43 հարկանի Էյժա Սքուեր Թաուեր 1 (Asia Square Tower 1) նորագույն կանաչ երկնաքերը կառուցվել է 3 տարում Սինգապուրի Կենտրոնական գործարար թաղամասում (Central Business District), տեղեկացնում է Asiaone կայքը: Վերջին տարիներին Սինգապուրն աչքի է ընկնում իրականացված մի շարք կանաչ նախագծերով, քանի որ երկրում շինությունների նախագծման հիմնական փուլերից մեկը դրանց բնապահպանական բարձր մակարդակի ապահովումն է: Տարածաշրջանի ամենականաչ նախագծի բացման հանդիսավոր արարողությունը տեղի է ունեցել նոյեմբերի 11-ին: Շինությունը համարվում է տարածաշրջանի առաջին նախագիծը, որն իրականացնում է թափոնների վերամշակում: Բանն այն է, որ այն համալրված է բիոդիզելային սարքավորումներով, որոնք իրականացնում են սննդի թափոնների յուղերի վերամշակում: Երկնաքերում տեղադրված են նաև այնպիսի համակարգեր, որոնք օգտագործում են օդորակիչների արտադրած ջուրը ոռոգման նպատակներով: Այս աշտարակը նախագծվել է «աշխատել, խաղալ, ապրել, աճել» սկզբունքով, հետևաբար կան դրա համար բոլոր հարմարությունները: Էյժա Սքուեր Թաուեր 1 աշտարակում կան գրասենյակային տարածքներ, հյուրանոցային համալիր, ռեստորան, մարզադահլիճ և խանութներ: Մինչ օրս աշտարակի 60 տոկոսն արդեն վարձակալված է: Շինության գլխավոր վարձակալը համարվում է Սիթիբանկը (Citibank) իր 9 հարկերով, երկրորդ տեղում է Google ընկերությունը՝ 3.5 հարկով, իսկ Փյուր ֆիթնես (Pure Fitness) ընկերությունը վարձակալել է 1 հարկ: Ըստ նախնական տվյալների՝ Վեսթին Հոթել (Westin Hotel) հյուրանոցային համալիրը կլինի նախագծի 2-րդ աշտարակում, որը նախատեսվում է շահագործման հանձնել 2013 թ-ին:

Այս շաբաթ ամերիկյան հայտնի PNC ֆինանսական ծառայությունների խումբը (PNC Financial Group), հայտարարել է, որ պատրաստվում է կառուցել աշխարհի «ամենականաչ» երկնաքերը: PNC Պլազա աշտարակը (Tower at PNC Plaza) կկառուցվի Պիտսբուրգի կենտրոնում, այն նույն վայրում, որտեղ ավելի քան 150 տարի գործում է ընկերություն գլխավոր գրասենյակը: Ընկերության նոր գլխավոր գրասենյակի շենքը կունենա 40 հարկ և շահագործման կհանձնվի 2015թ-ին: Ընդհանուր 75 հազար քառակուսի մետր տարածքով PNC Պլազան կլինի ընկերության ամենամեծ շինությունը Պիտսբուրգում: Աշտարակը կունենա կանաչապատ տանիք և 300 տեղով ստորգետնյա ավտոկայանատեղի: Մոտ 400 մլն դոլար արժողությամբ նախագիծը կստեղծի ավելի քան 2500 նոր աշխատատեղ: Ընկերության նախկին շենքի ապամոնտաժման աշխատանքները նախատեսվում է սկսել 2011 թ-ի վերջին, իսկ նոր աշտարակի շինարարությունը 2012 թ-ի գարնանը: PNC Group-ն ակնկալում է աշտարակը շահագործման հանձնել 2015 թ-ի ամռանը: Նախագծի հեղինակն է աշխարհի խոշորագույն ճարտարապետական Գենսլեր (Gensler) ընկերության պիտսբուրգյան գրասենյակը: Պիտսբուրգյան ՓիՋեյ Դիք (PJ Dick) ընկերությունը հանդես կգա որպես շինարարության կառավարիչ, իսկ Բուրո Հափոլդ (Buro Happold) ընկերության բրիտանական գրասենյակը՝ որպես տեխնիկական խորհրդատու: Որպես կանաչ շինարարության խորհրդատու՝ հանդես կգա Պալադինո և Ընկերություն (Paladino & Company) ընկերությունը: Շինության ճակատային հատվածը կլինի երկշերտ ապակուց, ինչը կբարձրացնի էներգիայի խնայողության արդյունավետությունը, ինչպես նաև բնական օդափոխության հնարավորություն կտա: Գերժամանակակից սարքերն ու սենսորները հնարավորություն կտան բարձրացնել ջեռուցման և սառեցման համակարգերի էֆեկտիվությունը: Աշտարակի բոլոր աշխատասենյակներում առավելագույնս կօգտագործվի արևի լույսը՝ նվազեցնելով արհեստական լուսավորության անհրաժեշտությունը օրվա ընթացքում: Շինության նախագծման հարցերով զբաղվող խումբը այժմ ուսումնասիրում է բոլոր այլընտրանքային էներգիայի աղբյուրների օգտագործման տարբերակներ, որոնք հնարավորություն կտան շենքի շահագործման ընթացքում զգալիորեն նվազեցնել ածխաթթու գազի արտանետումը շրջակա միջավայր: Աշտարակի կանաչապատ տանիքը կհավաքի անձրևաջրերը շինության այլ ջրային կարիքները հոգալու նպատակով: PNC Group-ը, ներգրավված ավանդների ծավալով ԱՄՆ-ի 6-րդ բանկը, իր առաջին «կանաչ» շինությունը շահագործման է հանձնել 2000 թ-ին: 60 հազար քառակուսի մետր տարածքով PNC -ի Ֆըրսթսայդ կենտրոնն (Firstside Center) ժամանակին առաջին LEED-լիցենզավորված շինությունն էր աշխարհում: Նշենք նաև, որ PNC Group-ը տիրապետում է աշխարհի ամենաշատ քանակությամբ «կանաչ» կառույցների, իսկ վերջերս, ընկերությունը շահագործման է հանձնել իր Վաշինգտոնյան նոր գրասենյակի «կանաչ» շենքը՝ Սպիտակ Տնից մի քանի թաղամաս հեռավորությամբ:

Տասներեք տարվա գործունեությունից հետո Google-ը որոշել է ունենալ իր սեփական հասցեն: Համացանցում ամենամեծ որոնողական ցանցի ղեկավարները որոշել են նախագծել և կառուցել ընկերության գլխավոր գրասենյակի շենքը: Շենքի նախագծման աշխատանքներով զբաղվելու է գերմանական Ինգենհովեն ճարտարապետական (Ingenhoven Architects) ընկերությունը: 2011 թ-ին Google-ը մտադիր է աշխատակազմը համալրել ևս 6 հազար մասնագետով, և սա շարունակական բնույթ է կրելու, ուստի նոր և մեծ գրասենյակը նաև անհրաժեշտություն է: Ինչպես տեղեկացնում է Mercury News ինտերնետային կայքը, Google-ն իր գլխավոր գրասենյակը կկառուցի Կալիֆորնիա նահանգում գտնվող փոքրիկ Մաունթին-Վյու (Mountain View) քաղաքում` Պալո-Ալտո (Palo Alto) քաղաքից հարավ Մոֆեթ (Moffett) դաշնային օդանավակայանի հարևանությամբ: Այս տարվա մարտին Google-ը և Մաունթին-Վյուի (Mountain View) քաղաքապետարանը համաձայնագիր են կնքել՝ ընկերությանը 53 տարով վարձակալության հանձնել 9,4 ակր հողատարածք: Նույն համաձայնագրով Google-ը պարտավորվել է վճարել 30 մլն դոլար կանխավճար: Նշենք, որ դեռևս 2007 թ-ին Google-ը և Մաունթին-Վյուի (Mountain View) քաղաքապետարանը մեկ այլ հողի (9,2 ակր) վարձակալության համաձայնագիր էին կնքել: Այս գործարքները թույլ կտան ինտերնետային հսկային սկսել կառուցապատման աշխատանքները և ստանալ մոտ 55 300 քռ. մ. գրասենյակային և հետազոտական տարածքներ: Ինգենհովեն ճարտարապետական ընկերությունն աշխարհում հայտնի է «կանաչ ճարտարապետության» ոլորտում իրականացված հետաքրքիր նախագծերով: Վերջինս նախագծեր է իրականացրել Եվրոպայում, Ասիայում և Ավստրալիայում, որոնց թվում են՝ Եվրոպական ներդրումային բանկի գլխավոր գրասենյակի շենքը՝ խողովակի տեսքով՝ պատրաստված պողպատից և ապակուց, Շտուտգարտի «էկոլոգիապես մաքուր» երկաթուղային կայանը, որը չունի ոչ մի թունավոր արտանետում, ինչպես նաև ջեռուցման, սառեցման և օդափոխության արհեստական համակարգեր: Google-ի ներկայացուցիչը Mercury News ինտերնետային կայքին հայտնել է, - «Մենք խնդրել ենք նախագծել ամենականաչ և հնարավորինս էկոլոգիապես ամենաանվնաս շենքը»: Այս նախագծի մանրամասները դեռևս հայտնի չեն, սակայն Մաունթին-Վյուի (Mountain View) քաղաքապետարանի ներկայացուցիչներն ասում են, որ շինարարությունը կսկսվի 2012 թ-ին:

Ամենայն հավանականությամբ, էկո քաղաքները շուտով կդառնան քաղաքաշինության մեջ առավել նախընտրելի զարգացումներից: Այսպես՝ օրինակ, համակարգչային հսկա Apple-ը, որը 2010 թվականին բարձր տեխնոլոգիաների ոլորտում դարձավ աշխարհի խոշորագույն ընկերությունը, Սիլիկոնային հովտի Կուպերտինո փոքրիկ քաղաքում հողատարածք է ձեռք բերել, «կանաչ քաղաքաշինության» նպատակով: Նշենք, որ Կուպերտինոյում, որի շուրջ բազմաթիվ տեխնոլոգիական ընկերությունների գրասենակներ են կենտրոնացած, արդեն գործում է Apple-ի կենտրոնական գրասենյակը, բայց, այնուամենայնիվ, «Կանաչ» քաղաք կառուցելու համար անցյալ ամիս Ստիվ Ջոբսի կորպորացիան HP-ից (Hewlett-Packard) մոտ $ 300 մլն արժողությամբ 40 հա հողատարածք ձեռք բերեց: Նոր Apple City քաղաքը ընկերության հին գրասենյակների հետ կապված է լինելու ստորգետնյա թունելների համակարգով, և ամենակարևորը՝ քաղաքը անհրաժեշտ էներգիան կքաղի վերականգնվող աղբյուրներից: Նախագիծը կիրականացվի առաջատար բրիտանական Foster + Partners ճարտարապետական բյուրոյի կողմից: Կազմակերպության ղեկավար Լորդ Նորման Ֆոստերը ժամանակակից ամենահռչակավոր ճարտարապետներից մեկն է: Նա այնպիսի նախագծերի հեղինակ է ինչպիսիք են, «վարունգ» երկնաքերը և Millennium կամուրջը Լոնդոնում, Hearst Tower –ը Նյու Յորքում, Ռեյխստագի վերանորոգված գմբեթը Բեռլինում և շատ ուրիշները: Ռուսաստանում Ֆոստերը հայտնի է որպես «Ռոսիա» հյուրանոցային համալիրի և Պուշկինի անվան թանգարանի վերակառուցման ծրագրերի հեղինակ, Սանկտ Պետերբուրգում՝ «Նոր Հոլանդիա» համալիրի մշակութային և ժամանցային հաստատության վերակառուցման հեղինակ: Ֆոստերը հարյուրավոր միջազգային մրցանակների և պարգևների դափնեկիր է: Apple City -ն նման է լինելու Ֆոստերի մեկ այլ ստեղծագործությանը՝ Մասդար էկո-քաղաքին, որի շինարարությունը 2008 թվականին սկսվել է Աբու Դաբիում, ՄԱԷ, և մոտ $ 22 մլրդ կարժենա: Ներկայումս Մասդարը իր տեսակի մեջ ամենախոշոր ծրագիրն է հանդիսանում աշխարհում:

Կիպրոսի և Հունաստանի կղզիների խոշորագույն կառուցապատող Լեպտոս Գրուպը սկսել է Neapolis Smart EcoCity էկո-քաղաքի կառուցումը: Քաղաքը գտնվելու է Պաֆոս քաղաքի տարածում՝ առասպելական Աֆրոդիտեյի Այգիներում: Նմանատիպ նախագծերի շարքում Neapolis Smart EcoCity- քաղաքը Կիպրոսի ամենախոշոր և աշխարհի խոշորագույններից մեկ է լինելու: Լեպտոս Գրուպը կառուցապատման գործունեության 50 տարվա փորձ ունի, և ծրագրի հաջողությունը երաշխավորված է գրեթե 100 տոկոսով: Դեռևս 1960 թվականին Մայքլ Լեպտոսի կողմից հիմնադրված կազմակերպության հիմնական գաղափարախոսություններից մեկը հիմնված է բնության հետ համահունջ շինարարության իրականացման, շրջակա միջավայրի սիրո և հարգանքի վրա: Քաղաքն իր մեջ բնակության, կրթության, բիզնեսի վարման, բուժման և հանգստի հիանալի պայմաններ է ներառելու: Նախագիծը նախատեսվում է ավարտին հասցնել մինչ 2018 թվականը ավելի քան 2.5 մլրդ եվրոյի կառուցապատման արժեք կստեղծի: Նախագծի առաջին փուլի արժեքը մոտավորապես կկազմի 171 մլդ. եվրո ու ներառում է համապատասխան ենթակառուցվածքների ստեղծումը, հիվանդանոցնի և մի քանի սպասարկող բնակելի շենքերի կառուցումը: Ծրագրի իրականացումը մինչև 2018 թվականը մոտ 8000 հավելյալ աշխատատեղեր կստեղծի, ինչով էլ էապես կնպաստի տարածաշրջանի տնտեսական զարգացմանը: