Ամերիկյան Apple կորպորացիան դեռևս չի հասցրել ավարտին հասցնել իր նոր գլխավոր գրասենյակի շինարարությունը, սակայն արդեն ընտրել է մեկ այլ ամբիցիոզ նախագիծ իր երկրորդ գրասենյակի համար: Ինչպես տեղեկացնում է business Insider պարբերականը, «Սիլիկոնե հովտում» Apple ընկերության երկրորդ յուրօրինակ գլխավոր գրասենյակը կկոչվի «Սենթրալ ենդ Վոլֆ» (Central & Wolfe): Նորագույն գրասենյակային կենտրոնը նախատեսվում է կառուցել Կուպերտինո քաղաքից հյուսիս գտնվող Սեննիվեյլ (Sunnyvale) քաղաքում: Ըստ նախնական տվյալների՝ որպես շինարարության կառուցապատող ընկերություն հանդես կգա «Լենդբենք Ինվեսթմենթս» (Landmark Investments) ընկերությունը, իսկ նախագիծը կիրականացնի ամերիկյան «Էյջ Օ Քեյ» (HOK) ճարտարապետական ընկերությունը: Ինչպես պնդում է Quartz ինտերնետային պարբերականը, Apple ընկերությունը ոչ թե կգնի այս բազմաֆունկցիոնալ համալիրը, այլ վարձակալությամբ կվերցնի այն: Կառուցապատող ընկեկերության հետ պայմանագիրն արդեն կնքված է, սակայն դեռևս անհայտ են շինարարության ժամկետները: Նորագույն բազմաֆունկցիոնալ համալիրը նախատեսվում է կառուցել ԱՄՆ-ի ամենահանգիստ քաղաքներից մեկում՝ 7,3 հեկտար տարածքի վրա: Ըստ նախնական տվյալների՝ Apple ընկերության գլխավոր գրասենյակի շենքը կունենա եռաթերթ ծաղկի տեսք, որի թերթիկները կշրջապատեն 500 հանդիսատեսի համար նախատեսված բացօթյա ամֆիթատրոնը: Ամֆիթատրոնի հարևանությամբ կարող են տեղակայվել սրճարան, մարզասրահ, խորհրդակցությունների սրահ, խանութ-սրահ, վարսավիրանոց, բանկի մասնաճյուղ, քիմմաքրման կետ, լվացքատուն, որոշ մարզական հրապարակներ և անգամ հեծանիվների վերանորոգման կենտրոն: Նախագծի տարբերակիչ առանձնահատկությունը զբոսուղիների և կանաչ տարածությունների հսկայական քանակությունն է; Եթե հաշվի առնվի այն հսկայական այգին, որ պետք է կառուցվի շինության տանիքին, ապա «Սենթրալ ենդ Վոլֆ» համալիրի կանաչ մակերեսը կհասնի 79 տոկոսի, եթե հաշվի չառնվի՝ 53 տոկոսի: Քայլուղիների ընդհանուր երկարությունը կկազմի 3 կիլոմետր, որոնց կեսը կտեղակայվի անմիջապես համալիրի տանիքին: Ըստ նախնական տվյալների՝ համալիրի շենքը կունենա 6 հարկ, որից 2-ը ստորգետնյա՝ նախատեսված ավտոկայանատեղիի համար: Յուրաքանչյուր հարկի բարձրությունը կկազմի 4 մետրից ավելի, իսկ յուրաքանչյուր աշխատատեղի հեռավորությունը պատուհանից կկազմի 14 մետր: Յուրաքանչյուր աշխատակից ամֆիթատրոնի կենտրոնից իր աշխատատեղ կկարողանա հասնել 2,5 րոպեում: Համալիրում գրասենյակային տարածքների ընդհանուր մակերեսը կկազմի 68,7 հազար քառակուսի մետր: Նշենք նաև, որ համալիրը կառուցվելու է «բաց տարածություն» (open space) սկզբունքով, ինչը, ըստ նախագծի հեղինակների, հնարավորություն կտա ավելի սերտացնել շփումն աշխատակիցների միջև և ավելի կհեշտացնի առաջացած խնդիրների լուծումը:

Օրերս Apple ընկերությունը հայտարարել է իր ծրագրերի մասին կառուցել 2 նոր տվյալների կենտրոն Դանիայում և Իռլանդիայում, որոնք պետք է օգտագործենք բացառապես վերականգնվող աղբյուրներից ստացվող էներգիա: Ըստ նախնական տվյալների նախագծի մեջ կատարված ներդրումները կկազմեն 1,9 մլրդ ԱՄՆ դոլար: Հայտարարված տվյալների կենտրոններից մեկը կկառուցվի արևմտյան Իռլանդիայի Ատենրայ բնակավայրում, իսկ մյուսը կենտրոնական Դանիայի Վիբորգ քաղաքում: Շինարարության ավարտից հետո, որը նախատեսված է 2017 թ-ին, տվյալների կենտրոնները ամբողջությամբ կաշխատեն վերականգնվող էներգիայով և կապահովեն Apple ընկերության այնպիսի օնլայն ծառայությունների աշխատանքը, ինչպիսին են՝ iTunes Store, App Store, iMessage, Maps և Siri: Նշենք, որ յուրաքանչյուր կառույցի մակերեսը կկազմի 166 հազար քառակուսի մետր: Ատենրայի տվյալների-կենտրոնը բացի հիմնական շինությունից կունենա նաև բացօթյա կրթական կենտրոն՝ նախատեսված տեղացի աշակերտների համար, ինչպես նաև զբոսուղի: Վերջինս կտեղակայվի այնպիսի հողատարածքի վրա, որը նախկինում օգտագործվել է ոչ տեղական ծառեր աճեցնելու նպատակով: Ընկերությունը նաև պարտավորվել է զբոսուղում տնկել բացառապես տեղական ծագման ծառատեսակներ: Դանիական Վիբորգ քաղաքում կառուցվող տվյալների կենտրոնը հարակից համայնքների համար կծառայի նաև որպես ջեռուցման մատակարար: Բանն այն է, որ այստեղ կներդրվի այնպիսի համակարգ, որը կկառավարի սերվերների արտադրած ջերմությունը և կուղղի այն դեպի հարևան համայնքների ջեռուցման համակարգեր: Ի դեպ, կենտրոնը կկառուցվի Դանիայի խոշորագույն էլեկտրական ենթակայանի հարևանությամբ, ինչը վերացնում հավելյալ ենթակառուցվածքի անհրաժեշտությունը: Ընկերությունը տարածած մամլո հաղորդագրության մեջ չի մանրամասնում՝ հատկապես էներգիայի ինչպիսի աղբյուր է օգտագործելու, բայց, ամենայն հավանականությամբ, դա քամին է լինելու: Բացի այդ, ինչպես պնդում է ընկերությունը, այն պատրաստ է սերտորեն համագործակցել տեղական ընկերությունների հետ վերականգնվող էներգիայի արտադրման այլ ծրագրերի շուրջ ևս:

Տեխնոլոգիաների հսկա Apple ընկերությունը իրավունք է ստացել Հյուսիսային Կարոլինայում կառուցել իր երրորդ արևային էլեկտրակայանը: Անցած շաբաթ Կլերմոնտ քաղաքի իշխանությունները հավանություն են տվել ընկերության կողմից ներկայացված նախագծին, որը ենթադրում է քաղաքային հողատարածքի օգտագործում նոր արևային էլեկտրակայան կառուցելու նպատակով: 405 հազար քառակուսի մետր մակերեսով էլեկտրակայանի կառուցման համար ներդրումը կկազմի 55 մլն ԱՄՆ դոլար: 17.5 մեգավատ հզորությամբ կայանի շինարարության ժամանակ նախատեսվում է ստեղծել 75 աշխատատեղ: Արևային էլեկտրակայանի շինարարության համար հատկացված հողատարածքը չի գտնվում քաղաքի սահմաններում: Պաշտոնական տվյալներով այն գտնվում է քաղաքային իշխանությունների արտատարածքային իրավասության տակ, այնուամենայնիվ իշխանությունները տարածքի տրամադրման որոշում են կայացրել: Ի դեպ, վերոնշյալ համաձայնագիրը մեկ այլ կետ էլ է նախատեսում, համաձայն որի, Apple ընկերության և քաղաքային իշխանությունների միջև տարածքների փոխանակում է կատարվել: Ընկերությունը քաղաքին է հատկացրել 2 հողատարածք, որոնք նախատեսված են կանաչ զբոսուղիների (արահետներ, հեծանվորդների և մարզիկների համար` շրջապատված բուսականությամբ), հանրային հանգստի և այլ հանրային միջոցառումների համար: Նշենք, որ շինարարության ավարտից հետո այս արևային էլեկտրակայանը կդառնա երրորդը: 20 մեգավատ հզորությամբ առաջին արևային էլեկտարակայանը ընկերությունը կառուցել է Հյուսիսային Կարոլինայի Մեյդեն քաղաքում, իսկ երկրորդ արևային էլեկտրակայանի, դարձյալ 20 մեգավատ հզորությամբ, շինարարությունը ավարտվել է 2013 թ-ին Կոնովերում: Նշենք, որ հենց այս կայաններն են սնում Մեյդեն քաղաքի iCloud տվյալների կենտրոնը էլեկտրաէներգիայով: Ինչպես պնդում է Apple ընկերությունը այսօր ընկերության բոլոր տվյալների կենտրոնները սնուցվում են բացառապես այլընտրանքային էներգիայով:

Կուպերտինոյի քաղաքային նախագծման Խորհուրդը հաստատել է Apple ընկերության նոր գլխավոր գրասենյակի նախագիծը, չնայած այն փաստին, որ վերջնական որոշումը պետք է ընդունվի 2014 թ-ի մայիսից ոչ շուտ: Այս յուրօրինակ գրասենյակային կառույցը հասարակությանն է ներկայացվել 2011 թ-ի կեսերին ընկերության հիմնադիր տնօրեն Սթիվ Ջոբսի կողմից: «Ֆոսթեր+Փարթներս» հանրահայտ ճարտարապետական ընկերության կողմից նախագծված և ինչպես Սթիվ Ջոբսն էր անվանում՝ աշխարհի լավագույն գրասենյակային համալիրի շինարարությունը նախատեսվում է ավարտել 2016 թ-ին: 260 հազար քառակուսի մետր ընդհանուր մակերեսով գրասենյակային համալիրը կկարողանա աշխատատեղով ապահովել 14 հազար աշխատակիցների: Համալիրում հիմնականում կլինեն գրասենյակային տարածքներ, ինչպես նաև մարզասրահ, լսարան, 3000 այցելուի համար նախատեսված սրճարան և 6000 ծառերով շրջապատված 600 այցելուի համար նախատեսված ռեստորան: Սթիվ Ջոբսի` առաջին անգամ նախագծի ներկայացումից հետո շատ բան է փոխվել, ինչպես գծագրերում, այնպես էլ բյուջեյում: Բանն այն է, որ նախագծի ընդհանուր բյուջեն 3 մլրդ ԱՄՆ դոլարից բարձրացել է 5 մլրդ-ի: Ենթադրվում է, որ շինարարության առաջին փուլում, որը նախատեսվում է սկսել 2014 թ-ի հունիսին, պետք է ապամոնտաժվի շինհրապարակում գտնվող 26 շինությունները և սկսվեն հողային աշխատանքները, իսկ ինքնաթափերը 6 ամիս և 24 ժամ շարունակ կիրականացնեն այս աշխատանքները:

Կալիֆորնիա նահանգի Լոս Ալտոս քաղաքի պատմական ժառանգության Խորհուրդը որոշել է քննարկել Սթիվ Ջոբսի մանկության տանը պատմական հուշարձանի աստիճան շնորհելու հարցը: Վերոնշյալ քննարկումը տեղի կունենա սեպտեմբերի 30-ին, որի ժամանակ խորհրդի 7 անդամները պետք է կողմ քվեարկեն, որպեսզի տանը շնորհվի նմանատիպ աստիճան: Ինչպես տեղեկացնում է CNN –ը, հենց այս տանն է Սթիվ Ջոբսը ստեղծել իր առաջին Apple համակարգիչը: Ջոբսն իր խնամակալ ծնողների հետ տեղափոխվել է Լոս Ալտոսում գտնվող այս տուն, երբ սովորում էր միջնակարգ դպրոցում: Մեկհարկանի ագարակատան տիպի տանը կից կա ավտոտնակ, որտեղ էլ Սթիվը Ջոբսը և նրա գործընկեր Սթիվ Վոզնյակը հավաքել են իրենց առաջին 50 Apple 1 համակարգիչները, որոնք հետագայում վաճառել են յուրաքանչյուրը 500 ԱՄՆ դոլարով: Դրանից ամիսներ անց, 1977 թ-ին, նրանք հարևան Կուպերտինո քաղաքում պաշտոնապես գրանցել են Apple Computer ընկերությունը: Ըստ Zillow անշարժ գույքի գործակալության գնահատման՝ 166.5 քառակուսի մետր ընդհանուր մակերեսով տունը, որը կառուցվել է 1952 թ-ին, գնահատվում է 1.5 մլն ԱՄՆ դոլար: Այն ունի հյուրասենյակ, 3 ննջարան և 2 լոգարան: