Խարդախության զոհ դարձած մի խումբ երևանցիներ օրեր առաջ բնակարանամուտ են տոնել: Սեպտեմբերի 10-ին տեղի է ունեցել մայրաքաղաքի Ծիծեռնակաբերդի 1/2 հասցեում կառուցված բազմաբնակարան բազմաֆունկցիոնալ շենքի շահագործման հանդիսավոր արարողությունը: ՀՀ Նախագահ Սերժ Սարգսյանի հանձնարարությամբ ստեղծված միջգերատեսչական հատուկ հանձնաժողովի առաջարկությունների հիման վրա, ՀՀ կառավարության 04.04.2013թ. 342-Ա որոշման շրջանակում, նորկառույց շենքում բնակարաններ են հատկացվել նաև Երևան քաղաքի Արամի 72-80 հասցեներում մասնավոր կառուցապատողի ձախողած կառուցապատման ծրագրից տուժած ընտանիքներին: Շենքի բացման պատիվը վերապահվել է Երևանի քաղաքապետ Տ. Մարգարյանին և «Դի Ընդ Էյջ Գրուպ»-ի տնօրեն Վահե Պետրոսյանին: Երևանի քաղաքապետարանից տեղեկացնում են, որ դեռևս 2011թ-ի դեկտեմբերին ՀՀ գլխավոր դատախազության պետական շահերի պաշտպանության վարչության կողմից քրեական գործ էր հարուցվել Արամի 72-80 հասցեներում կառուցվող շենքից բնակարաններ վաճառելու պատրվակով 2005-2011 թվականների ընթացքում բազմաթիվ քաղաքացիների վստահությունը չարաշահելով խարդախությամբ մեծ գումարների հափշտակման կապակցությամբ: Ըստ այդմ` Արամի 72-80 հասցեներում առկա մոտ 21 հազար քառակուսի մետր մակերեսի դիմաց, 2005-2011 թվականների ընթացքում տվյալ շենքի կառուցապատող հանդիսացող «Գապբնակշին» ՍՊԸ-ն վաճառել էր 53 հազար քառակուսի մետր, ընդ որում, քրեական գործի հարուցման պահին տվյալ շենքն անավարտ էր ու շահագործման ոչ ենթակա: Այս ամենին զուգահեռ, «Գապբնակշին» ՍՊԸ-ի պատասխանատուները արհեստականորեն Արամի փողոցի տվյալ շենք էին տեղափոխել նաև իրենց կողմից կիսավարտ կամ դեռևս շինարարությունը չսկսված այլ շենքերի գնորդների և իրացվող տարածքների սեփականատերերի: Արամի 72-80 հասցեներում մեկ բնակարանը վաճառվել էր ընդհուպ 8 գնորդի և, ըստ էության, 476 ընտանիք դարձել էր խաբեբաների զոհ, և մարդիկ կանգնած էին վճարած գումարները կորցնելու շեմին: Մասնավոր կառուցապատողի կողմից խաբեության զոհ դարձած քաղաքացիները ստիպված դիմել էին հանրապետության նախագահին՝ խնդրի լուծման գործում ակնկալելով որոշակի աջակցություն, ինչի արդյունքում հանրապետության ղեկավարի հանձնարարությամբ, կառավարությունը 2012թ մարտին ստեղծեց միջգերատեսչական հատուկ հանձնաժողով՝ այդ քաղաքացիների կորուստների վերականգնման միջոցառումներ մշակելու համար: Հաշվի առնելով, որ խոսքը 476 ընտանիքների մասին էր, ակնհայտ էր, որ անհրաժեշտ էր գտնել ոչ ստանդարտ ու աննախադեպ լուծումներ: Բանակցությունների և քննարկումների արդյունքում ոչ այնքան դյուրին այդ լուծումը գտնվեց, կառուցապատման ընթացքում տուժած քաղաքացիների մի մասին բնակարանով ապահովեցին այստեղ՝ Ծիծեռնակաբերդի 1/2 հասցեի այս շենքում, մյուս մասին էլ՝ Արամի փողոցի բազմաբնակարան շենքում: Այսպիսով կարող ենք արձանագրել, որ տուժած 476 ընտանիքների կողմից բարձրացված խնդիրը վերջնականապես լուծված է: Նշենք նաև, որ շուրջ 65 հազար քառակուսի մետր ընդհանուր մակերեսով բազմաբնակարան համալիրի հարակից տարածքն ամբողջությամբ բարեկարգվել է, կառուցվել են նոր հաղորդուղիներ, իրականացվել են բարեկարգման ու կանաչապատման աշխատանքներ: Շենքի բակային տարածքում տեղադրվել են նաև նստարաններ, աղբամաններ, զրուցարաններ, իսկ փոքրիկների համար էլ՝ մանկական հրապարակ: Այսպիսով 476 ընտանիքի խնդիր ամբողջությամբ կարգավորված է, սակայն կան դեռևս հասցեներ, որոնց բնակիչները դեռ շարունակում են պայքարել, հուսալով` որ մի օր էլ իրենց բնակարանի հարցը կլուծվի: Խոսքը վերաբերում է Բուզանդի փողոցի և Կոնդ թաղամասի բնակիչներին, ովքեր տարիներ շարունակ պայքարում են իրենց օտարված հողի դիմաց փոխհատուցում ստանալու համար: 2007 թվականի մարտի 1-ին, Կառավարության որոշմամբ, Կոնդ թաղամասը ճանաչվեց իրացման գոտի: Նույն տարվա դեկտեմբերին «Դաուն Թաուն Երևան» փակ բաժնետիրական ընկերությանը տրվեց իրավասություն` բնակիչների տները քանդելու և նրանց նոր բնակարաններով կամ գումարով ապահովելու: Գնելով տարածքը, ընկերությունը պետք է նախանշված 4 տարվա ընթացքում կառուցապատում իրականացներ: Ընդհանուր առմամբ, շուրջ 300 ընտանիք պայմանագիր կնքեց: Ըստ ընտանիքների կողմից կնքված պայմանագրերի` 2012 թվականին բնակիչներին պետք է հանձնվեին պատրաստի բնակարանները: Սակայն հունվար ամսին պարզվեց, որ ընկերությունը լուծարված է, թեև այդ մասին փաստաթղթային որևէ վկայություն չկա: Նշենք, որ բազմաբնակարան շենքի բացման արարողության ժամանակ քաղաքապետ Տարոն Մարգարյանը նշել է, որ քայլեր են ձեռնարկվում Բուզանդի փողոցի և Կոնդ թաղամասի խաբված բնակիչների խնդիրների լուծման ուղղությամբ: Հանձնաժողովը քննարկում է` ինչ մոդել կիրառել և ինչպես նոր ներդրողներ գտնել խնդիրը լուծելու համար:
Վերջերս ողբերգական մահացած հոլիվուդյան աստղ Ռոբին Ուիլիամսին պատկանող «Վիլլա Սորրիսո» (Villa Sorriso) առանձնատունը Կալիֆորնիայում, որը վաճառքի էր հանվել այս տարվա ապրիլին 30 մլն ԱՄՆ դոլարով դեռևս չի գտել իր գնորդին, հաղորդում է Daily Mail պարբերականը: Ինչպես նշում է հոդվածագիրը, դերասանը փորձել է վաճառել առանձնատունը դեռևս 2012 թ-ին շուկա հանելով 35 մլն ԱՄՆ դոլարով, սակայն չի կարողացել գնորդ գնել: Ապա առանձնատունը կրկին վաճառքի է հանվել 2014 թ-ի ապրիլին արդեն փոքր ինչ պակաս գնով` 29.9 մլն ԱՄՆ դոլարով: Երկրորդ անգամ առանձնատունը վաճառքի հանելու ժամանակ դերասանը հայտարարել է, որ այլևս չի կարող իրեն թույլ տալ պահել ավերվող առանձնատուն Կալիֆորնիայի գինեգործական կենտրոնում: «Վիլլա Սորրիսո» առանձնատան կամ ինչպես հաճախ այն անվանում են «Ժպիտների առանձնատուն» և տնամերձ հողատարածքի մակերեսը կազմում է 2.6 մլն քառակուսի մետր: 1800 մ² տան տարածքում տեղակայված են 5 ննջասենյակ, 6 ամբողջովին կահավորված լոգարան, գրադարան, թատրոն, վերելակ, դիտաաշտարակ և պատկերասրահ: Առանձնատան բակում է գտնվում բնական լճակ, ինչպես նաև Կաբերնե Սովինիոն տեսակի խաղողի հսկայական այգի:
Լոնդոնի ամենահայտնի երկնաքերը, որը համարվում է նաև բրիտանական մայրաքաղաքի գլխավոր տեսարժան վայրերից մեկը, վաճառքի է հանվել: Ինչպես գրում է The Guardian պարբերականը, «Վարունգ» (Gherkin) պայմանական անվանումը ստացած երկնաքերը վաճառքի է հանվել նախնական 1-1.1 մլրդ ԱՄՆ դոլարով: Պարբերականի տարածած տվյալներով, մի քանի ընկերություններ արդեն հետաքրքրված են երկնաքերի ձեռքբերմամբ: Առուվաճառքի պայմանագիրը նախատեսվում է ձևակերպել կամ սեպտեմբերի վերջին, կամ հոկտեմբերի սկզբին: 180 մետր բարձրությամբ և 40 հարկանի երկնաքերը կառուցվել է 2004 թ-ին բրիտանացի ճարտարապետ Նորման Ֆոսթերի նախագծով: Մինչև 2007 թ-ը շինության սեփականատեր է եղել «Սվիսս Ռե» (Swiss Re) ընկերությունը և երկնաքերը ստացավ Swiss Re Tower անվանումը, իսկ դրանից հետո շենքը 1 մլրդ ԱՄՆ դոլարով գնել են գերմանական անշարժ գույքի «ԱյՎիՋի Իմմոբիլիեն» (IVG Immobilien) գործակալությունը և բրիտանական ներդրումային բանկը (Mayfair-based investment bank) համատեղ օգտագործման նպատակով: Այնուհետև 2013 թ-ին «ԱյՎիՋի Իմմոբիլիեն» գործակալությունը հայտարարել է իր անվճարունակության մասին: 2014 թ-ի ապրիլին երկնաքերը տրվել է արտաքին կառավարման՝ հետագայում վաճառելու նպատակով, իսկ շենքի կառավարիչ նշանակվել է «Դելոիթթ» (Deloitte) ընկերությունը: Կարդալ ավելին Gherkin երկնաքերի մասին:
Հունաստանի իշխանությունները մտադիր չեն համակերպվել հարկային ոլորտում գոյացած պարտքերի հետ, տեղակացնում է BalkanEU կայքը: Այդ իսկ պատճառով երկրի հարկային ծառայությունը որոշել է մոտ ապագայում էլեկտրոնային աճուրդով վաճառել պարտատերերի առանձնատները: Ինչպես երևում է հարկեր չվճարողների հետ կապված իրավիճակը անմխիթար է: Հունաստանում հաշվարկվել է պարտատերերի 1500 առանձնատներ, որոնք գտնվում են երկրի զբոսաշրջային գոտիներում, մասնավորապես` Սանտորինի, Պորտո, Կոս, Ռոդոս, Միկոնոս, Պարոս, Հելի և այլն: Էլեկտրոնային աճուրդի միջոցով անշարժ գույքի վաճառքը ծայրահեղ քայլ է, որի ժամանակը եկել է: Պարտատերերին ներկայացվել են բոլոր հնարավոր առաջարկները և պատժամիջոցները, սակայն ապարդյուն: Իսկ այդ նույն ժամանակում պետական գանձապետարանը հսկայական վնասներ է կրում: Երկրի ֆինանսների նախարարության ներկայացուցիչը, ով պետք է կազմակերպի էլեկտրոնային առևտուրը բացատրել է, որ այս ամբողջ անշարժ գույքի սեփականատերերը իրենց ողջ բանկային հաշիվները երկրից հանել են, իսկ անշարժ գույքը թողել են երկրում: Աճուրդի ժամանակ կներկայացվեն միայն էլիտար առանձնատներ: Երկրի իշխանությունները վստահ են, որ առևտրի նման մեթոդը բավականին ուշագրավ կլինի: Այս մեթոդն անպայման կգտնի իր լսարանը, քանի որ աշխարհում հարուստ գնորդները բազմաթիվ են, իսկ գործարքը կիրականցվի ստեղնաշարի մեկ սեղմումով: Ի դեպ, Հունաստանը ենթադրում է, որ անշարժ գույքի հիմնական գնորդները կլինեն գործարարներ Եվրոպայից, Ռուսաստանից, Չինաստանից, ինչպես նաև արաբական պետություններից: Այսպիսի աճուրդի առավելությունները բազմաթիվ են, սակայն սոցիալական ամենամեծ առավելությունն այն է, որ բավականին մեծ եկամուտներ ունեցող քաղաքացիները կարող են գնում կատարել և հաշվետու չլինել իրենց երկրի առաջ: Բացի այդ բավականին թանկ առանձնատների վաճառքից գոյացած գումարը հնարավորություն կտա նվազեցնել երկրի պետական գանձապետարանի բյուջեում առաջացած ճեղքը:
Մայորկայում վաճառքի են հանել «Քասթիլլո Մայորկա» (Castillo Mallorca) առանձնատունը, որտեղ սիրել է հանգստանալ արքայադուստր Դիանան: Առանձնատունը գնահատվում է 52 մլն ԱՄՆ դոլար: The Local պարբերականի փոխանցմամբ, ներկայում այն կղզու ամենաթանկ անշարժ գույքն է: Չնայած բարձր գնին, «Իգլ և Վոլքերս» (Engel und Voelkers) անշարժ գույքի գործակալության վաճառքի գործակալները չեն կասկածում ապագա գործարքի հաջողությանը: «Քասթիլլո Մայորկա» առանձնատան ընդհանուր մակերեսը 1400 քառակուսի մետր է: Այն տեղակայված է Պալմա դե Մայորկայից 20 րոպե հեռավորության վրա գտնվող մասնավոր թերակղզում: Երկհարկանի առանձնատանը տեղակայված են «լեդի Դիանայի սենյակը», բիլիարդի սրահը, մարզասրահը և շոգեբաղնիքը: Առանձնատան բակում, որի մակերեսը կազմում է 6000 քառակուսի մետր, կան նաև հյուրերի համար նախատեսված տնակներ, շքեղ այգիներ, լողավազան, զբոսանավի նավամատույց եւ նույնիսկ սեփական քարանձավ: Առանձնատան գնորդը կդառնա ոչ միայն պատմական մեծ արժեքի, այլև իսկապես շքեղ առանձնատան սեփականատերը: Արդեն հետաքրքրություն են ցուցաբերել գնորդներ Իսպանիայից, Չինաստանից եւ Շվեյցարիայից:
