Պարսից Ծոցի տարածաշրջանում գտնվող երկրների շինարարական նախագծերի 43 տոկոսը սառեցված է համաշխարհային տնտեսական ճգնաժամի հետևանքով, տեղեկացնում է The National ինտերնետային կայքը: BNC ինտերնետային կայքի կատարած ուսումնասիրության համաձայն՝ տարածաշրջանում իրականացվող շինարարական նախագծերի ընդհանուր ծավալը կազմում է 1.68 տրլն ԱՄՆ դոլար, որոնցից սառեցված են ընդհանուր 735 մլրդ ԱՄՆ դոլար արժողությամբ նախագծեր: Բացի վերոնշյալից դեռ կան նաև նախագծեր, որոնք գտնվում են տենդերային, նախագծման և նախնական պլանավորման փուլերում: Այսպես՝ տենդերային փուլում են գտնվում 81մլրդ ԱՄՆ դոլար, նախագծման փուլում՝ 124,6 մլրդ ԱՄՆ դոլար, իսկ նախնական պլանավորման փուլում 264 մլրդ ԱՄՆ դոլար արժողությամբ նախագծեր: Ներկայացված ուսումնասիրության համաձայն՝ տարածաշրջանի խոշորագույն շինարարական շուկայում՝ Արաբական Միացյալ Էմիրություններում, իրականացվող նախագծերի ընդհանուր ծավալը կազմում է 681 մլրդ ԱՄՆ դոլար, որոնցից 62 տոկոսը, կամ 422 մլրդ ԱՄՆ դոլար արժողությամբ նախագծերը սառեցված են: Երկրորդ տեղը զբաղեցնող Սաուդյան Արաբիայում սառեցված են շինարարական նախագծերի 22.4 տոկոսը, որոնց ընդհանուր ծավալը կազմում է 103,2 մլրդ ԱՄՆ դոլար: Երրորդ տեղում է գտնվում Քուվեյթը, իսկ նրան հաջորդում է 2022 թ-ի Ֆուտբոլի աշխարհի առաջնության անցկացման իրավունքը շահած Քաթարը: Քաթարում շինարարական շուկայի ընդհանուր ծավալը կազմում է 170,2 մլրդ ԱՄՆ դոլար, որից սառեցված են 68, 6 մլրդ ԱՄՆ դոլար ընդհանուր արժողությամբ նախագծեր: Սակայն, չնայած տնտեսական աճի անկմանը, ֆինանսական ճգնաժամին և տարածաշրջանում սառեցված շինարարական նախագծերի հսկայական ծավալին, Մերձավոր Արևելքը համարվում է աշխարհի խոշորագույն շինարարական շուկաներից մեկը՝ զիջելով միայն Չինաստանին, նշվում է ուսումնասիրության մեջ: Բացի այդ, EC Harris ընկերության կատարած մեկ այլ ուսումնասիրության համաձայն՝ Մերձավոր Արևելքի երկրներն այսօր առևտրային համալիրներ կառուցելու համար լավագույն երկրների ցուցակում են: Վերոնշյալ ուսումնասիրության համաձայն՝ Սաուդյան Արաբիան, Քաթարը և Արաբական Միացյալ Էմիրությունները համապատասխանաբար զբաղեցնում են 8-րդ, 11-րդ և 15-րդ հորիզոնականները ներառված 40 երկրների ցուցակում: Իսկ Jones Lang LaSalle ընկերության կատարած ուսումնասիրությամբ՝ վերջին երկու տարիների ընթացքում Աբու Դաբիում 41 տոկոսով ավելացել է առևտրային կենտրոնների շինարարությունը:
Արաբական Միացյալ Էմիրությունների կառավարությունը հայտարարել է իր նպատակների մասին՝ կառուցել աշխարհի խոշորագույն դարպասները մայրաքաղաք Աբու Դաբիում: Այս երկիրը չի ցանկանում ետ մնալ նախկինում գրանցված ռեկորդներից և ուզում է այս տիտղոսն էլ կրել: Դուբայում են գտնվում աշխարհի ամենաբարձր շենքը՝«Բուրջ Խալիֆան» և աշխարհի ամենաբարձր բնակելի աշտարակը՝ «Փրինցես Թաուերը»: «Խալիֆան աշխարհի լեզուներով» (Khalifa in World Languages) անվանումը կրող նախագիծն իրականացնում է Սուլթան բեն Զաիդի անունը կրող մշակութային և լրատվական կենտրոնը: Նշենք, որ շինարարական աշխատանքները սկսվել են ամիսներ առաջ, սակայն շինարարության մասին պաշտոնապես հայտարարվել է օրերս: Նախագահ շեյխ Խալիֆաին նվիրված դարպասները կունենան 25 մետր բարձրություն, կներառեն տպագիր հանրագիտարան և ինտերնետ կայք: Ըստ նախնական տվյալների՝ նախագիծն արդեն գրանցվել է Գինեսի ռեկորդների գրքում և շահագործման կհանձնվի այս տարվա դեկտեմբերի 2-ին: Հանրագիտարանը կներառի աշխարհի 250 լեզուներով գրված նախագահի անունը, ինչպես նաև ԱՄԷ-ի պատմությունը: Սակայն նշենք, որ Աբու Դաբիի տարբերակն ունի իր մրցակիցը: Չինաստանի Սուչժոու (Suzhou) քաղաքում կառուցվում է դարպասանման աշտարակ: «Արևելյան դարպասներ» (Oriental Gate) անվանումը կրող աշտարակը մշակվել է բրիտանական «Առ-Էմ-Ջեյ-Էմ» (RMJM) ճարտարապետական բյուրոյի կողմից, շինարարությունը սկսվել է 2004 թ-ի սեպտեմբերին և կավարտվի այս տարվա վերջին: Ըստ նախնական տվյալների՝ 301.8 մետր բարձրությամբ աշտարակը կունենա 69 հարկ, որտեղ կտեղակայվեն հյուրանոց, գրասենյակային, բնակելի և առևտրային տարածքներ: Բացման արարողությունից հետո «Արևելյան դարպասները», որն արդեն համարվում է «աշխարհի համար առաջին դարպասը», կճանաչվի որպես աշխարհի խոշորագույն դարպասանման շինություն: Սակայն, ամենայն հավանականությամբ չինական մրցակիցը խաղից դուրս է, քանի որ շատերն այն ավելի նմանեցնում են «երկար վարտիքի»...
Սանկտ- Պետերբուրգում հասարակական-գործարար «Լախտա Կենտրոնի» շինարարությունը, որն իր մեջ ներառում է 463 մետր բարձրությամբ երկնաքեր, նախատեսվում է սկսել արդեն այս տարվա հոկտեմբերին, տեղեկացնում է ՌԻԱ Նովոստի կայքը, հղում կատարելով «Օխտա Հասարակական-Գործարար Կենտրոն» ՓԲԸ-ի գլխավոր տնօրեն Ալեքսանդր Բոբկովին: Սկզբում «Գազպրոմ» ընկերությունը նախատեսում էր 400 մետր բարձրությամբ «Օխտա Կենտրոն» երկնաքերը կառուցել Սանկտ-Պետերբուրգի Կարմիր գվարդիականների թաղամասում գտնվող Օխտինյան հրվանդանի վրա՝ Սմոլնիի տաճարի դիմաց: Սակայն բազմաթիվ քննադատությունների արդյունքում ընկերությունը որոշեց տեղափոխել շինարարության վայրը, և արդեն նոր անվանմամբ «Լախտա Կենտրոն» գործարար թաղամասը կառուցել քաղաքի պատմական կենտրոնից 10 կիլոմետր հեռավորության վրա՝ Ֆիննական ծովածոցի ափին գնված 140 հազար քառակուսի մետր մակերեսով տարածքում: Պրն. Ալեքսանդր Բոբկովի խոսքերով, շինարարությունը կիրանանա մի քանի փուլերով: Ամենաերկարը կտևի 463 մետր բարձրությամբ երկնաքերի շինարարությունը: Բոբկովի համոզմամբ արդեն հոկտեմբերի կեսին շինտեխնիկան կլինի հրապարակում, և կսկսվեն աշխատանքները: Շինարարության երկրորդ փուլը կսկսվի 1 տարի անց, իսկ 334 հազար քառակուսի մետր ընդհանուր մակերեսով ամբողջական «Լախտա Կենտրոն» գործարար թաղամասը շահագործման կհանձնվի 2018 թ-ին: Ընկերության գլխավոր տնօրենը չի ներկայացրել շինարարության ընդհանուր բյուջեն, սակայն նշել է, որ շինարարության 1 քառակուսի մետրը մոտավորապես կարժենա 2500-3500 ԱՄՆ դոլար, և նախագծի վերջնական տարբերակն ավելի մատչելի կլինի, քան նախապես առաջարկված «Օխտա Կենտրոնը», որի բյուջեն գնահատվում էր 1.9 մլրդ ԱՄՆ դոլար:
Դուբայի Շեյխ Զայեդ (Shaikh Zayed) փողոցում կառուցվում է քաղաքի առաջին «կանաչ» շինությունը, որը համապատասխանում է «կայուն շինության» բոլոր չափանիշներին: 31.6 հազար քառակուսի մետր մակերեսով շինույթունը պատկանում է Դուբայի Էլեկտրականության և ջրային հարցերով խորհրդին (Dubai Electricity and Water Authority (Dewa)): Ըստ նախնական տվյալների՝ շինությունը նախատեսվում է շահագործման հանձնել արդեն մի քանի ամիս անց: Նշենք, որ խորհրդի գործադիր տնօրեն Սայիդ Մուհամեդ Ալ Թայերի (Saeed Mohammed Al Tayer) խոսքերով, շինարարությունն իրականացվում է բոլոր ընդունված «կանաչ» չափանիշներին համաձայն: Նոր շենքը կառուցվում է Դուբայի «Առաջին Գալֆ Բենք» (First Gulf Bank) մետրոյի կայարանի հարևանությամբ և գտնվում է բանուկ տրանսպորտային հանգույցում: Նախագծողները շինությունում տեղադրել են «խելացի կառավարման համակարգ», որը պետք է ղեկավարի շինության էլեկտրականության հոսքը, կատարի ճիշտ բաշխումներ: «Խելացի կառավարման համակարգը» կաշխատի այնպես, որ բոլոր ենթահամակարգերը, այդ թվում՝ օդափոխությունը, ջեռուցումը, օդորակումը իրականացվեն առանց հավելյալ էլեկտրաէներգիայի կորստի: Բացի այդ, կառույցում տեղադրված են նաև արևային վահանակներ, որոնց շնորհիվ շինությունն ի վիճակի է ժամում արտադրել 600 կիլովատ էլեկտրաէներգիա: Նախագծի հեղինակները խնայողության նպատակով շինության լուսավորման համար սովորական լույսերի փոխարեն տեղադրել են լույսադիոդային լամպեր, որոնք 50 տոկոսով քիչ էներգիա են օգտագործում, քան իրենց ավանդական ընկերները: Բացի այդ, էկոլոգիապես մաքուր տրանսպորտային միջոցների օգտագործումը խրախուսելու նպատակով ավտոկայանատեղիի 5 տոկոսը հատկացված է հեծանիվներին:
Facebook-ը, որը համաշխարհային սոցցանցում մեկ միլիարդ մարդ է համախմբել, 2011 թվականին հայտարարեց և սկսեց իր 22 հա տարածքով գլխավոր գրասենյակի շինարարությունը Կալիֆոռնիայի մոտակայքում գտնվող Մենլո-Պարկ քաղաքում: Աշխատակիցների քանակությունը ստիպել է ընկերության ղեկավարությանը մտածել քաղաքային սեփական ենթակառուցվածք ստեղծելու մասին, որը հնարավորություն կտա բոլոր աշխատողներին «բնակություն հաստատել» նոր քաղաքում: Չէ՞ որ աշխատանքային պայմանների հարմարավետությունը կբարձրացնի աշխատանքի արդյունավետությունը: Նոր ենթակառուցվածքը սահմանափակվելու է կենտրոնական մեկ փողոցով, որտեղ էլ բավարարվելու են բոլոր աշխատակիցների պահանջները` սկսած վարսավիրանոց այցից մինչև ընթրիք ճապոնական ռեստորանում: Արդյունքում, այս խոշոր աշխատանքային կենտրոնը կդառնա ամենաժամանակակիցը ներկայիս քաղաքների մեջ, որը, ինչու չէ, կարելի է անվանել նույնիսկ «Ցուկեր Բուրգ» անունով, նշում է The Los Angeles Times-ը: «Հատուկ մթնոլորտը` այսինքն, առավելության գիտակցումը և «ամեն ինչ ձեռքիդ տակ ունենալու» պարզագույն զգացողությունը, թույլ կտա աշխատակիցներին ավելի արդյունավետ աշխատել` չշեղվելով աշխատավայրից դուրս գործուղումների պատճառով: Facebook-ի աշխատակիցների համար բոլոր ապրանքներն ու ծառայությունները կտրամադրվեն զեղչերով: Բարձր տեխնոլոգիաներով հագեցած այնպիսի ընկերություններ, ինչպիսիք են Google Inc. կամ Facebook-ը, վաղուց է, ինչ մրցավազքի մեջ են լավագույն ուղեղները ձեռք բերելու համար, այդ իսկ պատճառով ոչինչ չեն խնայում աշխատանքային առավել գրավիչ պայմաններ ստեղծելու համար` անվճար սնվելուց մինչև մերսումներ, քիմմաքրում և լվացքատուն: Բայց, փաստորեն, Facebook-ում նոր գաղափար են մտահղացել` սեփական քաղաք` սեփական գներով: Ամեն ինչ արվելու է այն բանի համար, որ աշխատակիցները չմտածեն կենցաղային խնդիրների մասին և ամբողջությամբ կենտրոնանան իրենց ստեղծագործական հնարավորությունները բացահայտելու վրա: Ֆեյսբուքյան նոր քաղաքում արդեն աշխատում է մոտ 2000 մարդ:
