՝ տարածաշրջանի առաջատար ճարտարապետա-շինարարական Խաթիբ և Ալամի (Khatib & Alami Consolidated Engineering Company) և համաարաբական ամենամեծ նախագծային և շինարարական խորհրդատվական Պրոջաքս Ինթերնեշնլ (Projacs International) ընկերությունների հետ: Շինարարական աշխատանքները ժամանակին ավարտելու նպատակով կառուցապատողը վստահել է շինարարության գլխավոր կապալառուի դերը Ալ Նաբուդահ (Al Naboodah) ընկերությանը: 36 հարկանի աշտարակն առաջարկում է բարձրակարգ գրասենյակային տարածքներ՝ յուրաքանչյուր հարկում 3 հազար քառակուսի մետր մակերեսով: Գրասենյակային տարածքներն աշտարակում բնութագրվում են ինչպես՝ ժամանակակից և ճկուն՝ 50 – 330 քառակուսի մետր տարածքների ընտրությամբ: Անհատական գրասենյակները 2 մոդուլով են՝ գործադիր և կորպորատիվ: Գործադիր գրասենյակներն ունեն առանձնացված զուգարանասենյակներ, բուֆետ և պահեստներ: Այ-Ռայզ բիզնես աշտարակի բոլոր գրասենյակային տարածքներում գերիշխում է արևի լույսը՝ հնարավորություն ընձեռելով էլեկտրաէներգիայի խնայողության համար և միաժամանակ բարձրացնելով կառույցի բնապահպանական ցուցանիշները: Աշտարակն ունի հարմարավետ դիրք՝ անմիջապես Շեյխ Զայեդ (Sheikh Zayed) փողոցից մուտքով և մետրոյի կայարանի հարևանությամբ, իսկ գրասենյակների լուսամուտներից բացվում են հիանալի տեսարաններ դեպի Արաբական ծովածոցը և Նոր Դուբայի հորիզոնը:
Այս շաբաթ Փարիզի հյուսիս-արևմտյան շրջանի Դեֆանս գործարար թաղամասում կայացել է Ֆրանսիայի ամենաբարձր երկնաքերի՝ Առաջին աշտարակի (First Tower) բացման հանդիսավոր արարողությունը: 324 մետրանոց Էյֆելյան աշտարակի քաշը մոտ երկու անգամ գերազանցող (21000 տն) այս սպիրալաձև կառույցը Փարիզի Մոնպարնաս (Montparnasse) աշտարակին զրկել է Ֆրանսիայի ամենաբարձր շենքի տիտղոսից: Մոնպարնաս աշտարակի բարձրությունը 210 մետր է, այն դեպքում, երբ Առաջինինը հասնում է 231 մետրի: Չնայած երկնաքերի ճարտարապետական հաղթանակին` մինչ օրս աշտարակի միայն կեսն է վարձակալությամբ հանձնված: Դեռևս Առաջինի միայն 80 հազար քառակուսի մետր տարածք է վարձակալությամբ հանձնված: Աշտարակի շինարարական աշխատանքները սկսվել են 2008 թ-ին, իսկ բյուջեն կազմել է 300 մլն եվրո (440մլն դոլար): Աշտարակի առաջին վարձակալը Էռնստ Ընդ Յանգ (Ernst and Young) հաշվապահական ընկերությունն է: Այնուամենայնիվ, Առաջին աշտարակը երկար չի պահպանի Ֆրանսիայի ամենաբարձրի տիտղոսը, քանի որ արդեն շինթույլատվություն է տրվել մեկ այլ աշտարակի համար: Շուտով Դեֆանս թաղամասում կմեկնարկի Փարոս աշտարակի (Phare Tower) շինարարությունը, որի բարձրությունը կլինի 300 մետր: Աշտարակի շինարարության ավարտը նախատեսված է 2016թ-ին:
20 տարի տևած մանրակրկիտ ամրապնդման աշխատանքներից հետո վերջապես Պիզայի աշտարակից հեռացվել է շինարարական փայտամածը, իսկ դա նշանակում է, որ զբոսաշրջիկների բազմությունը արդեն կարող է հիանալ աշտարակի գեղեցկությամբ մոտիկից: €27 միլիոն արժողությամբ նախագծի շնորհիվ աշտարակի թեքությունը նվազել է 50 սմ-ով, որը մինչ վերակառուցումը տարեկան թեքվում էր 1 մմ –ով: Աշտարակի թեքությունը բերվեց 3.99 մետրի (ուղղաձիգից)՝ նախորդ 4.5-ի փոխարեն, իսկ բարձրությունը կազմում է 56 մետր: Շուրջ երկու տասնյակ վերականգման մասնագետները քրտնաջան աշխատում էին Պիզայի աշտարակի վրա եղած գրաֆիթիի և դարավոր կեղտի մաքրման, ինչպես նաև պոկված մարմարե սալերի վերականգնման աշխատանքների վրա: Ջիզելլա Կապոնին՝ Իտալիայի մշակույթի նախարարության պահպանության և վերականգման ինստիտուտի ճարտարապետը բացատրում է,- «Չնայած հուշարձանի մակերեսին (7,000 քռ. մ) մենք աշխատել ենք յուրաքանչյուր սանտիմետրի վրա»: Աշտարակը անկումից փրկելու ինժեներական աշխատանքների հետաքրքրվածությունը առաջացել էր դեռևս 1964 թվականին, երբ իտալական կառավարությունը թեքությունը վերացնելու համար օգնություն խնդրեց: Հետագայում որոշվեց, որ տվյալ դասական կառույցին բնորոշ առանձնահատկությունները պահպանելու համար որոշակի թեքություն ամեն դեպքում պետք է պահպանվի: Արդյունքում, աշտարակի հիմքերի ստորին մասի վրա 800 տոննա քաշով կապարե հակակշիռներ են կիրառվել, հիմքերի բարձրացած մասին հակազդելու նպատակով, որոնք գտնվում են ավելի փափուկ գրունտերի վրա: 1987 թվականին UNESCO- ի համաշխարհային մշակույթային ժառանգության ցանկում ընդգրկվելուց հետո վերականգնողական լուրջ քայլեր ձեռնարկվեցին, և աշտարակը այցելուների համար փակվեց: Պիզայից հեռացրին ծանր զանգերը, երրորդ մակարդակի շուրջ ճոպաններ անցկացվեցին և հողի մեջ ամրացվեցին, իսկ վեր բարձրացված հիմքից 38 խորանարդ մետր հող հեռացվեց՝ աշտարակը բերելով 1838 թվականի թեքությանը: Պիզայի աշտարակը կառուցվել է մի քանի դար՝ 1173 -1372 թվականներին, իսկ ամրացմանն ուղղված միջոցառումներն աշտարակի կյանքը կերկարացնեն ևս 300 տարով:
