Հղում կատարելով Թաթարստանի փոխվարչապետ, կապի և տեխնոլոգիաների նախարար Նիկոլայ Նիկիֆորովի հայտարարությանը՝ digit.ru կայքը տեղեկացնում է՝ 2012 թ-ին Թաթարստանում նախատեսվում է սկսել ՏՏ-համայնքի (IT-Village) շինարարությունը, որտեղ պիտի ապրեն և աշխատեն տեղեկատվական տեխնոլոգիաների ոլորտի աշխատակիցները: Թաթարստանի Վերխնեուսլոնյան (Верхнеуслонский) մարզում 12 մլն քառակուսի մետր մակերեսով ՏՏ-համայնքի կառուցման վերաբերյալ որոշումն ընդունվել է 2010թ-ին: ՏՏ-համայնքի հատակագծի նախագծման նպատակով Թաթարստանը պայմանագիր է ստորագրել սինգապուրյան «ԱռԷսՓի Արքիթեքթս և Էնջինիրս» (RSP Architects&Engineers) ընկերության հետ: Մայրաքաղաք Կազանից 35 կիլոմետր հեռավորության վրա կառուցվող համայնքում պետք է ստեղծվեն ժամանակակից կյանքի համար անհրաժեշտ բոլոր պայմանները: Սինգապուրյան կազմակերպությունը համայնքը նախագծում է՝ առաջնորդվելով «Ապրի, սովորի, աշխատի և հանգստացի» նշանաբանով: Նախագիծը կիրականացվի պետական-մասնավոր համագործակցության դասական տարբերակով: Նախնական տվյալներով նախագծի իրականացման բյուջեն կկազմի 90-120 մլրդ ռուբլի: Նախարարի խոսքերով՝ նախագծի բյուջեն հիմնականում կախված կլինի այն կառուցապատող ընկերություններից, որոնք կմասնակցեն դրա իրականացմանը: Իսկ շինարարությունը նախատեսվում է ավարտել 5-7 տարվա ընթացքում: Նախատեսվում է ՏՏ-համայնքի շինարարությունը սկսել 2012 թ-ի գարնանը: Ինչպես հայտարարել է նախարարը, մինչև այս տարվա վերջ նախատեսվում է ավարտել նախագծային աշխատանքները: Ինչպես նաև մինչև տարեվերջ նախատեսվում է ստեղծել ԲԲԸ, որը կղեկավարի նախագիծը:
Մոտ 3 ամսից Ռուսաստանի Մեծ Թատրոնը կվերաբացի իր դռները արվեստի սիրահարների և լայն հասարակության առջև: Հոկտեմբերի 28-ին տեղի կունենա բացման հանդիսավոր արարողությունը, որը ուղիղ եթերով կհեռարձակվի աշխարհի ավելի քան 600 կինոդահլիճներում: Մեծ Թատրոնը լայնածավալ վերականգնողական աշխատանքների համար փակվել էր դեռևս 2005 թ-ի հուլիսի 2-ին: Նախնական ծրագրի համաձայն՝ այն պետք է վերաբացվեր 2008 թ-ին, սակայն շինարարական աշխատանքները սկսելուց հետո պարզ դարձավ, որ շինարարները չեն կարող տեղավորվել նշված ժամանակահատվածում, արդյունքում փոխվեց նաև գլխավոր կապալառուն: Վերականգնողական աշխատանքների սկսելուն Թատրոնը սպասում էր ավելի քան 115 տարի: Հիմնական խնդիրներից մեկը թատրոնի շենքը նոր հիմքի վրա տեղափոխելն էր, քանի որ հինը քանդվելու եզրին էր, շինարարներն անգամ վախենում էին մոտենալ: Վերականգնողական աշխատանքների արդյունքում Մեծ Թատրոնի հիմքում ներդրվել էն մոտ 7 հազար պողպատե խփովի ցցեր, իսկ նախկին կաղնե ցցերը հանվել են: Ռուսաստանի Պետական ակադեմիական մեծ թատրոնի տնօրեն Գենադի Իսկանովի խոսքերով, նա ամենից շատը վախենում էր կդիմանա՞ արդյոք շինությունը տեղափոխմանը, չի փլուզվի հին հիմքից նորին տեղափոխելու ժամանակ: Նոր հիմքի շնորհիվ թատրոնի նկուղային հարկում հսկա տարածք է ազատվել տարբեր տեխնիկական սարքավորումներ տեղադրելու համար: Արդյունքում թատրոնի ընդհանուր մակերեսը 40 հազար քառակուսի մետրից դարձել է 80 հազար: Ստորգետնյա 5 հարկերում կտեղադրվեն բեմի բարձրացման, թեքման բարդ մեխանիզմները, կպահվեն դեկորացիաները, կլինի նաև փորձերի մեծ դահլիճ: Ծրագրի գլխավոր կապալառու Սումա Կապիտալ (Сумма Капитал) ընկերության ներկայացուցիչ Միխայիլ Սիդորովի խոսքերով, վերանորոգման աշխատանքների հիմնական ձեռքբերումը թատրոնի 19-րդ դարի ակուստիկայի վերականգնումն է: Դրա համար հիմնական դահլիճը դարձրել են ավելի ընդարձակ՝ նախկին 2100 նստատեղի փոխարեն թողնելով միայն 1740-ը: Շինարարական աշխատանքների ընթացքում դահլիճի հատակից և նվագախմբի պատվանդանից հանել են ամբողջ բետոնե ծածկը՝ փոխարինելով այն եղևնու փայտով, ինչպես նաև փոխել են նստատեղերի ծածկոցներն ամեն ինչ ավելի համահունչ դարձնելու նպատակով: Այժմ իրականացվում է թատրոնի գլխավոր ճակատի արտաքին հիմնասյուների մաքրման աշխատանքների 2-րդ փուլը: Ամեն ինչ արվում է, որպեսզի վերջիններիս վերադարձնեն իրենց բնական՝ փղոսկրի գույնը:
Ինչպես տեղեկացնում է ռուսական lenta.ru կայքը, Տաշիր ընկերությունը Յարոսլավլում բացել է 120 մլն ԱՄՆ դոլար արժողությամբ ՌԻՈ առևտրա-ժամանցային համալիրը: 70 հազար քառակուսի մետր ընդհանուր մակերեսով համալիրը գտնվում է Տուտաևյան մայրուղու վրա, քաղաքի 2 խոշորագույն շրջանների՝ Բրագինոյի և Կիրովսկիի սահմանագծին: Համալիրում տեղակայված են առևտրային ցուցասրահ, մթերային հիպերմարկետ, հիպերմարկետ-DIY, կենցաղային և էլեկտրոնային սարքավորումների հանրախանութ, Սպորտմաստեր ապրանքանիշի մասնագիտացված խանութ-սրահ, Սինեմա-սթար ցանցի 4 դահլիճից բաղկացած կինոդահլիճ, մարզական և ժամանցի սրահներ. բոուլինգ և բիլիարդ, ռեստորաններ և ավտոկայանատեղի նախատեսված 800 ավտոմեքենայի համար: Յարոսլավլի ՌԻՈ համալիրը Տաշիր ընկերության 16-րդ գործող առևտրա-ժամանցային կենտրոնն է: Մոտ ապագայում նախատեսվում է Վոլոգդայում և Սանկտ Պետերբուրգում ևս բացել ՌԻՈ ապրանքանիշի առևտրային համալիրներ: Ռուսաստանի խոշորագույն անշարժ գույքի հոլդինգներից մեկը՝ Տաշիր գրուփը, հիմնադրել է Սամվել Կարապետյանը 1999 թ-ին: Ընկերությունը Մոսկվայում և Ռուսաստանի այլ շրջաններում կառուցում է առևտրա-ժամանցային կենտրոններ, գրասենյակային, բնակելի և պահեստային համալիրներ, հյուրանոցներ: 2011 թ-ի դրությամբ ընկերությունը կառուցել է մոտ 60 առևտրային նշանակության կենտրոն ավելի քան 1.2 մլն քառակուսի մետր ընդհանուր մակերեսով: Նշենք նաև, որ ռուսական ՌԲԿ (РБК) ամսագիրը, իր հունիսյան համարում հրապարակել էր Ռուսաստանի խոշորագույն կառուցապատողների ցուցակը: Այդ վարկանիշում Տաշիր ընկերությունը զբաղեցրել էր 2-րդ հորիզոնականը 1.73 մլրդ ԱՄՆ դոլար շրջանառությամբ: Ինչպես մանրամասնել էին ամսագրի հեղինակները, վարկանիշային աղյուսակը կազմվել է հիմնվելով ընկերությունների տրամադրած տվյալների, վերլուծաբանների գնահատականների, ինչպես նաև սեփական հետազոտությունների վրա:
Ինչպես տեղեկացնում է constructiondigital.com կայքը, Վլադիվոստոկ կատարած պաշտոնական այցի ժամանակ Ռուսաստանի նախագահ Դմիտրի Մեդվեդևը մտավախություն է հայտնել, որ 2012թ-ի Ասիա-խաղաղօվկիանոսյան տնտեսական համագործակցության (APEC) գագաթնաժողովի անցկացման նպատակով կառուցվող շինությունները պատրաստ չեն լինի նախատեսված ժամկետներում: Պետք է նշել, որ վերոնշյալ գագաթնաժողովն առաջինն է այն միջազգային իրադարձություններից, որ առաջիկա տասնամյակում անց կկացվի Ռուսաստանում: Երկիրը կհյուրընկալի նաև 2014թ-ի ձմեռային օլիմպիական խաղերը, 2015թ-ի Ֆորմուլա 1 ավտոմրցաշարը, նույն տարում հոկեյի աշխարհի առաջնությունը և 2018թ-ի ֆուտբոլի աշխարհի առաջնությունը: Վլադիվոստոկում և Ռուսական կղզում իրականացվող շինարարական աշխատանքների համար պետական բյուջեից հատկացվել է ավելի քան 23.8 մլրդ ԱՄՆ դոլար: Նշենք, որ 150 ամյա Վլադիվոստոկում ապրում է մոտ 616 740 մարդ: Մեկ այլ ինտերնետային աղբյուր komerssant.ru–ն նշում է, որ նախագահի Վլադիվոստոկ կատարած այցի ժամանակ պարզվել է, որ գագաթնաժողովի անցկացման համար կղզում նախատեսված 5-աստղանի հյուրանոցների միայն 20 տոկոսն է պատրաստ: Ի դեպ, կարևորագույն միջազգային միջոցառմանը մնացել 1 տարուց մի քիչ ավել, իսկ այդ 20 տոկոսն իրենցից ներկայացնում են մի քանի բետոնե կմախքներ: Պետական պաշտոնյաների հետ հանդիպման ժամանակ նախագահ Մեդվեդևը հրամայել է, այլընտրանքային տարբերակ մշակել, այն դեպքում, եթե հանկարծ կախովի կամուրջը ժամանակին պատրաստ չլինի: Մեկ տարի նախատեսված ժամկետից ետ է մնում նաև մեկ այլ կամուրջի շինարարությունը, Ոսկե Եղջյուր ծովախորշի վրայով: Արդյունքում կղզում իրականացված է ընդհանուր շինարարական աշխատանքների միայն 53.7 տոկոսը: Կառուցվող 96 շինություններից միայն 6-ն է հանձնվել շահագործման, 69 կառույցներում դեռ շարունակվում են շինարարական աշխատանքները, 13-ը դեռ նախագծման փուլում են, իսկ 6 կառույց անգամ չեն էլ սկսել նախագծել: Պաշտոնական տվյալներով շինարարական աշխատանքներում ներառված են 26.5 հազար մարդ, որոնցից 11 հազարը օտարերկրացիներ են, գրում է komersant.ru-ն: Վլադիվոստոկում կայացած հանդիպումը նախագահ Մեդվեդևն այսպես է եզրափակել. «Ինչքան ցանկանաք կարող եք փոփոխել շինարարության վերջնաժամկետները: Սակայն գագաթնաժողովը կբացվի 2012 թ-ի սեպտեմբերի 1-ին և այդ ամսաթիվն անհնար է փոփոխել»: Ռուսաստանը դարձել է 2012 թ-ի Ասիա-խաղաղօվկիանոսյան տնտեսական համագործակցության գագաթնաժողովը հյուրընկալող երկիր 2007 թ-ին Սիդնեյում կայացած հերթական ամենամյա հանդիպման ժամանակ: Նման քայլով Ռուսաստանի նախկին նախագահ, ներկայիս վարչապետ Վլադիմիր Պուտինը ձգտում էր բարձրացնել Ռուսաստանի դերը ասիական երկրների շրջանում: Ի դեպ, նախորդ տարի Չինաստանը դարձել է Ռուսաստանի գլխավոր առևտրային գործընկերը, և նրանց միջև ապրանքաշրջանառությունն ավելացել է 50 տոկոսով՝ կազմելով 59 մլրդ ԱՄՆ դոլար:
Անշարժ գույքի շուկայի վերլուծաբանները պնդում են՝ ապրիլին Մոսկվայի կենտրոնում բնակարանի քառակուսի մետրի գինը հասել է կես միլիոն ռուբլու ($18,000): Ինչպես տեղեկացնում է Regnum գործակալությունը, A-Reality Group ընկերության վերլուծական կենտրոնի տվյալններով ապրիլին Մոսկվայի կենտրոնում բնակարանների քառակուսի մետրի միջին գինը հասել է 412 հազար ռուբլու ($14,800): Ինչ վերաբերում է թանկարժեք վաճառվող բնակարանների միջին արժեքին, ապա այն արդեն կազմում է 56 մլն ռուբլի (մոտ $2,000,000): Քաղաքի կենտրոնական շրջանում վերջին տվյալներով վաճառքի է հանված 2.6 հազար բնակարան: Համաձայն ընկերության ներկայացրած տվյալների՝ Մոսկվայի կենտրոնում գտնվող «էկոնոմ» դասի բնակարանների քառակուսի մետրի գինը կազմում է միջինը 197 հազար ռուբլի ($7,000), «բիզնես» կարգի բնակարանների գինը՝ 258 հազար ռուբլի ($9,250), իսկ էլիտար բնակարաններինը՝ 475 հազար ռուբլի ($17,000): Մեկ սենյականոց բնակարանները վաճառվում են միջինը 7.7 մլն ռուբլով ($280,000), մակերեսը՝ 34.4 քառակուսի մետր: Երկսենյականոց բնակարաններ կենտրոնում կարելի է ձեռք բերել 13.4 մլն ռուբլով ($480,000), տարածքը՝ 54 քառակուսի մետր: Իսկ ինչ վերաբերում է երեք սենյականոցներին, ապա վերջիններիս գինը կազմում է 18.8 մլն ռուբլի ($670,000), իսկ մակերեսը՝ 76 քառակուսի մետր: Ընկերության կատարած վերլուծության «ամենա» անվանակարգում ներկայացվել են ամենաէժան և ամենաթանկ բնակարանները: Ապրիլին Մոսկվայի կենտրոնում վաճառվող ամենաէժանը բնակարանի գինը կազմում է 5.4 մլն ռուբլի ($193,500), իսկ ամենաթանկինը՝ 923մլն ռուբլի ($33,000,000): Ինչ վերաբերում է նորակառույց բնակարաններին, ապա վաճառվում է կառուցվածների մոտ 30%-ը՝ քառակուսի մետրը միջինը 714 հազար ռուբլով ($25,550): Ապրիլին Մոսկվայի կենտրոնում վաճառվող ամենաթանկ էլիտար բնակարանի քառակուսի մետրի գինը կազմում է 1 մլն 112 հազար ռուբլի ($39,800):
