Ինչպես տեղեկացնում է Բրիտանական Ճարտարապետների Թագավորական Ինստիտուտի (Royal Institute of British Architects) պաշտոնական կայքը, երկրորդ տարին անընդմեջ Մեծ Բրիտանիայի ամենահեղինակավոր ճարտարապետական՝ «Ստիրլինգյան» մրցանակին (RIBA Stirling Prize 2011) արժանացել է ճարտարապետ Զահա Հադիդի բյուրոյի կողմից նախագծված «Էվելին Գրեյսի Ակադեմիան» (Evelyn Grace Academy), որը ճանաչվել է լավագույնը և արժանացել 31 հազար ԱՄՆ դոլար մրցանակի: Նշենք, որ 1 տարի առաջ Զահա Հադիդի մեկ այլ ստեղծագործություն՝ 21-րդ դարի ժամանակակից արվեստի Հռոմի MAXXI թանգարանը (MAXXI Museum of 21st Century Art) ևս արժանացել էր այս մրցանակին՝ ճանաչվելով 2010 տարվա լավագույն շինություն: Մրցանակաբաշխության հանդիսավոր արարողությունը տեղի է ունեցել հոկտեմբերի 1-ին Ռոտերեմ (Rotherham) քաղաքի «Մագնա» գիտական կենտրոնում (Magna Science Adventure Centre): Պետք է նշել, որ այս կառույցը Զահա Հադիդի ճարտարապետական բյուրոյի կողմից նախագծված առաջին դպրոցն է: Բյուրոյի նախագծերից Մեծ Բրիտանիայում հայտնի են «Մեգիի Կենտրոնը» (Maggie's Centre) Շոտլանդիայում, «Ռիվերսայդ» թանգարանը (Riverside) Գլազգոյում և «Ջրային մարզաձևերի համալիրը» (Aquatics Centre) Լոնդոնում: 58 մլն ԱՄն դոլար բյուջե ունեցող նախագիծը շահագործման է հանձնվել 2010 թ-ին: 10.745 ընդհանուր մակերեսով ակադեմիայի շենքում միավորված են 4 դպրոց: Ճարտարապետներին հաջողվել է համալիրն այնպես նախագծել, որ 4 դպրոցները միաժամանակ կարողանան հանդես գալ ինչպես մեկ ամբողջություն, այնպես էլ որպես առաձին ինքնուրույն կառույցներ: Նշենք, որ արդեն 16-րդ տարին անընդմեջ տարվա լավագույն ճարտարապետական նախագծի համար հեղինակները ստանում են «Ստիրլինգյան» մրցանակը: Ինչպես արդեն նշեցինք, նախորդ տարի ևս հաղթող էր ճանաչվել Զահա Հադիդը՝ Հռոմի «Մաքսի» թանգարանով: Մինչ օրս նա ևս 3 անգամ ներկայացված է եղել մրցույթում՝ «BMW-ի կենտրոնական շենքը» Լայպցիգում, Գերմանիա, 2005 թ-ին, «Ֆաենո» (Phaeno) գիտական կենտրոնը Վոլֆսբուրգում, Գերմանիա, 2006 թ-ին և «Նորդ Փարք» (Nord Park) երկաթգիծը Ինսբուրգում, Ավստրիա, 2008 թ-ին:
Աշխարհի ճարտարապետական փառատոն-մրցանակաբաշխության՝ World Architecture Festival (WAF) Awards մրցանակին հավակնող նախագծերի վերջնական ցանկն արդեն հայտնի է: Ինչպես տեղեկացնում է architectsjournal.co.uk կայքը, այս տարի ներկայացվել է մոտ 704 նախագծերի դիմում-հայտ աշխարհի ավելի քան 59 երկրներից: Վերջնական փուլ անցել են 284 նախագիծ, որոնցից հաղթողը հայտնի կդառնա նոյեմբերի 2-ից 4-ը Բարսելոնայում կայանալիք մրցանակաբաշխության հանդիսավոր արարողության ժամանակ: Նշենք, որ եզրափակիչ փուլ անցած նախագծերի շարքում են ծղոտե թատրոնի շենքը Էստոնիայում, ֆուտբոլի դպրոցը Սոուէտոյում (ՀԱՀ), ծառ-հյուրանոցը Շվեդիայում, բամբուկե գրասենյակը Հնդկաստանում և շարժական պատկերասրահը Նյու-Յորքում: Ռուսաստանից մրցույթին կմասնակցի Սերգեյ Չոբանի և Սերգեյ Կուզնեցովի (Speech) «Гранатный, 6» համալիրի նախագիծը: Ճարտարապետական փառատոն-մրցանակաբաշխությունն արդեն 4-րդ անգամ տեղի կունենա Բարսելոնայում: Միջազգային մրցույթի ժյուրիի կազմը կգլխավորի «Մայքլ Սորկին Ստուդիո Նյու Յորք» բյուրոյի ղեկավար Մայքլ Սորկինը: Ժյուրիի կազմում են նաև «ՅուԷնՍտուդիո» (UNStudio) ընկերության հիմնադիր Բեն Վան Բերքելը, «Նեորո Վոլֆ Արքիթեքթս» (Noero Wolff Architects) ընկերության տնօրեն Ջո Նոերոն և «Տուրենսքեյփ» (Turenscape) ընկերության տնօրեն Յու Կոնջանը: Նշենք, որ փառատոնի ժամանակ կհայտարարվի «Համաշխարհային շինություն 2011» անվանակարգի հաղթողի անունը:
Բարսելոնան՝ աշխարհի ամենագեղեցիկ քաղաքներից մեկը, ուր բնակվել և ստեղծագործել է աշխարհահռչակ կատալոնացի Գաուդին, համալրվեց ևս մեկ մասնագիտորեն ճանաչված ճարտարապետական գլուխգործոցով: Emporis Skyscraper Award 2010 հեղինակավոր ճարտարապետական մրցանակին արժանացել է Porta Fira (Պորտա Ֆիրա) հյուրանոցի շենքը, որը «b720 Arquitectos» և ճապոնական Toyo Ito & Associates ճարտարապետական ընկերությունների համատեղ ստեղծագործությունն է: Երկրորդ մրցանակին արժանացավ աշխարհի ամենաբարձր շենքը՝ Դուբայի Բուրջ Խալիֆան, իսկ երրորդ պատվավոր տեղը զբաղեցրեց Ֆրանսիայի հարավում՝ Մարսելում գտնվող Tour CMA CGM աշտարակը: Ժյուրին, որը բաղկացած է աշխարհի առաջատար փորձագետներից, գնահատել է բարսելոնյան երկնաքերի գեղագիտական նրբությունը և ներդաշնակությունը քաղաքային միջավայրին: Ամեն տարի այս մրցույթին մասնակցում են ավելի քան 100 մետր բարձրություն ունեցող շենքերը, իսկ մրցանակին արժանանում են ամենալավ դիզայնով և օգտագործման հարմարավետությամբ կառույցները: 26 հարկանի այս հինգ աստղանի հյուրանոցը 113 մետր բարձրություն ունի և պատված է կարմիր ուղղահայաց ալյումինե խողովակներով: Վերին հատվածում այս գլանաձև շենքը լայնանում է և զարմանալիորեն ներդաշնակվում է շրջակա քաղաքային միջավայրին: Նշենք, որ մեկ այլ մրցանակաբաշխության արդյունքներով, որն անցկացրել էր Բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH), 2010 թվականի ամենալավ երկնաքերն է համարվել Լիդսի 70 մետրանոց Broadcasting Place «ժանգոտ» երկնաքերը, իսկ Դուբայի Բուրջ Խալիֆան արժանացել է մեկ այլ՝ CTBUH- 2010 Global Icon Award մրցանակի:
Բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH) ամեն տարի անցկացնում է աշխարհի «Լավագույն բարձրահարկ շենք» մրցույթը: Նախապես ընտրվում են 4 աշխարհագրական տարածաշրջաններից լավագույնները, իսկ հետագայում նրանցից ամենալավը արժանանում է տարվա լավագույնի տիտղոսին: Այս տարվա աշխարհի «լավագույն բարձրահարկ շինություն» անվանակարգի հաղթողի անունը կհայտարարվի հոկտեմբերի 27-ին Չիկագոյում կայանալիք հանդիսավոր արարողության ժամանակ, իսկ այժմ հայտնի են դարձել տարածաշրջանային 4 հաղթողները, որոնք էլ հավակնում են տարվա «լավագույն բարձրահարկ շենք» տիտղոսին: Այս մասին հաղորդում է խորհրդի պաշտոնական կայք ctbuh.org-ը: Ինչպես ներկայացված է խորհրդի պաշտոնական կայքում, տարվա «լավագույն բարձրահարկ շինություն» տիտղոսի հավակնորդներն են, իրենց տարածաշրջաններում արդեն լավագույնը ճանաչված Նյու Յորք բայ Գեհրի (New-York by Gehry) երկնաքերը Հյուսիսային և Հարավային Ամերիկա տարածաշրջանից, Ինդեքս (The Index) աշտարակը Մերձավոր Արևելք և Աֆրիկա տարածաշրջանից, Ասիա և Ավստրալիա տարածաշրջանից Գուանչժոուի Միջազգային ֆինանսական կենտրոնը (Guangzhou International Finance Center) և Եվրոպայից KFW Վեսթարկադե (KFW Westarkade) աշտարակը: Նյու Յորք բայ Գեհրի երկնաքերի պատվիրատուն Ֆորեսթ Սիթի Ռաթներ (Forest City Ratner) ընկերությունն է, որը կառույցի շինարարությունն ավարտել է 2011 թ-ի ապրիլին: 76 հարկանի բնակելի աշտարակի ճարտարապետն է Ֆրենկ Գեհրին Նյու Յորքյան Գեհրի Արքիթեքթս (Gehry Architects New York) ընկերությունից: 102 հազար քառակուսի մետր ընդհանուր մակերեսով աշտարակի բարձրությունը 265 մետր է, իսկ նախագիծն իրականություն դարձնելու համար պատվիրատուն ծախսել է ավելի քան 174 մլն ԱՄՆ դոլար: Գուանչժոու քաղաքում է գտնվում Ասիա և Ավստրալիա տարածաշրջանի հաղթող Գուանչժոուի Միջազգային ֆինասական կենտրոնը: 103 հարկանի, 440 մետր բարձրությամբ երկնաքերը աշխարհի ամենաբարձր աշտարակների ցուցակում զբաղեցնում է 9-րդ հորիզոնականը: Նախագծի գլխավոր պատվիրատուն Յու Քսյու Գրուփն է (Yue Xiu Group), իսկ գլխավոր ճարտարապետը Քրիս Ուիլկինսոնի Ուիլկինսոն Եյր Արքիթեքս (Wilkinson Eyre Architects) ընկերությունը: 2010 թ-ին շահագործման հանձնված՝ 250 հազար քառակուսի մետր ընդհանուր մակերեսով շինության ընդհանուր բյուջեն կազմել է 410 մլն ԱՄՆ դոլար: Շինարարության գլխավոր կապալառուի դերը ստանձնել են 2 ընկերություններ՝ Չինաստանի պետական ճարտարագիտա-շինարարական կորպորացիա ՍՊԸ (China State Construction Engineering Corporation LTD) և Գուանժուի քաղաքաշինական գրուփ ՍՊԸ (Guanzhou Municipal Construction Group CO LTD) ընկերությունները: Եվրոպական տարածաշրջանի հաղթողի տիտղոսը ստանձնել է 2010թ-ին շահագործման հանձնված KFW Վեսթարկադե աշտարակը Ֆրանֆուրտում: 14 հարկանի աշտարակի գլխավոր պատվիրատուն է KFW Բանքենգրուփփե (KFW Bankengruppe) ընկերությունը: 56 մետր բարձրությամբ աշտարակի նախագիծն իրականացրել է Զաուերբրուխ Խաթթոն (Sauerbruch Hutton) ճարտարապետական ընկերությունը: Մերձավոր Արևելք և Աֆրիկա տարածաշրջանի հաղթող, 326 մետր բարձրությամբ Ինդեքս երկնաքերը շահագործման է հանձնվել 2011 թ-ի մարտին Դուբայում: 80 հարկանի աշտարակի գլխավոր կապալառուի դերը ստանձնել է Բրուքֆիլդ Մուլթիփլեքս (Brookfield Multiplex) ընկերությունը, իսկ ճարտարապետական նախագիծն իրականացրել է Ֆոսթեր+Գործընկերներ (Foster+Partners) ընկերությունը: 170 քառակուսի մետր ընդհանուր մակերեսով շինության պատվիրատուն է Յունիոն Փրոփերթիս (Union Properties) ընկերությունը: Այս հղումով դուք կարող եք կարդալ նախորդ տարվա «Լավագույն բարձրահարկ շենք 2010» մրցույթի արդյունքների մասին:
Բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH) ամեն տարի անցկացնում է աշխարհի «Լավագույն բարձրահարկ շենք» մրցույթը: Նախապես ընտրվում են 4 աշխարհագրական տարածաշրջաններից լավագույնները, իսկ հետագայում նրանցից ամենալավը արժանանում է տարվա լավագույնի տիտղոսին: Այսպես, 2010 –ի արդյունքներով՝ Ամերիկայից լավագույնն է ընտրվել Նյու Յորքի «Բանկ օֆ Ամերիկա» երկնաքերը, (Bank of America Tower), Ասիական-Խաղաղօվկիանոսյան տարածաշրջանից՝ The Pinnacle@Duxton բնակելի համալիրը, Սինգապուր, Միջին Արևելքից և Աֆրիկայից՝ Դուբայի Բուրջ Խալիֆան (Burj Khalifa), իսկ Եվրոպայից՝ Լիդսում գտնվող «Broadcasting Place» համալսարանական համալիրը: Այս չորս ֆինալիստների մրցույթում «2010-ի լավագույն բարձրահարկ շենքի» պատվավոր տիտղոսին արժանացավ Լիդսի 70 մետրանոց «ժանգոտ երկնաքերը», որն իր այս ոչ պաշտոնական անունն է ստացել արտաքին ժանգոտ տեսքի պատճառով: Բայց, իհարկե, ատաքին տեսքի համար չե, որ այս շենքը արժանացել է ամենաբարձր գնահատականի: Մրցանակաբաշխման հանձնաժողովը, որը բաղկացած է ոլորտի առաջատար մասնագետներից, հաշվի է առնում գերազանցության բոլոր հատկանիշները՝ ճարտարապետական արտաքինը, կառուցվածքը, շինարարության իրականացման ձևերը, կյանքի համար անվտանգությունը, ազդեցությունը արտաքին միջավայրի վրա, ինժեներական լուծումներով կոմունալ ծախսերի նվազեցումը և շատ այլ պարագաներ: Այս «Ժանգոտ» շենքում գերազանց լուծումներ են տրվել լուսավորության օպտիմալ օգտագործմանը, բնական օդափոխությանը և երկրի ընդերքի ջերմության օգտագօրծմանը: Այս մրցույթը CTBUH-ն անցկացնում է 2007 թվականից, իսկ անցյալ տարվա մրցանակառուն Պեկինի Linked Hybrid բնակելի համալիրն էր: 220 000 քռ.մ տարածքով այս համալիրը, որը մաքսիմալ ուղղված է հետիոտների պահանջները բավարարելուն, իր բաց և հյուրընկալ ճակատներով հանդիսանում է քաղաքային հնարավոր զարգացման մի հիանալի օրինակ: Մի այլ CTBUH-ի պատվավոր ՝ 2010 Global Icon Award մրցանակի արժանացավ Դուբայի Բուրջ Խալիֆան (Burj Khalifa): Այս երկնաքերի աննախադեպ բարձրությունը (828մ), պահանջեց նախագծման և շինարարության իրականացման լրիվ նոր մոտեցումներ, իսկ «Y»-նման հատակագիծը թույլ տվեց մաքսիմալ օգտագործել բնական լուսավորությունը շենքի բնակիչների համար:
