Լոնդոնյան Մեյֆեյր (Mayfair) էլիտար թաղամասում նախատեսվում է կառուցել մեծ Բրիտանիայի ամենաթանկ էլիտար բնակելի համալիրը: «Օդլի Սքուեր Հաուս» (Audley Square House) անվանումը ստացած բնակելի համալիրի շինարարության բյուջեն կկազմի մոտ 3 մլրդ ԱՄՆ դոլար: Նշենք, որ սա ռեկորդային է Բրիտանիայի համար, քանի որ նախորդ ռեկորդները կազմել են ընդամենը 2.2 մլրդ ԱՄՆ դոլար և պատկանել են «Ուան Հայդ Փարք» (One Hide Park) և «199 Նայթսբրիջ» (199 Knightsbridge) կառույցներին: Daily Mail բրիտանական պարբերականի տվյալներով, բրիտանացի միլիարդատեր Ջոն Քոդուելը (John Caudwell) 230 մլն ԱՄն դոլարով գնել է Մեյֆեյր թաղամասում տեղակայված 5-հարկանի ավտոկայանատեղին և հարակից շինությունները, որպեսզի այնտեղ կառուցի թանկարժեք էլիտար բնակարաններ և թաունհաուսներ: Օրերս նյույորքյան «Ռոբերտ ԷյԷմ Սթերն Արքիթեքթս» (Robert AM Stern Architects) ընկերությունը հանրությանն է ներկայացրել նեո-դասական ոճով նախագծված 9-հարկանի շինության գծագրերը: Ըստ նախնական տվյալների՝ շինության ընդհանուր մակերեսը կկազմի 18.5 հազար քառակուսի մետր: Համալիրը կունենա 5 ստորգետնյա և 9 վերգետնյա հարկեր, որտեղ կտեղակայվեն թաունհաուսներ, փենթհաուսներ և շքեղ բնակարաններ: Թաունհաուսները և փենթհաուսները կունենան իրենց անձնական լողավազանները և մարզասրահները: 2 ստորգետնյա հարկերը կծառայեն որպես ավտոկայանատեղի, իսկ մյուս 3 հարկերում կտեղակայվեն 15 մետր երկարությամբ լողավազան, խորհրդակցությունների սրահներ, մարզասրահ, սպա-կենտրոն, կինոթատրոն և խաղային սրահներ: Նշենք, որ սկզբում Ջոն Քոդուելի 450 մլն ԱՄՆ դոլար բյուջեով կառույցի նախագծման աշխատանքերը իրականցնում էր «Ֆոսթեր և Փարթներս» (Foster & Partners) ճարտարապետական ընկերությունը: Սակայն երբ միլիարդատերը գնեց նաև հարակից շինությունները և նախագիծն ընդլայնեց իր սահմանները, նա հարցազրույց անցկացրեց համաշխարհային առաջատար 30 ճարտարապետական ընկերությունների հետ: Արդյունքում նախագծի իրականացման հնարավորություն ստացավ «Ռոբերտ ԷյԷմ Սթերն Արքիթեքթս» ընկերությունը, քանի որ ըստ սեփականատիրոջ, այս ընկերությունը կարող է նախագծել այնպիսի բարձրորակ կառույց, որը չի տարբերվի տարածքի ճարտարապետական ոճից և ավանդույթներից, ավելին կմիաձուլվի հարևան կառույցներին, գրում է Building design պարբերականը: Ապրիլի սկզբին էլիտար բնակարանային համալիրի նախագիծը ներկայացվել է Վեսթմինսթերյան Խորհրդի (Westminster Council) հաստատմանը: Սակայն, ինչպես գրում է Daily Mail պարբերականը` հղում կատարելով «Ռոքսթոն անշարժ գույքի գործակալության» (Rokstone estate agents) տնօրեն Բեքի Ֆաթեմիին (Becky Fatemi), միլիարդատերը շինարարության ընթացքում մի շարք խնդիրներ կունենա իր ազդեցիկ հարևանների հետ: Ապագա շինհրապարակի հարևանությամբ տեղակայված են Քաթարի դեսպանատունը, «Դորչեսթեր» (Dorchester) հյուրանոցը և մեծահարուստ անհատների բնակարաններ, որոնք կպահանջեն, որ շինարարությունը կազմակերպվի ամենաբարձր մակարդակով, մասնավորապես` անաղմուկ և փողոցների կատարյալ մաքրությամբ:
Նյու Յորքի շքեղ Մանհեթեն թաղամասի անշարժ գույքի շուկայում նոր ռեկորդ է գրանցվել: Նորակառույց «Ուան 57» (One57) աշտարակում անանուն գնորդը 100.5 մլն ԱՄՆ դոլար է վճարել վերնահարկում գտնվող երկհարկանի փենթհաուսի համար: Նշենք, որ Նյու Յորքի պատմության մեջ սա նմանօրինակ անշարժ գույքի շուկայում համարվում է մինչ այժմ իրականացված ամենաթանկ գործարքը: 306 մետր բարձրությամբ երկնաքերի 89–90–րդ հարկերում տեղակայված 1020 քառակուսի մետր ընդհանուր մակերեսով փենթհաուսն ունի 6 ննջասենյակ, 7 լոգարան, շոգեբաղնիք, գրադարան, ինչպես նաև կինոթատրոն: Ի դեպ, այս երկնաքերի բոլոր բնակարաններն ունեն բարձր առաստաղ, սենյակները ձևավորված են վարդագույն փայտով, իսկ լոգարանները իտալական մարմարով: Բացի այդ աշտարակի բոլոր բնակիչները կարող են օգտվել ընդհանուր մարզասրահից, լողավազանից, շոգեբաղնիքից, գրադարանից և ընդարձակ կինոթատրոնից: Շքեղ երկնաքերը, որն ամբողջությամբ գրեթե վաճառված է, հետաքրքրություն է առաջացնում ինչպես տեղացի, այնպես էլ արտերկրի գնորդների մոտ: «Ուան 57» երկնաքերի բնակարանների վաճառքը սկսվել է դեռևս 2011 թ-ին և առաջին 6 ամիսների ընթացքում նախագծի սեփականատերերի հաշվին է փոխանցվել մոտ 1 մլրդ ԱՄՆ դոլար գումար: Ի դեպ, նույն երկնաքերում 75 և 76 –րդ հարկերում տեղակայված մեկ այլ փենթհաուս 90 մլն ԱՄՆ դոլարով պետք է տրամադրվի Բիլլ Էքմեն ներդրումային խմբին: Ավելի վաղ ամերիկյան ԶԼՄ-ները հայտարարել էին, որ Քաթարի վարչապետ, շեյխ Համադ բին Ջասիմ բին Ջաբեր Ալ Թանին (Hamad bin Jassim bin Jaber al-Thani) պատրաստ է 100 մլն ԱՄՆ դոլար վճարել Նյու Յորքում կառուցվող «Ուան57» բնակելի երկնաքերում 89 և 90 –րդ հարկերում փենթհաուս գնելու նպատակով: Բնակարանն արդեն վաճառված է, իսկ թե ով է գնորդը՝ անհայտ է: Չնայած այն փաստին, որ 100 մլն ԱՄՆ դոլարը համարվում է շատ մեծ գումար և մինչ այժմ նյույորքյան երկնաքերերում որևէ բնակարանի համար վճարված ամենաբարձր գինը, քաղաքի անշարժ գույքի շուկան շարունակում է զարգանալ: «520 Փարք Ավենյու» (520 Park Avenue) երկնաքերն արդեն շուկա է հանել 130 մլն ԱՄՆ դոլար արժողությամբ նոր փենթհաուս, որի գինը մասնագետների կարծիքով դեռ կարող է բարձրանալ: Նշենք, որ Նյու Յորքի անշարժ գույքի շուկայի նախորդ ռեկորդակիրը ռուս միլիարդատեր Դմիտրի Ռիբոլովլեվն էր, ով Նյու Յորքում ուսանողուհի աղջկա համար գնված բնակարանի դիմաց:
Խարդախության զոհ դարձած մի խումբ երևանցիներ օրեր առաջ բնակարանամուտ են տոնել: Սեպտեմբերի 10-ին տեղի է ունեցել մայրաքաղաքի Ծիծեռնակաբերդի 1/2 հասցեում կառուցված բազմաբնակարան բազմաֆունկցիոնալ շենքի շահագործման հանդիսավոր արարողությունը: ՀՀ Նախագահ Սերժ Սարգսյանի հանձնարարությամբ ստեղծված միջգերատեսչական հատուկ հանձնաժողովի առաջարկությունների հիման վրա, ՀՀ կառավարության 04.04.2013թ. 342-Ա որոշման շրջանակում, նորկառույց շենքում բնակարաններ են հատկացվել նաև Երևան քաղաքի Արամի 72-80 հասցեներում մասնավոր կառուցապատողի ձախողած կառուցապատման ծրագրից տուժած ընտանիքներին: Շենքի բացման պատիվը վերապահվել է Երևանի քաղաքապետ Տ. Մարգարյանին և «Դի Ընդ Էյջ Գրուպ»-ի տնօրեն Վահե Պետրոսյանին: Երևանի քաղաքապետարանից տեղեկացնում են, որ դեռևս 2011թ-ի դեկտեմբերին ՀՀ գլխավոր դատախազության պետական շահերի պաշտպանության վարչության կողմից քրեական գործ էր հարուցվել Արամի 72-80 հասցեներում կառուցվող շենքից բնակարաններ վաճառելու պատրվակով 2005-2011 թվականների ընթացքում բազմաթիվ քաղաքացիների վստահությունը չարաշահելով խարդախությամբ մեծ գումարների հափշտակման կապակցությամբ: Ըստ այդմ` Արամի 72-80 հասցեներում առկա մոտ 21 հազար քառակուսի մետր մակերեսի դիմաց, 2005-2011 թվականների ընթացքում տվյալ շենքի կառուցապատող հանդիսացող «Գապբնակշին» ՍՊԸ-ն վաճառել էր 53 հազար քառակուսի մետր, ընդ որում, քրեական գործի հարուցման պահին տվյալ շենքն անավարտ էր ու շահագործման ոչ ենթակա: Այս ամենին զուգահեռ, «Գապբնակշին» ՍՊԸ-ի պատասխանատուները արհեստականորեն Արամի փողոցի տվյալ շենք էին տեղափոխել նաև իրենց կողմից կիսավարտ կամ դեռևս շինարարությունը չսկսված այլ շենքերի գնորդների և իրացվող տարածքների սեփականատերերի: Արամի 72-80 հասցեներում մեկ բնակարանը վաճառվել էր ընդհուպ 8 գնորդի և, ըստ էության, 476 ընտանիք դարձել էր խաբեբաների զոհ, և մարդիկ կանգնած էին վճարած գումարները կորցնելու շեմին: Մասնավոր կառուցապատողի կողմից խաբեության զոհ դարձած քաղաքացիները ստիպված դիմել էին հանրապետության նախագահին՝ խնդրի լուծման գործում ակնկալելով որոշակի աջակցություն, ինչի արդյունքում հանրապետության ղեկավարի հանձնարարությամբ, կառավարությունը 2012թ մարտին ստեղծեց միջգերատեսչական հատուկ հանձնաժողով՝ այդ քաղաքացիների կորուստների վերականգնման միջոցառումներ մշակելու համար: Հաշվի առնելով, որ խոսքը 476 ընտանիքների մասին էր, ակնհայտ էր, որ անհրաժեշտ էր գտնել ոչ ստանդարտ ու աննախադեպ լուծումներ: Բանակցությունների և քննարկումների արդյունքում ոչ այնքան դյուրին այդ լուծումը գտնվեց, կառուցապատման ընթացքում տուժած քաղաքացիների մի մասին բնակարանով ապահովեցին այստեղ՝ Ծիծեռնակաբերդի 1/2 հասցեի այս շենքում, մյուս մասին էլ՝ Արամի փողոցի բազմաբնակարան շենքում: Այսպիսով կարող ենք արձանագրել, որ տուժած 476 ընտանիքների կողմից բարձրացված խնդիրը վերջնականապես լուծված է: Նշենք նաև, որ շուրջ 65 հազար քառակուսի մետր ընդհանուր մակերեսով բազմաբնակարան համալիրի հարակից տարածքն ամբողջությամբ բարեկարգվել է, կառուցվել են նոր հաղորդուղիներ, իրականացվել են բարեկարգման ու կանաչապատման աշխատանքներ: Շենքի բակային տարածքում տեղադրվել են նաև նստարաններ, աղբամաններ, զրուցարաններ, իսկ փոքրիկների համար էլ՝ մանկական հրապարակ: Այսպիսով 476 ընտանիքի խնդիր ամբողջությամբ կարգավորված է, սակայն կան դեռևս հասցեներ, որոնց բնակիչները դեռ շարունակում են պայքարել, հուսալով` որ մի օր էլ իրենց բնակարանի հարցը կլուծվի: Խոսքը վերաբերում է Բուզանդի փողոցի և Կոնդ թաղամասի բնակիչներին, ովքեր տարիներ շարունակ պայքարում են իրենց օտարված հողի դիմաց փոխհատուցում ստանալու համար: 2007 թվականի մարտի 1-ին, Կառավարության որոշմամբ, Կոնդ թաղամասը ճանաչվեց իրացման գոտի: Նույն տարվա դեկտեմբերին «Դաուն Թաուն Երևան» փակ բաժնետիրական ընկերությանը տրվեց իրավասություն` բնակիչների տները քանդելու և նրանց նոր բնակարաններով կամ գումարով ապահովելու: Գնելով տարածքը, ընկերությունը պետք է նախանշված 4 տարվա ընթացքում կառուցապատում իրականացներ: Ընդհանուր առմամբ, շուրջ 300 ընտանիք պայմանագիր կնքեց: Ըստ ընտանիքների կողմից կնքված պայմանագրերի` 2012 թվականին բնակիչներին պետք է հանձնվեին պատրաստի բնակարանները: Սակայն հունվար ամսին պարզվեց, որ ընկերությունը լուծարված է, թեև այդ մասին փաստաթղթային որևէ վկայություն չկա: Նշենք, որ բազմաբնակարան շենքի բացման արարողության ժամանակ քաղաքապետ Տարոն Մարգարյանը նշել է, որ քայլեր են ձեռնարկվում Բուզանդի փողոցի և Կոնդ թաղամասի խաբված բնակիչների խնդիրների լուծման ուղղությամբ: Հանձնաժողովը քննարկում է` ինչ մոդել կիրառել և ինչպես նոր ներդրողներ գտնել խնդիրը լուծելու համար:
Դուբայի «Դամաք Փրոփերթիս» ընկերությունը հայտարարել է, որ էլիտար փենթհաուսների գնորդներին կնվիրի 2014 թ-ի արտադրության Լամբորգինի Ավենթադոր մակնիշի ավտոմեքենա (Lamborghini Aventador Roadster): Գովազդային ակցիայի մասին կառուցապատող ընկերությունը հայտարարել է Դուբայում անցկացվող ամենամյա «Առևտրային փառատոնի» շրջանակներում: Նշենք, որ ցնցող առաջարկությունն ուժի մեջ է մինչև ընթացիկ տարվա փետրվարի 2-ը: Առավել էժան բնակարաններ գնողները որպես նվեր կստանան «BMW» և «Mini Cooper» մակնիշների ավտոմեքենաներ: Ավտոմեքենաների մակնիշները կախված են բնակարանների գնից և չափերից: Նշենք, որ խաղարկությանը մասնակցող բնակարանների արժեքը չի հայտարարվում: «Դամաք Փրոփերթիս» ընկերությունն առաջին անգամ չէ նման միջոցառում կազմակերպում: 2013 թ-ին ընկերությանը պատկանող փենթհաուսների գնորդները նվեր ստացան Audi R8 մակնիշի ավտոմեքենաներ: Չորս սենյականոց, երեք սենյականոց և երկու սենյականոց բնակարանների գնորդները համապատասխանաբար նվեր ստացան Audi A8, Audi A6 և Audi A4 մակնիշի ավտոմեքենաներ: Ընկերության ներկայացուցիչի խոսքերով` նմանատիպ գովազդային միջոցառումների շնորհիվ «Դուբայի առևտրային փառատոնի» շրջանակներում ընկերության վաճառքի ծավալները կտրուկ աճում են: Տնտեսական ճգնաժամի ժամանակ Դուբայում անշարժ գույքի գները նվազեցին մոտ 50 տոկոսով, սակայն այժմ շուկան կամաց-կամաց վերականգնվում է: 2013 թ-ին որոշ գնահատականների համաձայն` անշարժ գույքի գներն աճել են 20-30 տոկոսով հիմնականում օտարերկրյա գնորդների շնորհիվ:
Հարյուրավոր տարիներ հոլանդացիները ծովի մակարդակից ցածր գտնվող վայրերից ջուրը հետ մղելու, ինչպես նաև ամբարտակներ կառուցելու նպատակով ներդրել են հսկայական ուժ և ֆինանսներ: Այսօր, սակայն, նրանք որոշել են ջրի դեմ պայքարելու փոխարեն այն օգտագործել` որպես հետագա կառուցապատման բաղկացուցիչ մաս կառուցելով աշխարհում առաջին լողացող բնակելի համալիրը: Հոլանդական «Վոթերստուդիո» (Waterstudio) ճարտարապետական ընկերությունը հանրությանն է ներկայացրել նորարական և շատ հետաքրքիր մի նախագիծ, որը ստացել է «Ցիտադել» (Citadel)` «լողացող տուն անվանումը»: Ըստ հեղինակների մտահղացման` «Ցիտադելը» կլինի շքեղ լողացող բնակելի համալիր` հագեցած նորարական և ժամանակակից տեխնոլոգիաներով: Նորագույն լողացող թաղամասի շինարարությունը նախատեսվում է սկսել արդեն հաջորդ տարվա սկզբին: Այն բաղկացած կլինի 60 բնակարաններից, որոնք կունենան «կանաչ» տանիք, սեփական այգի, նավահանգիստ փոքրիկ նավակի համար և ջերմոց: Ամբողջ համալիրը բաղկացած կլինի 180 մոդուլային էլեմենտներից համախմբված կենտրոնական բակի շուրջը: 73/128/2.8 մետր հաստությամբ բետոնե հիմքով բնակելի թաղամասը կունենա ավտոկայանատեղի և մայրցամաքի հետ կապող կամուրջ` նախատեսված շտապ օգնության և տեխնիկական սպասարկման մեքենաների համար: Ըստ նախնական տվյալների` «Ցիտադելը» կլողա 1.8 մետր ջրի մակարդակից բարձր, սակայն համալիրի ընդհանուր չափերը թույլ չեն տա բնակիչներին զգալ ջրի որևէ տատանում: Ի դեպ այս լողացող բնակարանները կօգտագործեն 25 տոկոսով ավելի քիչ էներգիա, քան իրենց ավանդական ցամաքային եղբայրները:
