Ինչպես տեղեկացնում է The Washington Post պարբերականը՝ հղում կատարելով Կապիտոլիումի ճարտարապետական բաժնի ղեկավար Սթիվեն Այերսին, շինարարներն ավարտել են Կապիտոլիումի գմբեթի փայտամածի մոնտաժումը և անցել են վերջինիս վերակառուցման աշխատանքներին: Փայտամածի տեղադրումը հնարավորություն կտա շինարարներին մաքրել և վերակառուցել գմբեթի բոլոր հատվածները: Կվերանորոգվի մոտ 325 մետր երկարությամբ ճաքած չուգունը, գմբեթի վրայից կհեռացվի նախորդ վերակառուցման ժամանակ քսված բազմաշերտ ներկը: Այնուհետև գմբեթը կպատվի նոր սպիտակ ներկով, որից կպահանջվի 4.6 հազար լիտր այն 3 շերտ ներկելու համար: ի դեպ, շինարարական աշխատանքները կիրականացվեն հիմնականում գիշերը և հանգստյան օրերին: Ներկայիս վերակառուցման բյուջեն գնահատվում է 60 մլն ԱՄՆ դոլար: Շինարարության ավարտը նախատեսված է 2017 թ-ին, ԱՄՆ հաջորդ նախագահի երդմնակալությանն ընդառաջ: Նշենք, որ Կապիտոլիումի նախորդ վերակառուցումը տեղի է ունեցել 1959-1960 թթ-ին, իսկ իրականացվող վերակառուցումը կծառայի 75-100 տարի: Կապիտոլիումի հիմքը դրվել է 1793 թ-ին ԱՄՆ առաջին նախագահ Ջորջ Վաշինգթոնի օրոք: Շինարարությունը վերջնականապես ավարտվել է Ավրաամ Լինկոլնի նախագահության օրոք 1863 թ-ին՝ երկրի հարավային և հյուսիսային նահանգների միջև ընթացող քաղաքացիական պատերազմի ընթացքում:
Ամերիկացի միլիարդատեր Դոնալդ Թրամփը հանրությանն է ներկայացրել Վաշինգտոնի նախկին փոստի պատմական շենքի (Old Post Office Pavilion)` էլիտար հյուրանոցի ձևափոխման նախագիծը: Ինչպես տեղեկացնում է USD Today պարբերականը, նախագծի ներկայացման ժամանակ գործարարը խոստացել է կառուցել քաղաքի լավագույն հյուրանոցը: Նախագծի իրականացման համար «Թրամփ Կազմակերպությունը» (Trump Organization) մտադիր է ներդնել մոտ 200 մլն ԱՄՆ դոլար: Ընդհանուր առմամբ հյուրանոցում կլինեն 56 քառակուսի մետր մակերեսով 270 համարներ: Սակայն հյուրանոցի զարդը կհամարվեն 280 քառակուսի մետր մակերեսով 2 նախագահական սենյակներ, որոնք կունենան բուխարի, սաունա, անձնական վերելակ և զրահապատ պատուհաններ: Բացի վերոնշյալը հյուրանոցում կլինի հանդիսությունների սրահ 1200 քառակուսի մետր մակերեսով, 9 հարկանի ատրիում շատրվաններով, գրադարան, ռեստորաններ և խանութներ: Հյուրանոցի ներքին հարդարումը կլինի շքեղ, կահույքները պատրաստված թանկարժեք փայտերից: Վերաձևափոխման նախագծի սկիզբը նախատեսված է 2014 թ-ի գարնանը, իսկ ավարտը՝ 2015 թ-ի վերջին: Նախագծի իրականացմանը ակտիվ մասնակցում է Թրամփի աղջիկը՝ Իվանկան: Վաշինգտոնի փոստի պատմական շենքը կառուցվել է 1899 թ-ին և գտնվում է Սպիտակ տան և Կապիտոլիի միջնամասում: Համալիրը մի քանի անգամ փորձել են ապամոնտաժել, իսկ ներկա պահին այնտեղ գործում են միայն մի քանի խանութներ և արագ սննդի կետեր: Ընթացիկ տարվա հունիսին Թրամփը ԱՄՆ կառավարությունից 60 տարի ժամկետով վարձակալել է շենքը՝ 250 հազար ԱՄՆ դոլար ամսեկան վճարով: Համաձայնագրում հնարավորություն է տրված 2 անգամ 20 տարով երկարաձգել վարձակալությունը:
Էներգիան խնայելու նպատակով Վաշինգտոնի համալսարանի Մոլեկուլային ճարտարագիտության և գիտության մասնաճյուղի շենքի պատերն օդի տաք ջերմաստիճանի դեպքում սկսում են «հալվել», հաղորդում է The Tecca կայքը: Շենքի արտաքին կառուցվածքն, անշուշտ, կարծր է, բայց էներգիա խնայելու նպատակով գիտնականները ստեղծել են հատուկ մի գել, որը նրանք լցրել են շենքի արտաքին պատերի՝ ապակիների մեջ: Երբ դրսում ջերմաստիճանը բարձրանում է, պատերի մեջ եղած գելը սկսում է հալվել՝ ապահովելով զովություն շենքի ներսում: Գելի աշխատանքի յուրահատկությունն այն է, որ այն օգտագործում է թերմոդինամիկայի հիմնական սկզբունքը՝ նյութը պինդ վիճակից հեղուկի անցնելու ժամանակ և ընդհակառակը, կլանում է էներգիան` առանց ջերմաստիճանի փոփոխման: Օրվա ընթացքում, երբ դրսում ջերմաստիճանը բարձր է, գելը հալվում է` վերցնելով էներգիան: Գիշերվա ընթացքում գելը նորից անցնում է պինդ վիճակի՝ ցուրտ ջերմաստիճանի պատճառով, որպեսզի հաջորդ օրվա ընթացքում պատերը կարողանան էներգիա կլանել: Այս կերպ կարիք չի լինում օդորակիչներ օգտագործել և նվազում են շենքի էներգետիկ ծախսերը: Սա զովացնող նոր տեխնոլոգիաներից միայն մեկն է, որ ստեղծվել է գիտնականների կողմից: Եվ չնայած, որ այն լայն գործածություն չունի, գիտնականները կարծում են, որ մեկ տասնամյակ հետո նման տեխնոլոգիաները լայն տարածում կստանան շինարարության ոլորտում:
