Այսօր տեղի ունեցավ աշխարհի ամենաթանկ բնակելի տարածքի՝ Ուան Հայդ Պարկ համալիրի (One Hide Park) բացումը: Այն գտնվում է Լոնդոնում՝ Նայթսբրիջի վրա (Knightsbridge) և բաղկացած է 65000 քռմ ընդհանուր մակերեսով 4 հիմնական շենքերից՝ 86 էլիտար բնակարաններով և երեք արևտրի սրահներով: Հիմնական շինարարական աշխատանքներն իրականացվել են 2007- 2010 թվականներին, իսկ 2006-ի վերջում քանդել են այստեղ գտնվող հին շենքը: Բնակելի համալիրի նախագիծն իրականացրել է Rogers Stirk Harbor+Partners ճարտարապետական բյուրոն, ներքին էկսկլյուզիվ դիզայնը՝ Candy&Candy-ն, իսկ որպես գլխավոր կապալառու հանդես է եկել բրիտանական Laing O'Rourke ընկերությունը: Համալիրը Փրոջեքթ Գրանդե-ի (Project Grande Guernsey Limited, PGGL) սեփականությունն է, որը հանդիսանում է Քենդի և Քենդի՝ (Candy & Candy) լյուքս դասի բնակարանների հայտնի կառուցապատողներ Նիք և Քրիստիան Քենդի եղբայրների և Կատարի վարչապետ և արտաքին գործերի նախարար՝ Շեյխ Համաս բին Ջասիմ բին Ջաբեր ալ-Թհանի՝ (Sheikh Hamad bin Jassim bin Jaber al-Thani) համատեղ ձեռնարկությունը: Ծրագրի ֆինանսավորումն իրականացրել է գերմանական Eurohypo AG բանկը: Համալիրի կառավարումը կիրականացնի հարևանությամբ գտնվող հայտնի հյուրանոցային օպերատոր Մանդարին Օրիենտալը (Mandarin Oriental), և դա այս ընկերության առաջին «բնակելի» փորձ է Եվրոպայում: Բացման արարողությանը մասնակցում են մոտ 350 հյուրեր, որոնց համար ճաշատեսակներ են պատրաստում այնպիսի հայտնի խոհարարներ, ինչպիսիք են Հեթսոն Բլյումենտալը (Heston Blumenthal) և Դանիել Բոլուդը (Daniel Boulud): Չնայած Մեծ Բրիտանիայում շարունակվող բնակարանների գների կայուն անկմանը, այս համալիրում բնակարանների մեկնարկային գինը սկսվում է £ 20 միլիոնից, իսկ անցյալ ամռանը պենթհաուսներից մեկը վաճառվել է երկրի համար ռեկորդային գնով՝ £ 140 միլիոնով (մոտ $ US222 մլն): Պենթհաուսը գտնվում է 2 մակարդակների վրա, բաղկացած է վեց ննջասենյակներից, պատուհանները գնդականթափանց ապակուց են, և այնտեղից բացվում է հիանալի տեսարան դեպի Հայդ Պարկի հիմնական գեղեցկությունը՝ Սերփենթայն լիճը: Չնայած SAS (SAS Security Services) անվտանգության ընկերության կողմից իրականացվող շուրջօրյա հսկողությանը, այս բնակարանն ունի նաև այսպես կոչված «զրահապատ սենյակ», որտեղ կարելի է թաքնվել արտառոց դեպքերում (ինչպես, օրինակ, ամերիկյան Դեվիդ Ֆինչերի « Խուճապի Սենյակ» թրիլլերում): Այս պենթհաուսի գնորդի անունը պահվում է խիստ գաղտնիության մեջ, սակայն որոշ անշարժ գույքի գործակալներ ենթադրում են, որ գնորդը ամենայն հավանականությամբ Մերձավոր Արևելքից կամ Նիգերիայից է:
Նոր Տարվա նախօրեին հայտնի բոստոնյան Ջոն Հենքոք երկնաքերը (John Hancock Tower) գնել է Բոստոն Փրոփերթիսը՝ (Boston Properties) ԱՄՆ $ 930 մլն-ով: Այս շենքը պատկանում էր Նորմանդի Ռեալ Իսթեյթ (Normandy Real Estate Partners) և Ֆայվ Մայլ Քէփիտալ Փարթներս (Five Mile Capital Partners) ընկերություններին, ովքեր 18 ամիս առաջ այն ձեռք էին բերել աճուրդի ժամանակ՝ ընդամենը ԱՄՆ $ 660,6 մլն-ով: Մեկ ու կես տարվա ընթացքում անշարժ գույքի վերավաճառքից ունենալ այսպիսի շահույթ՝ փայլուն գործարք է, ինչը մասնակիորեն ԱՄՆ-ի անշարժ գույքի շուկայի քաոսային վիճակի արդյունք է: Նշենք, որ այս հայտնի երկնաքերի արժեքը 2006-ին մոտ ԱՄՆ$1.3 մլրդ է եղել: Երկնաքերի հատակների ընդհանուր մակերեսը կազմում է 158.000 քմ: 60 հարկանի և 241 մետր բարձրությամբ Ջոն Հենքոք երկնաքերը կառուցվել է 1976 և դեռևս պահպանում է Բոստոնի ամենաբարձրահարկ շենքի տիտղոսը: Շենքը նախագծել է I.M. Pei & Partners ճարտարապետական բյուրոն, որը սույն նախագծի համար 1977 թվականին Ամերիկյան Ճարտարապետության Ինստիտուտի կողմից արժանացավ Ազգային Պատվո մրցանակի: Մասնագետների կարծիքով, լինելով ամբողջովին ապակեպատ, շենքի ճակատները արտացոլում են շրջակա պատմական կառույցների պատկերները, ինչի շնորհիվ քաղաքի պատմական մասի ճարտարապետությունը չի տուժում: Այս «ապակե փորձը» I.M. Pei & Partners-ը իրականացրեց նաև Փարիզի պատմական մասում՝ Լուվրի հանրահայտ ապակե բուրգի նախագծման և շինարարության ժամանակ: Իհարկե այս անգամ, ապակե բուրգը բավական քննադատության արժանացավ: Շենքը կրում է Ամերիկյան հեղափոխության պատրիոտ, Ամերիկայի Անկախության հռչակագրի ամենահայտնի ստորագրության հեղինակ և Մասաչուսեթսի առաջին նահանգապետ՝ Ջոն Հենքոքի (1737-1793) անունը: Ջոն Հենքոք անունը կրում է մեկ երկնաքեր ևս ՝ Ջոն Հենքոքի Կենտրոնը Չիկագոյում: Նրա բարձրությունը 344 մետր է և այն 100 հարկանի է:
Հանրահայտ ինտերնետային հսկա Google –ը Նյու Յորքում գրասենյակային շենքի ձեռքբերման պայմանագիր է կնքել: Ութերորդ Ավենյուի 111 շենքը, որը գտնվում է Մանհեթենի հեղինակավոր Չելսի թաղամասում, կորպորացիան համաձայնվել է ձեռք բերել 1.8 միլիարդ դոլլարով: Նշենք, որ այժմ այս նույն շենքի մի մասը՝ 51000 քռ.մ. տարածքով վարձակալության պայմանագրով օգտագործում է հենց ինքը Google –ը, որպես Նյու Յորքյան մասնաճյուղի գրասենյակ: Բայց հսկան որոշել է վերջնականապես հիմնավորվել 1932 թվականին կառուցված այս 18 հարկանի , 270 հազար քռ.մ հատակների ընդհանուր մակերեսով շենքում, վճարելով 6600 դոլլար 1 քռ.մ –ի համար: Պատկերացնելու համար նշենք, որ շենքի հատակների ընդհանուր մակերեսը գերազանցում է հայտնի երկնաքեր- Empire State Building-ի մակերեսները: Այս գործարքը ԱՄՆ-ում տարվա խոշորագույնն է, իսկ որպես վարձակալի կողմից անշարժ գույքի ձեռք բերման գործարք՝ երկրի պատմության մեջ ամենախոշորը: Ըստ վերջին տվյալների, $ 188 մլրդ շուկայական կապիտալիզացիայով Google-ի կորպորացիան աշխարհում երրորդն է հանդիսանում բարձր տեխնոլոգիաների ոլորտում՝ Apple-ից և Miсrosoft-ից հետո: Google-ի հիմնադիրներն են Լարրի Փեյջը և Սերգեյ Բրինը, ովքեր 1998 թվականին գրանցեցին Google-ը որպես կորպորացիա: 2001 թվականին այս զույգին միանում է Էրիկ Շմիդտը՝ Apple-ից, ով ներկա պահին կորպորացիայի գլխավոր գործադիր տնօրենն է: Երեքն էլ Google-ի բաժնետոմսերի զգալի մասի սեփականատերեր են հանդիսանում և ըստ կորպորացիայի 2011թվականի աշխատավարձերի ճշտումների կշարունակեն ստանալ $1 տարեկան սիմվոլիկ աշխատավարձ:
Այս տարի օգոստոսին հայտնի Հոլիվուդյան աստղ Նիկոլ Քիդմանը և իր ամուսին Կիտ Ուրբանը Մանհեթենի էլիտար թաղամասում՝ Չելսիում (Նյու Յորք), ձեռք բերեցին մի պենտհաուս, Գուդզոնի ծովածոցի հրաշալի տեսարանով: 12-րդ հարկում գտնվող այս 302 քռ.մ. երկհարկանի բնակարանի մեկնարկային գինը եղել է $12.5 միլիոն, սակայն, միգուցե դերասանուհու հմայքի շնորհիվ, այն ձեռք բերվեց $10 միլիոնով : Բնակարանը բաղկացած է 3 ննջարաններից, 2 տեռասներից, գրադարանից, երկմակարդակ հյուրասենյակից, խոհանոցից և ավտոտնակից... Այո՛, հենց 32.5 քռմ. ավտոտնակից, որը խոհանոցի հետ նույն հարկում է գտնվում: Այս նորամուծությունն առաջին անգամ է Նյու-Յորքում օգտագործվել, և ահա թե ինչպես է դա կատարվում. մեքենան մտնում է հատուկ վերելակի մեջ, որը նրան անհրաժեշտ հարկ է բարձրացնում, իսկ այնուհետև մեքենան վերելակից մտնում է ավտոտնակ, որը դուռ ունի դեպի բնակարանի խոհանոց: Այսպիսի ավտոտնակն իսկապես շատ հարմար է ծանր գնումներից հետո և ինչու ոչ՝ բնակարանի վերանորոգման աշխատանքների ու կահավորման համար: Բացի այս բնակարանից Նիկոլ Քիդմանը ևս մի քանի տներ ունի, ինչպես ԱՄՆ-ում, այնպես էլ իր ծնողների ծննդավայր Ավստրալիայում, սակայն տարվա մեծ մասը ամուսնական զույգն անցկացնում է իրենց սիրված վայրում՝ Թեննեսի նահանգի Նեշվիլում գտնվող տանը:
Մայքլ Դուգլասը և Քեթրին Զետա-Ջոնսը ձեռք են բերել $5,075,000 արժողությամբ երկհարկանի «գյուղական տնակ»: Կալվածքը գտնվում է Նյու Յորք նահանգում՝ Բեդֆորդ քաղաքից ոչ հեռու: «Տնակի» ընդհանուր մակերեսը 585 քռ. մ է և իր մեջ է ներառում հինգ ննջասենյակ, հինգ լոգարան, հինգ բուխարի ու խոհանոց: Եվ չնայած գյուղական ոճի, խոհանոցը հագեցած է տեխնիկայի վերջին խոսքով: Տունն իր մեջ է ներառում նաև մեծ հյուրասենյակ, ճաշասենյակ և գրադարան: Հարակից՝ 2,3 հա հողատարածքի վրա է գտնվում նաև հյուրատունը, լողավազանը և թենիսի կորտը: Տեղեկացնում են նաև, որ տան անմիջապես մոտակայքում տեղակայված է խոշոր ձիաբուծական ֆերմա, սակայն ճշտվծ չէ, արդյո՞ք այն պատկանում է Դուգլասին և Զետա-Ջոնսին, թե ոչ: Ինչպես հայտնում է realestalker-ը, ուսումնասիրությունները ցույց են տվել, որ բացի Big Apple-ում ունեցած բնակարանից և արդեն իսկ Բեդֆորդի կալվածքից բացի, աստղային զույգի սեփականությունն են հանդիսանում (կամ հանդիսացել) նաև Բահամյան կղզիներում, Սենտուրի Սիթիում (Լոս Անջելես) և Ասպենում գտնվող տները, Մայորկայում բնակելի համալիրը, Զետա-Ջոնս Դուգլասի հայրենիքում՝ Սուոնսիում (Ուելս) մեծ տունը, և, վերջապես, Տուրկս և Կայկոս կղզիներից մեկում հինգ սենյականոց թաքստոցը:
