Գորիսի պատմական կենտրոնը վերականգնվում է Տեղական տնտեսության և ենթակառուցվածքների զարգացման ծրագրի շրջանակում՝ Համաշխարհային բանկի վարկային միջոցներով և ՀՀ կառավարության համաֆինանսավորմամբ: Ծրագրով առանձնացրել են XIX-XX դարերի 36 համայնքային նշանակության հուշարձան-շենքեր, որոնք գորիսյան ինքնատիպ ճարտարապետության պահպանված նմուշներ են: Անմշակ բազալտ քար, բաց պատշգամբներ ու կարմիր տանիքներ. լեռնային վայրի գեղեցկություն պարփակված պարզ ճարտարապետական ձևերի մեջ Գորիսի պատմական-ճարտարապետական արժեք ներկայացնող շենքերը հիմնականում երկհարկանի, երբեմն միահարկ են՝ նկուղով, կառուցված կարմիր գծերի վրա, իսկ բակերն ու տնամերձ հողամասերը գտնվում են շինությունների հետնամասում: Դրանք կառուցվել են տեղական կոպտատաշ բազալտ քարից, հարդարվել Գորիսին բնորոշ գեղարվեստական սվաղով, որը նաև «բարքաշ» են անվանում, ունեն փայտե բաց պաշտգամբներ՝ փայտյա կամ մետաղյա ճաղերով, երկփեղկ դռների ու պատուհանների կիսակամար բացվածքներ՝ մշակված սրբատաշ քարով, փայտե դարպասներ, կարմիր թիթեղածածկ լանջավոր տանիքներ: Գորիսի հին տների արտաքին ճակատները աչքի են ընկնում մշակման միջոցների պարզությամբ, համահունչ են իրար ու ներդաշնակ բնությանը: Հենց դրանում է նրանց ճարտարապետա-գեղարվեստական արժեքն ու հմայքը: Գորիսին առանձնահատուկ հմայք է հաղորդում նաև գծային կառուցապատումը: Քաղաքի հատակագիծը կազմված է քառակուսի կամ ուղղանկյուն առանձնացված թաղամասերից, որոնք երբեմն համեմատում են շախմատի համաչափ դաշտերի հետ: Այս հատակագիծը ձևավորվել է 1850-ականներին Ելիզավետպոլում և կյանքի կոչվել 1870-ականներին: Գորիսը կառուցապատվել է որպես ցարական Ելիզավետպոլ նահանգի Զանգեզուր գավառի կենտրոն: Գորիսի ճարտարապետ Գարեգին Փարսյանը հենց դրանով է պայմանավորում իր հարազատ քաղաքի ու Շուշիի նմանությունը: Միևնույն ժամանակ նման նախագծեր են իրականացվել թե՛ Գորիսում ու Շուշիում, և թե՛ Մեղրիում ու Գավառում, բայց նախնական ճարտարապետական ձևերը պահպանվել են առավելապես Շուշիում ու Գորիսում: Գ. Փարսյանի խոսքով յուղաթղթի վրա արված հին նախագծերը դեռ պահպանվել են, իսկ վերականգնման աշխատանքներն իրականացվում են դրանց հետ համեմատելով և համապատասխանեցնելով: Գորիսը հնուց ի վեր եղել է վարչական, առևտրական ու արհեստագործական կենտրոն: Այդ պատճառով էլ շենքերը կառուցվել են, ինչպես Գորիսի գլխավոր ճարտարապետն է ասում, որպես «եկամտաբեր տներ». առաջին հարկերը եղել են առևտրային, արհեստագործական, սպասարկման մակերեսներ, երկրորդ հարկերը՝ բնակելի տարածքներ ու հյուրատներ: Այսօր էլ այդ վերականգնվող շենքերի մեծ մասի երկրորդ հարկերը բնակելի նշանակության են, իսկ առաջին հարկերը հիմնականում առևտրային կամ այլ սպասարկման կետեր են: Շենքերից մեկի առաջին հարկում գործում է մանկապարտեզ: Վերականգնման ծրագրով շենքերի օգտագործման նպատակային նշանակության փոփոխություն չի նախատեսվում: Գորիսը՝ հայկական «Լուգանո» Ներկայումս Գորիսի պատմական նշանակության շենքերը հիմնականում անմխիթար վիճակում են: Ծրագրով արդեն սկսել են այդ շենքերի տանիքների, դռների և պատուհանների փոխարինման, շենքերի ամրացման, ճակատների պատմական տեսքի, պատշգամբների ու փայտե դարպասների վերականգնման աշխատանքները: Գորիսի գլխավոր ճարտարապետ Գարեգին Փարսյանը ներկայացնում է կատարվող աշխատանքները. «Ուշադրություն ենք դարձնում ու պահպանում ճարտարապետական բոլոր այն դետալներին, որոնք կրկնվում են Գորիսյան տներում: Տանիքների ծածկերը փոխարինում ենք պրոֆիլավոր կարմիր թիթեղով, որը նման է հին նախնական ծածկերին, անգամ տանիքների օդափոխության պատուհանները իրականացնում ենք հնի նմանությամբ, ինչպես որ պահպանվել է որոշ տներում ու կա հին նախագծերում, նույնիսկ տանիքի բարձրությունն ենք պահպանում՝ ըստ նախագծային հին ծավալների: Արդեն փոխվել է շուրջ 6000 քմ տանիք: Տեղադրվում են կաղնու փայտի մշակվածքով մետաղապլաստե պատուհաններ, բարեկարգվում են պատշգամբները հին ձևի մեջ, շտկվում մոււտքերն ու քարե արգելապատերը, երկաթե դարպասները երեսապատվում են փայտով»: Տարածքային կառավարման և ենթակառուցվածքների նախարարությունից տեղեկացնում են, որ ամեն ինչ արվել ու արվելու է Գորիսի պատմական միջուկի անաղարտությունը պահպանելու համար. «Գորիսի պատմական միջուկի վերականգնման նախագիծը մշակվել է «Մաստարա» արտադրական կոոպերատիվի կողմից, քննարկվել ու հավանաության է արժանացել ՀՀ մշակույթի, սպորտի և երիտասարդության հարցերի գիտամեթոդական խորհրդի և Քաղաքաշինության պետական կոմիտեի կողմից: Գորիսում կազմակերպվել են նաև հանրային քննարկումներ: Միանշանակ է, որ պատմական միջավայրը չի խաթարվելու, որովհետև այս ամենն արվում է գլխավորապես այդ նույն պատմական միջավայրը վերականգնելու և պահպանելու համար: Հին քաղաքը այս աշխատանքներից հետո նոր շունչ կստանա և իր առանձնահատուկ դիմագծով կներկայանա հազարավոր զբոսաշրջիկների»: Այս պահին Գորիսի գլխավոր ճարտարապետի խոսքով իրականացվել է աշխատանքների 30 %-ը, բայց արդյունքն արդեն տպավորիչ է ու ակնառու: Ծրագրով նախատեսվում է նաև վերակառուցել պատմական կենտրոնին հարակից հիմնական փողոցները: Մայթերի քայքայված եզրաքարերը կփոխարինվեն բազալտե նոր քարերով, կենտրոնական փողոցների երթևեկելի մասերը կսալապատվեն բազալտե քարերով՝ վերականգնելով նախկին տեսքը, քարերի գունային տարբեր երանգներ օգտագործելով կգծանշվեն առանձնացված հեծանվային ուղիները, կփոխվեն փողոցային լուսավորության սյուները, իսկ ամբողջ ինժեներական ցանցերը կմոնտաժվեն ստորգետնյա, քաղաքի այդ հատվածը ազատելով աչք չշոյող բազմապիսի լարանցումներից ու խողովակաշարերից: Կնորացվեն ջրահեռացման ու ջրամատակարարման վերգետնյա համակարգերը, դրենաժային բաց առուները կմաքրվեն, կվերականգնվեն ու կդառնան ավելի ակնառու: Այս բաց առվակներն էլ են ըստ էության գորիսյան կոլորիտի առանձնահատկությունը, «համն ու հոտը» կազմում. «Առվակները ստեղծվել են քաղաքի պահանջից, դարեր շարունակ ծառայել որպես ոռոգման ու ջրահեռացման ցանց: Խորհրդային տարիներին մի քանի հատվածներում այս առուները փակեցին, ու դա հանգեցրեց ճգնաժամի. քաղաքը գոգավորության մեջ է, և քաղաքի բարձրադիր կետերից հոսող անձրևաջրերը գալիս, կուտակվում են քաղաքի կենտրոնական համեմատաբար հարթ հատվածում: Այնպես որ առվակները կպահպանվեն ու կբարեկարգվեն, որովհետև ժամանակի փորձությունն անցած ինժեներական անհրաժեշտ ենթակառուցվածքներ են»: Ըստ աշխատանքների կատարման ժամանակացույցի 2021 թ-ի ամռանը քաղաքի պատմական միջուկի վերակառուցումը արդեն ավարտված կլինի: Բայց Գորիսի վերափոխման աշխատանքներն այդքանով չեն ավարտվի. նախատեսվում է Երիտասարդական այգու բարեկարգումը, ընթացիկ ուսումնասիրության փուլում են Հին Գորիս քարանձավային քաղաքի զբոսաշրջային ենթակառուցվածքների բարելավման և արդիականացման աշխատանքները: Աշխարհագրական հարմար դիրքը, բնակլիմայական բարենպաստ պայմանները՝ մեղմ ձմեռներով ու զով ամառներով, բազմաթիվ բնական հուշարձանների առկայությունը ու ճարտարապետական կոլորիտային վառ միջավայրը Գորիսը զբոսաշրջային հայտնի կենտրոն դարձնելու նշանակալի ներուժ են: Գարեգին Փարսյանը համոզված է՝ մի քանի տարի անց իր հարազատ քաղաքը ոչնչով չի զիջելու Շվեյցարիայի Լուգանոյին. Գորիսը մտերմիկ քաղաք է հարմար ապրելու, հանգստանալու, արարելու և ներշնչվելու համար:

Ոչ ոք չի հերքի, որ սպորտում լավ արդյունքներ ունենալու համար, անհրաժեշտ են ոչ միայն լավ մարզիչներ, այլև լավ շենքային պայմաններ ու հագեցվածություն։ Միջավայրը, որտեղ երեխան սկսում է հաճախել ու հետաքրքրվել այս կամ այն մարզաձևով պետք է լինի գրավիչ ու ոգևորող։ Նախագիծը, որի համաձայն նախատեսվում է վերակառուցել ԿԳՍՄ նախարարության ենթակայության տակ գտնվող Հեծանվային սպորտի և Հրանտ Շահինյանի անվան սպորտային, գեղարվեստական մարմնամարզության և ակրոբատիկայի մանկապատանեկան մարզադպրոցները, խոստանում է դառնալ հենց այդպիսի միջավայր մարզիկների ու ապագա չեմպիոնների համար։ Ստորև ներկայացնում ենք նախագծի մանրամասները։ Հեծանվային սպորտի և Հրանտ Շահինյանի անվան սպորտային, գեղարվեստական մարմնամարզության և ակրոբատիկայի մանկապատանեկան մարզադպրոցները գտնվում են տարբեր հասցեներում. առաջինը՝ Բագրատունյաց 48, երկրորդը՝ Հ. Շահինյան 2: Ի սկզբանե նախատեսվում էր Հրանտ Շահինյանի անվան սպորտային, գեղարվեստական մարմնամարզության և ակրոբատիկայի օլիմպիական մանկապատանեկան մարզադպրոցի շենքի բակային տարածքում մետաղասարքավորումներով դահլիճ կառուցել, և վերակառուցել Հեծանվային սպորտի օլիմպիական մանկապատանեկան մարզադպրոցը։ Սակայն հետազոտությունների արդյունքում պարզվեց, որ հեծանվային մարզադպրոցը ֆիզիկապես մաշված է և գտնվում է IV-րդ կարգի վթարային վիճակում և անվտանգության նկատառումներից ելնելով պետք է քանդվի, իսկ Հրանտ Շահինյանի անվան մարզադպրոցի բակային տարածքում մարզադահլիճի կառուցումը տեխնիկապես հնարավոր չէ: Հաշվի առնելով հետազոտությունների արդյունքները՝ որոշվել է միավորել նախագծերը և կառուցել մեկ մարզական համալիր։ Նոր մարզահամալիրը կլինի Բագրատունյաց 48 հասցեում և կազմված կլինի երկու մասնաշենքից։ Մեկում կտեղակայվի գեղարվեստական մարմնամարզության և ակրոբատիկայի 1076.0 մ2 մակերեսով դահլիճը և 348 մ2 մակերեսով օժանդակ կառույցները։ Մյուսը կլինի հեծանվային մարզադպրոցի՝ երկու հարկանի, հարթ տանիքով և ներքին բակով մասնաշենքը ընդհանուր 1280մ2 մակերեսով : Երկու մասնաշենքերի պարագծով նախատեսված է հեծանվաուղի ասֆալտաբետոնե ծածկույթով՝ 220մ երկարությամբ և 2մ լայնությամբ։ Մասնաշենքերը կապված են իրար հետ, և հեծանվային մարզադպրոցի աշխատողներն ու մարզիկները կարող են օգտվել ընդհանուր բուֆետից։ Դեպի բուֆետ մոտեցում է նախատեսված նաև էվակուացիոն աստիճանների կողմից՝ այգում հանգստացողների համար։ Աստիճանավանդակով կարելի է բարձրանալ բաց հարթակի վրա գտնվող դահլիճ, որտեղ կարելի է կազմակերպել Հայաստանի գեղարվեստական մարմնամարզության և ակրոբատիկայի թանգարան, իսկ մրցումների ժամանակ օգտագործել կարևոր հյուրերի համար (20-30 մարդ) որպես դիտահարթակ։ Տանիքին նաև հարթակ է նախատեսված ուշուի կամ ֆենշուի պարապմունքների համար։ Գեղարվեստական մարմնամարզության և ակրոբատիկայի դահլիճում կարող է տեղավորվել 250 դիտող։ Տրիբունան երեսապատված է OSB սալերով, որոնք համապատասխանում են ինտերիերի հետ և կարելի է չտեղադրել պլաստիկ նստարաններ։ Մարզադահլիճի կախովի առաստաղը լուծված է գիպսաստվարաթղթով՝ ալիքների տեսքով, մետաղական ֆերմաների արանքներում, որը հնարավորություն է տալիս պարապունքների ժամանակ մինչև 12մ բարձրությամբ նետել գնդակը: Հեծանիվային մարզադպրոցի երկհարկանի շենքի հարթ տանիքի վրա նախատեսվում է մոնտաժել արևային ֆոտովոլտային 200-240 պանելներ։ Առաջին հարկում կլինի նախասրահ, ֆիզիկական պատրաստության երկու դահլիճներ իրենց հանդերձարաններով, և 9 խմբասենյակ։ Խմբակային սենյակները կունենան ելք ու մուտք հեծանվաուղու կողմից։ Սենյակների շարքի վերջում գտնվում է հեծանիվ վերանորոգողների և բժշկի սենյակները։ Մասնաշենքը օդափոխվում է բնական ձևով՝ ներքին բակի միջոցով, որում կպահպանվեն տարածքում եղած ծառերը (դեղծ, ծիրան, թութ)։ Երկրորդ հարկում կգործի դպրոցի ադմինիստրացիան, մարզիչների սենյակը, պահեստները, հավաքարարի սենյակը, ժողովների սենյակը և ելքի հնարավորություն դեպի պատշգամբ։ Նաև նախատեսվում է Հայաստանի հեծանվային սպորտի թանգարան, որտեղ կարելի է կազմակերպել դասախոսություններ և վիդեո ցուցադրումներ։ Հարկերի բարձրությունը 3,30մ է հատակից - առաստաղ։ Երկու մասնաշենքերի արտաքին պատերը կմոնտաժվեն երեք գույնի ֆիբրոցեմենտե սալերով։ Մարզահամալիրում միաժամանակ կարող է գտնվել մինչև 500 մարդ։ Տարածքը հարմարեցված է հենաշարժողական խնդիրներ ունեցող անձանց համար։ Նոր մարզահամալիրը կունենա բարեկարգ կանաչապատ տարածք՝ 1727 մ2 մակերեսով, որտեղ կվերատնկվեն բոլոր դեկորատիվ ծառերը, եղևնիները և թփերը։ Երկու մասնաշենքերի մուտքը կլինի Բագրատունյանց փողոցից և «Գործարանային» մետրոյի կողմից։ Ավտոմեքենաների մուտք դպրոցի տարածք չի նախատեսվում։ Երկու մասնաշենքերն էլ արտակարգ իրավիճակների համար կունենան տարհանման ելքեր Արշակունյանց պողոտայի կողմից։ Հեծանվային սպորտի և Հրանտ Շահինյանի անվան սպորտային, գեղարվեստական մարմնամարզության և ակրոբատիկայի մանկապատանեկան մարզադպրոցների նախագիծն իրականացվում է ՀՀ քաղաքաշինության կոմիտեի պատվիրատվությամբ «ՀԳՇՆ» սահմանափակ պատասխանատվությամբ ընկերության կողմից: Նախագծի գլխավոր ճարտարապետն է Գագիկ Հարությունյանը:

Գնային ԻՋԵՑՈՒՄ "Գեպոտանիք" ՍՊԸ խանութ-սրահում : Շուկայական ամենամատչելի գինը մետաղական ծալքաթիթեղների համար: Մենք առաջարկում ենք լավագույն համադրությունը ՝ մատչելի գին, որակյալ արտադրանք և գունային մեծ տեսականի: Սեղմ ժամկետներում մեր մասնագետները կկատարեն նույնիսկ ամենաքմահաճ հաճախորդի պահանջները: Պատվերների և/կամ այլ ինֆորմացիայի համար այցելեք մեր արտադրամաս՝ Խաղաղ Դոնի 1/7, կամ զանգահարեք ՝ հեռ. 012 407 103, 093 407 103, 099 407 103:

Օղակաձև զբոսայգում՝ Գրիգոր Լուսավորիչ եկեղեցու հարևանությամբ կկառուցվի սքեյթ - պարկ։ Այլ կերպ ասած, տարածքը նոր շունչ կստանա։ Այս ծրագրի իրականացման նպատակով վերջերս քաղաքապետ Հայկ Մարությանը պայմանագիր է կնքել նվիրատուի՝ Ուկրաինայի հայերի միության նախագահ Վիլեն Շատվորյանի հետ։ «Երբ մեր երկրից մեզ ձայն են տալիս, մենք փորձում ենք անպատճառ մի բանով օգտակար լինել։ Մեր Հայաստանի հետ կապը մեզ ուժ և եռանդ է տալիս, այդ պատճառով փորձում ենք միշտ պահել և պահպանել այդ կապը, և այստեղ ձևը կարևոր չէ»,- իր խոսքում նշել է Ուկրաինայի հայերի միության նախագահ Վիլեն Շատվորյանը։ Ըստ ծրագրի օղակաձև զբոսայգու 6-րդ հատվածում 5044 քմ հանրային տարածքում մոտակա ամիսներին կսկսվի սքեյթ-պարկի շինարարությունը։ Ըստ քաղաքապետարանի տրամադրած տեղեկության, աշխատանքները կիրականացվեն երկու փուլով։ Առաջին փուլում մինչև հունիսի 30-ը ըստ նախագծի խաղահրապարակի հարավային հատվածի ռելյեֆային լանջը կվերածվի ամֆիթատրոնի, որն ուղղված կլինի դեպի խաղահրապարակ։ Տարածքում ըստ նախագծի նախատեսվում է կառուցել սքեյթի վարձակալման կետ, բուժկետ, կբարեկարգվեն նաև կառուցապատումից ազատ կանաչ տարածքները։ Տարածքը համալրված կլինի արևային պանելներով աշխատող ոճային հովհարներով։ Բացի այդ, կիրականացվի ընդհանուր պարագծային լուսավորություն լեդ համակարգի օգտագործմամբ։ Ինչ վերաբերվում է ծրագրի երկրորդ փուլին, ապա մինչև օգոստոսի 30-ը կբարեկարգվի տարածքի արևելյան հատվածի առկա կանաչ գոտին՝ յուրօրինակ լանդշաֆտային և բուսական դիզայնով և դիտահարթակներով։ Այգում լուծված է լինելու նաև հասարակական սահնագույցի խնդիրը, որի կառուցման համար առանձին նախագիծ է արվելու։ Սքեյթ-պարկը մեր համաքաղաքացիներին կհյուրընկալի այս տարի, քանի որ նախատեսված է նախագիծը ամբողջությամբ ավարտել 2020-ի օգոստոսին։ «Եկանք մի հիանալի որոշման, որ դա պետք է լինի նախագիծ, որն առաջին հերթին կուրախացնի մեր երիտասարդներին։ Այսպիսով ծնվեց այդ միտքը, որ մեր մայրաքաղաքում պետք է կառուցվի շատ վաղուց սպասված և այդքան պահանջված սքեյթ- պարկ։ Սա ոչ միայն սպորտաձև է, այլ նաև մշակույթ։ Սա ժամանցի վայր է, որտեղ երիտասարդությունը միասին և′ սպորտով կզբաղվի և′ ժամանակ անց կկացնի՝ շփում կլինի։ Ինչը կարևոր է քաղաքի համար։ Եվ սա սկիզբն է այս մշակույթի և այս տիպի օջախների»- իր խոսքում նշել է Երևանի քաղաքապետը։

Նոր կորոնավինուսային վարակով պայմանավորված կարճատև դադարից հետո վերսկսվել են Հայաստանի Հանրապետությունը Վրաստանի հետ կապող Մ6 միջպետական ճանապարհի երկրորդ հատվածի՝ Թումանյան-Բագրատաշեն մաքսային անցակետի՝ (51,74կմ) շինարարական աշխատանքները: Թե ի՛նչ ընթացքում են դրանք, ծանոթանանք ստորև: Ոչ միայն հարմար, այլև արդեն անվտանգ ճանապարհ Մ6, Վանաձոր-Ալավերդի-Վրաստանի սահման միջպետական ճանապարհն սկսվում է Վանաձոր քաղաքից, անցնում է ՀՀ Լոռու և Տավուշի մարզերի 33 համայնքներով ու հասնում Բագրատաշենի սահմանակետ: Այս 90 կմ ընդհանուր երկարությամբ միջպետական ճանապարհի վերակառուցման աշխատանքների առաջին փուլը ավարտվել է 2018թ․ դեկտեմբերի 24-ին։ Այն ընդգրկել է Վանաձոր-Թումանյան (38,45կմ) հատվածը: Այժմ հիմնանորոգվում է Թումանյան-Բագրատաշենի մաքսային անցակետ հատվածը՝ Ասիական զարգացման բանկի (44.04 մլն եվրո) և ՀՀ կառավարության (10․14 մլն եվրո) համաֆինանսավորմամբ: Կապալառու կազմակերպություններն են «Հորիզոն-95», «ԱԱԲ Պրոեկտ» և «Սուարդի»: Տեխնիկական հսկողությունն իրականացնում է «Սաֆեժ ՍԱՍ և Հիլլ Ինտերնեյշընըլ» համատեղ ձեռնարկությունը: Հողերի օտարման և տարաբնակեցման գործընթացը հիմնականում ավարտվել է: Միայն, ինչպես տեղեկացնում են «Ճանապարհային դեպարտամենտ» ՊՈԱԿ-ից, որոշ հատվածներում կատարված նախագծային փոփոխությունների հետևանքով լրացուցիչ օտարումներ իրականացնելու անհրաժեշտություն է առաջացել։ Մ6 ճանապարհը հիմնանորոգվում է ասֆալտբետոնե ծածկով։ Հիմնանորոգումը նոր կորոնավիրուսային վարակով պայմանավորված կարճատև դադարից հետո ամբողջ ծավալով ընթացքի մեջ է։ Իրականացվում են կոյուղագծերի և ջրագծերի տեղադրում‚ մայթերի և ջրահեռացման վաքերի կառուցման‚ հողային‚ ասֆալտապատման նախապատրաստական‚ հենապատի կառուցման‚ ժայռապայթեցման, ճանապարհի լայնացման, և բազմաթիվ այլ աշխատանքներ։ Որոշ հատվածներում կատարվում է ասֆալտապատում: Միջպետական նշանակության ու 3 տասնյակից ավելի համայնքների սպասարկող ճանապարհը մինչ այս գտնվում էր չափազանց անբարեկարգ վիճակում, ինչը մեծ անհարմարություններ էր ստեղծում վարորդների և ուղևորների համար: Դրանից հատկապես բողոքում էին Հայաստանից Վրաստան ուղևորվող օտարերկրացի զբոսաշրջիկները: Իսկ գարնանը՝ ձնհալից ու անձրևներից հետո, անհարմարությանն ավելանում էր նաև քարաթափումների, փլուզումների վտանգը: «Ճանապարհային դեպարտամենտ» ՊՈԱԿ-ի տեղեկացմամբ հիմնանորոգման աշխատանքներում հաշվի է առնվել նաև այդ վտանգը: Քարաթափումները կանխելու նպատակով ճանապարհի հիմնանորոգման ընթացքում կիրառվում են տարբեր մեթոդներ՝ մասնավորապես‚ հողային պաստառի շեպերի վրա ամրացվում են պաշտպանիչ հատուկ ցանցեր‚ կատարվում է ժայռային հանույթ‚ քարաթափումներից ու սողանքներից խուսափելու համար կառուցվում են հենապատեր և այլն։ «Սանահին» կայարան-Հաղպատ հատվածում առկա է մեծածավալ՝ շուրջ 70 մ բարձրությամբ‚ ժայռային զանգվածի հորատապայթեցման խնդիր։ Քննարկվում է այդ տեղամասում գալերեա կառուցելու տարբերակը, որը թույլ կտա իրականացնել փոքրածավալ ժայռային հանույթ և ճանապարհը պաշտպանել քարաթափումներից։ Մ6 միջպետական ճանապարհի Հաղպատ-Բագրատաշենի սահմանային անցակետ տարածքի հիմնանորոգումն իրականացնող կապալառուի՝ իտալական «Սուարդի» կազմակերպության առաջարկով Քարկոփ-Վրաստանի հետ սահմանային անցակետ հատվածում կիրառվում է ապակեթելքավոր ցանցը‚ որը նվազագույնի կհասցնի ճանապարհի պատվածքին առկա ճաքերի՝ դեպի վերին շերտեր տարածման հավանականությունը: Ծրագրի շրջանակում Թումանյան-Բագրատաշեն մաքսային անցակետ հատվածում կհիմնանորոգվի 8 կամուրջ Մ6‚ Վանաձոր-Ալավերդի-Վրաստանի սահման միջպետական ավտոճանապարհի վերականգնման և բարելավման ծրագրի շրջանակներում Թումանյան-Բագրատաշեն մաքսային անցակետ հատվածում վերանորոգվելու և հիմնանորոգվելու է ընդհանուր առմամբ 8 կամուրջ, այդ թվում՝ Ալավերդի քաղաքի երկու կամուրջները: Ալավերդի քաղաքի երկու կամուրջների հիմնանորոգումը դեռ չի մեկնարկել‚ մյուս կամուրջների վերանորոգման աշխատանքներն ընթացքի մեջ են։ Ալավերդու 2 կամուրջները ծառայում են ինչպես քաղաքի, այնպես էլ միջպետական ճանապարհի երթևեկությանը: Կամուրջներից մեկը կառուցվել է 1961թ.-ին, մյուսը՝ 1989 թ.-ին: 2-րդ կամրջի կառուցման անհրաժեշտությունն Ալավերդիում առաջացել է հին կամրջի վթարային վիճակի պատճառով, երբ Ալավերդու ավտոձեռնարկության ավտոբուսների և բեռնատարների վարորդները 1989թ. հունիսին գործադուլ էին արել և իշխանությունից պահանջել ապահովել իրենց երթևեկության անվտանգությունը: Արդյունքում որոշվել է կառուցել երկրորդ կամուրջը։ Չնայած վտանգավորությանը՝ հին կամրջի շահագործումն այս տարիների ընթացքում շարունակվել է: Այս տարի վերջապես Ալավերդու կամուրջները կհիմնանորոգվեն, ու վարորդներն այն առաջվա պես ահուդողով չեն անցնի: Մ6 միջպետական ավտոճանապարհի հիմնանորոգման ավարտը նախատեսվում է 2020թ․ նոյեմբերին։ Ի դեպ, «Ճանապարհային դեպարտամենտ» ՊՈԱԿ-ից տեղեկացրին, որ նոր տեսակի կորոնավիրուսային հիվանդության հետևանքով սահմանված արտակարգ դրությամբ պարտադրված դադարը զգալի ազդեցություն չի ունեցել ճանապարհի հիմնանորոգման տեմպերի վրա: Իսկ շինարարության ընթացքում կապալառուների կողմից պահպանվում են նոր տեսակի կորոնավիրուսային հիվանդության տարածումը կանխելու համար սահմանված միջոցառումները՝ աշխատակիցների ջերմաչափում‚ օգտագործվող սարքավորումների ու մեխանիզմների ախտահանում համապատասխան նյութերով և այլն։