Անցած շաբաթ Լիբանանում սկսվել է Վոթերֆրոնթ Սիթի (Waterfront City) նախագծի շինարարությունը, տեղեկացնում է Zawya.com կայքը: Բնակելի և առևտրային համալիրներից, ինչպես նաև հանգստի գոտուց բաղկացած այս նախագիծը կկառուցվի մի քանի փուլով առաջիկա տարիների ընթացքում: Հուլիսի 13-ին սկսվել է նախագծի առաջին փուլի շինարարությունը, որը ներառում է 7 հիանալի կառույց, ափամերձ ռեստորաններ և առևտրային գոտի: Վոթերֆրոնթ Սիթի նախագիծը տեղակայված է Միջերկրական ծովի ափին՝ հեռու քաղաքի աղմուկից, մայրաքաղաք Բեյրութից 15 կիլոմետր դեպի հյուսիս, հայտնի Մարինա Քլաբի (Marina Club) շրջակայքում: Նախագծի կառուցապատողներն են Սթե Ժոսեֆ Գ. Խորի էթ Ֆիլս Հոլդինգ (Ste Joseph G. Khoury et Fils Holding) և Մեջիդ Ալ Ֆութեյմ Փրոփերթիս (Majid Al Futtaim Properties) կազմակերպությունները, իսկ ճարտարապետական դիզայնն իրականացրել են ԷՐԳԱ Գրուփ (ERGA Group) և ամերիկյան ՍԲ Արքիթեքթս (SB Architects) ընկերությունները: Ընդհանուր 193.6 հազար քառակուսի մետր տարածքով Վոթերֆրոնթ Սիթի նախագիծը մեծ դեր կխաղա Լիբանանի զարգացման գործում: Վերջինս ներառում է 5 հազար ճոխ բնակարան, առևտրային թաղամաս, հսկա միջազգային առևտրային կենտրոն, ռեստորաններ, ժամանցի կենտրոններ, մարզասրահ, առողջարանային համալիր, լողավազան՝ ամբողջ տարին, ինչպես նաև հանրաճանաչ հյուրանոցների ցանց:

Ինչպես տեղեկացնում է news.yahoo.com կայքը, այս շաբաթ Պանամայում շահագործման է հանձնվել Թրամփ աշտարակը (Trump Tower): Լատինական Ամերիկայի ամենաբարձր երկնաքերը պոտենցիալ հաճախորդներին առաջարկում է ինչպես բնակարաններ, այնպես էլ հյուրանոցային համարներ: 284 մետր բարձրությամբ աշտարակը մեկ անգամ ևս ընդգծում է Պանամայի անշարժ գույքի բումը: Ինչպես ներկայացված է Թրամփ Օուշն Քլաբի (Trump Ocean Club) բացման հրավիրատոմսերում, վերջինս ժամանակակից, շքեղ ճանապարհորդության կենտրոն է: Հյուրանոցում ամենաէժան սենյակն արժե 300 ԱՄՆ դոլար գիշերվա համար, իսկ բնակարանների գները տատանվում են 250 հազարից մինչև 1 մլն ԱՄՆ դոլար: 430 մլն ԱՄՆ դոլար արժողությամբ նախագծի հեղինակն է կոլումբիական Արիաս Սեռնա Սարավիա (Arias Serna Saravia) ընկերությունը, իսկ կառուցապատողը Դոնալդ Թրամփի կազմակերպությունն է: Թրամփ աշտարակում կա 47 լյուքս, 37 վերելակ, սպա-կենտրոն, փոքրիկ նավահանգիստ զբոսանավերի համար, խաղասրահ և կղզի մասնավոր լողափով: Հյուրանոցն իր մեջ ներառում է 900 քառակուսի մետր տարածքով պատշգամբ՝ լողավազանով և 4200 քառակուսի մետր ընդհանուր մակերեսով խորհրդակցությունների դահլիճ: Հյուրերը հնարավորություն ունեն նաև օգտվել սեփական սպասավորի ծառայություններից: Զարգացող անշարժ գույքի շուկան Պանաման վերածել է «փոքրիկ Դուբայի»՝ հայելապատ երկնաքերերով և հոյակապ կառույցներով: Հարցն այն է թե որքան՞ ժամանակ կտևի այս շինարարական վերելքը և ինչ՞ ցավալի հետևանքների կարող է այն հանգել: Ի դեպ Լատինական Ամերիկայի ամենաբարձր 3 երկնաքերերը գտնվում են Պանամայում: Ցուցակը գլխավորում է այս շաբաթ շահագործման հանձնված Թրամփ աշտարակը, նրան հաջորդում է 67 հարկանի, 266 մետր բարձրությամբ Դը Փոինթ (The Point) աշտարակը և կրկին այս տարի բացված 246 մետր բարձրությամբ Օուշն Թու (Ocean Two) աշտարակը:

Բարձրահարկ շենքերի և քաղաքային միջավայրի միջազգային Խորհուրդը (The Council on Tall Buildings and Urban Habitat- CTBUH) ամեն տարի անցկացնում է աշխարհի «Լավագույն բարձրահարկ շենք» մրցույթը: Նախապես ընտրվում են 4 աշխարհագրական տարածաշրջաններից լավագույնները, իսկ հետագայում նրանցից ամենալավը արժանանում է տարվա լավագույնի տիտղոսին: Այս տարվա աշխարհի «լավագույն բարձրահարկ շինություն» անվանակարգի հաղթողի անունը կհայտարարվի հոկտեմբերի 27-ին Չիկագոյում կայանալիք հանդիսավոր արարողության ժամանակ, իսկ այժմ հայտնի են դարձել տարածաշրջանային 4 հաղթողները, որոնք էլ հավակնում են տարվա «լավագույն բարձրահարկ շենք» տիտղոսին: Այս մասին հաղորդում է խորհրդի պաշտոնական կայք ctbuh.org-ը: Ինչպես ներկայացված է խորհրդի պաշտոնական կայքում, տարվա «լավագույն բարձրահարկ շինություն» տիտղոսի հավակնորդներն են, իրենց տարածաշրջաններում արդեն լավագույնը ճանաչված Նյու Յորք բայ Գեհրի (New-York by Gehry) երկնաքերը Հյուսիսային և Հարավային Ամերիկա տարածաշրջանից, Ինդեքս (The Index) աշտարակը Մերձավոր Արևելք և Աֆրիկա տարածաշրջանից, Ասիա և Ավստրալիա տարածաշրջանից Գուանչժոուի Միջազգային ֆինանսական կենտրոնը (Guangzhou International Finance Center) և Եվրոպայից KFW Վեսթարկադե (KFW Westarkade) աշտարակը: Նյու Յորք բայ Գեհրի երկնաքերի պատվիրատուն Ֆորեսթ Սիթի Ռաթներ (Forest City Ratner) ընկերությունն է, որը կառույցի շինարարությունն ավարտել է 2011 թ-ի ապրիլին: 76 հարկանի բնակելի աշտարակի ճարտարապետն է Ֆրենկ Գեհրին Նյու Յորքյան Գեհրի Արքիթեքթս (Gehry Architects New York) ընկերությունից: 102 հազար քառակուսի մետր ընդհանուր մակերեսով աշտարակի բարձրությունը 265 մետր է, իսկ նախագիծն իրականություն դարձնելու համար պատվիրատուն ծախսել է ավելի քան 174 մլն ԱՄՆ դոլար: Գուանչժոու քաղաքում է գտնվում Ասիա և Ավստրալիա տարածաշրջանի հաղթող Գուանչժոուի Միջազգային ֆինասական կենտրոնը: 103 հարկանի, 440 մետր բարձրությամբ երկնաքերը աշխարհի ամենաբարձր աշտարակների ցուցակում զբաղեցնում է 9-րդ հորիզոնականը: Նախագծի գլխավոր պատվիրատուն Յու Քսյու Գրուփն է (Yue Xiu Group), իսկ գլխավոր ճարտարապետը Քրիս Ուիլկինսոնի Ուիլկինսոն Եյր Արքիթեքս (Wilkinson Eyre Architects) ընկերությունը: 2010 թ-ին շահագործման հանձնված՝ 250 հազար քառակուսի մետր ընդհանուր մակերեսով շինության ընդհանուր բյուջեն կազմել է 410 մլն ԱՄՆ դոլար: Շինարարության գլխավոր կապալառուի դերը ստանձնել են 2 ընկերություններ՝ Չինաստանի պետական ճարտարագիտա-շինարարական կորպորացիա ՍՊԸ (China State Construction Engineering Corporation LTD) և Գուանժուի քաղաքաշինական գրուփ ՍՊԸ (Guanzhou Municipal Construction Group CO LTD) ընկերությունները: Եվրոպական տարածաշրջանի հաղթողի տիտղոսը ստանձնել է 2010թ-ին շահագործման հանձնված KFW Վեսթարկադե աշտարակը Ֆրանֆուրտում: 14 հարկանի աշտարակի գլխավոր պատվիրատուն է KFW Բանքենգրուփփե (KFW Bankengruppe) ընկերությունը: 56 մետր բարձրությամբ աշտարակի նախագիծն իրականացրել է Զաուերբրուխ Խաթթոն (Sauerbruch Hutton) ճարտարապետական ընկերությունը: Մերձավոր Արևելք և Աֆրիկա տարածաշրջանի հաղթող, 326 մետր բարձրությամբ Ինդեքս երկնաքերը շահագործման է հանձնվել 2011 թ-ի մարտին Դուբայում: 80 հարկանի աշտարակի գլխավոր կապալառուի դերը ստանձնել է Բրուքֆիլդ Մուլթիփլեքս (Brookfield Multiplex) ընկերությունը, իսկ ճարտարապետական նախագիծն իրականացրել է Ֆոսթեր+Գործընկերներ (Foster+Partners) ընկերությունը: 170 քառակուսի մետր ընդհանուր մակերեսով շինության պատվիրատուն է Յունիոն Փրոփերթիս (Union Properties) ընկերությունը: Այս հղումով դուք կարող եք կարդալ նախորդ տարվա «Լավագույն բարձրահարկ շենք 2010» մրցույթի արդյունքների մասին:

Այս շաբաթ Կոպենհագենի նորաստեղծ Օրեսթադ թաղամասում (Orestad) բացվել է ոչ միայն Դանիայի, այլև ամբողջ Սկանդինավիայի խոշորագույն հյուրանոցներից մեկը: Բելլա Սքայ (Bella Sky) հյուրանոցը խորհրդանշում է ոչ միայն թաղամասի արդիականությունը, այլև մայրաքաղաքի աստիճանաբար աճող միջազգային դերը: Գտնվելով Բելլա Սենթրի (Bella Center), օդանավակայանի և Կոպենհագենի պատմական կենտրոնի շրջակայքում, կառույցի տեղը բավականին բարենպաստ է միջազգային միջոցառումների անցկացման համար: Հյուրանոցի պատվիրատուն Բելլա Սենթր (Bella Center) ընկերությունն է, իսկ նախագծողը դանիական 3XH Ճարտարապետական բյուրոն: Շինարարության ինժեներական կողմն ապահովել է Ռեմբոլ (Rembol) խորհրդատվական և ինժեներական ընկերությունը: Ինչպես բացատրում է նախագծի գլխավոր պատասխանատու Կարե Դահլը (Kaare K.B. Dahl), «նախագծի հիմնական խնդիրներից էր շինության «երկրաչափությունը» հասկանալը և դրա իրականացնելը: Անխոս առանց Tekla դիզայն-ծրագրի, նախագծի իրականացումն անհնար կլիներ»: Ռեմբոլ (Rembol) ընկերության մասնագետները բոլոր հաշվարկները և գծագրերն իրականացրել հաշվարկային ROBOT և դիզայներական TEKLA ծրագրերի համատեղմամբ: Երկու ծրագրերի համատեղումը հնարավորություն տվեց պարզել նաև այնպիսի հարցեր ինչպիսիքն են՝ հիմքերի հետագա դեֆորմացումը շինության ավարտից հետո, ինչքան կարող է թեքվել շինությունը հետագայում և այլն: Մասնագետները նախագծել և կառուցել են երկու աշտարակ, որոնք մոտ 15 աստիճանով թեքված են ուղղահայացից: Ի դեպ Բելլա Սքայ (Bella Sky) հյուրանոցի թեքությունը չորս անգամ գերազացում է հայտնի Պիզայի աշտարակի թեքությունը: Հյուրանոցի աշտարակների բարձրությունը 76.5 մետր է, իսկ ընդհանուր տարածքը 44.173 հազար քառակուսի մետր: Հյուրանոցում կա 814 սենյակ, 32 խորհրդակցական դահլիճ, 3 ռեստորան, հյուրասրահ, սքայ-բար, առողջարանական կենտրոն՝ 850 քառակուսի մետր մակերեսով: 3XH Ճարտարապետական բյուրոյի հիմնադիր և տնօրեն Կիմ Հերֆորդ Նիլսենի (Kim Herforth Nielsen) խոսքերով, աշխարհի գրեթե բոլոր միջազգային հյուրանոցները կառուցված են գործնական ոճով: Նրանք որոշել են շեղվել այս համընդհանուր կանոնից և նախագծել այնպիսի շինություն, որն իր ոճով կլինի ոչ թե գործնական, այլ կընդգծի սկանդինավյան օջախների ջերմությունը, լույսը և կապը բնության հետ:

Ինչպես տեղեկացնում է Inhabitat.com ինտերնետային կայքը, անցած շաբաթ Սեուլում Հանգան գետի վրա բացվել է աշխարհի ամենամեծ լողացող կղզին: 700 տեղանոց հյուրասրահից, ռեստորաններից և առևտրային պատկերասրահներից բաղկացած Վիվա (Viva) լողացող կղզին կազմում է 83.9 մլն դոլար արժողությամբ պետական նախագծի միայն մի մասը: Բացի 3.2 հազար քառակուսի մետր ընդհանուր տարածքով Վիվա կղզուց, որը բացվելուց անմիջապես հետո սկսել է հավաքել այցելուների հսկա բանակ, օգոստոս – սեպտեմբեր ամիսներին նախատեսվում է շահագործման հանձնել տարածքով ավելի փոքր ևս 2 կղզի՝ Վիսթան (Vista) 1.3 հազար քառակուսի մետր տարածքով և Տերան (Tera) 371 քառակուսի մետր տարածքով: Կղզիների ամբողջական շահագործումից հետո նախատեսվում է, որ վերջիններս կդառնան միջազգային գիտաժողովների, մշակութային միջոցառումների, ցուցահանդեսների, ինչպես նաև ջրային մարզաձևերի մրցումների կենտրոններ: Շինարարության ավարտից հետո բոլոր 3 կղզիներն իրար հետ կկապվեն շղթաներով: Սեուլի կղզիները տարբերվում են Դուբայի արհեստական կղզիներից, որոնք կառուցվել են ծովի հատակը լցված ավազային հիմքի վրա: Ի տարբերություն վերջիններիս՝ Վիվան և նրան ուղեկցող մյուս 2 կղզիները լողում են ջրի վրա և հաշվի առնելով գետի հեղեղումները, կղզիները նախագծված են այնպես, որ ջրի մակարդակին զուգահեռ իրենք էլ բարձրանան և իջնեն: 2 հազար տոննա կշռով Վիվա կղզին, որն ընդունակ է պահելու ևս 6.4 հազար տոննա ծանրություն, գետի երեսին լողում է շնորհիվ 24 հսկա օդային բարձիկների: Կղզին ամրացված է 500 տոննա կշռով բետոնե հիմքին, որն էլ կղզին պահում է իր տեղում: Բացի այդ կղզու վրա տեղադրված է հատուկ անվտանգության համակարգ, որը պետք է անմիջապես ահազանգի, եթե վերջինս հեռանա իր նախատեսված հատվածից: Վիվա կղզու վրա կառուցված 3 հարկանի շինությունը ծածկված է 54 քառակուսի մետր ընդհանուր տարածքով արևային պանելներով, որոնց շնորհիվ գիշերը լուսավորվում է կառույցի ճակատը: